Van ons lesers

Globalisasie Ek het julle voorbladartikels “Globalisasie—Vloek of seën?” (22 Mei 2002) baie geniet. Ek het al ’n hele paar lesings oor globalisasie bygewoon en gevind dat die aanbiedings bevooroordeeld en eensydig was. Die sprekers het globalisasie probeer voorstaan deur die voordele daarvan aan te haal of dit gekritiseer sonder om ’n alternatief te gee. Maar soos julle artikels getoon het, sal God se Koninkryk ’n globalisasie teweegbring wat elkeen van ons tot voordeel sal strek. Hoe gretig wag ek tog dat hierdie voordelige veranderinge plaasvind!

E. F., Filippyne

Julle het weer eens ’n baie goeie artikel geskryf wat uit alle oorde geprys sal word. Soos julle in die slot beklemtoon, is die heerskappy van God se Koninkryk oor ’n paradysaarde die enigste oplossing vir die mensdom. Ek wil net graag my waardering uitspreek vir die goeie werk wat julle doen om artikels te druk wat relevant is in die gevaarlike tye waarin ons lewe.

G. B., Ierland

Ek wil julle graag bedank vir julle prysenswaardige evangelisasiewerk. Ek het die voorbladartikels “Globalisasie—Vloek of seën?” gelees en gevind dat dit baie akkuraat is. Hierdie artikels help ons om bewus te word van ons menslike beperkings. Dit help ons ook om te besef dat niks suksesvol kan wees as ons nie volgens Jehovah se wette lewe nie.

J. D., België

Ek wil graag my waardering uitspreek vir die artikels oor globalisasie. Dit is baie goed geskryf en geïllustreer. Voordat ek hierdie artikels gelees het, het ek nie die vaagste benul gehad wat die woord beteken nie, maar nou voel ek goed ingelig. Ek geniet dit altyd om die Ontwaak! te lees.

E. K., Peru

Gehoor Baie dankie vir die artikel “Beskerm jou gehoor!” (22 Mei 2002). Ek is in my eerste jaar van opleiding as ’n gehoortoestel-akoestikus en sien elke dag watter uitwerking geraas het. Dit is veral belangrik om jongmense bewus te maak van die geraas waaraan hulle hulle daagliks blootstel.

C. K., Duitsland

Jongmense vra Die artikel “Jongmense vra . . . Hoe kan ek ’n goeie woonstelmaat vind?” (22 Mei 2002) was baie leersaam. Ek is nie jonk nie, maar is onlangs van my man geskei. Die feit dat ek weens die hoë lewenskoste nie kop bo water kon hou nie, het my onkant betrap. Die enigste oplossing was om ’n woonstelmaat te kry. Ek het gedink dat dit as gevolg van my ouderdom ’n groot uitdaging sou wees. ’n Jong suster, wat nuut in ons gemeente was, het ook ’n woonstelmaat nodig gehad. Ons het saam ingetrek. Die reëling was waarlik ’n seën. Ons het na ’n ruk geldelike probleme ondervind, en ’n ander suster het by ons ingetrek. Ek moet sê dat dit net in Jehovah se organisasie is dat ’n 60-jarige ouma en twee jong vroue uit verskillende agtergronde in soveel vrede en liefde kan saamwoon! Ons het ’n gesinnetjie geword, en in baie opsigte het dit ’n leemte in ons lewe gevul.

L. G., Verenigde State

Ons beskou die wêreld Dankie vir die nuusbrokkie in “Ons beskou die wêreld” met die opskrif “Insig in geestesiekte” (22 Mei 2002). Ek ly al 18 jaar lank aan bipolêre versteuring. Ondanks hierdie siekte het ek ’n produktiewe lewe gelei. Ek het drie seuns grootgemaak en was ’n goeie vrou vir my man. Ek het ook ’n paar mense gehelp om Bybelkennis op te doen. Ek het ’n liefdevolle gesin en liefdevolle vriende in die gemeente. Dankie vir die Ontwaak! Dit verhef ons almal tot dieselfde opvoedingsvlak.

H. B., Suid-Afrika

[Foto-erkenning op bladsy 30]

Mountain High Maps® Copyright © 1997 Digital Wisdom, Inc.