Eer Jehovah deur waardigheid aan die dag te lê
“[Jehovah se] dade is waardigheid en prag.”—PS. 111:3.
1, 2. (a) Hoe sal jy “waardigheid” omskryf? (b) Watter vrae gaan in hierdie artikel bespreek word?
TOE die tienjarige Madison gevra is wat die woord “waardigheid” beteken, het sy onmiddellik geantwoord: “Dis om mooi aangetrek te wees.” Wat hierdie dogtertjie dalk nie geweet het nie, is dat die Bybel sê dat God ‘met waardigheid beklee is’ (Ps. 104:1). Vir mense kan waardigheid soms beteken om goed geklee te wees. Die apostel Paulus wou byvoorbeeld hê dat Christenvroue “hulle met goed versorgde kleredrag moet versier, met beskeidenheid en gesonde verstand, nie met haarvlegtery en goud of pêrels of baie duur klere nie” (1 Tim. 2:9). Maar waardige gedrag wat Jehovah se “waardigheid en prag” tot eer strek, behels meer as dit.—Ps. 111:3.
2 In die Bybel kan die Hebreeuse woord vir “waardigheid” ook vertaal word met “prag”, “majesteit”, “heerlikheid” en “eer”. Een woordeboek omskryf “waardigheid” as “die eienskap of toestand van waardig te wees, geëer of hooggeag te word”. En niemand verdien groter eer en agting as Jehovah nie. As sy toegewyde knegte moet ons dus waardigheid in woord en daad aan die dag lê. Maar waarom kan mense met waardigheid optree? Hoe word Jehovah se waardigheid en prag geopenbaar? Watter uitwerking moet God se waardigheid op ons hê? Wat kan Jesus Christus ons leer oor hoe om hierdie eienskap te betoon? En hoe kan ons godvrugtige waardigheid aan die dag lê?
Waarom ons met waardigheid kan optree
3, 4. (a) Hoe moet ons reageer op die waardigheid wat aan ons verleen word? (b) Na wie wys Psalm 8:5-9 profeties? (Sien voetnoot.) (c) Aan wie het Jehovah in die verlede waardigheid verleen?
3 Omdat alle mense na God se beeld gemaak is, het hulle die vermoë om met waardigheid op te tree. Jehovah het waardigheid aan die eerste man verleen deur hom as oppasser van die aarde aan te stel (Gen. 1:26, 27). Selfs nadat die mens volmaaktheid verloor het, het Jehovah die mens se verantwoordelikheid met betrekking tot die aarde herhaal. God ‘kroon’ mense dus nog steeds met waardigheid. (Lees Psalm 8:5-9.)a Die waardigheid wat aan ons verleen word, vereis ’n waardige reaksie—dat ons Jehovah se majestueuse naam met eerbied en waardigheid loof.
4 Jehovah verleen veral aan dié wat heilige diens aan hom verrig, ’n mate van waardigheid. God het waardigheid aan Abel verleen deur sy offerande te aanvaar, terwyl Hy sy broer Kain s’n verwerp het (Gen. 4:4, 5). Moses is beveel om ‘van sy waardigheid te lê’ op Josua, die man wat hom as leier van die Israeliete sou opvolg (Num. 27:20). Aangaande Dawid se seun Salomo sê die Bybel: “Jehovah het aangehou om Salomo uitermate groot te maak voor die oë van die hele Israel en om aan hom ’n koninklike waardigheid te verleen soos geen koning oor Israel voor hom gehad het nie” (1 Kron. 29:25). God sal buitengewone waardigheid verleen aan verrese gesalfde Christene, wat “die heerlikheid van die prag van sy koningskap” getrou verkondig het (Ps. 145:11-13). Ook die toenemende menigte van Jesus se “ander skape” het ’n geseënde en waardige rol omdat hulle Jehovah op dié wyse verheerlik.—Joh. 10:16.
Jehovah se waardigheid en prag word geopenbaar
5. Hoe groot is Jehovah se waardigheid?
5 In ’n lied wat God se grootheid met die mens se nietigheid vergelyk, het die psalmis Dawid gesing: “O Jehovah ons Here, hoe majestueus is u naam tog op die ganse aarde, u wie se waardigheid bo die hemele bekend gemaak word!” (Ps. 8:1). Van voor die skepping van “die hemel en die aarde” af tot ná die glorieryke vervulling van God se voorneme om die aarde ’n paradys te maak en die mensdom tot volmaaktheid te verhef—van ewigheid tot ewigheid—is Jehovah God die mees majestueuse en waardige Persoon in die heelal.—Gen. 1:1; 1 Kor. 15:24-28; Op. 21:1-5.
6. Waarom het die psalmis gesê dat Jehovah met waardigheid beklee is?
6 Hoe moes dit die godvresende psalmis tog geraak het toe hy die stille grootsheid van die sterrehemel, vol skitterende “juwele”, aanskou het! Vervul met verwondering oor hoe God ‘die hemel uitgespan het soos ’n tentdoek’, het die psalmis Jehovah uitgebeeld as iemand wat met waardigheid beklee is weens Sy luisterryke skeppingsvermoë. (Lees Psalm 104:1, 2.) Die waardigheid en prag van die onsigbare, almagtige Skepper is duidelik in sy sigbare werke.
7, 8. Watter bewys van Jehovah se waardigheid en prag sien ons in die hemele?
7 Neem byvoorbeeld die Melkwegstelsel. In hierdie uitgestrekte oseaan van sterre, planete en sonnestelsels lyk die planeet Aarde so piepklein soos een sandkorreltjie op ’n eindelose strand. Hierdie sterrestelsel alleen bevat meer as 100 miljard sterre! As jy 24 uur per dag, sonder ophou, elke sekonde een ster kon tel, sou dit jou meer as 3 000 jaar neem om 100 miljard te bereik.
8 As die Melkwegstelsel alleen 100 miljard sterre bevat, wat dan van die res van die heelal? Sterrekundiges skat dat die Melkweg maar net een van sowat 50 miljard tot 125 miljard sterrestelsels is. Hoeveel sterre is daar in die ganse heelal? Die antwoord is sekerlik verbysterend. Tog “bepaal [Jehovah] die getal van die sterre; hy noem hulle almal by hulle name” (Ps. 147:4). Beweeg dit jou nie om Jehovah se groot naam te verheerlik wanneer jy sien dat hy met soveel waardigheid en prag beklee is nie?
9, 10. Hoe verheerlik die voorsiening van brood ons Skepper se wysheid?
9 Kom ons beweeg nou weg van die majestueuse hemele en kyk na iets so algemeen soos brood. Jehovah is nie net “die Maker van hemel en aarde” nie, maar hy is ook “die Een wat brood gee aan dié wat honger is” (Ps. 146:6, 7). God se “waardigheid en prag” word weerspieël in sy groot werke, met inbegrip van sy voorsiening van plante waarvan brood gemaak word. (Lees Psalm 111:1-5.) Jesus het sy volgelinge leer bid: “Gee ons vandag ons brood vir hierdie dag” (Matt. 6:11). Brood was ’n stapelvoedsel vir baie volke van die ou tyd, insluitende die Israeliete. Hoewel brood as ’n eenvoudige kossoort beskou word, is die chemiese proses wat ’n paar basiese bestanddele in heerlike brood verander, allesbehalwe eenvoudig.
10 Toe die Bybel geskryf is, het die Israeliete koring- of garsmeel en water gebruik om brood te maak. Suurdeeg, of gis, is soms in die broodmaakproses gebruik. Hierdie eenvoudige bestanddele vorm saam ’n verstommende aantal chemiese samestellings wat aktief met mekaar verbind. Die presiese werking tussen hierdie samestellings word nie ten volle verstaan nie. Verder is die manier waarop brood deur die liggaam verteer word, nog ’n verstommend ingewikkelde proses. Geen wonder dat die psalmis gesing het nie: “Hoe talryk is u werke, o Jehovah! U het hulle almal in wysheid gemaak”! (Ps. 104:24). Word jy ook beweeg om Jehovah te loof?
Watter uitwerking het God se waardigheid en prag op jou?
11, 12. Watter uitwerking kan nadenke oor God se skeppingswerke op ons hê?
11 Ons hoef nie sterrekundiges te wees om ons oor die naghemel te verwonder of chemici te wees om brood te geniet nie. Maar om die prag van ons Skepper te waardeer, moet ons tyd neem om na te dink oor die werke van sy hande. Wat kan sulke bepeinsing vir ons doen? Dit het dieselfde uitwerking as bepeinsing oor werke van ’n ander aard wat Jehovah verrig het.
12 Aangaande die groot dade wat Jehovah ten behoewe van Sy volk verrig het, het Dawid gesing: “Die glorieryke prag van u waardigheid en die aangeleenthede van u wonderlike werke sal ek oordink” (Ps. 145:5). Ons oordink hierdie werke deur die Bybel te bestudeer en tyd te neem om te peins oor wat ons daarin lees. Watter uitwerking het sulke nadenke? Ons waardering vir God se waardigheid en prag neem toe. Dit sal ons ongetwyfeld beweeg om Jehovah soos Dawid te eer en te sê: “Wat u grootheid betref, ek sal dit bekend maak” (Ps. 145:6). Bepeinsing oor God se wonderlike werke behoort ons verhouding met Jehovah te versterk en ons te beweeg om ander met geesdrif en vasbeslotenheid van hom te vertel. Neem jy ywerig daaraan deel om die goeie nuus te verkondig en mense te help om die waardigheid, prag en majesteit van Jehovah God te waardeer?
Jesus weerspieël God se waardigheid op volmaakte wyse
13. (a) Wat het Jehovah volgens Daniël 7:13, 14 aan sy Seun verleen? (b) Hoe behandel Jesus as Koning sy onderdane?
13 God se Seun, Jesus Christus, het die goeie nuus ywerig verkondig en sy waardige en majestueuse hemelse Vader geëer. Jehovah het spesiale waardigheid aan sy enigverwekte Seun verleen deur aan hom ‘heerskappy en ’n koninkryk’ te gee. (Lees Daniël 7:13, 14.) Tog is Jesus nie hoogmoedig of afsydig nie. Inteendeel, hy is ’n medelydende Heerser wat die beperkings van sy onderdane verstaan en aan hulle ’n mate van waardigheid verleen. Beskou een voorbeeld van hoe Jesus as die aangewese Koning die mense behandel het wat hy teëgekom het, veral die verstotelinge en dié wat skynbaar onbeminlik was.
14. Hoe is melaatses in eertydse Israel beskou?
14 Mense wat in die ou tyd aan melaatsheid gely het, het dikwels ’n hartverskeurend stadige dood gesterf. Die slagoffer se liggaamsdele is geleidelik aangetas. Daar is gemeen dat dit net so moeilik is om ’n melaatse te genees as om iemand uit die dood op te wek (Num. 12:12; 2 Kon. 5:7, 14). Melaatses is onrein verklaar en is verafsku en uit die samelewing verban. Wanneer hulle naby mense gekom het, moes hulle die waarskuwing uitroep: “Onrein, onrein!” (Lev. 13:43-46). ’n Melaatse was soos iemand wat dood is. Rabbynse verslae meld dat ’n melaatse nie nader as sowat een en ’n half meter van enigiemand af mag gekom het nie. Na bewering het ’n sekere godsdiensleier, wanneer hy ’n melaatse selfs net op ’n afstand gesien het, klippe gegooi om hom ver weg te hou.
15. Hoe het Jesus ’n sekere melaatse behandel?
15 Maar Jesus se reaksie teenoor ’n melaatse wat na hom toe gekom en gesmeek het om genees te word, is opmerkenswaardig. (Lees Markus 1:40-42.) Jesus het die melaatse nie weggestuur nie, maar het die verstote man op ’n medelydende en waardige wyse behandel. Wat Jesus gesien het, was ’n bejammerenswaardige mens wat verligting nodig gehad het. Met ’n hart vol deernis het Jesus sy gevoelens van medelye onmiddellik in dade omgesit. Hy het sy hand uitgesteek, die melaatse aangeraak en hom genees.
16. Watter les het jy geleer uit die manier waarop Jesus ander behandel het?
16 Hoe kan ons, as volgelinge van Jesus, die wyse navolg waarop Jesus sy Vader se waardigheid weerspieël het? Een manier is deur te besef dat alle mense—ongeag hulle status, gesondheid of ouderdom—gepaste eer en respek verdien (1 Pet. 2:17). Veral persone wat ’n posisie van toesig het, soos getroude mans, ouers en Christen- ouer manne, moet waardigheid verleen aan diegene onder hulle sorg en hulle help om hulle selfrespek te behou. Die Bybel beklemtoon dat hierdie vereiste vir alle Christene geld en sê: “In broederliefde moet julle tere geneentheid vir mekaar hê. Neem die leiding in eerbetoning aan mekaar.”—Rom. 12:10.
Lê waardigheid aan die dag in aanbidding
17. Wat kan ons uit die Skrif leer oor die feit dat ons waardigheid aan die dag moet lê wanneer ons Jehovah in aanbidding nader?
17 Ons moet spesiale aandag daaraan skenk om waardigheid aan die dag te lê wanneer ons Jehovah in aanbidding nader. “Gee ag op jou voete wanneer jy na die huis van die ware God gaan”, sê Prediker 5:1. Moses sowel as Josua is beveel om hulle sandale uit te trek toe hulle op ’n heilige plek was (Eks. 3:5; Jos. 5:15). Hulle moes dit doen as ’n blyk van respek of eerbied. Israelitiese priesters was verplig om linnebroeke te dra “om die naakte vlees te bedek” (Eks. 28:42, 43). Dit het onwelvoeglike ontbloting voorkom wanneer hulle by die altaar gedien het. Elke lid van ’n priester se gesin moes die goddelike standaard van waardigheid handhaaf.
18. Hoe lê ons waardigheid aan die dag in ons aanbidding van Jehovah?
18 Waardigheid in aanbidding behels dus eer en respek. As ons eer en respek waardig wil wees, moet ons met respek optree. Die waardigheid wat ons aan die dag lê, moet nie net vir die skyn of bloot ’n identifiserende kleed wees nie. Dit moet verder strek as wat menseoë kan sien, tot wat God sien—ons hart (1 Sam. 16:7; Spr. 21:2). Waardigheid moet deel van ons word en ’n invloed hê op ons gedrag, ons gesindheid, ons verhouding met ander, selfs die manier waarop ons onsself beskou en oor onsself voel. Ja, waardigheid moet te alle tye en in alles wat ons sê en doen, gesien kan word. Wanneer dit kom by ons gedrag, houding, kleredrag en persoonsversorging, neem ons die woorde van die apostel Paulus ter harte: “In geen opsig gee ons enige rede tot struikeling nie, sodat daar nie met ons bediening foutgevind sal word nie; maar in elke opsig beveel ons ons as God se bedienaars aan” (2 Kor. 6:3, 4). Ons “[versier] die leer van ons Redder, God, in alles”.—Tit. 2:10.
Hou aan om godvrugtige waardigheid aan die dag te lê
19, 20. (a) Wat is ’n goeie manier waarop ons waardigheid aan ander kan verleen? (b) Wat moet ons vasbeslote wees om te doen met betrekking tot waardigheid?
19 Gesalfde Christene, wat “ambassadeurs [is] wat as plaasvervangers vir Christus optree”, lê waardigheid aan die dag (2 Kor. 5:20). Die “ander skape”, wat hulle lojaal ondersteun, is waardige gesante vir die Messiaanse Koninkryk. ’n Ambassadeur of ’n gesant spreek met vrymoedigheid en waardigheid namens sy regering. Daarom moet ons met waardigheid en vrymoedigheid spreek ter ondersteuning van God se regering, die Koninkryk (Ef. 6:19, 20). En verleen ons nie waardigheid aan ander wanneer ons “goeie nuus van iets beters” aan hulle bring nie?—Jes. 52:7.
20 Ons moet vasbeslote wees om God te verheerlik deur ons ooreenkomstig sy waardigheid te gedra (1 Pet. 2:12). Laat ons altyd diepe respek vir hom, vir sy aanbidding en vir ons medeaanbidders toon. En mag Jehovah, wat homself met waardigheid en prag beklee het, behae skep in die waardige wyse waarop ons hom aanbid.
[Voetnoot]
a Dawid se woorde in die 8ste Psalm wys ook profeties na die volmaakte man Jesus Christus.—Heb. 2:5-9.
Hoe sal jy antwoord?
• Watter uitwerking moet waardering vir die prag van Jehovah se waardigheid op ons hê?
• Wat kan ons oor waardigheid leer uit die manier waarop Jesus ’n sekere melaatse behandel het?
• Hoe kan ons Jehovah op waardige maniere eer?
[Prent op bladsy 12]
Hoe het Jehovah waardigheid aan Abel verleen?
[Prent op bladsy 14]
Jehovah se groot werke kan selfs in die voorsiening van brood gesien word
[Prent op bladsy 15]
Wat het jy oor waardigheid geleer uit die manier waarop Jesus ’n sekere melaatse behandel het?
[Prent op bladsy 16]
Waardige aanbidding behels dat Jehovah geëer word