Ateïste op ’n kruistog
’N NUWE groep ateïste het in die gemeenskap verrys. Die nuwe ateïste, soos hulle genoem word, wil nie hulle beskouings net vir hulleself hou nie. Hulle voer eerder ’n kruistog waarin hulle “daadwerklik, aggressief en vol ywer probeer om godsdienstige mense oor te haal om hulle beskouing te aanvaar”, het die rubriekskrywer Richard Bernstein geskryf. Hulle het selfs agnostici in die visier, want vir hierdie nuwe ateïste is twyfel buite die kwessie. Vir hulle is daar eenvoudig geen God nie. Uit en gedaan.
“Die wêreld moet wakker skrik uit sy lang nagmerrie van godsdienstigheid”, het die Nobelpryswenner Steven Weinberg gesê. “Enigiets wat ons as wetenskaplikes kan doen om die houvas van godsdiens te verswak, moet gedoen word en kan op die ou end ons grootste bydrae tot die beskawing wees.” Een middel wat ingespan word om hierdie houvas te verswak, is die geskrewe woord, wat blykbaar aansienlike belangstelling wek, aangesien party van die nuwe ateïste se boeke topverkopers geword het.
Godsdiens het vir die nuwe ateïste skietgoed gegee, want mense is keelvol vir die godsdienskonflik, -ekstremisme en -terrorisme wat die wêreld teister. “Godsdiens vergiftig alles”, sê ’n vooraanstaande ateïs. Wat meer is, hierdie ‘gif’ sluit na bewering godsdiensopvattings oor die algemeen in, nie net ekstremistiese beskouings nie. Grondleerstellings, sê die nuwe ateïste, moet aan die kaak gestel word, die rug toegekeer word en vervang word deur logiese denke en rede. Mense moenie bang wees om openlik te praat oor die “hope lewensverwoestende nonsens” wat in die Bybel en die Koran gevind word nie, skryf die ateïs Sam Harris. “Ons kan ons nie meer die weelde van . . . politieke korrektheid veroorloof nie.”
Terwyl die nuwe ateïste godsdiens afkraak, hemel hulle die wetenskap op, en party beweer selfs dat die wetenskap bewys dat God nie bestaan nie. Maar is dit die geval? Trouens, kan die wetenskap so iets bewys? “Ná verloop van tyd”, sê Harris, “gaan die een kant hierdie geskil loshande wen, en die ander kant gaan ver verloor.”
Watter kant dink jy gaan die geskil wen? Terwyl jy hieroor nadink, kan jy jou afvra: ‘Is geloof in ’n Skepper op sigself skadelik? Sal die wêreld ’n beter plek wees as almal ateïste is?’ Kom ons kyk wat party gesiene wetenskaplikes en filosowe al oor ateïsme, godsdiens en die wetenskap gesê het.