Altyd volop te doen
1 Jehovah se volk is ’n besige volk. Ons het baie verpligtinge ten opsigte van ons gesin, werk en skool. En bowenal is daar altyd “volop . . . in die werk van die Here te doen” (1 Kor. 15:58, NW). Ons moet vir weeklikse gemeentelike vergaderinge voorberei en dit bywoon. Ons word aangemoedig om elke week ’n aandeel aan die veldbediening te hê. Genoeg tyd moet gereeld vir persoonlike en gesinsbybelstudie opsygesit word. Ouere manne en bedieningsknegte het baie gemeentelike toewysings. Soms word ons gevra om behoeftiges te help wat dit waardig is.
2 Party van ons voel dalk nou en dan moedeloos omdat ons soveel het om te doen. Tog kan die besigste mense van die gelukkigste mense wees as ’n balans en die regte perspektief behou word.—Pred. 3:12, 13.
3 Die apostel Paulus was iemand wat volop te doen gehad het. Terwyl hy in sy persoonlike behoeftes voorsien het deur sekulêr as ’n tentmaker te werk, het hy oorvloediger as die ander apostels gearbei. Hy het onvermoeid as ’n evangeliedienaar gewerk deur in die openbaar en van huis tot huis te preek, sonder om sy verantwoordelikhede as ’n herder van die kudde te verwaarloos (Hand. 20:20, 21, 31, 34, 35). Ondanks sy besige rooster was Paulus altyd gretig om meer in Jehovah se diens te doen.—Vergelyk Romeine 1:13-15.
4 Paulus het sy balans en ’n gelukkige hart behou deur op Jehovah vir krag te vertrou. Sy bediening was vir hom lonend en bevredigend (Filip. 4:13). Hy het geweet dat God nie sy werk sou vergeet nie (Hebr. 6:10). Die blydskap daarvan om ander te help om Jehovah te ken, het hom aangespoor (1 Thess. 2:19, 20). Die sekerheid dat hy sy Bybelse hoop sou verkry, het hom aangespoor om ywerig te bly.—Hebr. 6:11.
5 Ons moet ook die goeie resultate van ons arbeid in gedagte hou. Ons teenwoordigheid by en deelname aan weeklikse vergaderinge help om ander op te bou en aan te moedig (Hebr. 10:24, 25). Ons ywerige inspanning om almal met die goeie nuus te bereik, dra by tot die vooruitgang van die gemeente namate belangstelling gekweek word en nuwelinge met ons assosieer (Joh. 15:8). Hulp aan diegene wat dit nodig het, bevorder ’n hegte gees, soos dié in ’n gesin, in die gemeente (Jak. 1:27). Daarbenewens moet ons, soos Paulus, nooit vergeet dat dit Jehovah God behaag as ons met nuttige werke besig is nie. Ons beskou dit as ’n wonderlike voorreg om hom te dien. Daar is vir ons geen beter lewenswyse nie!
6 Daar is ’n bykomende voordeel aan verbonde as ons volop te doen het. Wanneer ons daarmee besig is om ’n gesonde geestelike roetine te volg, voel dit of die tyd baie vinniger verbygaan. Omdat ons besef dat elke nuwe dag ons nader aan die nuwe wêreld bring, aanvaar ons met graagte die vol lewe wat ons nou geniet. Ons besef ook hoe verstandig dit is om besig te bly, aangesien ons dan minder tyd het om by nuttelose wêreldse strewes betrokke te raak.—Ef. 5:15, 16.
7 Daar is beslis volop in die werk van die Here te doen. Maar ons kan gelukkig bly as ons aanhou om op Jehovah God en Jesus Christus, wat ons diens verkwikkend en lonend maak, te vertrou.—Matt. 11:28-30; 1 Joh. 5:3.