Wat is die uitdagings?

Wat dink jy? Is die uitdagings waarvoor die jongmense van hierdie geslag te staan kom, groter as dié van die verlede? As jou antwoord nee is, meen jy dalk dat vandag se tieners meer geseënd is as enige groep jongmense in die geskiedenis.

In baie lande word siektes wat die jeug voorheen van hulle gesondheid en lewe beroof het, deur die geneeskunde onder beheer gehou. Danksy die tegnologie is daar nou elektroniese toestelle en speelgoed waarvan vorige geslagte net kon droom. En ekonomiese ontwikkeling het miljoene gesinne uit armoede bevry. Trouens, tallose ouers werk hard om hulle kinders ’n lewenstandaard en opvoedkundige geleenthede te gee wat hulle self nie gehad het nie.

Jongmense van vandag geniet ongetwyfeld baie voordele. Maar hulle kom ook voor ongekende uitdagings te staan. Een rede is dat die mensdom nou in ’n tydperk lewe wat die Bybel “die voleinding van die stelsel van dinge” noem (Matteus 24:3). Jesus Christus het akkuraat voorspel dat hierdie era gekenmerk sou word deur enorme maatskaplike beroeringe (Matteus 24:7, 8). Die Bybel noem hierdie selfde era “die laaste dae” en beskryf die maatskaplike toestande wat sou heers as “moeilik . . . om deur te kom” (2 Timoteus 3:1). Kyk na net ’n paar van die moeilike uitdagings waarvoor tieners vandag te staan kom.

Uitdaging 1

Groter afsondering

Die beeld wat in rolprente, TV-programme en tydskrifte geskep word, is dat jongmense altyd omring is deur ’n groep vriende saam met wie hulle hulle skooljare deurbring en met wie hulle as volwassenes ’n band behou. Vir die meeste tieners is die werklikheid heelwat anders.

Die navorsers Barbara Schneider en David Stevenson, wat onderhoude met duisende jongmense in die Verenigde State ontleed het, het gevind dat “relatief min leerders vir ’n lang tyd dieselfde beste vriend gehad het of deel van dieselfde groepie vriende was”. Baie jongmense “voel nie dat hulle na aan enigiemand is nie en het min hegte vriende met wie hulle voel dat hulle hulle probleme of idees kan bespreek”, sê Schneider en Stevenson.

Tieners wat wel vriende maak, het blykbaar nie veel tyd om saam met hulle deur te bring nie. Volgens ’n uitvoerige studie in die Verenigde State bring die meeste tieners ongeveer 10 persent van hulle tyd in die teenwoordigheid van hulle vriende deur, terwyl hulle tot 20 persent van hulle dag alleen is—meer tyd as wat hulle saam met hulle gesin of vriende bestee. Hulle eet alleen, reis alleen en geniet vermaak alleen.

Hierdie neiging tot afsondering word deur die groot toename in elektroniese toestelle bevorder. In 2006 het die tydskrif Time byvoorbeeld berig dat jongmense in Amerika tussen die ouderdomme van 8 en 18 gemiddeld ses en ’n half uur per dag voor die TV vasgenael sit, met oorfone op die kop of met hulle hande op videospeletjiekontroles of rekenaartoetsborde.a

Hierdie geslag is natuurlik nie die eerste wat dit geniet om ure lank na musiek te luister of speletjies te speel nie (Matteus 11:16, 17). Maar die geweldige hoeveelheid tyd wat jongmense tans in elektroniese afsondering deurbring pleks van interaksie met hulle gesin te hê, kan skadelik wees. Die navorsers Schneider en Stevenson sê: “Jongmense meld dat hulle ’n swakker gevoel van eiewaarde het, ongelukkiger is, minder geniet wat hulle doen en minder aktief voel wanneer hulle alleen is.”

Uitdaging 2

Druk om seks te hê

Geweldige druk word op tieners en selfs laerskoolkinders uitgeoefen om met seks te eksperimenteer. Nathan, ’n jong man wat in Australië woon, sê: “Meeste van die kinders wat ek op skool geken het, het tussen die ouderdomme van 12 en 15 seksueel aktief geraak.” ’n Jong vrou met die naam Vinbay, wat in Mexiko woon, sê dat los seks onder die jongmense by haar skool baie algemeen was. “Dié wat nie seks gehad het nie, is as vreemd beskou”, sê sy. “Los seks is so algemeen onder my portuurs dat dit nie genoeg is om net een keer nee te sê nie”, sê Ana, ’n 15-jarige wat in Brasilië woon. “Jy moet die uitnodigings keer op keer verwerp.”

Navorsers in die Verenigde Koninkryk het ’n opname gedoen onder jongmense uit verskillende agtergronde tussen die ouderdomme van 12 en 19. Hulle het gevind dat byna 50 persent van die jongmense gereeld aan die een of ander seksuele aktiwiteit deelneem. Meer as 20 persent van hierdie seksueel aktiewe jongmense was maar 12 jaar oud! Dr. Dylan Griffiths, wat toesig gehou het oor die navorsing, sê: “Die beheer wat die gesin, die Kerk en ander instansies tradisioneel uitgeoefen het, het verdwyn, en jongmense is die slagoffers.”

Is jongmense wat met seks eksperimenteer werklik “slagoffers”? In ’n verslag wat in 2003 gepubliseer is, het die navorsers Rector, Noyes en Johnson gevind dat daar onder jongmense ’n regstreekse verband is tussen seksuele aktiwiteit, depressie en ’n groter risiko van selfmoordpogings. Hulle het onderhoude met 6 500 tieners ontleed en gevind dat “die kans meer as drie keer groter is dat seksueel aktiewe meisies aan depressie sal ly as meisies wat nie seksueel aktief is nie”. En onder seuns “is die kans twee keer groter dat dié wat seksueel aktief is, aan depressie sal ly as dié wat nie seksueel aktief is nie”.

Uitdaging 3

Gebroke gesinne

Jongmense in die Verenigde State het vinnige veranderinge in die gesinstruktuur en ’n veranderende stel waardes ondervind. “In die afgelope paar dekades was daar verskeie groot demografiese veranderinge wat ’n regstreekse uitwerking op tieners se lewens het”, sê die boek The Ambitious Generation—America’s Teenagers, Motivated but Directionless. “Die gemiddelde Amerikaanse gesin word kleiner, en daarom het adolessente waarskynlik minder broers en susters. Namate egskeidingsyfers toeneem, het al hoe meer kinders gedurende ’n deel van hulle kinderjare net een ouer. Daar is ook meer kinders onder agtien wie se moeder werk, en dit is dus minder waarskynlik dat daar ’n volwassene by die huis is.”

Baie kinders voel vervreemd van hulle ouers juis op die tye wanneer hulle hulle die nodigste het, hetsy hulle by een of twee ouers woon. In ’n studie van 7 000 tieners oor ’n tydperk van ’n paar jaar is daar bevind dat die meeste van die adolessente hulle ouers as liefdevol en ondersteunend beskou. Nogtans “het net ’n derde gesê dat hulle spesiale aandag en hulp ontvang wanneer hulle ’n probleem het”. Daar is ook bevind dat “die meeste adolessente probleemsituasies beskou as die tye wanneer ouers die minste geneig is om in te gryp en hulp aan te bied”.

In Japan word gesinsbande wat vroeër sterk was, deur die begeerte na materiële sukses verweer. Joeko Kawanisji, ’n professor in sosiologie, sê: “Die meeste ouers van vandag se tieners behoort tot die baby boomer-geslag en het grootgeword met ’n nuwe stel waardes wat ekonomiese sukses en materiële gewin beklemtoon het.” Watter waardes leer hierdie ouers hulle kinders? “Baie ouers van vandag stel hoofsaaklik in hulle kinders se akademiese sukses belang”, sê Kawanisji. “Solank hulle kinders leer”, sê sy verder, “is ander dinge by die huis van minder belang of maak dit glad nie saak nie.”

Hoe kan so ’n ongebalanseerde klem op materiële sukses en akademiese prestasie jongmense beïnvloed? In Japan praat die media dikwels van kireroe—’n term wat die manier beskryf waarop jongmense skielik knak onder die druk om te presteer. “Wanneer dit lyk of kinders waansinnig optree”, sê Kawanisji, “is dit dalk omdat hulle voel dat hulle gesin geen beheer oor hulle gedrag uitoefen nie.”

’n Rede vir optimisme

Ons lewe beslis in “kritieke tye . . . wat moeilik is om deur te kom” (2 Timoteus 3:1). Die Bybel doen egter baie meer as om net te voorspel dat mense wat nou lewe, voor meer probleme te staan sou kom.

Die Bybel bied praktiese raad oor hoe jongmense hulle lewens kan verbeter. Jehovah God, die Outeur van die Bybel, wil jongmense baie graag leer hoe om uitdagings die hoof te bied (Spreuke 2:1-6). Hy wil hê dat hulle ’n goeie lewe moet hê. Sy Woord kan “aan die onervarenes skerpsinnigheid . . . gee, aan ’n jong man kennis en denkvermoë” (Spreuke 1:4). Kyk hoe Bybelbeginsels kan help.

[Voetnoot]

[Lokteks op bladsy 5]

Volgens een studie is die kans drie keer groter dat meisies wat met seks eksperimenteer, aan depressie sal ly as dié wat dit nie doen nie

[Venster/Prent op bladsy 6]

Selfvernietigende gedrag

In 2006 het ’n regeringsverslag aan die lig gebring dat kokaïengebruik onder 11- tot 15-jariges in Brittanje binne ’n jaar verdubbel het. Sowat 65 000 jongmense het gesê dat hulle al met die dwelm geëksperimenteer het. In Holland is meer as 20 persent van jongmense tussen 16 en 24 jaar blykbaar in ’n sekere mate afhanklik van alkohol of hulle ly aan ’n alkoholverwante siekte.

Baie jongmense gee op ’n meer direkte manier uiting aan hulle innerlike pyn. Hulle sny, byt of brand hulle eie liggame. “Daar word geraam dat driemiljoen Amerikaners aan selfbesering ly, en een uit elke 200 tieners ly aan chroniese selfbesering”, sê die navorsers Len Austin en Julie Kortum.

[Prent op bladsy 3]

Baie jongmense het nie hegte vriende wat hulle in hulle vertroue kan neem nie