Wat sal jy vir ’n ateïs sê?
1 “Ek is ’n ateïs”, het ’n professor van Pole vir ’n sendeling in Afrika gesê. Die suster kon egter ’n bespreking met die vrou hê en het vir haar die boek Lewe—Hoe het dit hier gekom? Deur evolusie of deur die skepping? gegee. Toe die sendeling die volgende week teruggaan, het die professor vir haar gesê: “Ek is nie meer ’n ateïs nie!” Sy het die hele Skepping-boek gelees en het toe vir ’n Bybelstudie gevra. Wat kan jy doen om met welslae vir diegene te getuig wat sê dat hulle nie aan God glo nie? Kom ons kyk eers na die verskillende redes waarom mense so sê.
2 Faktore wat tot ongeloof bydra: Nie alle ateïste is so grootgemaak nie. Baie is aan die een of ander vorm van godsdiens blootgestel en het voorheen aan God geglo. Maar ernstige gesondheids- of gesinsprobleme of sekere ongeregtighede wat hulle ondervind het, het hulle geloof verswak. Kursusse op skool of by inrigtings vir hoër onderwys het ’n negatiewe invloed op ander se idee van God gehad. Let op die volgende voorbeelde van ateïste wat uiteindelik ’n sterk geloof in Jehovah God ontwikkel het en sy Getuies geword het.
3 ’n Vrou in Parys is met ’n aftakelende beensiekte gebore. Hoewel sy as ’n Katoliek gedoop was, het sy haarself ’n ateïs genoem. Toe sy die nonne gevra het waarom God toegelaat het dat sy met so ’n gebrek gebore word, was hulle antwoord: “Want hy het jou lief.” Sy het geweier om daardie onsinnige gedagte te aanvaar. Dan is daar ’n jong persoon in Finland met ’n ongeneeslike spiersiekte wat aan ’n rolstoel gekluister is. Sy ma het hom na ’n lid van ’n Pinksterkerk geneem wat beweer het dat hy siek mense gesond maak. Maar daar was geen wonderdadige genesing nie. Gevolglik het die jong man belangstelling in God verloor en ’n ateïs geword.
4 ’n Man in Honduras is as ’n Katoliek grootgemaak, maar het toe sosialistiese filosofie en ateïsme gaan studeer. Universiteitsopleiding het hom oortuig dat die mens die produk van evolusie is, en hy het opgehou om aan God te glo. ’n Vrou in die Verenigde State is eweneens as ’n Metodis grootgemaak. Op universiteit het sy sielkundeklasse geloop. Hoe het dit haar geloof beïnvloed? Sy het gesê: “In een somer het hulle elke greintjie geloof wat ek in godsdiens gehad het, vernietig.”
5 Bereik die hart van opregtes: Baie mense wat sê dat hulle nie aan God glo nie, sal graag wil weet of daar ’n oplossing is vir gesondheidsprobleme, gesinsprobleme, ongeregtigheid, ensovoorts. Hulle stel opreg daarin belang om antwoorde te vind op vrae soos: ‘Waarom bestaan daar iets soos boosheid?’ ‘Waarom gebeur slegte dinge met goeie mense?’ en ‘Wat is die betekenis van die lewe?’
6 ’n Man en vrou wat in Switserland woon, is albei as ateïste grootgemaak. Toe hulle die eerste keer met die waarheid in aanraking gekom het, was hulle reaksie negatief. Maar hulle het ernstige gesinsprobleme gehad en het ’n egskeiding oorweeg. Toe die Getuie hulle weer besoek het, het sy die paartjie uit die Bybel gewys hoe om hulle probleme op te los. Die paartjie was verstom oor die praktiese raad wat die Skrif bevat, en hulle het tot ’n Bybelstudie ingestem. Hulle huwelik is versterk, hulle het geestelik vordering gemaak en is gedoop.
7 Wat kan jy vir ’n ateïs sê: Wanneer iemand vir jou sê dat hy ’n ateïs is, moet jy probeer uitvind waarom hy so sê. Is dit weens die opvoeding wat hy ontvang het, probleme wat hy ondervind het of godsdienshuigelary en valse leerstellings wat hy gesien het? Jy kan hom vra: “Het jy nog altyd so gevoel?” of “Waarom het jy tot hierdie gevolgtrekking gekom?” Sy antwoord sal jou help om te besluit wat om te sê. Wanneer kragtige redenasie nodig is, is die boek Is daar ’n Skepper wat vir jou omgee? dalk net wat jy nodig het.
8 Jy kan ’n gesprek met ’n ateïs verder voer deur te vra:
◼ “Het jy al ooit gewonder: ‘As daar ’n God is, waarom is daar soveel lyding en ongeregtigheid in die wêreld?’ [Wag vir ’n antwoord.] Kan ek vir jou die Bybelse beskouing oor hierdie onderwerp wys?” Lees Jeremia 10:23. Vra sy mening oor die teks nadat jy dit gelees het. Wys dan vir hom bladsye 16 en 17 in die brosjure Will There Ever Be a World Without War? Of in plaas daarvan kan jy hoofstuk 10 in die Skepper-boek gebruik. Nooi hom om die publikasie te neem en die materiaal te lees.—Vir verdere inligting, sien die Redenering-boek, bladsye 165-6.
9 Nie alle ateïste sal weliswaar die waarheid aanneem nie. Maar daar is baie wat bereid is om ’n ander beskouing te ondersoek. Gebruik logika, oorreding en bowenal die krag van God se Woord om hulle te help om die waarheid in te sien.—Hand. 28:23, 24; Heb. 4:12.