“Die stille noodtoestand” se einde in sig!

“IN VERGELYKING met die toestand wat redelik onlangs nog bestaan het, lewe ons vandag in ’n wêreld van oorvloed. . . . Daar is meer as genoeg kos vir almal . . . teoreties gesproke.” Dit is wat ’n studie deur die Wêreldgesondheidsorganisasie (WGO) gesê het. As dit die geval is, wat is die ware oorsaak van wanvoeding?

“Die probleem is dat die produksie en verspreiding van voedsel nie regverdig geskied nie”, sê die WGO. “Alte dikwels staan die armes in vrugbare ontwikkelende lande met leë hande—en leë mae—en toekyk hoe groot oeste vir harde kontant uitgevoer word. Korttermynwinste vir ’n paar, langtermynverliese vir baie.” Volgens ’n onlangse studie deur die Verenigde Nasies se Voedsel- en Landbou-Organisasie (VLO) ‘eet die rykste vyfde van die mense’ op die planeet ‘45 persent van al die vleis en vis; die armste vyfde kry net 5 persent’.

Daarenteen “is nog ’n rede vir wanvoeding die feit dat mense nie toegang tot goeie onderwys en akkurate inligting het nie”, sê die Verenigde Nasies-kinderfonds, en voeg by: “Sonder strategieë om mense in te lig en beter en toegankliker opvoedkundige programme, kan die bewustheid, vaardighede en gedrag wat nodig is om wanvoeding te bestry, nie ontwikkel word nie.” Maar ’n tekort aan voedsel tas mense se gesondheid aan, wat hulle vermoë belemmer om ’n beter opvoeding te kry—nog ’n wrede kringloop.

Geregtigheid en onselfsugtige belangstelling in ander

Ondanks sulke frustrerende struikelblokke is party deskundiges in hierdie veld nog steeds optimisties. Die direkteur-generaal van die VLO, Jacques Diouf, het byvoorbeeld hierdie hoop uitgespreek: “Ek het ’n visie van ’n wêreld waar elke man, vrou en kind elke dag genoeg voedsame en veilige kos het om te eet. In my visie is die skokkende kloof tussen die rykes en armes uitgewis. Ek sien verdraagsaamheid en nie diskriminasie nie; vrede en nie burgertwis nie; die volhoubare benutting van habitats en nie omgewingsagteruitgang nie; algemene voorspoed en nie verlammende wanhoop nie.”

Maar soos ons gesien het, sal dit meer as verhoogde produksie en groter verspreiding van voedsel verg om sulke verwagtinge te verwesenlik. ’n Klimaat van geregtigheid en onselfsugtige belangstelling in ander is nodig. Hierdie edele eienskappe is egter nie kenmerkend van hedendaagse kommersialisme nie.

Is dit moontlik om sulke groot struikelblokke soos hebsug, armoede, onenigheid en selfsug uit die weg te ruim en die aarde sodoende van wanvoeding te bevry? Of is dit ’n onmoontlike droom?

Die enigste ware oplossing

Volgens die Bybel moet ons nie verbaas wees oor die onderliggende probleme wat tot wanvoeding aanleiding gee nie. God se Woord sê: “In die laaste dae [sal daar] kritieke tye . . . wees wat moeilik is om deur te kom. Want mense sal liefhebbers van hulleself wees, liefhebbers van geld, . . . sonder natuurlike geneentheid, nie bereid tot enige ooreenkoms nie, . . . sonder liefde vir die goeie, . . . wat ’n vorm van godvrugtige toegewydheid het maar die krag daarvan verloën.”—2 Timoteus 3:1-5.

Kan die mens sonder God se hulp van sulke diepgewortelde gesindhede ontslae raak? Dit lyk nie so nie, of hoe? Miskien het jy al gesien dat mense in gesagsposisies soms goeie bedoelings het met betrekking tot die maatskaplike probleme van die mens, maar dat selfsug, liefde vir geld en ander se onvolmaaktheid selfs die opregste pogings belemmer of verydel.—Jeremia 10:23.

Maar die oplossing is nie ’n onmoontlike droom nie. Die Bybel belowe dat God se Koninkryk ’n einde sal maak aan ongeregtigheid sowel as al die ander probleme wat die mens vandag teister.

Jesaja 9:6, 7 bied hierdie wonderlike hoop: “’n Kind is vir ons gebore, ’n seun is vir ons gegee; en die vorstelike heerskappy sal op sy skouer wees. En hy sal genoem word: Wonderlike Raadgewer, Magtige God, Ewige Vader, Vredevors. Aan die oorvloed van die vorstelike heerskappy en aan vrede sal daar geen einde wees nie, op die troon van Dawid en oor sy koninkryk om dit stewig te vestig en om dit deur middel van geregtigheid en deur middel van regverdigheid in stand te hou, van nou af en tot onbepaalde tyd. Die ywer van Jehovah van die leërs sal dit doen.”

Dit is dieselfde Koninkryk waarvoor mense bid wanneer hulle in die Onse Vader-gebed vir God sê: “Laat u koninkryk kom” (Matteus 6:9, 10). Let op dat Jesaja sê dat ‘die ywer van Jehovah van die leërs dit sal doen’. Ja, Jehovah God het nog altyd opreg daarin belanggestel om die behoeftes van mense te bevredig. Hy het hierdie aarde ontwerp om meer as genoeg kos vir almal te voorsien.

Psalm 65:9-13 sê van hom: “U het u aandag op die aarde gerig, sodat u dit oorvloed kan gee; u verryk dit grootliks. Die stroom wat van God kom, is vol water. U berei hulle graan, want so berei u die aarde. Sy vore word deurdrenk, sy kluite gelykgemaak; met oorvloedige reënbuie maak u dit sag; u seën sy uitspruitsel. . . . Die weivelde van die wildernis bly drup, en die heuwels omgord hulleself met vreugde. Die weivelde is met kuddes bekleed, en die laagvlaktes is in graan gehul.”

Ja, die Skepper, Jehovah, is die een wat die beste in die mensdom se behoeftes voorsien. Hy is “die Een wat voedsel aan alle vlees gee: want sy liefderyke goedhartigheid is tot onbepaalde tyd”.—Psalm 136:25.

Ons kan die vertroue hê dat God se Koninkryk onder Christus vir alle mense sal sorg. “Daar sal volop graan op die aarde wees; op die top van die berge sal daar ’n oorvloed wees”, sê die Bybel. Maar die kos sal ook regverdig verdeel word, want “[Jesus Christus] sal die arme verlos wat om hulp roep, ook die geteisterde en elkeen wat geen helper het nie. . . . Die siel van die armes sal hy red” (Psalm 72:12, 13, 16). Skep dus moed! Hierdie “stille noodtoestand” sal binnekort eens en vir altyd beëindig word.

[Lokteks op bladsy 11]

“Tegnies gesproke is dit moontlik om hongersnood en wanvoeding uit die weg te ruim. Die middele is daar. Die uitdaging is om . . . nasionale en internasionale samewerking te kry.”—Wêreldgesondheidsorganisasie

[Volbladillustrasie op bladsy 10]