Van ons lesers

Hoop Ons wil net kortliks ons diepe waardering uitspreek vir die reeks “Hoop—Waar kan jy dit vind?” (22 April 2004). Ons het dit as ’n gesin saam gelees, en teen die tyd dat ons klaar was, was ons na aan trane. Die kunswerk met die blom het die punt pragtig toegelig.

H. H. & L. H., Verenigde State

’n Week voordat ek hierdie artikels gelees het, is my ma oorlede, en ek het groot vertroosting gevind in die woorde: “Die dooies is in die veiligste plek denkbaar, soos ’n baba wat veilig in die moederskoot is.” Ek treur nog oor my ma se dood, maar ek is bly dat sy veilig in Jehovah se geheue is.

V. L., Verenigde State

Ek lees die Ontwaak! al byna 50 jaar, en dit het my nog altyd verbaas dat julle ’n onderwerp kan neem wat julle al baie kere bespreek het, en met ’n nuwe benadering vorendag kan kom. Die navorsing wat julle oor pessimisme gedoen het, was waarlik die moeite werd om te oorweeg.

T. H., Verenigde State

Ek het ’n ongeneeslike siekte. Ek probeer positief bly, maar toe ek vandag wakker word, het ek wanhopig gevoel. Daarom het ek die artikels toe twee keer gelees. Die artikels is met ’n diep begrip geskryf, en ek het baie vertroosting daaruit geput.

B. J., Brittanje

My man voer ’n stryd teen kanker. Ek was onder groot druk terwyl ek na ons kinders omgesien het. Ek het ook my werk verloor. Maar die deel “Redes vir hoop” het my krag gegee. Ek wil hierdie artikel met soveel mense moontlik deel.

J. N., Japan

Wanneer iets slegs met my gebeur, is ek geneig om paniekerig te raak. Hierdie artikels was ’n antwoord op ’n gebed! Die stappe om ’n pessimistiese uitkyk te oorkom, was so spesifiek dat ek die stappe een vir een kan toepas wanneer pessimistiese gedagtes by my opkom. Ek hou hierdie tydskrif by my bed en kyk elke dag daarna.

S. T., Japan

Versorging van vere Waar ek woon, sien ’n mens dikwels voëls wat hulle vere gladstryk. Nadat ek die artikel “Net om mooi te lyk?” (22 April 2004) gelees het, verstaan ek die talle voordele wat dit vir voëls inhou om hulle vere glad te stryk. Ek wil julle bedank vir julle leersame aanbieding van inligting oor God se unieke skepsele.

F. K., Nigerië

Ek lees graag artikels oor plante, diere en voëls. Ek het uit hierdie artikel geleer dat om skoon te bly, ’n saak van lewe of dood vir voëls is. Ek het nog nooit voorheen daaraan gedink nie.

K. G., Rusland

Dansklubs Dankie vir die artikel “Jongmense vra . . . Hoe moet ek dansklubs vir jongmense beskou?” (22 April 2004). Ek stem saam dat sulke klubs nie vir Christene is nie. Ek is spyt dat ek Jehovah nie vroeër in my lewe geken het toe ek na sulke klubs gegaan het nie.

L., Indonesië

Om eerlik te wees, ek het na plekke gegaan waar ek nie moes nie. Ek hou baie daarvan om te dans en het altyd verskonings gemaak om te gaan. Die volgende dag het ek skuldig gevoel. Ek het niks slegs gedoen nie; dit was wat almal rondom my gedoen het! Die artikel het die waarheid oor dansklubs aan die kaak gestel—dat baie van hulle gevaarlik en onsedelik is.

D. K., Australië