Het jy realistiese doelwitte?

● Wat wil jy uit die lewe hê? Het jy redelike verwagtinge of dagdroom jy oor dinge wat miskien buite jou bereik is? ’n Goeie waarnemer van die menslike natuur het hierdie wyse raad gegee: “Wat die mens het, is beter as wat hy begeer. Ook hier kom dit tot niks. Dit is ’n gejaag na wind.”—Prediker 6:9, Nuwe Afrikaanse Bybelvertaling.

“Wat die mens het”, verwys na ’n mens se huidige omstandighede en na die werklikheid. Daar is weliswaar niks daarmee verkeerd om jou lewe te probeer verbeter nie. Maar die punt wat die Bybel maak, is dat wyse mense nie onrealistiese doelwitte nastreef nie. Dit kan ’n strewe wees na roem, rykdom, die ideale huweliksmaat of volmaakte gesondheid.

Wat meer is, dié wat ’n sekere doelwit, soos materiële rykdom, bereik, sal dalk net nog meer wil hê. Die Bybel sê reguit: “Iemand wat silwer liefhet, sal nie genoeg kry van silwer nie, ook nie iemand wat rykdom liefhet, van inkomste nie. Ook dit is nietigheid” (Prediker 5:10). Mense wat geestelik wys is, probeer dus tevrede wees met wat hulle het. Ja, hulle erken hierdie waarheid: “Ons het niks in die wêreld ingebring nie, en ook kan ons niks uitdra nie.”—1 Timoteus 6:7.

Die menslike natuur is van so ’n aard dat mense die grootste geluk sal ervaar as hulle hulle geestelike behoeftes bevredig (Matteus 5:3). Hoe kan ons dit doen? Jesus Christus het gesê: “Die mens sal nie van brood alleen lewe nie, maar van elke woord wat uit Jehovah se mond kom” (Matteus 4:4). Hierdie kosbare woorde word in die Bybel gevind, en dit is tot almal se beskikking.

’n Voorbeeld van sulke woorde word in Psalm 37:4 gevind. Dit sê: “Verlustig jou . . . in Jehovah, en hy sal jou die versoeke van jou hart gee.” As die almagtige God sal Jehovah vir sy getroue aanbidders dinge gee wat geen mens kan gee nie: volmaakte gesondheid, materiële sekuriteit en die ewige lewe in die Paradys op aarde (Lukas 23:43; Openbaring 21:3, 4). Dit is nie onrealisties om ons vertroue in hierdie woorde te stel nie.