Ly jy aan Stres?
REGOOR die wêreld is die konflik tussen werk en gesinslewe ’n groot probleem. Soos een bron toon, ‘het globalisasie, nuwe tegnologie en die groot druk van ’n 24/7-ekonomie die tradisionele skeidslyn tussen die huis en die werk laat vervaag’. Hierdie veranderinge het ongekende rykdom meegebring. Maar hierdie sukses het mense duur te staan gekom. Een skrywer sê: “Miljoene van ons is oorwerk, ooreis en oorweldig. Ons ondervind eenvoudig te veel stres.”
Voeg nou hierby die ontmoedigende uitwerking van die onlangse ekonomiese resessie. Wêreldwyd het wit- sowel as blouboordjiewerkers hulle werk en hulle huis verloor. Hulle wens waarskynlik dat hulle nog hard kon werk.
Kom ons kyk na die omvang van hierdie probleme:
▶ Onder Europese werkers ly 6 uit 10 aan werkstres.
▶ Onder Amerikaanse werknemers voel 1 uit 3 chronies oorwerk.
▶ Meer as 2 uit elke 3 Kanadese sukkel om ’n balans tussen hulle gesinslewe en werk te vind.
▶ Na raming bring meer as 600 miljoen werkers, of 22 persent van die wêreld se arbeidsmag, meer as 48 uur per week by hulle werk deur.
Hierdie statistieke weerspieël ’n ontsaglike mensetragedie. Volgens sommige studies hou lang en ongereelde werksure verband met swak gesondheid, gespanne verhoudings, slegte ouerskap en egpare wat uitmekaar gaan of skei.
Wat van jou? Werk jy te hard? Of tel jy onder die miljoene wat tans werkloos is? Smag jy na ’n beter balans tussen jou werk en gesinslewe? Indien wel, hoe kan jy dit vind?
[Venster/Prent op bladsy 3]
DIE “TWEEDE SKOF”
“Wanneer ek by die huis kom”, sê een werkende vrou, “moet ek aandete voorberei, die huis skoonmaak, klere was, die kinders gaan haal, hulle met hulle huiswerk help en sorg dat hulle bad en in die bed kom. Teen daardie tyd is ek doodmoeg.” Miljoene van die wêreld se geraamde 1,2 miljard werkende vroue, asook baie mans, kom voor hierdie oorweldigende “tweede skof” te staan. Opnames toon egter dat mans dikwels weier om take in die huis te doen. Vroue dra gewoonlik die grootste deel van hierdie las, of hulle nou sekulêr werk of nie.