Geliefde troeteldier of wrede aanvaller?

DEUR ONTWAAK!-MEDEWERKER IN POLE

’N DRAWWER word deur ’n aggressiewe hond aangeval en bloei hom daarna dood. ’n Dogtertjie word deur haar eie rottweiler doodgebyt. ’n Negejarige seuntjie word voor sy ouers se oë noodlottig beseer deur ’n Duitse herdershond. Dit is maar net ’n paar van die tragedies wat veroorsaak is deur opreggeteelde honde in Pole.

Om sulke tragedies te voorkom, laat party owerhede mense toe om sekere honde aan te hou slegs nadat hulle ’n permit gekry het. Barbara Zaleska, ’n lid van die Poolse Hondevereniging, sê dat die permit vir die eienaar uitgereik moet word en nie vir die hond nie, “want dit is die eienaar wat besluit of mastiffs, rottweilers en bulterriërs wreedaardig sal word of mense se vriend sal bly”.

In party gevalle word honde doelbewus opgelei om dood te maak. Die afrigters se metodes sluit na bewering in dat hulle die honde slaan, uithonger en selfs aan “doodmaakoefeninge” laat deelneem, waartydens die hond opgelei word om poppe aan te val en te verskeur. Honde word dan geleer om swakker honde aan te val wat hulle beslis sal doodmaak. Wanneer die opleiding voltooi is, is die hond gereed om aan werklike hondegevegte deel te neem, tot genot van dobbelaars en bloeddorstige aanhangers.

Die Bybel sê uitdruklik wat God se beskouing van dieremishandeling is. Dit sê: “Die regverdige sorg vir die siel van sy mak dier, maar die barmhartighede van die goddeloses is wreed” (Spreuke 12:10). Diegene wat God wil behaag, mishandel diere nie op ’n sadistiese manier nie. Ons kan bly wees dat die gebruik om diere op te lei om aanvallers te word—hetsy vir sport of enige ander rede—in God se nuwe wêreld sal eindig.—Psalm 37:9-11.