“Jy het positief gebly”
● Camila ly aan bloedarmoede, neurologiese probleme en ’n groeigestremdheid. Gevolglik was sy op agtjarige ouderdom net 75 sentimeter lank. Camila se ouers, wat Jehovah se Getuies is, het besluit om haar na ’n mediese konferensie te neem wat gehou is by ’n plaaslike ouditorium in hulle tuisdorp in Argentinië. Hulle het in die tweede ry gesit by die konferensie, wat deur 500 mense bygewoon is.
Tydens ’n lesing het die spreker, wat ’n dokter is, na Camila gewys as ’n voorbeeld van iemand wat skynbaar goeie gesondheid geniet. Hy was nie bewus van die meisie se ouderdom en mediese toestand nie en het gevra: “Hoe oud is die baba?”
“Sy is agt jaar oud”, het Camila se ma, Marisa, gesê.
“Het jy gesê agt maande oud?” het die dokter gevra.
“Nee, agt jaar oud”, het Marisa bevestig.
Die dokter se belangstelling is gewek en hy het die ma en dogter na die verhoog genooi om ’n paar vrae te beantwoord. Nadat Marisa die toetse beskryf het wat dokters op Camila gedoen het, asook die behandelings wat hulle probeer het, het die dokter gesê: “Daar is ma’s wat huil as hulle kinders doodgewone griep het. Maar jy het positief gebly ná sewe jaar van behandelings en nadat jy alles moontlik vir Camila gedoen het. Hoe het jy dit reggekry?”
Marisa het hierdie geleentheid benut en vir die gehoor vertel van haar Bybelse hoop om in ’n regverdige nuwe wêreld te lewe waar alle siektes en lyding, en selfs die dood, nie meer sal bestaan nie (Jesaja 33:24; Openbaring 21:3, 4). Laastens het Marisa die wêreldwye broederskap beskryf wat Jehovah se Getuies geniet en verduidelik hoe die Getuies se liefde vir mekaar hulle help om beproewinge en ander probleme in die lewe te verduur.—Johannes 13:35.
Ná die program het ’n vrou na Marisa toe gekom en gevra dat sy haar meer vertel van die punte wat sy bespreek het. Die vrou was gretig om meer te leer en het ’n gratis tuisbybelstudie aanvaar, wat regoor die wêreld deur Jehovah se Getuies aangebied word vir mense wat ’n opregte begeerte het om die Bybel en God se wonderlike voorneme vir die mensdom te verstaan.
[Prent op bladsy 25]
Die agtjarige Camila saam met haar ma, Marisa