Binnekort—’n Wêreld sonder dwelms
Kan jy jou ’n wêreld sonder dwelmmisbruik voorstel?
DIE Verenigde Nasies se sekretaris-generaal Kofi Annan het ’n beroep op alle nasies gedoen om hulle vir so ’n wêreld te beywer. Hy het gesê: “Ons moet nuwe en moedige stappe neem om hierdie euwel te bestry; hierdie plaag wat al te veel van ons kinders verstrik het.”
Alhoewel leiers dalk ooreenkom om die wêreldwye vervaardiging en verspreiding van dwelms te verminder, is dit ’n geweldige uitdaging. Hennadij Oedowenko van die Oekraïne, wat as voorsitter gedien het vir ’n spesiale sessie van die VN se Algemene Vergadering, het gesê dat “die handel in dwelmmiddels, met ’n geskatte waarde van meer as $400 miljard [R3 750 miljard] per jaar, een van die winsgewendste onwettige bedrywe is, . . . wat in staat is om wêreldwye finansiële markte te besmet of te destabiliseer”. Hy het bygevoeg dat die dwelmprobleem “’n wêreldwye verskynsel geword het en dat geen nasie kan voel dat hulle immuun is daarteen nie”.
Dit is moeilik om ons ’n wêreld sonder dwelms voor te stel. Menseregerings was tot dusver beslis nie in staat om dit uit te roei nie. Maar niemand kan die almagtige God keer om sy voorneme te vervul om die aarde in ’n paradys te omskep waarin elke emosionele, fisiese en geestelike behoefte bevredig sal word nie (Psalm 145:16; Lukas 23:43; 2 Petrus 3:13). Volgens die profeet Jesaja sal God se woord ‘nie sonder resultate na hom toe terugkeer nie, maar dit sal beslis doen wat hy behaag en sal beslis sukses behaal in alles waarvoor hy dit gestuur het’.—Jesaja 55:11.
Vertroue in hierdie beloftes kan selfs nou groot voordele inhou. Edmundo was byvoorbeeld ’n dwelmgebruiker. Maar deur die Bybel se belofte van ’n regverdige nuwe wêreld aan te neem, het dit hom beweeg om sy lewe te herevalueer. Edmundo sê nou: “Hoe dwaas was ek tog om my tyd te mors.” Aangesien hy God se goedkeuring wil behou, is hy nou vasbeslote om nie weer dwelms te gebruik nie. Ja, kennis van God en sy beloftes kan ons beweeg om ons nou “met die nuwe persoonlikheid [te] beklee, wat na God se wil in ware regverdigheid en lojaliteit geskep is”.—Efesiërs 4:24.
Talle ander wat voorheen dwelms misbruik het, geniet nou ook ’n intieme verhouding met hulle Skepper. Die woorde van die psalmis het vir hulle spesiale betekenis: “Dink tog nie aan die sondes van my jeug en my opstandige dade nie. Dink aan my ooreenkomstig u liefderyke goedhartigheid, ter wille van u goedheid, o Jehovah. Goed en reg is Jehovah. Daarom onderrig hy sondaars in die weg” (Psalm 25:7, 8). Hoe vertroostend is dit tog vir ouers met weerspannige kinders om te weet dat hulle kinders kan verander! Met ywerige inspanning kan ouers hulle kinders help om dwelmmisbruik te weerstaan en om “’n stewige houvas op die werklike lewe” te kry, wat in God se nuwe wêreld verwesenlik sal word.—1 Timoteus 6:19.
[Prente op bladsy 10]
Die hoop om in God se nuwe wêreld te lewe, het baie dwelmgebruikers beweeg om hulle lewe te verander