Groter seëninge as rykdom

JON het ’n baie suksesvolle loopbaan gehad as ’n konsultant in die Verenigde State. Selfs as ’n jong man het hy oral in die wêreld gereis en baie geld verdien. Hy en sy vrou het ’n pragtige huis en ’n gerieflike lewenstyl gehad. In die oë van baie mense was hulle geseënd.

Beskou nog ’n geval. Uit meer as 5 000 aansoekers was Kostasa een van slegs 80 mense wat gekies is om as ’n leerklerk by ’n vername Europese bank te gaan werk. Binne slegs ’n paar jaar is hy etlike kere bevorder, en hy is uiteindelik as die hoof van ’n groot afdeling by ’n ander bank aangestel. Teen die tyd dat hy daar bedank het om sy eie maatskappy te begin, het hy meer geld verdien as wat die meeste mense in ’n leeftyd verdien. Hy het geseënd gevoel.

Nietemin is albei hierdie mans daarvan oortuig dat daar groter seëninge is as materiële rykdom. Byvoorbeeld, vandag werk Jon vrywillig as ’n Bybelonderrigter en help hy mense om nader aan God te kom. Jon sê: “Ek het uit eie ondervinding gesien dat materiële rykdom nie tot geluk lei nie. Die stryd om dit te verkry en te behou, laat min tyd oor vir enigiets anders. Aan die ander kant bring dit baie seëninge mee as ’n mens volgens Bybelstandaarde lewe, soos ’n baie gelukkiger huwelik, gemoedsrus en ’n goeie gewete.”

Kostas sê ook: “God wil nie hê dat ons in weelde moet lewe nie. Ek dink regtig dat alles wat hy ons benewens ons daaglikse behoeftes gee, ons onder verpligting plaas om dit in ooreenstemming met sy wil te gebruik.” Kostas en sy gesin het onlangs ’n ander taal begin aanleer sodat hulle meer mense omtrent Bybelbeginsels kan leer. Hy sê: “Ons het geleer dat dit groter geluk verskaf om te gee as om te ontvang.”—Handelinge 20:35.

Ja, Jon en Kostas het albei geleer dat geestelike seëninge baie kosbaarder is as materiële rykdom. Daniel Gilbert, ’n professor aan die Harvard-universiteit, sê dat deskundiges op die gebied van geestesgesondheid “al dekades lank die verband tussen rykdom en geluk bestudeer, en hulle het oor die algemeen tot die slotsom gekom dat rykdom mense gelukkiger maak wanneer dit hulle uit volslae armoede ophef en hulle in die middelklas plaas”. Maar dan voeg hy by: “Daarna doen dit maar min om mense gelukkiger te maak.”

’n Les wat dikwels ten duurste geleer word

“Wanneer iemand eers bo die broodlyn is”, het ’n skerpsinnige waarnemer gesê, “het ’n toename in inkomste verbasend min met persoonlike geluk te doen.” Vroeg in die vorige eeu is hierdie les by ’n verslaggewer tuisgebring toe hy ’n onderhoud gevoer het met Andrew Carnegie, ’n baanbreker in die staalbedryf wat destyds een van die rykste mense ter wêreld was. “Mense moet my nie beny nie”, het Carnegie gesê. “Hoe kan my rykdom my help? Ek is sestig jaar oud en ek kan nie my kos verteer nie. Ek sou al my miljoene gee as ek jeug en gesondheid kon hê.”

Die verslaggewer het toe bygevoeg: “Mnr. Carnegie het skielik weggedraai en met onbeskryflike bitterheid en intensiteit stilweg gesê: ‘Ek sal met graagte enigiets verkoop as ek my lewe kon oorhê.’” ’n Ander multimiljoenêr, die oliemagnaat J. Paul Getty, het later saamgestem en gesê: “Geld hou nie noodwendig verband met geluk nie. Dalk met ongelukkigheid.”

Jy stem dalk saam met die Bybelskrywer wat gesê het: “Gee my nie armoede of rykdom nie. Laat my die voedsel verslind wat vir my voorgeskryf is, sodat ek nie versadig word en u verloën en sê: ‘Wie is Jehovah?’ nie, en sodat ek nie in armoede verval en steel en die naam van my God skend nie.”—Spreuke 30:8, 9.

Koning Salomo van eertydse Israel het verduidelik: “Ek het groter geword en meer toegeneem as enigiemand wat voor my in Jerusalem was.” Tog het hy bygevoeg: “Alles was nietigheid en ’n gejaag na wind.” Salomo het ook gesê: “Die seën van Jehovah—dit maak ryk, en hy voeg daar geen pyn by nie.”—Prediker 2:9-11; 5:12, 13; Spreuke 10:22.

Die weg na ewige seëninge

Dit is duidelik dat ons alleenlik ware en blywende geluk kan vind wanneer ons ons geestelike behoeftes behoorlik bevredig. As ons God eerste stel, sal ons vind dat ons lewe in alle opsigte sinvoller en bevredigender word.

Gelukkig sal ons ons nie altyd oor geld hoef te bekommer nie. Die Bybel verseker ons van ’n toekoms wanneer die gierige en uitbuitende handelswêreld permanent uit die weg geruim sal wees (1 Johannes 2:15-17). God se nuwe stelsel van dinge wat dan tot stand gebring sal word, sal deur sy regverdige beginsels gerig word. Die aarde sal in ’n paradys omskep word, wat God se oorspronklike voorneme was toe hy die eerste mensepaar daarop geplaas het. Wat ’n seën sal dit tog wees om te sien dat die hele aarde met geluk, vrede en liefde gevul is!—Jesaja 2:2-4; 2 Petrus 3:13; 1 Johannes 4:8-11.

Dan sal die lewe nie somber en vervelig wees nie. Materiële seëninge sal gepaardgaan met geestelike seëninge wanneer God sy oorspronklike voorneme vervul dat die mens vir ewig op ’n paradysaarde lewe. Ons word verseker dat daar meer as genoeg kos, behuising en sinvolle werk vir almal sal wees. Armoede sal heeltemal uit die weg geruim wees.—Psalm 72:16; Jesaja 65:21-23; Miga 4:4.

Almal wat opreg geloof beoefen in Jehovah, die God van die Bybel, sal nie teleurgestel word nie (Romeine 10:11-13). Hoe wys is dit dan tog om nou die seëninge na te streef wat groter is as rykdom!—1 Timoteus 6:6-10.