‘Werk die neiging tot selfsug teë’
● GIBRALTAR, wat aan die suidelike punt van die Iberiese Skiereiland lê, is al dikwels gedurende sy onstuimige geskiedenis beleër en ingeval. Maar op ’n naweek in Oktober 2008 het die dorp ’n vreedsame “inval” van byna duisend Spanjaarde gesien. Hulle het gekom om ’n Koninkryksaal te bou wat sou dien as ’n vergaderplek vir die twee gemeentes van Jehovah se Getuies in Gibraltar.
Die regering se hoofminister het vir Ontwaak! gesê dat Gibraltar die honderde mense verwelkom wat aan die projek kom werk het. Hy het opgemerk dat hulle “tot die vooruitgang van [die] plaaslike gemeenskap bydra”. Hy het gesê: “Jehovah se Getuies hou die rekord vir die grootste getal mense wat na Gibraltar gekom het om aan ’n enkele projek te werk—en dit boonop vrywillig.”
Die plaaslike owerheid het die projek uit die staanspoor ondersteun en die Getuies goedgunstiglik ’n geskikte stuk grond gegee om hierdie plek van aanbidding te bou. Wat het die owerheid beweeg om so vrygewig te wees?
“Ek glo dat godsvrug ’n positiewe eienskap in enige gemeenskap is”, het die hoofminister verduidelik. “Alle godsdienste in Gibraltar het ’n grondwetlike reg tot godsdiensvryheid, en daarom het die regering ’n sedelike verpligting om nie in godsdienssake te diskrimineer nie. Wat meer is, om ’n gepaste terrein aan die Getuies te voorsien om ’n plek van aanbidding te bou, is ’n belegging in die gemeenskap.
“Ons moet die algemene neiging tot selfsug teëwerk”, het hy bygevoeg. “Julle entoesiastiese groep vrywilligers het getoon dat dit gedoen kan word.”
Ten spyte daarvan dat die bouwerk weens ’n storm uitgestel moes word, is die Koninkryksaal op die Maandag, die derde dag van die projek, voltooi. “Baie van die vrywilligers het aangebied om nog ’n dag in Gibraltar te bly om die projek te voltooi”, het Secundino Nogal, wat toesig gehou het oor die werk, verduidelik. “Ons is daaraan gewoond om probleme te oorkom. Ons boumetode vereis aanpasbaarheid. Maar bowenal vereis dit onselfsugtigheid, en daarom is dit vir ons so bevredigend.”a
[Voetnoot]
a Die Gibraltar Chronicle, ’n plaaslike koerant, het berig: “Op ’n naweek toe die elemente verwoesting gesaai het, het Jehovah [se] Getuies in Gibraltar . . . hulle tempel [Koninkryksaal] in net drie dae met ’n menigte vrywilligers voltooi.”