Ons beskou die wêreld

◼ “Die diepsee is verreweg die grootste habitat op die planeet. En een van die strafste . . . Tog vind ons lewe oral waar ons kyk, en soms ’n merkwaardige oorvloed daarvan.”—NEW SCIENTIST, BRITTANJE.

◼ In ’n onlangse toetssaak het ’n regter van ’n federale hof in Harrisburg, Pennsilvanië, VSA, beslis dat “dit ongrondwetlik is om [intelligente ontwerp] as ’n alternatief vir evolusie in ’n wetenskapklas in ’n openbare skool te leer”.—NEW YORK TIMES, VSA.

◼ Volgens ’n meningspeiling in 2005 “verwerp 51 persent van Amerikaners die evolusieteorie”.—NEW YORK TIMES, VSA.

◼ Op 175-jarige leeftyd is Harriet, ’n Galápagos-reuseskilpad van 150 kilogram in ’n dieretuin in Brisbane, Australië, die “wêreld se oudste bekende lewende dier”.—AUSTRALIESE UITSAAIKORPORASIE.

◼ Switserse navorsers het uitgevind hoe party mieliesoorte hulle teen die westelike mieliewortelboorder beskerm. Hulle gee reuke in die grond af. Dit lok piepklein draadwurms wat die larwes van die mieliewortelboorder doodmaak.—DIE WELT, DUITSLAND.

Reusepylinkvis afgeneem

Naby die Bonin-eilande, suid van Japan, het wetenskaplikes vir die eerste keer ’n lewende reusepylinkvis in die natuur afgeneem. Hulle het klein pylinkvisse en garnaalpulp aan hoeke gesit en kameras bo dit gehang. Die reusepylinkvis wat verskyn het, op ’n diepte van ongeveer 900 meter, was sowat agt meter lank.

“Dinosourusse het gras geëet”

“Dit was vir wetenskaplikes ’n groot verrassing” om te ontdek dat “dinosourusse gras geëet het”, sê ’n verslag deur die Associated Press. Die ontdekking is gemaak toe versteende sauropoda-mis wat in Indië gevind is, ontleed is. Waarom was wetenskaplikes so verras? Daar is gedink dat “gras eers ontstaan het lank nadat die dinosourusse uitgesterf het”, verduidelik die verslag. Daar is ook geglo dat sauropodas “nie die regte soort tande gehad het wat nodig is om growwe halms te kou nie”. Die paleobotanis Caroline Stromberg, die leier van die span wat die ontdekking gemaak het, sê: “Die meeste mense sou nie kon begryp dat [sauropodas] gras geëet het nie.”

Hoe vlieg bye?

Daar is al grappenderwys gesê dat ingenieurs bewys het dat bye nie kan vlieg nie. Dit het nie gelyk asof sulke “swaar” insekte met ’n kort vlerkslag genoeg hefkrag behoort te kan voortbring nie. Om die insek se geheime te ontrafel, het ingenieurs “bye wat op een plek in die lug hang, teen 6000 raampies per sekonde afgeneem”, sê New Scientist. Die bye se tegniek word as “buitengewoon” beskryf. “Die vlerk swaai terug met ’n boog van 90 grade, dan swaai dit om terwyl dit terugbeweeg—230 keer per sekonde. . . . Dit is soos ’n dryfskroef waarvan die lemme ook roteer”, verduidelik ’n lid van die navorsingspan. Hulle bevindinge kan ingenieurs help om dryfskroewe te herontwerp en makliker hanteerbare vliegtuie te bou.

Singende muise

“Muise kan sing, en . . . wanneer hulle vir hulle potensiële maats sing, is dit byna so ingewikkeld soos voëlsang”, berig New Scientist. Muissang is ultrasonies, met ander woorde op ’n toonhoogte wat te hoog is vir die menseoor om te hoor—dit is waarskynlik hoekom niemand daarvan geweet het nie. Navorsers in St. Louis, Missouri, VSA, het gevind dat die sang van mannetjies “in frases en motiewe gerangskik was, wat dit aan die definisie van ’n ‘lied’ laat voldoen”. Muise behoort dus aan ’n unieke groep. Ander soogdiere wat bekend is vir hulle sang, is walvisse, dolfyne, sekere vlermuise en natuurlik ook mense.