LES 38
Waardeer die geskenk van lewe
Die lewe kan vol wonderlike ondervindinge wees. Selfs wanneer ons probleme het, kan ons gewoonlik nog steeds sekere dinge in die lewe geniet. Hoe kan ons wys dat ons die geskenk van lewe waardeer? En wat is die belangrikste rede hoekom ons dit moet doen?
1. Hoekom moet ons lewe waardeer?
Ons moet lewe waardeer, want dit is ’n geskenk van ons liefdevolle Vader, Jehovah. Hy is “die bron van lewe” – hy het alle lewende dinge gemaak (Psalm 36:9). “Hy [gee] self aan alle mense lewe en asem en alles” (Handelinge 17:25, 28). Jehovah gee ons wat ons nodig het om aan die lewe te bly. En hy maak dit ook vir ons moontlik om die lewe te geniet. – Lees Handelinge 14:17.
2. Hoe kan ons vir Jehovah wys dat ons die geskenk van lewe waardeer?
Van die oomblik dat jou ma swanger geword het met jou, het Jehovah vir jou omgegee. In ’n gebed wat Jehovah in sy Woord laat neerskryf het, het een van sy aanbidders, Dawid, vir hom gesê: “U oë het my selfs as ’n embrio gesien” (Psalm 139:16). Jou lewe is baie kosbaar vir Jehovah. (Lees Matteus 10:29-31.) Dit sal hom baie seermaak as enige iemand aspris ’n einde maak aan ’n mens se lewe, selfs al is dit sy of haar eie lewea (Eksodus 20:13). Dit sal Jehovah ook seermaak as ons ons lewe onnodig in gevaar gestel het of nie stappe geneem het om ander se lewens te beskerm nie. Wanneer ons dinge doen om ons lewe te beskerm en die lewens van ander respekteer, wys ons dat ons die wonderlike geskenk van lewe waardeer.
SOEK DIEPER
Kyk na ’n paar maniere hoe jy kan wys dat jy die geskenk van lewe waardeer.
3. Kyk na jou gesondheid
Toegewyde Christene gebruik hulle hele lewe om Jehovah te dien. Dit is asof hulle hulle liggame as ’n offerande vir God aanbied. Lees Romeine 12:1, 2, en bespreek dan hierdie vrae:
Wat moet jou motiveer om na jou gesondheid te kyk?
Wat is ’n paar maniere hoe jy dit kan doen?
4. Wees bewus van jou veiligheid en die veiligheid van ander
Die Bybel moedig ons aan om dinge te vermy wat gevaarlik is. Speel die VIDEO om ’n paar dinge te leer wat jy kan doen om veilig te wees.
Lees Spreuke 22:3, en bespreek dan hoe jy en ander veilig kan wees . . .
in jou huis.
by jou werk.
wanneer jy sport speel.
wanneer jy ’n voertuig bestuur of in een ry.
5. Respekteer die lewe van ’n ongebore kind
Dawid het verduidelik dat Jehovah belangstel in alles wat gebeur terwyl ’n kind in sy ma se baarmoeder groei. Lees Psalm 139:13-17, en bespreek dan hierdie vraag:
In Jehovah se oë, begin ’n persoon se lewe wanneer die ma swanger word of wanneer sy geboorte gee?
Jehovah se wette vir eertydse Israel het ma’s en hulle ongebore kinders beskerm. Lees Eksodus 21:22, 23, en bespreek dan hierdie vrae:
Hoe het Jehovah gevoel as iemand die lewe van ’n ongebore kind per ongeluk beëindig het?
Hoe sou hy voel as iemand dit aspris gedoen het?b
Hoe voel jy oor God se beskouing?
Selfs ’n vrou wat lewe waardeer, kan voel dat aborsie haar enigste opsie is. Lees Jesaja 41:10, en bespreek dan hierdie vrae:
As daar druk op ’n vrou geplaas word om ’n aborsie te hê, vir wie moet sy vra om haar te help? Hoekom?
PARTY MENSE SÊ: “’n Vrou het die reg om te kies of sy ’n aborsie sal kry of nie – dis haar liggaam.”
Wat oortuig jou dat die lewens van ’n ma en haar ongebore baba vir Jehovah kosbaar is?
WAT ONS GELEER HET
Die Bybel leer ons om Jehovah se geskenk van lewe lief te hê, te respekteer en te beskerm. Dit sluit ons eie lewe en die lewens van ander in.
Hersiening
Hoekom is mense se lewens vir Jehovah kosbaar?
Hoe voel Jehovah wanneer iemand aspris ’n einde maak aan ’n mens se lewe?
Hoekom waardeer jy die geskenk van lewe?
LEER MEER
Hoe kan ons vir Jehovah dankie sê vir die geskenk van lewe?
Kry die antwoord op die vraag: Sal God ’n vrou vergewe wat ’n aborsie gehad het?
Leer hoe God se beskouing van lewe ons moet help om ontspanning te kies wat nie ons lewe in gevaar sal stel nie.
“‘Waaghalssport’—Moet jy jou lewe in gevaar stel?” (Ontwaak!, 8 Oktober 2000)
Wat as ’n persoon daaraan dink om homself dood te maak? Kyk hoe die Bybel kan help.
“Ek wil doodgaan – Kan die Bybel my help as ek daaraan dink om selfmoord te pleeg?” (Web-artikel)
a Jehovah gee baie om vir dié wie se hart gebreek is (Psalm 34:18). Hy verstaan hartseer gevoelens wat kan veroorsaak dat mense daaraan dink om hulleself dood te maak, en hy wil hulle help. Om te sien hoe hy iemand wat so voel, kan help, lees die artikel “Ek wil doodgaan – Kan die Bybel my help as ek daaraan dink om selfmoord te pleeg?” in die deel LEER MEER in hierdie les.
b Dié wat ’n aborsie gehad het, hoef nie oorweldig te voel as gevolg van skuldgevoelens nie – Jehovah kan hulle vergewe. Vir meer inligting, sien die artikel “Wat sê die Bybel oor aborsie?” in die deel LEER MEER in hierdie les.