Wat lok mense na die okkulte?
DIE antwoord op hierdie vraag kan grootliks afhang van waar iemand woon, sowel as wat sy of haar godsdiensopvattings en kulturele agtergrond is. Wat lok mense in jou omgewing na die okkulte? Dalk word hulle deur een van die volgende verlok.
● Nuuskierigheid Mense is van nature nuuskierig, en die okkulte is vol misterie. Daarom wonder party of daar ’n geheime mag agter die okkulte is. Ander eksperimenteer miskien met ’n ouijabord of lees hulle horoskoop om te sien of wat dit sê bewaarheid word. Dan is daar ander wat dalk ’n séance bywoon of ’n spiritistiese medium raadpleeg.
● Vermaak In onlangse jare was daar ’n merkbare toename in vermaak—in die vorm van boeke, flieks en rekenaarspeletjies—wat gebaseer is op okkulte temas en eertydse heidense godsdiensbygelowe. Van hierdie vermaak bevat ook eksplisiete geweld en seks.
● Sorge oor die dag van môre Die Bybel het voorspel dat “daar in die laaste dae kritieke tye sal wees wat moeilik is om deur te kom” (2 Timoteus 3:1). Ons ondervind inderdaad moeilike tye, en baie mense raadpleeg okkultiste—soos astroloë, heldersiendes, handlesers, spiritistiese mediums en toordokters—vir leiding. “Dit is een van die min bedrywe wat bestand is teen resessies”, het een spiritistiese medium gesê. “Mense kom nie gewoonlik na jou toe wanneer hulle gelukkig is nie.” ’n Heldersiende in Kanada het gesê: “Ewe skielik ontvang ek oproepe van beroepsmense wat van hulle privaat kantoortelefoon bel, of hulle staan in die gang en fluister op hulle selfoon.” Sy het bygevoeg: “Dit is mense wat in die verlede gewoonlik skepties was of nie heeltemal gemaklik was met die idee om ’n spiritistiese medium te raadpleeg nie.”
● Fisiese siekte In party lande verloor mense wat ernstig siek is, dikwels vertroue in dokters en wend hulle hulle tot tradisionele genesers wat van okkulte metodes gebruik maak. Daar word dalk vir hulle gesê dat hulle siek is omdat ’n vloek op hulle rus of omdat hulle getoor is. Om hiervan bevry te word, raadpleeg die siek persoon se vriende of familie moontlik ’n okkultis, wat dalk baie geld vra vir sy dienste.
● Begeerte na beskerming en geluk In party gebiede in Afrika huur dorpsbewoners ’n “profeet” van ’n charismatiese kerk om bose geeste uit die gemeenskap uit te dryf. Tydens rituele word drankies en “heilige water” gedrink. Op ander plekke raadpleeg mense spiritistiese mediums om geluk oor ’n nuwe huis of oor ’n graf te bring.
● Gevare vir kinders In Papoea-Nieu-Guinee weier ’n moeder moontlik om saans die huis met haar pasgebore baba te verlaat. Waarom? Sy is bang dat bose geeste die baba dalk leed sal aandoen. In Uganda bind moeders gewoonlik toutjies, waaraan daar soms krale en skulpe is, om die polse en enkels van hulle babas om hulle teen leed te beskerm.
● Dood van ’n geliefde Die Britse skrywer sir Arthur Conan Doyle het sy seun, broer, swaer en susterskind in die Eerste Wêreldoorlog verloor. Doyle en sy vrou was verbysterd en desperaat en het séances bygewoon, in die hoop om met hulle oorlede seun te praat. Vandag raadpleeg baie mense ook spiritistiese mediums in ’n poging om met afgestorwe dierbares te kommunikeer. In party lande leer tradisionele godsdienste en sogenaamde Christenkerke dat die dood die gevolg is van ’n kwaadwillige daad deur bose geeste. Verskeie verpligte, duur rituele word dalk uitgevoer om ’n reeks sterftes in ’n gemeenskap te voorkom.
● Vrees vir die dooies Opvattings aangaande die dood en die dooies het ’n geweldige invloed op die mensdom gehad. In baie lande voer mense dus allerhande rituele uit, insluitende selfbesering, om die dooies te paai of om hulle liefde vir hulle te “bewys”. Onder party volke van die Stille Oseaan-eilande word weduwees of wewenaars gedwing om maande lank swart klere te dra en te rou. Gedurende hierdie tyd word hulle in ’n huis toegesluit en mag hulle nie die oorledene se gunstelingkosse eet nie. Mense wat hierdie gebruik beoefen, kan neerslagtig raak, siek word weens honger of selfs doodgaan.
Dit is duidelik dat daar baie dinge is wat mense verlok om by die okkulte betrokke te raak. Hoe belangrik is dit tog dat ons weet wat die ware bron van okkulte leringe is! Kom ons ondersoek dus wat die Bybel daaroor sê, aangesien dit die enigste boek is wat ons die geheelbeeld gee.