Van ons lesers

Polisie Ek wil julle bedank vir die voorbladreeks “Die polisie—Waarom het ons hulle nodig?” (8 Julie 2002). My pa het drie jaar gelede in ’n motorongeluk gesterf. Twee plaaslike polisiemanne het vir ons gesin die nuus gebring, hulp aangebied en hulle meegevoel uitgespreek. Een van hulle het my ma selfs in sy arms gehou terwyl sy gehuil het. Ek is seker dat hierdie deel van hulle werk nie vir hulle maklik is nie, maar wat sou ons sonder hulle doen?

D. E., Verenigde State

Die voorbladreeks oor die polisie het ’n vraag by my laat opkom. Sal dit vir een van Jehovah se Getuies gepas wees om hierdie werk te doen? Ek neem aan dat ’n mens dalk ’n vuurwapen sal moet gebruik en moontlik selfs iemand sal moet doodmaak as ’n geveg sou uitbreek.

J. S., Australië

“Ontwaak!” antwoord: Ons voorbladreeks het bloot getoon watter nuttige werk die polisie doen om die orde te handhaaf en ander nodige dienste te lewer. Die meeste van Jehovah se Getuies vermy werk wat vereis dat hulle ’n wapen dra, aangesien hulle nie bloedskuldig wil word deur ’n lewe te neem nie (Eksodus 20:13; Matteus 26:51, 52). Hou egter in gedagte dat baie mense wat vir wetstoepassingsinstansies werk, glad nie ’n wapen hoef te dra nie, en in party lande dra die meeste polisiemanne nie vuurwapens nie.

Ek het so pas die artikels gelees oor waarom ons die polisie nodig het. Dit is baie goed geskryf en het begrip getoon vir die moeilike taak wat polisiemanne het om ’n mate van orde in hierdie chaotiese wêreld te probeer handhaaf. In die sewentigerjare was ek en my vrou reisende bedienaars, en ons het in ’n woonstel in die kelderverdieping van ’n ou Koninkryksaal gebly terwyl ons ’n gemeente in die binnestad bedien het. Omdat dit warm was, het ons ’n venster oopgemaak vir ’n bietjie vars lug. Tweeuur die oggend het my vrou my wakker gemaak, want daar was twee mans by die venster. Ek het na hulle gesprek geluister. Een het gesê dat die venster gewoonlik toe is. Die ander een het gesê dat iemand waarskynlik in die woonstel is omdat daar ’n motor in die parkeerterrein staan. Hulle was polisiemanne, en blykbaar het hulle gereeld kom kyk of alles by die Koninkryksaal nog in orde was. Ons het daarna beter geslaap!

P. S., Verenigde State

Die artikels oor die polisie is tydig—veral ná die terreuraanvalle op die World Trade Center en die Pentagon in die Verenigde State. Hopelik het ons nou groter waardering vir die polisie, brandweermanne en ander staatsamptenare wat die verantwoordelikheid het om burgers en eiendom nie net teen terrorisme te beskerm nie, maar ook teen misdade oor die algemeen.

H. B., Verenigde State

Woonstelmaats Ek wag al lank vir ’n artikel oor woonstelmaats. Toe ek die artikel “Jongmense vra . . . Hoe kan ek ’n goeie woonstelmaat vind?” (22 Mei 2002) lees, was ek verbaas om uit te vind dat daar mense is wat nie noodwendig hulle woonstelmaat se beste vriend wil wees of oral saam met hom wil gaan nie en dat dit normaal is. Terselfdertyd is ’n woonstelmaat ’n groot hulp wanneer dit by finansies en huiswerk kom. Dankie dat julle my gehelp het om ’n gebalanseerde beskouing te verkry.

S. M., Japan

Oor twee weke gaan ek en ’n mede-Getuie in Dresden woonstelmaats word. Ek moet erken dat die goeie raad in die artikels oor woonstelmaats in die nommers van 22 April, 22 Mei en 22 Junie 2002 presies is wat ek nodig gehad het en dat dit op die regte tyd gekom het. Gaan voort met die goeie werk!

R. P., Duitsland