Van ons lesers

Van die redakteur: Die voorbladreeks “Die lewe is die moeite werd” (22 Oktober 2001) het groot reaksie onder ons lesers uitgelok. Dit is bemoedigend, want “Ontwaak!” wil graag praktiese, Bybelse inligting voorsien wat mense uit alle nasies, rasse en godsdiensagtergronde sal help om vandag se probleme die hoof te bied.

Ek lees al lank die Ontwaak!, maar niks het my nog ooit so getref soos die reeks “Die lewe is die moeite werd” nie. ’n Jaar gelede was ek baie wanhopig, en ek wou net doodgaan. Hierdie artikels het my weer die versekering gegee dat God ons swakhede verstaan.

S. H., Japan

Die aanval op die Tweelingtorings in New York het my neerslagtig laat voel. Ek het soms selfmoordgedagtes gehad, maar nooit teenoor myself erken dat daar iets met my verkeerd was nie. Ek sal die nodige hulp kry en die wenke in die artikel volg.

M. M., Verenigde State

As gevolg van my swak gesondheid het ek daaraan gedink om ’n einde aan alles te maak. Ek het daaroor gepraat, soms in ’n grap, om te sien hoe ander sou reageer. Daar was trane in my oë toe ek lees dat God altyd na ons luister en dat hy omgee. Hierdie tydskrif het my uitkyk op die lewe heeltemal verander.

T.E.J., Kanada

Ek ly al jare lank aan depressie, en onlangs het ek dit ernstig oorweeg om selfmoord te pleeg. Net toe ek by die deur wou uitstap, het ek onthou dat die laaste artikel van die reeks in die Ontwaak! gesê het ’n mens moet met iemand praat. Daarom het ek my man vertel. Dit het gekeer dat ek my plan uitvoer. Hierdie reeks het gehelp om my lewe te red!

M. B., Verenigde State

’n Paar weke voordat hierdie tydskrif verskyn het, het ek na ’n koppie vol slaappille gekyk en voor dieselfde dilemma te staan gekom as wat in die artikel beskryf word: “Moet ek dit drink of nie?” Julle tydskrif het my die nodige wil om te lewe, gegee. Party siektes tas die verstand in so ’n mate aan dat ons nie meer wil lewe nie, maar dit is hartroerend om te sien dat God selfs in mense belangstel wat skynbaar nie meer waardering het vir die gawe van die lewe nie.

E. S., Italië

Ek het die geleentheid gehad om hierdie inligting met my dokter te bespreek. Ek het hom vertel hoeveel dit my gehelp het. Die blote versekering dat ek vir God kosbaar is, gee my die motivering om te lewe. Ek bid voortdurend dat julle nog sulke artikels sal skryf!

J. S., Verenigde State

Ek het gedink dat niemand my verstaan nie, en die gedagte het by my opgekom dat dit baie makliker sou wees as ek dood was. Maar hierdie artikels het my gehelp om te onthou wat die belangrikste ding in die lewe is. Ek sal nie meer aan die dood bly dink nie!

M. M., Japan

Mishandelde vroue Dankie vir die voorbladreeks “Hulp vir mishandelde vroue” (8 November 2001). As kind het ek gesien hoe my pa my ma elke dag slaan. Toe het hy my en my susters begin aanrand. Ek het grootgeword met ’n diepgewortelde haat vir mans. Later het ons egter die Bybel saam met Jehovah se Getuies begin studeer. Dit was nie maklik vir my pa om te verander nie, maar met Jehovah se hulp het hy tot die besef gekom dat hy God nie kan behaag as hy Sy lieflike skepping mishandel nie. Hy het nie oornag verander nie, maar nou is my pa so mak soos ’n lammetjie. Ek kan hom met my hele hart liefhê.

G. B., Verenigde State