Liefde in moeilike tye
DEUR ONTWAAK!-MEDEWERKER IN NIGERIË
SONDAG, 27 Januarie 2002, is in Lagos, Nigerië, Swart Sondag genoem. ’n Ontploffing in ’n ondergrondse arsenaal het die stad geskud en die aandhemel verlig. Etlike ure lank het ontploffings bomme en puin oor ’n radius van drie kilometer laat neerreën, wat paniek in die stad veroorsaak het.
Wilde gerugte het vrees aangeblaas. Hordes vreesbevange mense het in die strate ingestroom en nie geweet waarvoor hulle vlug of waarheen hulle gaan nie. In die donker het honderde mense, insluitende talle histeriese kinders, in die troebel water van ’n kanaal ingehardloop en verdrink. Huise, skole en sakepersele is vernietig of erg beskadig, wat duisende dakloos en werkloos gelaat het. Na raming het 1 000 mense hulle lewe in die tragedie verloor. Latere skattings was selfs hoër.
Sowat 1 350 bomme, vuurpyle en handgranate wat nie ontplof het nie, is later teruggekry uit woonbuurte om die militêre basis waar die ontploffings plaasgevind het. Een man het ’n metaalvoorwerp in sy sitkamer gekry. Hy het nie besef dat dit ’n bom is nie en dit opgetel, in die kattebak van sy motor gesit en vir die owerheid teruggegee.
Toe die takkantoor van Jehovah se Getuies in Nigerië van die ontploffings hoor, het hulle onmiddellik met ’n ouer man in Lagos in aanraking gekom en gereël dat die 16 reisende opsieners in die gebied vasstel wat die situasie is van die 36 000 Getuies in Lagos. Eenmiljoen naira (sowat R100 000) is deur die takkantoor gestuur, saam met instruksies om ’n noodlenigingskomitee te vorm om hulp te verleen.
Onder die Getuies is een man ernstig deur skrapnel beseer; twee jong vroue het ongelukkig hulle lewe verloor en twee Koninkryksale en die huise van 45 gesinne is beskadig.
Ses dae ná die ammunisie-ontploffings, op 2 Februarie 2002, het ’n etniese geveg in ’n ander deel van die stad uitgebreek. Volgens die Rooi Kruis is 100 mense in die bakleiery dood, is 430 beseer, moes 3 000 uit hulle huise vlug en is 50 huise afgebrand. Die noodlenigingskomitee wat na die behoeftes van die “Swart Sondag”-slagoffers omgesien het, het gou na hulle Christenbroers in hierdie gebied gaan soek.
Nie een van die Getuies het op hierdie stadium hulle lewe verloor nie, aangesien die meeste van hulle ’n kringbyeenkoms op ’n ander plek bygewoon het toe die bakleiery begin het. Maar baie lede van die vyf gemeentes in die gebied het nie huise gehad waarheen hulle kon terugkeer nie. Hulle Christenbroers het hulle geredelik in hulle huise ingeneem. ’n Getuie-dokter en sy vrou het verblyf verskaf aan 27 mense sonder heenkome.
Die Getuies in Lagos wat nie deur die ontploffings en die etniese bakleiery geraak is nie, het mildelik kos, klere en huishoudelike artikels gegee. Die stadsopsiener het berig: “Die broers in die Lagos-omgewing skenk baie meer as wat die slagoffers nodig het.” Die takkantoor moes vir die gemeentes skryf om vir hulle te sê om nie meer bydraes te stuur nie. Drie vragte van die goedere wat oorgebly het, is na die takkantoor gestuur om gestoor te word.
Gemeentelike ouer manne het baie slagoffers besoek, asook die gesinslede van dié wat dood is. Hulle het hulle uit die Skrif probeer vertroos. Die noodlenigingskomitee het gereël dat herstelwerk gedoen word aan die huise wat beskadig is. Hulle het die slagoffers van albei rampe van huishoudelike artikels, klere en kos voorsien en diegene sonder heenkome gehelp om verblyf te kry. Altesaam 90 gesinne en individue is deur die komitee gehelp.
Baie slagoffers is oorweldig deur die hulp wat hulle ontvang het. ’n Getuie het vir die noodlenigingskomitee gesê: “So lank as wat ek lewe, sal ek Jehovah my ‘toevlug en sterkte’ maak!”—Psalm 46:1, 2.
Diegene wat nie Getuies is nie, het gesien hoe Jehovah se Getuies na mekaar omgesien het gedurende hierdie krisisse. ’n Oom van een van die Getuies wat dood is, het vir die ouer manne van die gemeente waarin sy was, gesê: “Ek gaan terugkom om julle werklik te bedank en om meer te leer.” Vir sy familie het hy gesê: “Wat ek in Lagos gesien het, was wonderlik. Selfs familielede het nie gedoen wat hierdie mense gedoen het nie.”
[Prent op bladsy 13]
’n Vragmotor vol noodlenigings-voorraad
[Prent op bladsy 13]
Party wat gehelp is
[Prent op bladsy 14]
Hierdie egpaar het verblyf verskaf aan 27 mense sonder heenkome
[Prent op bladsy 14]
Getuies wat aan ’n beskadigde huis werk
[Foto-erkenning op bladsy 13]
Bo: Sam Olusegun - The Guardian