Waarom baie mense skuld het
MICHAEL en Reena het hulle eerste huweliksherdenking gevier deur terug te keer na die plek waar hulle hulle wittebrood deurgebring het. Maar op die drumpel van die tweede jaar van hulle huwelik het hulle voor ’n onaangename werklikheid te staan gekom. Ongeag hoe spaarsaam hulle te werk gegaan het, hulle kon nie al hulle rekeninge betaal nie.
Beskou ’n ander egpaar. Robert het net ’n klein studentelening gehad om af te betaal toe hy met Rhonda getroud is, en sy moes net haar motor afbetaal. Robert sê: “Ons het albei voltyds gewerk, en ons het saam $2950 [R12 830] per maand verdien. Maar ons het nêrens gekom nie.” Rhonda sê: “Ons het nie enige groot aankope of enigiets buitensporig gedoen nie. Ek kon net nie verstaan waarop ons al ons geld bestee nie.”
Robert en Rhonda was nie lui nie. Michael en Reena ook nie. Wat was hulle probleem? Kredietkaartskuld. Binne die eerste jaar van hulle huwelik het Michael en Reena $14000 (R60900) op hulle kredietkaarte geskuld. Nadat Robert en Rhonda twee jaar getroud was, was hulle skuld op hulle kaarte $6000 (R26100).
Anthony, ’n middeljarige man met ’n gesin, het ook voor die finansiële krisis van sy lewe te staan gekom. Sy probleme het egter nie met kredietkaarte verband gehou nie. In 1993 is die maatskappy waarvoor hy gewerk het kleiner gemaak, en Anthony het sy bestuurspos, met ’n salaris van $48 000 (R209 000) per jaar, verloor. Daarna was dit vir hom ’n groot uitdaging om vir sy gesin van vier te sorg. Janet, ’n enkelouer wat in die stad New York woon, kon eweneens skaars die pot aan die kook hou met haar jaarlikse inkomste van ongeveer $11 000 (R47800).
Hoewel dit waar is dat die meeste geldelike probleme deur behoorlike bestuur opgelos kan word, lewe ons eintlik in ’n tyd waar baie gekniehalter word deurdat hulle “in die nutteloosheid van hulle verstand” wandel (Efesiërs 4:17). Grace W. Weinstein sê in haar boek The Lifetime Book of Money Management: “Baie van die reëls van die finansiële spel het verander, is heeltemal omgekeer deur ’n onvoorspelbare ekonomie, deur nuwe gesindhede teenoor besteding en besparing en deur veranderende lewenstyle.” In die deurmekaar wêreld waarin ons lewe, vind al hoe meer mense dit al hoe moeiliker om persoonlike en gesinsfinansies te behartig.
Gelukkig het Michael en Reena, Robert en Rhonda, Anthony asook Janet dit reggekry om hulle finansies te behartig. Voordat ons bespreek wat hulle gehelp het, gaan ons ’n ondersoek instel na die vorm van maklike finansiering wat tot die geldelike weë van baie bygedra het—ja, kredietkaarte.