Ons beskou die wêreld
◼ Oor die afgelope dekade het ongeveer 40 miljoen Chinese boere hulle land weens vinnige verstedeliking verloor.—CHINA DAILY, CHINA.
◼ Gedurende 2005 het 28 volskaalse oorloë en 11 ander gewapende konflikte wêreldwyd gewoed.—VITAL SIGNS 2006-2007, WORLDWATCH-INSTITUUT.
◼ ’n Span van Tokio se Instituut vir Tegnologie het ’n bemande ultraligte vliegtuig wat minder as 55 kilogram weeg en net met huishoudelike batterye werk, suksesvol laat vlieg. Die vliegtuig het 391 meter binne 59 sekondes gevlieg.—MAINICHI DAILY NEWS, JAPAN.
◼ Onder Nederlandse Internetgebruikers van 12 tot 20 jaar wat sogenaamde “profielwebwerwe” besoek het terwyl hulle ’n webkamera gebruik, “het 40 persent van die seuns en 57 persent van die meisies gesê dat hulle al gevra is om hulle klere uit te trek of om die een of ander seksuele daad voor die webkamera te doen”.—RUTGERS NISSO-GROEP, NEDERLAND.
Kan videospeletjies verslawend wees?
“Breinreaksies van mense wat te veel rekenaarspeletjies speel, is soortgelyk aan dié van alkoholiste of daggaverslaafdes.” Dit is volgens die sielkundige Ralf Thalemann, die leier van ’n groep wat navorsing oor verslawing doen by die Charité-universiteitshospitaal in Berlyn, Duitsland. Die stimulasie wat mense ervaar wanneer hulle te veel rekenaarspeletjies speel, kan vermoedelik veroorsaak dat meer dopamien in ’n speler se brein vrygestel word, wat ’n gevoel van tevredenheid meebring en uiteindelik “verslawing” kan veroorsaak. Een opname het aangedui dat dit moontlik gebeur in meer as 10 persent van diegene wat videospeletjies speel.
Rykes is dikwels “onseker van hulleself en verontrus”
“Miljoenêrs voel onseker van hulleself en verontrus”, sê die Beijingse koerant China Daily. ’n Opname is gedoen onder mense van Oos- en Suid-China met ’n gemiddelde fortuin van 2,2 miljard yuan (R2,1 miljard). Die navorsers, wat ryk mense se “gesindhede teenoor geloof, die huwelik, die lewe, loopbane en geld” bestudeer het, het gevind dat “die meeste van die miljoenêrs geld liefhet maar dit terselfdertyd haat”. ’n Aantal respondente het gesê dat geld, benewens sosiale status en ’n gevoel dat hulle iets bereik het, “vir hulle hoofsaaklik ergernis gebring het”.
Plase is goed vir sielsiekes
Meer as 100 deskundiges van 14 lande het onlangs in Stavanger, Noorweë, bymekaargekom om te leer omtrent Groensorg, ’n konsep wat boerdery, onderrig en gesondheidsorg kombineer. Volgens die uitsaaimaatskappy NRK hoef party wat al jare lank sielsiek is, nie meer in inrigtings gehou te word wanneer hulle plaaswerk begin doen nie. Dit is “goed vir die verstand en die liggaam”. Meer as 600 tradisionele plase in Noorweë werk saam met Groensorg, waarvoor hulle ’n ekstra inkomste kry.
Kerktorings word benut
“Kerke in Nieu-Engeland [in die Verenigde State] het ’n oplossing gevind vir krimpende begrotings: hulle verhuur hulle skilderagtige kerktorings aan selfoonmaatskappye wat plek soek vir hulle antennas”, sê die tydskrif Newsweek. Weens soneringsbeperkings is daar min plekke waar torings wat boodskappe van selfone stuur en ontvang, opgerig kan word, en inwoners wil nie onooglike antennas in hulle buurt hê nie. Selfoonverskaffers steek dus hulle toerusting in kerktorings weg. Die president van ’n konsultasiefirma vir kerke sê: “Die eerste kerk waarin ons ’n antenna opgerig het, het nou drie selfoonmaatskappye se antennas in hulle toring, en hulle kry $74 000 [R567-000] per jaar vir ruimte wat niemand in elk geval gebruik het nie.”