Ons beskou die wêreld
◼ “In die 20ste eeu het tabak 100 miljoen sterftes veroorsaak.”—WÊRELDGESONDHEIDSORGANISASIE, SWITSERLAND.
◼ “Vir byna 9 000 pasiënte wat tussen 1996 en 2003 in die [Verenigde Koninkryk] ’n hartoperasie ondergaan het, het die feit dat hulle ’n oortapping van rooibloedselle ontvang het, die risiko om binne een jaar te sterf, drie keer vergroot en die risiko om binne 30 dae ná die operasie te sterf, amper ses keer vergroot, in vergelyking met diegene wat nie ’n oortapping ontvang het nie.”—NEW SCIENTIST, BRITTANJE.
’n Tyd van vrede?
“Kersfees is een van ons grootste vieringe”, maar dit is ook “’n tyd van konflik”, sê Vi Föräldrar, ’n Sweedse tydskrif vir ouers. Trouens, gedurende die Kerstyd “stry [gesinne] meer as gedurende enige ander tyd van die jaar”. Die tydskrif het meer as 1 100 ouers van klein kindertjies oor hulle ondervindinge gedurende die Kersseisoen gevra. Sowat 88 persent het geantwoord dat die gesin stry oor “hoe en waar hulle Kersfees wil vier”. Baie is geïrriteerd omdat grootouers hulle kleinkinders met lekkers en onnodige geskenke bederf.
Om te gee, verskaf groter geluk
“Geld maak jou gelukkig—as jy dit weggee”, lui ’n opskrif in The Globe and Mail van Kanada. Hoewel die meeste mense met wie daar ’n onderhoud gevoer is, gedink het dat dit hulle gelukkiger sou maak om geld op hulleself uit te gee, het diegene wat hulle geld gebruik het om ander te help—ongeag die bedrag—gemeld dat dit hulle eintlik gelukkiger gemaak het. “Studie op studie het bewys dat rykdom nie bepaal hoe gelukkig ons is nie”, sê die koerant. “Wanneer mense eers genoeg geld het om in hulle basiese behoeftes te voorsien, maak meer geld hulle nie juis gelukkiger nie.”
Jy kan dit op die Internet koop!
Amerikaanse staatsamptenare het besluit om uit te vind of dit vir hulle potensiële vyande moontlik sou wees om “militêre toerusting van ’n sensitiewe aard” op die Internet te verkry, sê die tydskrif New Scientist. “Hulle was verbaas om uit te vind hoe maklik dit is.” Hulle kon maklik “Amerikaanse militêre lyfpantsers”, ’n “gebruikte pak wat ’n mens beskerm teen kern-, biologiese en chemiese wapens”, onderdele van straalvegvliegtuie en “etlike ander artikels van ’n sensitiewe aard” op ’n bekende handelswebwerf koop. Dit is onbekend hoe die verkopers sulke toerusting in die hande gekry het, maar baie van hulle “staar nou ’n polisieondersoek in die gesig”, sê die tydskrif.
Eertydse supergom
’n Eertydse Romeinse offisier se paradehelm is met silwer lourierblare versier wat daaraan vasgeplak is met ’n kleefstof wat baie soortgelyk is aan supergom. Frank Willer, hoofrestoureerder by die Rynland-museum in Bonn, Duitsland, het dit toevallig ontdek. Hy het ’n fyn saag gebruik om ’n klein stukkie metaal te verwyder van ’n ysterhelm uit die eerste eeu v.G.J. wat ten minste 1 500 jaar lank op die bodem van die Rynrivier gelê het. “Die hitte van die saag het die silwer lourierblare op die helm laat lostrek en draderige oorblyfsels van die gom agtergelaat”, verduidelik hy. Die sterk kleefstof is ontleed, en daar is vasgestel dat dit van bitumen, houtteer en beesvet gemaak is.