Die globalisasie wat jou tot voordeel sal strek

“Globalisasie kan slegs suksesvol wees as dit die rykes sowel as die armes tot voordeel strek. Dit moet net soveel regte as rykdom voortbring. Dit moet net soveel maatskaplike geregtigheid en gelykheid as ekonomiese welvaart en verbeterde kommunikasie voorsien.”—KOFI ANNAN, SEKRETARIS-GENERAAL VAN DIE VERENIGDE NASIES.

SOOS Kofi Annan uitgewys het, sou ’n werklik suksesvolle globalisasie die lewe van elke inwoner van die wêreldgemeenskap verbeter. Maar wat ons in onlangse jare gesien het, skiet ver tekort aan daardie ideaal. Menseregte en maatskaplike gelykheid het ver agter tegniese en materiële vooruitgang gebly.

Die grootste probleem is dat ekonomiese globalisasie aangedryf word deur die begeerte om geld te maak. Die winsmotief neem selde die armes en die minderbevoorregtes of die langtermynbehoeftes van die planeet in ag. “’n Ongereguleerde wêreldekonomie wat oorheers word deur korporasies wat slegs aan geld waarde heg, is inherent onstabiel . . . en verarm die mensdom in werklikheid”, sê dr. David C. Korten.

Sal die regerings van die wêreld die wêreldekonomie so kan reguleer dat dit maatskaplike geregtigheid sal teweegbring? Dit lyk onwaarskynlik. Tot dusver het regerings dit moeilik gevind om enige wêreldwye probleem op te los—of dit nou wêreldwye misdaad, aardverwarming of wêreldarmoede is. “Gesamentlike optrede is nodig om wêreldbelange te beskerm”, sê Annan, “maar in vandag se geglobaliseerde wêreld is die meganismes wat vir wêreldwye optrede beskikbaar is, nog maar in die beginstadium.”

Wêreldwye meganismes om wêreldwye probleme te hanteer, is nie die enigste vereiste nie. Die Kommissie vir Wêreldbestuura redeneer dat die wêreld ook etiese waardes nodig het. “Sonder ’n wêreldwye etiek”, sê hulle verslag, “sal die wrywing en spanning van die lewe in die wêreldgemeenskap vermenigvuldig; sonder leierskap sal selfs die beste instellings en strategieë misluk.”

Watter soort wêreldwye etiek het hulle aanbeveel? “Mense moet ander behandel soos hulle self behandel wil word”, het die verslag gesê. Jesus Christus, die grootste leier wat die wêreld nog ooit geken het, het hierdie standaard van gedrag sowat tweeduisend jaar gelede geleer (Matteus 7:12). Maar die beginsel is nog steeds net so geldig. Die globalisasie wat op daardie standaard gebaseer is, sal almal ongetwyfeld tot voordeel strek. Kan dit ooit gebeur?

’n Wêreldwye oplossing van ’n ander aard

Die Bybel voorspel dat ’n wêreldregering die mensdom in die nabye toekoms sal verenig op grond van onselfsugtigheid eerder as geld of tegnologie. Dit sal suksesvol wees omdat dit die mag en die middele het om wêreldwyd namens die hele mensdom op te tree. Jesus Christus het self die aandag op hierdie wêreldregering gevestig toe hy sy volgelinge geleer het om te bid vir ‘God se Koninkryk om te kom en God se wil om op die aarde te geskied’.—Matteus 6:10.

God se Koninkryk, ’n hemelse regering in die hande van Jesus Christus, sal ’n nuwe wêreldwye etiek beliggaam, dieselfde etiek wat Jesus mense geleer het toe hy op die aarde was. Liefde vir God en naaste sal die vernaamste beginsels wees (Matteus 22:37-39). Baie profesieë in die Bybel gee ’n oorsig van wat hierdie nuwe regering sal doen. Aangaande die Heerser daarvan, Jesus Christus, belowe die Bybel: ‘Hy sal die geringes met regverdigheid oordeel, en ten behoewe van die sagmoediges van die aarde sal hy met billikheid teregwysing gee’ (Jesaja 11:4). Die rykes en magtiges sal nie die minderbevoorregtes uitbuit nie. Jesus sal “jammer voel vir die geringe en die arme . . . Van onderdrukking en van geweld sal hy hulle siel verlos.”—Psalm 72:13, 14.

Omgewingsprobleme sal onmiddellik aandag kry. Pleks dat die woestyne uitbrei, ‘sal die droë wêreld juig, oortrek met affodille’ (Jesaja 35:1, Die Bybel, 1983). In plaas van voedselskaarstes ‘sal daar volop graan op die aarde wees’.—Psalm 72:16.

God se Koninkryk verenig mense uit alle agtergronde. “In eenheid sal ek hulle stel, soos skape in die kraal”, belowe God. ‘Ek sal hulle tot ’n suiwer taal laat oorgaan, sodat hulle my skouer aan skouer kan dien’ (Miga 2:12; Sefanja 3:9). Hierdie “suiwer taal”, wat ’n gemeenskaplike stel sedelike en godsdienstige waardes insluit, verenig mense nou reeds.

Danksy wêreldwye reisfasiliteite hou Jehovah se Getuies gereeld groot internasionale byeenkomste, wat bande tussen verskillende rasse-, volks- en kultuurgroepe versterk. Hierdie byeenkomste is tasbare bewyse van ’n eenheid wat in harte en verstande bestaan, eerder as ’n eenheid wat deur tegnologie en die handel bewerkstellig word. (Sien die bygaande venster.) ’n Spaanse teoloog wat van hierdie byeenkomste bygewoon het, het geskryf: ‘Ek het opgebou gevoel toe ek daar weggaan, nie net deur die leersame skriftuurlike toesprake nie, maar ook deur die eenheid wat tussen hierdie mense bestaan, hulle hoë sedelike waardes en hulle puik gedrag.’

Jehovah se Getuies benut ook ander aspekte van globalisasie om hulle verkondiging van die goeie nuus van God se Koninkryk te vergemaklik. Ontwaak! word byvoorbeeld in meer as 80 tale vertaal deur baie vertalers, wat van rekenaarstelsels en elektroniese pos gebruik maak. Sulke toerusting help Jehovah se Getuies om hulle Bybelonderrigtingsprogram werklik ’n wêreldwye program te maak. Dit is duidelik dat die instrumente van globalisasie gebruik kan word om op te bou sowel as om af te breek.

Net so sal ’n wêreldregering wat deur God teweeggebring word, probleme oplos eerder as om probleme te skep soos menslike globalisasie gedoen het. Ons het alle rede om die volste vertroue in hierdie hemelse administrasie te hê. “Ek skep . . . ’n nuwe aarde”, belowe God. “Die vorige dinge sal nie onthou word nie, en ook sal dit nie in die hart opkom nie. Maar verheug julle en wees vir ewig bly oor wat ek skep” (Jesaja 65:17, 18). God se “nuwe aarde” sal mense in alle wêrelddele werklik tot voordeel strek.

[Voetnoot]

[Venster op bladsy 12]

VERBIND MAAR TOG VERDEELD

Hoewel tegnologie die wêreld kleiner gemaak het, bly verdeeldheid steeds ingewortel. Televisie, sellulêre telefone en die Internet is nuttig om mense te verbind, maar nie om mense te verenig nie. Ekonomiese integrasie en die einde van wedywering tussen die supermoondhede het die aantal oorloë tussen state verminder, maar honderdduisende mense sterf nog steeds elke jaar in wrede burgerlike konflikte.

Waarom? Omdat daar geen teken is dat haat tussen mededingende etniese, rasse- en godsdiensgroepe—die onderliggende oorsaak van burgeroorloë—afneem nie. En internasionale sakeondernemings en misdaadsindikate sorg dat daar oorgenoeg goedkoop wapens beskikbaar is om die strydende partye goed bewapen te hou. Ware eenheid kan nooit met behulp van elektroniese middele bewerkstellig word nie. En ’n skerp prysstyging op die effektebeurs bevorder ook nie maatskaplike geregtigheid nie.

In sekere opsigte kan ekonomiese globalisasie selfs tot verdeeldheid bydra. Wanneer ’n resessie op ’n tydperk van ekonomiese welvaart volg, kan armes ’n maklike prooi word vir ekstremistiese politici wat ekonomiese griewe vir hulle eie doeleindes uitbuit. Wat is die oplossing? “Nasionale en wêreldbestuur moet herskep word—met menslike ontwikkeling en regverdigheid as die fokus”, sê die Human Development Report 1999. Dit is presies wat God se Koninkryk gaan doen.

[Prente op bladsy 13]

Die wêreldwye Bybelonderrigtingsprogram van Jehovah se Getuies help om mense uit alle agtergronde te verenig