Maak tyd vir wat belangrik is

“Die oorblywende tyd is kort.”—1 Korintiërs 7:29.

“OM IN die water rond te spring en te plas, beteken nie dat jy swem nie”, skryf Michael LeBoeuf in sy boek Working Smart.

Met ander woorde, om bloot bedrywig te wees en om werklik iets uit te rig, is twee verskillende dinge. Kyk terug oor die afgelope week. Waarvoor het jy tyd gemaak? Waarvoor was jy te besig? Moet jy dalk meer tyd maak vir die dinge wat jou werklik na aan die hart lê?

Kyk wat Jesus oor ons gejaagde tye voorspel het. Hy het gesê dat sy dissipels besig sou wees wanneer hierdie stelsel sy einde nader en God se regverdige nuwe wêreld op hande is. Waarmee sou hulle besig wees? Met die verkondiging van “hierdie goeie nuus van [God se] koninkryk”. Jesus het ook gesê dat die meeste mense te besig sou wees om te luister. Hulle sou behep wees met die alledaagse dinge van die lewe. Hy het bygevoeg dat diegene wat te besig is om ag te slaan op die Koninkryksboodskap, vernietig sou word.—Matteus 24:14, 37-39; Lukas 17:28-30.

Vandag verkondig Jehovah se Getuies die goeie nuus van God se Koninkryk in meer as 230 lande. Soos Jesus voorspel het, wys baie mense hulle weg met die verskoning dat hulle “te besig” is. Maar ons nooi jou om tyd in jou besige lewe in te ruim om te ondersoek wat die Bybel oor God se Koninkryk leer. Ons hoop dat jy, wanneer jy uitvind watter seëninge God vir die mensdom in die vooruitsig stel, sal saamstem dat dit die moeite werd is om na die Bybel se boodskap te luister en daarop ag te slaan—dit is werklik belangrik, iets waarvoor ons tyd moet maak.a

[Voetnoot]