Vraebus

◼ Wie moet koepons en Internetversoeke invul?

Ons publikasies bevat dikwels koepons wat mense kan invul en na die takkantoor kan stuur om lektuur aan te vra of te versoek dat Jehovah se Getuies hulle besoek. Die webwerf www.watchtower.org kan ook gebruik word om ’n Bybelstudie aan te vra. Hierdie voorsienings help baie mense om die waarheid te leer. Maar probleme het al ontstaan wanneer verkondigers hierdie hulpmiddels gebruik het om te reël dat familielede of ander mense geestelike hulp ontvang.

Party mense aan wie die takkantoor ongevraagd lektuur gestuur het, het al hieroor gekla omdat hulle voel dat ons organisasie hulle lastig val en hulle op die een of ander poslys het. Verkondigers wat gevra is om iemand te besoek wat nie persoonlik ’n besoek aangevra het nie, het hulle al in ’n ongemaklike situasie bevind toe die persoon ergernis uitgespreek het. Daarom moet versoeke wat op ons webwerf of deur middel van koepons gemaak word, van belangstellendes self kom, nie van verkondigers wat dit namens ander instuur nie. Wanneer dit duidelik is dat ’n versoek namens iemand anders ingestuur is, word dit gewoonlik nie aangestuur nie.

Hoe kan ons dan ’n familielid of ’n kennis geestelik help? As jy wil hê dat hy lektuur moet ontvang, kan jy dit gerus self as ’n geskenk aan hom stuur. As hy belangstelling getoon het en wil hê dat die Getuies hom moet besoek, maar jy nie weet hoe om met die ouer manne in die plaaslike gemeente in aanraking te kom nie, moet jy ’n Volg asseblief op-vorm (S-43) aan jou gemeentelike sekretaris gee, wat dit sal nagaan en dit na die takkantoor sal stuur. (Elke gemeente moet genoeg van hierdie vorms in voorraad hou.) Maar as die belangstellende in ’n gevangenis, ’n dwelmrehabilitasiesentrum of ’n staatshospitaal is, moet jy nie namens hom met die takkantoor in aanraking kom nie. Jy kan hom eerder aanmoedig om in aanraking te kom met die broers wat die inrigting besoek of om self aan die takkantoor te skryf.