Koninkryksverkondigers berig

“Vurig van gees” in Mexiko

“DIT lyk asof die hele land gloei en gons met aktiwiteit.” Dit is die kommentaar van die Wagtoringgenootskap se takkantoor in Mexiko, en hoe waar is daardie opmerking tog nie! Die ywerige bedrywigheid in daardie land blyk uit die feit dat daar teen Augustus 70 agtereenvolgende maandelikse hoogtepunte was, met ’n uiteindelike verkondigerhoogtepunt van 277 436. Daarbenewens is meer as 400 000 Bybelstudies gerapporteer en is die Gedenkmaal verlede jaar deur 1 046 291 bygewoon. Wat ’n goeie grondslag vir toekomstige groei!

’n Hoogtepunt van 1989 was ’n verandering in die status van Jehovah se Getuies in Mexiko. Gevolglik kon die Bybel vir die eerste keer in die predikingswerk van huis tot huis gebruik word en kon vergaderinge met gebed geopen word. Dit het onmiddellik ’n uitwerking gehad. Binne twee maande het die getal verkondigers met meer as 17 000 toegeneem.

Die broers se vreugde oor hierdie ontwikkeling kan in hulle kommentare gesien word. Een het geskryf: “Toe die brief in die gemeente gelees is, is dit twee maal deur spontane applous onderbreek. Dit was opwindend!” Iemand anders het gesê: “Ons kon die vreugdetrane nie keer nie. Die gevolge kan gesien word in beter stiptelikheid. Almal wil vir die openingsgebed teenwoordig wees.”

“In ons gebied”, sê ’n ander Getuie, “het ’n vrou wat betrokke is by die Bybelstudieprogram van die Katolieke Kerk gesê: ‘[Die Getuies] het ons vroeër bloot met hulle woorde en hulle tydskrifte stomgeslaan, maar noudat hulle die Bybel by die deure gebruik, is ons verlore!’”

Jehovah se Getuies in Mexiko beklemtoon ook informele getuieniswerk met die Bybel. Een suster het ’n vrou genader wat haar gevra het wat sy van aborsie dink. Die Getuie het geantwoord: “Wat ek dink, is nie so belangrik as wat die Bybel sê nie.” Nadat sy etlike tekste gelees het, het die suster geredeneer: “Lewe is baie belangrik vir die Skepper, selfs die lewe van die ongeborenes.”

Die vrou het toe gesê dat sy haar eerste baba verwag, maar dat kliniese ondersoeke dit laat lyk het asof die baba abnormaal sou wees. Haar dokter wou hê dat sy ’n aborsie moet ondergaan en haar man het saamgestem, maar sy self was nie seker nie. Die verkondiger het verder met haar uit die Bybel geredeneer, haar vertel wat haar naam is, en toe is hulle uitmekaar.

Vyf jaar later by ’n streekbyeenkoms wou ’n egpaar met ’n kind van vier die suster en haar man sien. Dit was dieselfde vrou! Wat het gebeur? Na haar gesprek met die Getuie het die vrou besluit om haar baba te hê. Haar dokter het geweier om haar weer te sien en haar man het selfs gedreig om haar te verlaat as die baba misvormd gebore word. Toe die tyd vir die geboorte aangebreek het, het sy die eerste dokter wat sy kon vind om hulp genader.

Dadelik na die baba gebore is, het die dokter gesê: “Veels geluk, Mamma! Jy het ’n pragtige dogtertjie.” Sy kon haar ore nie glo nie en het gevra dat hy die baba deeglik ondersoek. Toe het sy hom haar verhaal vertel. Die dokter kon net sê: “Dit is ’n wonderwerk.” Die vrou was verheug dat sy die moed gehad het om Jehovah se beskouing van die heiligheid van lewe te respekteer, en sy het haar pragtige, gesonde baba na die suster vernoem. Toe sy sterk genoeg was, het sy die Getuies dadelik opgesoek en begin om die Bybel saam met hulle te bestudeer. Binne ’n jaar is sy en haar man gedoop.

Die apostel Paulus het gemaan: “Wees vurig van gees; dien die Here” (Romeine 12:11). Soos alle ware Christene, reageer Jehovah se Getuies in Mexiko van ganser harte op hierdie aansporing. Dit is waarom die hele land gloei en gons met geestelike aktiwiteit. Hoe ryklik seën Jehovah tog sy getroue knegte!