Elanwo Tɔ Vɔvɔ Le Xexeɛ Mɛ​—Enyɔ Ci Bibla Nuɔ?

Le 9 Octobre 2024 ɔ, Fonds mondial pour la nature nu enyɔɖefunnamɛwo so lé agbetɔwo nuwanawo dadahɛn nu le elanwo nu do. Énu mɔ “so exwe 1970 va exwe 2020 ci yí nyi exwe 50 ɔ, elanwo ɖe kpɔtɔ 73 le 100 ji.” Wokanxle mì mɔ: “Nɔ mìdable nɔnɔɔ, lé mìawa nu do le exwe amatɔn ciwo yí gbɔgbɔ mɛ adasɛ lé mìwo gbe avanɔ do le nyigban lɔ ji.”

Nɔ amɛ sugbɔ se nyɔ cɛ hanwoɔ, ékpanɔca wo sugbɔ. Mìlɔn mìwo nyigban nyakpɔkpɔ cɛ sugbɔ yí nɔ elanwo kpekpeɛ fun ɔ, dejɔnɔ ji nɔ mì o. Éwanɔ ahan nɔ mì ɖo Mawu ji mɔ mìwo le lenɔ bu nɔ elanwo.​—Gɔnmɛjeje 1:27, 28; Elododo Wema 12:10.

Eyi taɖo ètɛnŋ biɔ eoɖeki se mɔ: ‘Keke mìasun ji aglɔn ta nɔ elanwo le nyigban lɔ jia? Enyɔ ci Bibla nuɔ?’

Esɔ mɛ mɔkpɔkpɔ

Nɔ mìtekpɔ mɔ mìahwlɛn elanwo gan ɖeeɖe can ɔ, Mawu ɖekɛ yí atɛnŋ aglɔn ta nɔ wo nyɔnɔnwimɛtɔ. Bibla nu ɖɛ le Enyɔdasɛ 11:18 mɛ mɔ, Mawu “a trɔn amɛ ciwo yí trɔn nyigban lɔ.” Kpukpui cɛ kpla enu amɛve mì:

1. 1. Mawu aɖo te agbetɔwo nɔ woŋgbedahɛn nyigban lɔ vɛ o.

2. 2. Mawu aso do wo ji sabaɖe yɛ. Nyi yí taɖo mìnu ahan ɔ? Ðo agbetɔwo vawawa enu ciwo yí nyi afɔku nɔ elanwo le egbɛ mɛ sɔwu sa.

Nyi Mawu awa keŋ asɔ kpɔ cukaɖa cɛ gbɔɔ? Ázan yi Fyɔɖuxu ci yí le jeŋkwi mɛ yí asɔ kpa acɛ nɔ nyigban lɔ pleŋ. (Matie 6:10) Fyɔɖuxu cɛ akpla nu agbetɔ tonusetɔwo yí ana kpla wo nɔ woanya lé woale bu nɔ elanwo yí aglɔn ta nɔ wo do.​—Ezai 11:9.