Ons beskou die wêreld
Volgens 76,3 persent van volwassenes met wie ’n onderhoud in Duitsland gevoer is, is flankeerdery “heeltemal onskadelik” en “plaas dit geen verpligting op die betrokkenes nie”. Byna die helfte het gesê dat ’n getroude persoon maar met ’n vreemdeling kan flankeer.—APOTHEKEN UMSCHAU, DUITSLAND.
Volgens ’n landwye opname in Rusland meen 48 persent van die bevolking dat terroristeaanvalle iets is wat ’n mens “heeltemal te wagte” kan wees en wat “algemeen geword het in die lewe”.—KOMMERSANT, RUSLAND.
“In ’n onbeskaamde poging wat ’n mens herinner aan ’n Middeleeuse beleëring”, het Mexikaanse smokkelaars onlangs grensbeamptes op ’n vindingryke manier probeer ontduik—hulle het ’n “stewige werptuig”, wat op ’n sleepwa vasgemaak is en met ’n sterk rek toegerus is, gebruik “om dwelms noordwaarts te skiet” oor die Amerikaanse grensdraad.—DIE REUTERS-NUUSDIENS, VSA.
“Twee uit vyf swangerskappe” in die stad New York word met ’n aborsie beëindig. Hierdie getalsverhouding het “oor meer as ’n dekade byna onveranderd gebly”.—THE NEW YORK TIMES, VSA.
Plaagbestryders was verbaas toe hulle geroep is om ’n jakkals te vang op die 72ste verdieping van ’n wolkekrabber wat in aanbou is in die middestad van Londen. Die dier, wat “gelewe het van oorskietkos wat die bouers daar laat lê het”, is daar naby vrygelaat.—THE TELEGRAPH, LONDEN.
Russies-Ortodokse priesters kan hulle verkiesbaar stel
“Die Raad van Biskoppe van die Russies-Ortodokse Kerk het daartoe ingestem dat sy geestelikes hulle onder buitengewone omstandighede vir politieke ampte verkiesbaar kan stel ten einde die kerk teen skeurings en ander regstreekse bedreigings te beskerm”, berig die nuusagentskap RIA Novosti. Volgens ’n verklaring van die biskoppe ontstaan sulke omstandighede wanneer dit nodig is om “te stry teen magsgroepe, insluitende dié wat skeurings veroorsaak en dié van ander gelowe, wat verkiesingsmag teen die Ortodokse Kerk probeer gebruik”.
Nuwe wetlike probleme
Metodes wat in voortplantingsgeneeskunde gebruik word, en wat eens as wetenskapsfiksie beskou is, skep nou nuwe wetlike dilemmas. “Elke jaar word al hoe meer babas gebore uit sperm of embrio’s wat maande of jare lank geberg is”, verduidelik The Wall Street Journal. “In party gevalle is die een ouer reeds dood, gewoonlik die vader.” In die Verenigde State ontvang party weeskinders maandelikse uitbetalings van die owerheid. Maar die wette oor die kwessie of sulke uitbetalings gemaak moet word as die kind ná die dood van een van die ouers verwek is, verskil van staat tot staat. “Tegnologie het ’n vlak bereik wat die wet nooit gedroom het moontlik sou wees nie”, sê Sonny Miller, ’n regsgeleerde van Minnesota.