Vraebus

◼ Moet verkondigers die Internet gebruik om vir vreemdelinge in ander lande te getuig of met hulle Bybelstudies te hou?

Sommige verkondigers het al die Internet gebruik om Bybelstudies te begin in lande waar ons werk beperk is of waar daar min verkondigers is. In party gevalle is goeie resultate bereik. Dit hou egter gevare in wanneer verkondigers deur middel van e-pos of kletskamers besprekings met vreemdelinge hou. (Sien Ons Koninkryksbediening vir Julie 2007, bl.3.) Hoewel dit ons bedoeling is om opregtes van hart met die Koninkryksboodskap te bereik, kan sulke besprekings ’n broer of ’n suster met slegte assosiasie, insluitende afvalliges, in kontak bring (1 Kor. 1:19-25; Kol. 2:8). Wat meer is, korrespondensie met mense in lande waar ons werk verbied word, kan deur die owerheid gemonitor word. Sulke kommunikasie kan die plaaslike broers en susters in gevaar stel. Om dié rede moet verkondigers nie aanlyn gaan om mense van ander lande te probeer vind om hulle van die goeie nuus te vertel nie.

As ons informeel getuig vir iemand wat uit ’n ander land kuier, moet ons nie probeer om sy belangstelling verder te kweek nadat hy huis toe teruggekeer het nie, tensy ons ander riglyne van die plaaslike takkantoor ontvang het. Ons kan hom eerder wys hoe hy meer inligting op jw.org kan vind of hoe hy met die plaaslike takkantoor in aanraking kan kom. Ons kan hom ook aanspoor om ’n Koninkryksaal te besoek wat naby sy huis is. In sommige lande is daar natuurlik geen Koninkryksale nie. Indien hy graag deur Getuies in sy omgewing besoek wil word, kan ons hom wys hoe om ’n Bybelstudie aan te vra deur die vorm Vra ’n gratis Bybelstudie aan op jw.org in te vul. Die takkantoor wat toesig hou oor die werk in die land waar die belangstellende woon, ken die plaaslike omstandighede en sal in die beste posisie wees om geestelike hulp te voorsien.—Sien Ons Koninkryksbediening vir Junie 2014, bl. 7, en Ons Koninkryksbediening vir November 2011, bl. 2.

As ’n persoon wat ons op die oomblik besoek, na ’n ander land toe trek of as ons op die oomblik studeer met ’n persoon in ’n ander land wat ons slegs deur die Internet ken, moet ons die bogenoemde riglyne volg. Maar ons mag aanhou om die belangstelling te kweek totdat die plaaslike verkondigers met die persoon in aanraking gekom het. Ons moet nietemin baie versigtig wees as ons per telefoon, per brief of op elektroniese wyse oor Bybelonderwerpe praat met ’n persoon wat in ’n land woon waar ons werk beperk of verbied is.—Matt. 10:16.