Tot diens beweeg
WAT sou 24 egpare in die fleur van hulle lewe beweeg om hulle familie, vriende en bekende omgewing te verlaat om sendingwerk in vreemde lande te gaan doen? Waarom sou hulle graag wou gaan na plekke soos Papoea-Nieu-Guinee en Taiwan, sowel as lande in Afrika en Latyns-Amerika? Kan dit avontuurlus wees? Nee. Hulle word eerder beweeg deur ’n opregte liefde vir God en hulle naaste.—Matteus 22:37-39.
Wie is hierdie mense? Hulle is die gegradueerdes van die 109de klas van die Wagtoring-Bybelskool Gilead. Op Saterdag 9 September 2000 het altesaam 5 198 byeengekom by die Wagtoring-onderrigsentrum—wat by Patterson, New York, geleë is—en by ander nabygeleë ouditoriums om na liefdevolle raad te luister wat die gegradueerdes kan help om suksesvolle sendelinge te wees.
Die voorsitter van die program was Stephen Lett, ’n lid van die Onderrigtingskomitee van die Bestuursliggaam van Jehovah se Getuies. Sy inleidingskommentare het gehandel oor Matteus 5:13: “Julle is die sout van die aarde.” Broer Lett het verduidelik dat Jesus se woorde beslis op die graduerende studente van toepassing is. Sout het byvoorbeeld die vermoë om dinge smaaklik te maak. Net so is sendelinge in figuurlike sin soos sout vanweë hulle doeltreffende predikingswerk.
Aanmoedigende afskeidswoorde
Broer Lett het toe ’n paar broers wat Jehovah al lank dien na die verhoog genooi, en hulle het kort maar kragtige skriftuurlike toesprake gehou. Die eerste een was John Wischuk, wat in die Skryfafdeling dien. Sy tema, “Die kortste Psalm bevorder die sendinggees”, was op Psalm 117 gebaseer. Vandag moet daar vir “nasies” en “volke” regoor die wêreld getuig word van Jehovah en sy Koninkryk. Die studente is aangemoedig om Psalm 117 (NW) te vervul deur ander aan te spoor om ‘Jah te loof’.
Die voorsitter het daarna Guy Pierce van die Bestuursliggaam na vore genooi. Sy toespraak was oor die onderwerp: “Wees buigsaam, maar ferm.” God se Woord is onveranderlik. Jehovah God word in Deuteronomium 32:4 die Rots genoem, en tog laat sy Woord ruimte vir buigsaamheid omdat dit vir alle taalgroepe en kulture geskryf is—ja, vir die hele mensdom. Die studente is aangespoor om God se Woord te verkondig, om toe te laat dat die boodskap daarin die hart en gewete van mense raak (2 Korintiërs 4:2). “Neem ’n ferm standpunt in vir regte beginsels, maar wees buigsaam. Moenie neersien op die mense in jou toewysing omdat hulle kultuur anders is nie”, was die raad van broer Pierce.
Karl Adams, een van die Gileadinstrukteurs, wat al byna 53 jaar by die wêreldhoofkwartier dien, het hulle toegespreek oor die gedagteprikkelende tema: “Waarheen nou?” Die 24 egpare het weliswaar sendingtoewysings in 20 verskillende lande regoor die wêreld ontvang, maar die vraag is geopper: As jy eers daar is en jy het dit gesien, wat dan? Ons lewe in ’n wêreld wat ’n rustelose gees het. Mense wil na nuwe plekke toe gaan en nuwe dinge doen vir hulle eie genot. Aan die ander kant het die studente ’n toewysing van Jehovah ontvang na die plek waar hy wil hê hulle op onselfsugtige wyse na sy “skape” moet omsien. Hulle moenie soos persone in eertydse Israel wees wat weens selfsug die geleentheid verbeur het om deur Jehovah gebruik te word om die hele mensdom te seën nie. Hulle moet eerder Jesus Christus navolg, wat altyd sy Vader se wil op onselfsugtige wyse gedoen het en wat gehoorsaam was in elke situasie waarin hy hom bevind het.—Johannes 8:29; 10:16.
“Bewaar die diep dinge van God as ’n skat” was die tema waaroor Wallace Liverance, die registrateur van Gileadskool, gepraat het. Die Skrif vergelyk God se Woord op verskeie plekke met rykdom, kosbare edelstene, edelmetale, en dinge wat uiters gesog is. Spreuke 2:1-5 toon dat ons, as ons “die kennis van God” wil vind, daarna moet soek soos na “verborge skatte”. Die spreker het die studente aangemoedig om aan te hou delf in die diep dinge van God terwyl hulle in hulle nuwe toewysings dien. Broer Liverance het geredeneer: “Dit is prakties, want dit bou geloof en vertroue in Jehovah op en dit sal jou meer vasbeslote maak om in jou toewysing te bly. Dit sal jou help om met oortuiging te praat en om ’n bekwamer onderrigter te wees wanneer jy God se voornemens aan ander verduidelik.”
Deur ’n klaskameragtergrond te gebruik, het ’n ander Gileadskoolinstrukteur ’n oorsig gegee van hoe Jehovah die studente se velddiensbedrywighede gedurende die afgelope vyf maande geseën het. Lawrence Bowen het die apostel Paulus se woorde in Handelinge 20:20 aangaande sy openbare bediening in Efese aangehaal en beklemtoon dat Paulus van alle geleenthede gebruik gemaak het om ’n getuienis te gee. Die studente se ondervindinge het getoon dat diegene in ons tyd wat deur liefde vir God en hulle naaste beweeg word, soos die apostel Paulus, nooit aarsel om die waarheid te verkondig en die krag van God se Woord in ander te laat werk nie. Dit bring Jehovah se ryk seën mee.
Hoor van diegene met ondervinding
Terwyl hierdie Gileadklas aan die gang was, kon die studente die bykomende seën geniet om te assosieer met Takkomiteelede uit 23 lande, wat ook by die Onderrigsentrum in Patterson was vir spesiale opleiding. Leon Weaver en Merton Campbell van die Diensafdeling het onderhoude gevoer met verskeie Takkomiteelede, waarvan party self Gileadgegradueerdes was. Dit was vir die studente en hulle familie en vriende gerusstellend om van hierdie ervare sendelinge te hoor.
Die raad aan die graduerende klas om hulle te help om in hulle buitelandse toewysings aan te pas, het opmerkings soos dié ingesluit: “Wees positief. As jy iets ondervind wat vir jou baie vreemd is of wat jy nie kan verstaan nie, moenie moed opgee nie. Vertrou op Jehovah”; “leer om tevrede te wees met wat beskikbaar is, en vertrou dat Jehovah jou van die lewensbenodigdhede sal voorsien”. Ander kommentare het raad bevat om die studente te help om hulle vreugde in hulle toewysing te behou. Van die kommentare was: “Moenie die toewysing wat jy het, vergelyk met die plek waar jy vandaan kom nie”; “leer die plaaslike taal aan en praat dit reg sodat jy met mense kan kommunikeer”; “leer ken die gebruike en kultuur van die mense, want dit sal jou help om in jou toewysing te bly”. Hierdie kommentare was vir die nuwe sendelinge baie aanmoedigend.
Ná die onderhoude het David Splane, ’n oudsendeling en ’n gegradueerde van die 42ste klas van Gilead wat nou as ’n lid van die Bestuursliggaam van Jehovah se Getuies dien, die hooftoespraak ontwikkel oor die interessante tema: “Studente of gegradueerdes—Watter een?” Hy het die graduerende klas gevra: “Hoe gaan jy jouself beskou wanneer jy na jou sendingtoewysing gaan? As ’n gegradueerde wat alles omtrent sendingwerk weet of as ’n student wat nog baie moet leer?” Broer Splane het daarop gewys dat die verstandige gegradueerde homself as ’n student beskou. Die sendelinge moet die beskouing hê dat almal wat hulle in hulle sendingtoewysing teëkom, hulle moontlik iets kan leer (Filippense 2:3). Die studente is aangemoedig om ten nouste met hulle medesendelinge, die takkantoor en die plaaslike gemeente saam te werk. “Julle het julle eindeksamen geslaag, maar julle bly studente. Mense daar moet weet dat julle bereid is om te leer”, het broer Splane hulle aangespoor.
Ná hierdie toespraak het die studente hulle diplomas ontvang, en hulle toewysings is aan die gehoor aangekondig. Dit was vir die graduerende studente ’n hartroerende oomblik toe ’n klasverteenwoordiger daarna ’n resolusie gelees het wat die gegradueerdes se vasbeslotenheid uitgedruk het om toe te laat dat dit wat hulle uit God se Woord geleer het, hulle beweeg om groter dade van heilige diens te verrig.
Almal in die gehoor het ongetwyfeld saamgestem dat die raad wat die gegradueerdes ontvang het, hulle versterk het in hulle voorneme om liefde vir God en hulle naaste te toon. Dit het hulle ook meer vasbeslote as ooit gemaak om mense in hulle sendingtoewysing op geestelike gebied te help.
[Venster op bladsy 25]
KLASSTATISTIEK
Aantal lande verteenwoordig: 10
Aantal lande waarheen gestuur: 20
Aantal studente: 48
Gemiddelde ouderdom: 33,7
Gemiddelde jare in waarheid: 16,2
Gemiddelde jare in voltydse bediening: 12,5
[Prent op bladsy 26]
109de Gradueringsklas van die Wagtoring-Bybelskool Gilead
In die lys hieronder word rye van voor na agter genommer, en name word van links na regs in elke ry aangegee.
(1) Collins, E.; Miles, L.; Alvarado, A.; Lake, J. (2) Van Dusen, L.; Biharie, A.; Heikkinen, H.; Koós, S.; Smith, H. (3) Ashford, J.; Ashford, C.; Boor, C.; Richard, L.; Wilburn, D.; Lake, J. (4) Chichii, K.; Chichii, H.; Ramirez, M.; Baumann, D.; Becker, G.; Biharie, S.; Ramirez, A. (5) Van Dusen, W.; Lemâtre, H.; Pisko, J.; Cutts, L.; Russell, H.; Johnson, R. (6) Becker, F.; Baumann, D.; Johnson, K.; Pifer, A.; Madsen, C.; Lemâtre, J.; Heikkinen, P. (7) Smith, R.; Russell, J.; Collins, A.; Pisko, D.; Wilburn, R.; Koós, G. (8) Cutts, B.; Boor, J.; Madsen, N.; Pifer, S.; Richard, E.; Miles, B.; Alvarado, R.