Wema Amɛvetɔ ci Woŋwlɛ Ðaɖa Timɔte
3 Vɔ nyà mɔ le ŋkeke kpɛtɛkpɛtɛwo mɛɔ, hwenu sɛnŋsɛnŋwo ava yí enuwo agbɔnnu haan. 2 Ðo amɛwo alɔnnɔ wowoɖekiwo, woanyi eholɔntɔwo, mɛ ciwo yí gangannɔ wowoɖekiwo, egoyitɔwo, enyɔkpotunutɔwo, mɛ ciwo yí desenɔ tonu nɔ wowo dawo koɖo wowo nɔwo o, akpemadotɔwo, egbejimanɔtɔwo, 3 mɛ ciwo yí delɔnnɔ amɛ ɖeeɖe o, mɛ ciwo yí delɔnnɔ do ŋɖekɛ ji o, eɖyixoamɛtɔwo, mɛ ciwo yí delénɔ wowoɖekiwo domɛ o, dɔmɛzitɔnɔwo, mɛ ciwo yí delɔnnɔ nunywi o, 4 amɛsatɔwo, ŋtashintɔwo, mɛ ciwo yí tɛnnɔ wowoɖekiwo, mɛ ciwo yí lɔnnɔ agbeɖuɖu sɔwu Mawu, 5 mɛ ciwo yí wanɔ nu le amɛwo mɛ shigbe mɔ wonyi Mawu sɛntɔwo nɛ, vɔ wowo gbenɔnɔ desɔnɔ koɖo Mawu sɛnsɛn lɔ o. Nɔ̀ azɔge nɔ nɛnɛmunɔwo. 6 Mɛɖewo le mɛ cɛwo mɛ be yí ɖonɔ axwewo mɛ yí sɔ nyɔnu ciwo yí gbɔjɔ sɔ wanɔ hwashiwo, nuvɔn nyi agban han yí kpɛnkpɛn nyɔnu cɛwo yí edro hamɛhamɛwo ɖenɔ fun nɔ wo. 7 Wokplanɔ nu gashiagamɛ, vɔ wodevasun ji yí mɔŋje nyɔnɔnwi lɔ mɛ nywiɖe gbeɖe o.
8 Shigbe lé Ʒanɛsi koɖo Ʒanbrɛsi fɔn gu do Moizi ji nɛɔ, ahanke mɛ cɛwo can fɔnfɔn gu do nyɔnɔnwi lɔ ji nɛ. Susu mɛ dahɛn nɔ mɛ cɛwo keŋkeŋ yí wowo nu dekpe nɔ Mawu le xɔse lɔ mɛ o. 9 Gan mɛ cɛwo datɛnŋ ayi ŋkɔ o, ɖo sukujeje* wowotɔ avaze nɔ mɛshiamɛ shigbe lé amɛ amɛve cɛwo tɔ ze nɔ amɛwo nɛ. 10 Vɔ eoɔ, enu ci èkpɔ le ŋgbɔ pɛpɛpɛ yí wa yí nyi lé ŋkplanɔ nu amɛ do, lé ŋnɔnɔ agbe do, enu ci ŋdodoɔ afɔ nɔ, anyi xɔse, lé ŋdonɔ ʒinxo do, lé ŋlɔnnɔ amɛ do koɖo lé ŋdonɔ ji do. 11 Ènya lé woci yumɛ nɔŋ do koɖo efun ciwo yí ŋkpe le Antiɔshi, Ikonia koɖo Listra. Ŋdo ji le yumɛcici cɛwo mɛ yí Axwetɔ lɔ hwlɛnŋ gan le wo pleŋ mɛ. 12 Le nyɔnɔnwi mɛɔ, ahanke woaci yumɛ nɔ Kristo Yesu dokplɔtɔ ciwo pleŋ yí ji mɔ yewoanɔ gbeji nɔ Mawu nɛ. 13 Vɔ, amɛvwinwo koɖo amɛbletɔwo afɔn ale enudɔndɔn wakɔ yí anyinakɔ doji, woablekɔ amɛwo yí amɛwo can ablekɔ wo.
14 Vɔ eoɔ, kpɔ̀tɔ awakɔ do enu ciwo èkpla ji. Èvakando enu cɛwo ji mɔ nyɔnɔnwi yí wonyi, ɖo ènya mɛ ciwo gbɔ yí èkpla wo so. 15 So vihwɛ mɛ ɖii yí èjeshi enuŋwlɛŋwlɛ kɔkɔɛ lɔwo, woatɛnŋ akpedo eo nu yí nànya ŋɖɛ keŋ akpɔ hwlɛngan to xɔse ci èɖo do Kristo Yesu nu ji. 16 Enuŋwlɛŋwlɛ lɔwo pleŋ so Mawu gbɔngbɔn mɛ, wonyɔ yí woasɔ kpla nu amɛ, asɔ dra afɛn do, asɔ gbe nyɔ nɔ amɛ, asɔ dra enuwo do, asɔ kpla lé woawɛ awa enu ci yí le jɔjɔɛɖe 17 keŋ nɔ Mawu mɛ atɛnŋ akpe enu ji vɛ yí ale gbesɔsɔ keŋkeŋ nɔ edɔ nywi ɖekpokpui wawa.