Wanɔ Nu Le Dredrenu Shigbe Yehowa Nɛ

1. Lé Kristotɔwo ɖo ale shigbe aci nɛ doɔ? (Kpɔ foto lɔ hɛnnɛ.)

WODONƆ elo ɖeka mɔ: “Jihɔn detɛnŋ ŋɛnɔ aci ci yí tɛnŋ trɔnɔdo nɔnɔmɛwo nu o.” Elododo cɛ xokɔ nuxu so nɔnɔmɛ vevi ɖeka ci yí na aci ɖewo tɛnŋ shinnɔ nywiɖe nu, eyi nyi trɔtrɔdo nɔnɔmɛwo nu. Mìwo can mìɖo atrɔnɔdo nɔnɔmɛwo nu keŋ atɛnŋ ashin le gbɔngbɔn mɛ nywiɖe. Lé mìawɛ doɔ? Mìɖo awanɔ nu le dredrenu nɔ mìwo nɔnɔmɛwo trɔ yí agbedonɔ bubu mɛbuwo gbetasɔsɔwo nu.

2. Nɔnɔmɛ ciwo yí akpedo mì nu nɔ enuwo trɔ nɔ mìɔ, yí nyi mìakpɔ le nyɔta cɛ mɛɔ?

² Ci mìnyi Yehowa sɛntɔwoɔ, mìjinɔ mɔ mìawa nu le dredrenu. Mìgbeji mɔ mìasɔ mìwoɖekiwo hwenɔ yí asenɔ vevi do amɛ nu. Le nyɔta cɛ mɛɔ, mìakpɔ lé nɔnɔmɛ cɛwo kpedo Kristotɔ ɖewo nu ci enuwo trɔ nɔ wo. Mìagbekpɔ lé nɔnɔmɛ ŋtɔ́wo atɛnŋ akpedo mìwo can nu. Vɔ doŋkɔɔ, mìakpla nu so Yehowa koɖo Yesu gbɔ, woɖo kpɔwɛ nywi ɖɛ nɔ mì le enuwawa le dredrenu mɛ.

YEHOWA KOÐO YESU WANƆ NU LE DREDRENU

3. Lé mìwɛ yí nya mɔ Yehowa wanɔ nu le dredrenuɔ?

³ Woyɔ Yehowa mɔ yɛnyi “Ekpe,” ɖo énɔnɔ te sɛnsinɖe. (2 Ese. 32:4) Ele ahan gan, éwanɔ nu le dredrenu. Ci enuwo fɔn yí trɔtrɔɔ, Yehowa trɔkɔdo nɔnɔmɛ lɔwo nu keŋ nɔ yi dro anyi wawa. Yehowa wa agbetɔ do yi nɔnɔmɛ nu, edasɛ mɔ agbetɔ ɖo nujikpekpe yí atrɔdo nɔnɔmɛwo nu. Éna mì Bibla gɔnmɛɖose ciwo atɛnŋ akpedo mì nu mìasɔ gbeta nywiwo, nɔ mìle cukaɖa ɖekpokpui mɛ can. Yehowa ŋtɔ kpɔwɛ koɖo gɔnmɛɖose ci ena mì, na mìkpɔɛ mɔ ci enyi “Ekpe” can ɔ, éwanɔ nu le dredrenu.

4. Na kpɔwɛ ɖeka ci yí dasɛ mɔ Yehowa wanɔ nu le dredrenu. (1 Ese Wema 5:7, 11)

⁴ Afɛn dele Yehowa mɔwo nu o yí egbewanɔ nu le dredrenu. Yi nyɔ mɛ desɛnnɔŋ ɖoɖu nɔ ele nu wakɔ koɖo agbetɔwo o. Le kpɔwɛ mɛ, Yehowa se nu gɔnmɛ nɔ Izraɛliviwo. Nɔ wonyi dɔkunɔ alo abɔnɔ can ɔ, deʒin wo ji mɔ mɛshiamɛ awa vɔnsa ŋmɛɖekɛ o. Le nɔnɔmɛ ɖewo mɛɔ, étashi mɛɖekamɛɖeka nɔ asɔ enu ci yí le shi sa vɔn sɔ koɖo yi nɔnɔmɛwo.​—Hlɛn 1 Ese Wema 5:7, 11.

5. Na kpɔwɛ ɖeka ci yí dasɛ mɔ Yehowa sɔ yiɖeki hwenɔ yí gbesenɔ vevi do amɛ nu.

⁵ Ci Yehowa sɔ yiɖeki hwenɔ yí gbesenɔ vevi do amɛ nuɔ, edɔ éwanɔ nu le dredrenu. Le kpɔwɛ mɛ, amɛɖekisɔsɔhwe Yehowa tɔ ze hwenu emɔ yeagu amɛvɔnwo le Sodomu. Yehowa to yi dɔlawo ji yí kanxle amɛjɔjɔɛ Loti mɔ yi le shi yi etowo ji. Vɔ Loti vɔnkɔ nɔ hunnɔtɔxu yiyi. Eyi taɖo eɖe kuku mɔ ye koɖo ye xomu ashi yi Zoa, eju hwɛhwɛ ɖeka ci Yehowa ji mɔ yeagu hɛnnɛ. Yehowa atɛnŋ amɔ duudan yí Loti ɖo awa do enyɔ ci yenu ji. Vɔ dewɛ ahan o, éɖo to yí se enyɔ ci Loti nu yí tashi Zoa ju lɔ gugu si. (Gɔnm. 19:18-22) Exwe sanŋdi nɛniɖe goduɔ, Yehowa se vevi do Ninivutɔwo nu. Édɔ yi nyɔnuɖɛtɔ Ʒonasi nɔ ayi nu nɔ jukɔn lɔ mɔ yeagu ju lɔ koɖo amɛvɔn ciwo yí le mɛ swi. Vɔ ci Ninivutɔwo trɔ ji mɛɔ, Yehowa trɔ yi susu yí degbegu ju lɔ o.​—Ʒonasi 3:1, 10; 4:10, 11.

6. Na kpɔwɛ ɖeka ci yí dasɛ mɔ Yesu ɖyi Dalɔ yí wanɔ nu le dredrenu.

⁶ Yesu sran Yehowa yí wanɔ nu le dredrenu. Wodɔ Yesu ɖaɖa nyigban ji nɔ avaɖe kunu nɔ “lɛngbɔ ciwo yí bu le Izraɛli xwe mɛ.” Vɔ éwa nu le dredrenu hwenu ele edɔ cɛ wakɔ. Gbeɖekaɔ, nyɔnu ɖeka ci yí denyi Izraɛlivi o ɖe kuku ni mɔ yi le da dɔ̀ nɔ ye viye nyɔnuvi ci “gbɔngbɔnvɔnwo doahɛn susumɛ nɔ.” Yesu ku ŋshishi nɔ nyɔnu lɔ yí da dɔ̀ nɔ eviɛ nyɔnuvi lɔ. (Mt. 15:21-28) Mìagbesɔ kpɔwɛ bu. Le tɔtɔmɛ nɔ yi kunuɖeɖedɔ lɔɔ, Yesu nu mɔ: “Amɛ ɖekpokpwi ci yí a gbé Ŋ le amɛwo ŋkɔ ɔ, Enyɛ can Na gbí.” (Mt. 10:33) Vɔ égbe Piɛ ci Piɛ nu zetɔn mɔ yedejeshi ɖɛa? Oo. Yesu kpɔ mɔ Piɛ trɔ ji mɛ yí xɔse le shi. Ci Yesu fɔn so ku goduɔ, édasɛ yiɖeki nɔ Piɛ, taŋfuin éjikɔ adasɛ nɔ Piɛ mɔ yesɔ ki yí kpɔtɔ yí luin.​—Luiki 24:33, 34.

7. Sɔgbe koɖo Filipitɔwo 4:5 ɖe, lé mìji mɔ amɛwo le kpɔnɔ mì doɔ?

⁷ Mìkpɔ mɔ Yehowa Mawu koɖo Yesu Kristo wanɔ nu le dredrenu. Vɔ mìwo ɖe? Yehowa ji mɔ mìwo can mìwo le wanɔ nu le dredrenu. (Hlɛn Filipitɔwo 4:5 le NWT mɛ.) Bibla gɔnmɛɖeɖe ɖeka ɖe kpukpui cɛ gɔnmɛ mɔ: “Mínyi mɛ ciwo wojeshi ɖɛ mɔ wowanɔ nu le dredrenu.” Mìatɛnŋ abiɔ mìwoɖekiwo se mɔ: ‘Amɛwo kpɔnɔŋ mɔ ŋnyi mɛ ci yí wanɔ nu le dredrenu yí senɔ nu gɔnmɛ nɔ amɛa? Alo wokpɔnɔŋ mɔ ŋnyi mɛ ci yí delɔnnɔ nu o ci nyɔ mɛ sɛnnɔŋ a? Ŋnunɔ mɔ amɛwo ɖo awa nu dandandan shigbe lé nyɛkpɔkpɔɛ do nɛa? Alo ŋɖonɔ to amɛwo yí lɔnnɔ do nyɔ ciwo wonu ji nɔ ŋɖe dedɔn le wo nua?’ Nɔ mìtekpɔ yí ɖyikɔ Yehowa koɖo Yesu dojiɔ, mìagbesenɔ nu gɔnmɛ nɔ amɛwo doji. Ecɛyɛɔ, mìakpɔ enu amɛve ciwo mɛ mìɖo awa nu le dredrenu le. Wowo yí nyi: nɔ mìwo nɔnɔmɛ trɔ koɖo nɔ amɛwo susu koɖo gbetasɔsɔwo desɔ koɖo mìwo tɔ o.

WANƆ NU LE DREDRENU NƆ AO NƆNƆMƐWO TRƆ

8. Nyi yí akpedo mì nu mìawa nu le dredrenu nɔ mìwo nɔnɔmɛwo trɔɔ? (Kpɔ gɔnmɛnuŋwlɛŋwlɛ lɔ hɛnnɛ.)

⁸ Ele mɔ mìawa nu le dredrenu nɔ nuwo trɔ nɔ mì le agbe mɛ. Trɔtrɔ lɔwo tɛnŋ hɛn cukaɖa ciwo mìdebu mɔ mìaɖo le agbe mɛ o va mì ji. Mìtɛnŋ vable sɛnŋsɛnŋɖe le avomɛ. Ehonyɔwo tɛnŋ trɔ alo wotɛnŋ ɖɔli acɛkpakpa ci yí le fini mìle ci yí adɔ enuwo atrɔ nɔ mì maɖoŋdonutɔ. (Ŋun. 9:11; 1 Kor. 7:31) Nɛnɛke etɛnŋ gbɔnnu nɔ mì nɔ habɔbɔ lɔ wa trɔtrɔwo yí mɔ mìwo le sɛn Yehowa le mɔ bu ji alo fibu. Nɔ trɔtrɔ lɔwo gbele do ɖe can ɔ, mìatɛnŋ atrɔ do wo nu nywiɖe nɔ mìwa nu amɛnɛ cɛwo: (1) lɔn do lé enu lɔwo le yɛ ji, (2) sɔ ŋkuvi ɖo esɔ mɛ ji, (3) ao susu le nɔ enunywiwo ji yí (4) kpenɔdo mɛbuwo nu.b Ecɛyɛ mìakpɔ lé nɔvi ɖewo kpɔ nyɔna ci wowa do enu amɛnɛ cɛwo ji do.

9. Lé asu koɖo ashi ejugodu ŋɛnywidratɔ ɖeka wa nu do ci wodo go cukaɖa maɖoŋdonuwoɔ?

⁹ Lɔn do lé enu lɔwo le yɛ ji. Emanuele koɖo Francesca nyi ejugodu ŋɛnywidratɔwo. Ci wotɔ ju lɔ gbe kplakpla yí ajeshi nɔviwo ɖɛ le hamɛ lɔ mɛɔ, COVID-19 dɔ̀bamɛ lɔ to yí woɖo anɔ azɔge nɔ amɛwo. Eyi Francesca nɔlɔ ku le avomɛ. Francesca ji veviɖe mɔ yeayi nɔ koɖo ye xomu, vɔ dɔ̀bamɛ lɔ dɔ yí datɛnŋ azɔn mɔ ayi wo gbɔ o. Nyi yí kpedo nu eto cukaɖa cɛwo mɛɔ? Enu ŋkɔtɔ, Emanuele koɖo Francesca donɔ gbe ɖaɖa doju yí biɔnɔ nunya ci woʒan gbeɖeka duu asɔ kpanŋkɔ wowo cukaɖawo. Yehowa ɖonɔ wowo gbedoɖawo ŋci do gamɛ nywitɔ ji to yi habɔbɔ lɔ ji. Le kpɔwɛ mɛ, enyɔ ɖeka ci nɔviŋsu ɖeka nu le video mɛ do ŋsɛn wo. Nɔvi lɔ nu mɔ: “Nɔ mìxɔ gbe do mìwo nɔnɔmɛ yoyu lɔ ji blaŋ ɔ, mìwo jijɔ gbetrɔnɔ gbɔ blaŋ.”c Enu amɛvetɔ, woɖui mɔ yewoabi doji le kunuɖeɖe to telefonu ji mɛ keke tɔ Bibla kplakpla koɖo amɛwo hɛnnɛ. Enu amɛtɔntɔ, wolɔn yí xɔ kpekpedonu ciwo yí nɔvi ciwo yí le wowo hamɛ nana wo. Nɔvinyɔnu ɖeka ŋwlɛnɔ nu ɖaɖa wo yí ŋwlɛnɔ Bibla kpukpui ɖeka do mɛ ŋkeke ɖeka duu keke na nɔ xwe ɖeka. Ahanke nɔ mìxɔ gbe do lé enu lɔwo vale do nɔ mì jiɔ, mìakpɔ jijɔ le enu ci ji mìkpe yí wakɔ mɛ.

10. Lé nɔvinyɔnu ɖeka trɔdo trɔtrɔ gangan ɖeka nu doɔ?

¹⁰ Sɔ ŋkuvi ɖo esɔ mɛ ji yí ao susu le nɔ enunywiwo ji. Ci wogu Ŋlɛshigbe hamɛ ci mɛ yí nɔvinyɔnu Christina ci yí so Roumanie yí le Japon leɔ, ése vevi sugbɔ. Vɔ devale tamɛ bukɔ gbɛmɛgbɛmɛ so enu ci yí jɔ nu o. Ci ele ahan ɔ, évayi ci Japon-gbe hamɛ mɛ yí wakɔ ci ji ekpe le kunuɖeɖedɔ lɔ mɛ. Ébiɔ nyɔnu ɖeka ci yi koɖo yɛ wa dɔ vayi kpɔ mɔ yi le kpedo ye nu nɔ yeajeshi Japon-gbe lɔ dodo ɖɛ nywiɖe. Nyɔnu lɔ lɔn mɔ yeazan Bibla koɖo Se vivi nɔ agbe lɔ sɔyi mavɔ! wemagbaja lɔ yí asɔ kpla Japon-gbe Christina. Ecɛ na yí Christina vadokɔ Japon-gbe lɔ nywiɖe wu yí nyɔnu lɔ can vasɔ ɖe le nyɔnɔnwi lɔ ji. Nɔ mìdevabukɔ tamɛ kpɔ so enu ciwo yí jɔ vayi nu o yí kpɔtɔ ɖo susu nywiɔ, trɔtrɔ maɖoŋdonuwo atɛnŋ ahɛn nyɔna maɖoŋdonuwo vɛ nɔ mì.

11. Nyi yí kpedo asu koɖo ashi ɖeka nu ci wodo go eho cukaɖawoɔ?

¹¹ Kpenɔdo mɛbuwo nu. Asu koɖo ashi ɖeka le eju ci mɛ woɖo te mìwo dɔwo le. Wodo go cukaɖawo ci honyɔwo tɔ enu gbɔngbɔn le ju lɔ mɛ. Lé wotrɔdo nɔnɔmɛ lɔ nu doɔ? Doŋkɔɔ, wotekpɔ yí ɖe wowo hozanzan kpɔtɔ. Yi goduɔ, ci woasɔ susu ɖo wowoŋtɔwo cukaɖawo jiɔ, wosɔ susu ɖo lé woawɛ akpedo mɛbuwo nu yí wovazankɔ gamɛ sugbɔ le kunuɖeɖedɔ lɔ mɛ. (Edɔ. 20:35) Nɔviŋsu lɔ nu mɔ: “Ci mìvaɖekɔ kunu sugbɔɔ, mìdegbeɖo gamɛ yí abu tamɛ kpɔ so enu ciwo yí agbɔjɔ mì nu o, vɔ mìvazankɔ gamɛ sugbɔ yí sɔ wakɔ Mawu dro.” Nɔ enuwo trɔ le mìwo gbe mɛɔ, mìɖo aɖo ŋwi mɔ yɛ le veviɖe mɔ mìɖo akpɔtɔ akpenɔdo mɛbuwo nu vevitɔ to kunuɖeɖedɔ lɔ ji.

12. Lé apotru Pɔlu kpɔwɛ atɛnŋ akpedo mì nu mìatrɔdo nɔnɔmɛwo nu le kunuɖeɖedɔ lɔ mɛɔ?

¹² Mìɖo awa nu le dredrenu le kunuɖeɖedɔ lɔ mɛ. Mɛ ciwo mìdonɔ go le kunuɖeɖedɔ lɔ mɛ ɖo jixɔse koɖo adɛn vovovowo yí gbeso akɔta hamɛhamɛwo mɛ. Apotru Pɔlu trɔnɔdo nɔnɔmɛ vovovowo nu yí mìatɛnŋ akpla nu so yi kpɔwɛ mɛ. Yesu ɖo apotru Pɔlu yí enyi “amɛdɔdɔ . . . nɔ amɛmanyiʒuifuwo.” (Rɔm. 11:13) Eyi apotru Pɔlu ɖe kunu nɔ Ʒuifuwo, Grɛkiwo, amɛyisukluwo, agbledetɔwo, egawo koɖo efyɔwo. Nɔ enyɔ ciwo Pɔlu nukɔ atɛnŋ aɖo ji mɛ nɔ amɛ lɔwo pleŋ ɔ, ésɔ yiɖeki “trɔsun enuwo pleŋ nɔ amɛwo pleŋ.” (1 Kor. 9:19-23) Élenɔ ŋkuvi do wowo kɔnuwo, ekpla ci woxɔ koɖo wowo jixɔsewo nu yí wanɔ nu esɔnɔ koɖo nu cɛwo. Mìwo can mìatɛnŋ ana mìwo kunuɖeɖedɔ lɔ anyɔ doji nɔ mìwanɔ nu le dredrenu yí tekpɔ yí bunɔ tamɛ kpɔ so lé mìawɛ akpedo mɛ ciwo mìdonɔ go le kunuɖeɖedɔ lɔ mɛ nu.

DONƆ BUBU MƐBUWO SUSU NU

13. Nɔ mìdonɔ bubu mɛbuwo susu nu ɖe, afɔku ci wonu do 1 Korɛntitɔwo 8:9 mɛ yí mìazenɔɔ?

¹³ Enuwawa le dredrenu akpedo mì nu mìado bubu mɛbuwo susu nu hɛnnɛ. Le kpɔwɛ mɛ, nɔvinyɔnu ɖewo shinɔ nu do ŋmɛ, vɔ nɔvinyɔnu buwo dejinɔ awa ahan o. Kristotɔ ɖewo nunɔ ahamuamɛ le dredrenu, vɔ mɛɖewo dejinɔ mɔ yewoanu kpetii o. Kristotɔwo pleŋ jinɔ mɔ yewoanɔ lanmɛsɛn mɛ, vɔ wodezannɔ edɔ̀dada mɔnu ŋmɛɖekɛwo o. Nɔ mìbunɔ mɔ lé mìwo kpɔnɔ nuwo do yí nyi nywitɔ yí nɔviŋsu koɖo nɔvinyɔnuwo ɖo awa mìwo tɔ han ɔ, mìavatrɔ afɔklɛnnu nɔ mɛbuwo yí mama ava mì mɛ. Mìdaji mɔ mìawa ahan gbeɖe o! (Hlɛn 1 Korɛntitɔwo 8:9; 10:23, 24) Ecɛyɛɔ, mìakpɔ kpɔwɛ amɛve ciwo yí adasɛ lé wawa do Bibla gɔnmɛɖosewo ji atɛnŋ akpedo mì nu mìawanɔ nu le dredrenu yí ana fafa akpɔtɔ anɔ hamɛ lɔ mɛ.

14. Bibla gɔnmɛɖose ciwo yí akpedo mì nu le enudodo koɖo dradrado mɛɔ?

¹⁴ Enudodo koɖo dradrado. Yehowa dedo sewo kudo enu ciwo mìado nu o, vɔ éna gɔnmɛɖose ciwo yí akpedo mì nu le enudodo mɛ. Mìɖo adonɔ nu ci yí sɔgbe nɔ Mawu sɛntɔwo le dredrenu koɖo le “susu nywi mɛ.” (1 Tim. 2:9, 10; 1 Piɛ 3:3) Eyi taɖo mìdedonɔ nu ciwo yí adɔn amɛwo susu va mìwoɖekiwo ji o. Bibla gɔnmɛɖosewo akpedo hamɛmɛshinshinwo can nu yí wodadonɔ esewo kudo enudodo koɖo eɖawawa nu o. Le kpɔwɛ mɛ, le hamɛ ɖeka mɛɔ, hamɛmɛshinshinwo ji mɔ yewoakpedo jajɛ ɖekawo ciwo kpa ɖa ci han yí amɛwo kpakɔ yí ewa ɖaŋ yi gɔnmɛ gan yile hliya nu. Lé hamɛmɛshinshin lɔwo akpedo wo nu do yí wodado esewoɔ? Ekán lɔ mɛ hamɛwo jikpɔtɔ kpedo hamɛmɛshinshin lɔwo nu nɔ woanu nɔ nɔviŋsu lɔwo mɔ: “Nɔ èle nuxu xokɔ le kplɔnta yí toɖotɔwo vaglokɔ lé èle kpɔ do sɔwu mɔ woalé to do enyɔ ci ènukɔ nuɔ, anyi èwa fɛn dra do.” Enyɔ kleŋ cɛ na yí wokpɔ cukaɖa lɔ gbɔ sɔwu mɔ woado sewo.d

15. Ese koɖo gɔnmɛɖose ciwo yí le Bibla mɛ ciwo yí atɛnŋ akpedo mì nu nɔ mìsɔkɔ gbeta so mìwo lanmɛsɛn nuɔ? (Rɔmatɔwo 14:5)

¹⁵ Lanmɛsɛn mɛ nɔnɔ. Kristotɔ ɖekpokpui ɖo asɔ gbeta so lé àwɛ anɔ lanmɛsɛn mɛ nu. (Gal. 6:5) Nɔ Kristotɔ ɖe asɔ gbeta so edɔ̀dada mɔnu ɖe nuɔ, éɖo awa do Bibla mɛ se ci yí mɔ mìŋgbetɔ aɖe ehun alo awa gbɔngbɔn yɔyɔ nu ɖe ji. (Edɔ. 15:20; Gal. 5:19, 20) Vɔ wowoŋtɔwo yí ɖo asɔ gbeta so edɔ̀dada mɔnu ci woazan nɔ wo nu. Mɛɖewo jinɔ mɔ dotoxwe ɖekɛ yí woakpɔ lanmɛsɛnnyɔ yewotɔ gbɔ le, vɔ mɛbuwo jinɔ edɔ̀dada mɔnu buwo. Mìtɛnŋ kando dɔ̀dada mɔnu ɖe ji yí amɔ yɛnyɔ yí akpɔ ebu mɔ yɛdɔn. Vɔ ele mɔ mìado bubu mɛɖekamɛɖeka gbetasɔsɔ kudo edɔ̀dada mɔnuwo nu. Eyi taɖo mìɖo aɖonɔ ŋwi susu vevi amɛnɛ cɛwo: (1) Mawu Fyɔɖuxu lɔ ɖekɛ yí agu dɔ̀lelewo pleŋ si. (Ezai 33:24) (2) Kristotɔ ɖekaɖeka ɖo ‘akando’ enu ci yí nyɔ ni ji nɔ ésɔsɔ gbeta so lanmɛsɛnnyɔwo nu. (Hlɛn Rɔmatɔwo 14:5.) (3) Mìdeɖo adonɔ hwɛ mɛbuwo alo anyi afɔklɛnnu nɔ wo o. (Rɔm. 14:13) (4) Kristotɔwo ɖo alɔn wowonɔnɔwo yí ase mɛ mɔ ejunɔnɔ ci yí le hamɛ lɔ mɛ le veviɖe wu wowoŋtɔwo susuwo. (Rɔm. 14:15, 19, 20) Nɔ susu amɛnɛ cɛwo le tamɛ nɔ mìɔ, mìatɛnŋ ana yí exlɔnyinyi ci yí le gblamɛ nɔ mìwo koɖo nɔviŋsu koɖo nɔvinyɔnuwo akpɔtɔ ani yí mìagbena yí fafa anɔ hamɛ lɔ mɛ.

16. Lé hamɛmɛshinshin ɖe atɛnŋ awa nu le dredrenu nɔ ele nu wakɔ koɖo yi kpena hamɛmɛshinshinwoɔ? (Kpɔ foto lɔ hɛnnɛ.)

¹⁶ Hamɛmɛshinshinwo ɖo anyi kpɔwɛ le enuwawa le dredrenu mɛ. (1 Tim. 3:2, 3) Le kpɔwɛ mɛ, hamɛmɛshinshin ɖe deɖo anu mɔ ci yeshin wu mɛkpɛtɛwo taɖo woɖo alɔnnɔ do ye susuwo ji gashiagamɛ o. Énya mɔ Yehowa gbɔngbɔn atɛnŋ awa dɔ to hamɛmɛshinshin ɖekpokpui ji le hamɛmɛshinshin lɔwo mɛ yí anu enyɔ ciwo yí ana woasɔ gbeta nywiwo. Eyi nɔ wodeda le Bibla gɔnmɛɖose ɖe jiɔ, hamɛmɛshinshin ci yí wanɔ nu le dredrenu lɔnnɔ do nyɔ ci ji yí amɛ sugbɔ lɔn do nɔ desɔgbe koɖo yi susu can.

NYƆNA CIWO MÌAKPƆ NƆ MÌWANƆ NU LE DREDRENU

17. Nyɔna ciwo yí Kristotɔwo kpɔnɔ nɔ wowanɔ nu le dredrenuɔ?

¹⁷ Kristotɔwo kpɔnɔ nyɔna sugbɔwo ci wowanɔ nu le dredrenu. Mìnyinɔ xlɔ koɖo nɔviwo yí fafa nɔnɔ hamɛ lɔ mɛ. Ci mìɖo adɛn vovovowo yí so akɔta vovovowo mɛ can ɔ, mì pleŋ le ju yí sɛnnɔ Yehowa shigbe xomu ɖeka mɛ tɔwo nɛ. Ci yí gbewu ŋtɔ́wo pleŋ ɔ, eji jɔnɔ mì mɔ mìwanɔ nu shigbe mìwo Mawu, Yehowa mɛ ci yí wanɔ nu le dredrenu nɛ.