Handhaaf lojaliteit met ’n verenigde hart

“Ek sal in u waarheid wandel. Verenig my hart om u naam te vrees.”—PS. 86:11.

1, 2. (a) Wat sal ons volgens Psalm 86:2, 11 help om ondanks toetse of versoekings aan Jehovah getrou te bly? (b) Wanneer moet hartgrondige lojaliteit aangekweek word?

WAAROM swig party Christene wat jare lank ondanks gevangenskap of vervolging getrou gebly het, later voor materialisme? Die antwoord hou verband met ons figuurlike hart—wat ons werklik innerlik is. Die 86ste Psalm verbind lojaliteit met ’n verenigde hart; dit wil sê ’n volkome hart, een wat nie verdeeld is nie. “Bewaar tog my siel, want ek is lojaal”, het die psalmis Dawid gebid. “U is my God—red u kneg wat op u vertrou.” Dawid het ook gebid: “Onderrig my, o Jehovah, aangaande u weg. Ek sal in u waarheid wandel. Verenig my hart om u naam te vrees.”—Ps. 86:2, 11.

² As ons nie met ons hele hart op Jehovah vertrou nie, sal ander belange en liefdes ons lojaliteit teenoor die ware God ondermyn. Selfsugtige begeertes is soos landmyne wat versteek is onder die pad waarop ons loop. Al het ons dalk onder beproewende omstandighede aan Jehovah getrou gebly, kan ons die slagoffer word van sataniese strikke. Hoe noodsaaklik is dit tog dat ons nóú, voordat toetse of versoekings oor ons kom, hartgrondige lojaliteit teenoor Jehovah aankweek! “Bewaak jou hart meer as enigiets anders wat bewaar moet word”, sê die Bybel (Spr. 4:23). In hierdie opsig kan ons waardevolle lesse leer uit die ondervinding van ’n profeet van Juda wat deur Jehovah na koning Jerobeam van Israel gestuur is.

“Laat ek jou ’n geskenk gee”

3. Hoe het Jerobeam gereageer op die oordeelsboodskap wat God se profeet oorgedra het?

³ Stel jou die toneel voor. Die man van God het so pas ’n snydende boodskap oorgedra aan koning Jerobeam, wat kalfaanbidding in die noordelike tienstammeryk van Israel ingestel het. Die koning is woedend. Hy beveel sy manne om die boodskapper te gryp. Maar Jehovah is met sy kneg. Die hand wat die koning in woede uitgesteek het, verdor onmiddellik op wonderdadige wyse, en die altaar wat vir valse aanbidding gebruik is, word uitmekaar geskeur. Skielik verander Jerobeam se houding. Hy smeek die man van God: “Versag asseblief die aangesig van Jehovah jou God en bid vir my dat my hand vir my herstel word.” Die profeet bid, en die koning se hand word genees.—1 Kon. 13:1-6.

4. (a) Waarom was die koning se aanbod in werklikheid ’n toets van die profeet se lojaliteit? (b) Wat was die profeet se antwoord?

⁴ Dan sê Jerobeam vir die man van die ware God: “Kom tog saam met my huis toe en neem versterking, en laat ek jou ’n geskenk gee” (1 Kon. 13:7). Wat moet die profeet nou doen? Moet hy die koning se gasvryheid aanvaar nadat hy ’n oordeelsboodskap aan hom oorgedra het? (Ps. 119:113). Of moet hy die koning se uitnodiging van die hand wys, selfs al lyk dit of die koning berou het? Jerobeam het beslis die middele om sy vriende met duur geskenke te oorlaai. As God se profeet heimlik enige begeerte na materiële dinge gekoester het, sal die koning se aanbod waarskynlik ’n groot versoeking wees. Maar Jehovah het die profeet beveel: “Jy mag geen brood eet of water drink nie, en jy mag nie terugkeer met die pad waarmee jy gegaan het nie.” Die profeet antwoord dus ferm: “Al sou u my die helfte van u huis gee, sou ek nie saam met u kom en brood eet of water drink in hierdie plek nie.” En die profeet verlaat Bet-El met ’n ander pad (1 Kon. 13:8-10). Wat leer die profeet se besluit ons omtrent hartgrondige lojaliteit?—Rom. 15:4.

‘Wees tevrede’

5. Waarom het materialisme met lojaliteit te doen?

⁵ Dit lyk miskien nie of materialisme enigiets met lojaliteit te doen het nie, maar dit het wel. Vertrou ons op Jehovah se belofte om te voorsien wat ons werklik nodig het? (Matt. 6:33; Heb. 13:5). Kan ons sonder party van die “beter” dinge in die lewe wat op die oomblik buite ons bereik is, klaarkom eerder as om dit ten alle koste te probeer verkry? (Lees Filippense 4:11-13.) Oorweeg ons dit om teokratiese voorregte op te offer om te kry wat ons nou wil hê? Kom lojale diens aan Jehovah eerste in ons lewe? Ons antwoorde sal grootliks daarvan afhang of ons God heelhartig dien of nie. “Dit is . . . ’n middel tot groot gewin”, het die apostel Paulus geskryf, “hierdie godvrugtige toegewydheid tesame met vergenoegdheid. Want ons het niks in die wêreld ingebring nie, en ook kan ons niks uitdra nie. As ons dan voedsel, klere en onderdak het, sal ons met hierdie dinge tevrede wees.”—1 Tim. 6:6-8.

6. Watter “geskenke” word ons miskien aangebied, en wat sal ons help om te besluit of ons dit moet aanvaar?

⁶ Byvoorbeeld, ons werkgewer bied moontlik vir ons ’n bevordering met ’n beter salaris en ander voordele aan. Of ons besef dalk dat ons groter finansiële voordele kan verkry as ons na ’n ander land of gebied verhuis om werk te vind. Aanvanklik lyk sulke geleenthede miskien na ’n seën van Jehovah. Maar moet ons nie ons beweegredes ondersoek voordat ons daarop reageer nie? Ons eerste prioriteit moet wees: “Watter uitwerking sal my besluit op my verhouding met Jehovah hê?”

7. Waarom is dit belangrik om materialistiese begeertes uit te roei?

⁷ Satan se stelsel bevorder materialisme voortdurend. (Lees 1 Johannes 2:15, 16.) Die Duiwel se oogmerk is om ons hart te verderf. Ons moet dus waaksaam bly om materialistiese begeertes in ons hart te identifiseer en uit te roei (Op. 3:15-17). Dit was glad nie vir Jesus moeilik om Satan se aanbod van al die koninkryke van die wêreld te verwerp nie (Matt. 4:8-10). Hy het gewaarsku: “Hou julle oë oop en waak teen elke soort hebsug, want selfs wanneer iemand oorvloed het, spruit sy lewe nie voort uit die dinge wat hy besit nie” (Luk. 12:15). Lojaliteit sal ons help om op Jehovah te vertrou en nie op onsself nie.

’n Ou profeet “het hom bedrieg”

8. Hoe is die lojaliteit van God se profeet op die proef gestel?

⁸ Alles sou goed verloop het vir God se profeet as hy sy reis huis toe voortgesit het. Maar hy het byna onmiddellik voor nog ’n toets te staan gekom. “’n Sekere ou profeet het in Bet-El gewoon”, sê die Bybel, “en sy seuns het toe ingekom en hom vertel” wat alles vroeër die dag gebeur het. Toe die ou man dit hoor, vra hy hulle om vir hom ’n esel op te saal sodat hy God se profeet kan inhaal. Nie lank daarna nie vind hy die profeet waar hy onder ’n groot boom rus en sê hy: “Gaan saam met my huis toe en eet brood.” Toe die man van die ware God die uitnodiging van die hand wys, antwoord die ou man: “Ek is ook ’n profeet soos jy, en ’n engel het deur die woord van Jehovah met my gepraat en gesê: ‘Laat hom saam met jou terugkom na jou huis sodat hy brood kan eet en water kan drink.’” Maar die Skrif sê: “Hy het hom bedrieg.”—1 Kon. 13:11-18.

9. Wat sê die Skrif oor bedrieglike mense, en wie word deur hulle benadeel?

⁹ Wat ook al die ou profeet se beweegrede was, hy het gelieg. Miskien was die ou man eens op ’n tyd ’n getroue profeet van Jehovah. Maar nou het hy bedrieglik opgetree. Die Skrif veroordeel sulke gedrag ten sterkste. (Lees Spreuke 3:32.) Bedrieglike mense skaad nie net hulleself geestelik nie, maar benadeel dikwels ook ander.

‘Hy het saam met die ou man teruggegaan’

10. Hoe het God se profeet op die ou man se uitnodiging gereageer, en wat was die uiteinde?

¹⁰ Die profeet van Juda moes eintlik deur die ou profeet se bedrog gesien het. Hy kon hom afgevra het: ‘Waarom sal Jehovah ’n engel na iemand anders stuur met nuwe instruksies vir my?’ Die profeet kon Jehovah vir duidelikheid hieroor gevra het, maar die Skrif dui nie aan dat hy dit gedoen het nie. Hy het eerder “saam met [die ou man] teruggegaan om in sy huis brood te eet en water te drink”. Dit het Jehovah mishaag. Toe die misleide profeet uiteindelik weer op pad was na Juda, het ’n leeu hom gekry en hom doodgemaak. Wat ’n tragiese einde aan sy loopbaan as profeet!—1 Kon. 13:19-25.a

11. Watter goeie voorbeeld het Ahia gestel?

¹¹ In teenstelling hiermee het die profeet Ahia, wat gestuur is om Jerobeam as koning te salf, tot op sy oudag getrou gebly. Toe Ahia oud en blind was, het Jerobeam sy vrou gestuur om Ahia te raadpleeg oor die welsyn van hulle siek seun. Ahia het moedig voorspel dat Jerobeam se seun sou sterf (1 Kon. 14:1-18). Een van die baie seëninge wat Ahia ontvang het, was die voorreg om ’n bydrae tot God se geïnspireerde Woord te lewer. Hoe? Sy geskrifte is later deur die priester Esra as bronnemateriaal gebruik.—2 Kron. 9:29.

12-14. (a) Watter les kan ons uit die voorval met betrekking tot die jonger profeet leer? (b) Lig toe waarom Bybelse raad wat deur ouer manne gegee word, noukeurig en biddend oorweeg moet word.

¹² Die Bybel sê nie waarom die jonger profeet Jehovah nie geraadpleeg het voordat hy afgedraai en saam met die ou man gaan eet en drink het nie. Is dit dalk omdat die ou man vir hom gesê het wat hy wou hoor? Wat kan ons hieruit leer? Ons moet absoluut oortuig wees van die regverdigheid van Jehovah se vereistes. En ons moet vasbeslote wees om dit na te kom, ongeag wat gebeur.

¹³ Party hoor net wat hulle wil hoor wanneer dit by raad kom. Byvoorbeeld, ’n verkondiger word dalk ’n betrekking aangebied wat inbreuk kan maak op die tyd wat hy saam met sy gesin of aan teokratiese bedrywighede kan bestee. Hy vra miskien ’n ouer man vir raad. Die ouer man begin dalk deur te erken dat hy nie in ’n posisie is om vir die broer te sê hoe om vir sy gesin te sorg nie. Dan bespreek die ouer man moontlik die geestelike gevare wat dit kan inhou as hy die werksaanbod aanvaar. Sal die broer net die ouer man se eerste woorde onthou, of sal hy ernstig nadink oor wat hy daarna gesê het? Die broer moet uiteraard besluit wat vir hom geestelik die beste is.

¹⁴ Beskou nog ’n moontlike situasie. ’n Suster vra ’n ouer man dalk of sy haar ongelowige man moet verlaat. Die ouer man sal ongetwyfeld verduidelik dat die besluit of sy hom moet verlaat of nie, by haar berus. Dan sal hy moontlik die Bybel se raad oor die onderwerp hersien (1 Kor. 7:10-16). Sal die suster noukeurig nadink oor wat die ouer man sê? Of het sy haar reeds voorgeneem om haar man te verlaat? Voordat sy besluit, sal dit verstandig wees om Bybelse raad biddend te oorweeg.

Wees beskeie

15. Wat leer ons uit die fout van God se profeet?

¹⁵ Wat anders kan ons leer uit die fout wat die profeet van Juda begaan het? Spreuke 3:5 sê: “Vertrou op Jehovah met jou hele hart en moenie op jou eie begrip steun nie.” In plaas van steeds op Jehovah staat te maak soos hy in die verlede gedoen het, het die profeet van Juda by hierdie geleentheid op sy eie oordeel vertrou. Sy fout het hom sy lewe en sy goeie naam by God gekos. Hoe kragtig beklemtoon sy ondervinding tog die belangrikheid daarvan om Jehovah beskeie en lojaal te dien!

16, 17. Wat sal ons help om lojaal aan Jehovah te bly?

¹⁶ Die selfsugtige neiging van ons hart kan ons maklik mislei. “Die hart is verraderliker as enigiets anders en is desperaat” (Jer. 17:9). As ons lojaal aan Jehovah wil bly, moet ons ons voortdurend inspan om die ou persoonlikheid met sy neiging tot vermetelheid en selfversekerdheid af te lê. En ons moet ons met die nuwe persoonlikheid beklee, “wat na God se wil in ware regverdigheid en lojaliteit geskep is”.—Lees Efesiërs 4:22-24.

¹⁷ “Wysheid is by die beskeidenes”, sê Spreuke 11:2. As ons beskeie is en op Jehovah staatmaak, help dit ons om duur foute te vermy. Byvoorbeeld, as ons mismoedig is, kan dit ons oordeel maklik vertroebel (Spr. 24:10). Ons raak dalk moeg vir die een of ander aspek van heilige diens en begin voel dat ons oor die jare genoeg gedoen het en dat dit miskien tyd is vir ander om die vrag te dra. Of ons wil dalk ’n “normaler” lewe lei. Maar as ons ‘ons kragtig inspan’ en “altyd baie het om in die werk van die Here te doen”, sal dit ons hart bewaak.—Luk. 13:24; 1 Kor. 15:58.

18. Wat kan ons doen as ons nie weet watter besluit om te neem nie?

¹⁸ Ons moet soms moeilike besluite neem, en dit is miskien nie dadelik duidelik wat die regte ding is om te doen nie. Sal ons dan in die versoeking kom om dinge op ons eie manier te doen? Wanneer ons ons in sulke situasies bevind, sal dit verstandig wees om Jehovah te vra om ons te help. “As een van julle dan wysheid kortkom”, sê Jakobus 1:5, “laat hom aanhou om God te vra, want hy gee [mildelik] aan almal.” Ons hemelse Vader sal vir ons die nodige heilige gees gee om goeie besluite te neem.—Lees Lukas 11:9, 13.

Wees vasbeslote om lojaal te bly

19, 20. Wat moet ons vasbeslote wees om te doen?

¹⁹ Die onstuimige jare nadat Salomo van ware aanbidding afgewyk het, het die lojaliteit van God se knegte swaar beproef. Baie het wel hulle lojaliteit op die een of ander wyse prysgegee. Nietemin het party lojaal aan Jehovah gebly.

²⁰ Ons kom elke dag voor keuses en besluite te staan wat ons lojaliteit op die proef stel. Ons kan ook getrou bly. Laat ons altyd lojaal aan Jehovah bly terwyl ons ons hart verenig, in die volle vertroue dat hy sal voortgaan om sy lojales te seën.—2 Sam. 22:26.

[Voetnoot]

Hoe sal jy antwoord?

• Waarom moet ons ons inspan om materialistiese begeertes in ons hart uit te roei?

• Wat sal ons help om lojaal aan Jehovah te bly?

• Hoe kan beskeidenheid ons help om lojaal aan God te bly?

[Prente op bladsy 9]

Is dit vir jou moeilik om versoekings te weerstaan?

[Prente op bladsy 10]

Sal jy Bybelse raad biddend oorweeg?