Vraebus

◼ Watter voordele hou dit in om na die gemeente toe te gaan wat die gebied het waar ons woon?

Deur die gemeentelike reëling ontvang ons aanmoediging wat ‘ons tot liefde en goeie werke aanspoor’ (Heb. 10:24, 25). Deur die gemeente leer ons die waarheid en word ons toegerus om ons opdrag uit te voer om dissipels te maak (Matt. 28:19, 20). Ons word ook versterk om beproewinge getrou te verduur en het liefdevolle opsieners wat ons help om toenemende druk en bekommernisse die hoof te bied. Dit is duidelik dat die gemeente noodsaaklik is as ons geestelik staande wil bly. Maar hou dit voordele in om na die gemeente toe te gaan wat die gebied het waar ons woon?

Elkeen se omstandighede verskil, en faktore soos sekulêre werk, ’n ongelowige huweliksmaat en vervoer kan ’n mens se uiteindelike besluit in hierdie verband raak. Nogtans hou dit besliste geestelike en ander voordele in wanneer iemand omgaan met die gemeente wat die gebied het waar hy woon. Die ouer manne sal moontlik tydens noodgevalle gouer met al die verkondigers in aanraking kan kom. Vorige Vraebusse het al die aandag op ’n hele paar ander voordele gevestig.—Augustus 1991 (CD-ROM Mei 1991), April 1976 (CD-ROM Maart 1976) en Februarie 1967 (CD-ROM Januarie 1967).

Dit is gewoonlik geriefliker om vergaderinge by te woon wat naby is, aangesien dit ons in staat stel om vroeg genoeg daar te wees sodat ons met ander kan gesels, na nodige sake kan omsien en saam die openingslied kan sing en na die gebed kan luister. Wanneer nuwe belangstellendes in ons omgewing woon, is ons gewoonlik in ’n beter posisie om hulle te bereik, Bybelstudies met hulle te hou en hulle na die vergaderinge te neem wat vir hulle die gerieflikste is.

Ons is vol vertroue dat gesinshoofde hierdie saak biddend sal oorweeg en al die betrokke faktore in ag sal neem om te bepaal wat die beste is vir die geestelike en fisiese welsyn van hulle gesin.—1 Tim. 5:8.