Paano Nagabulig Kamon ro Manogtatap it Sirkito?

Pirme ginasambit it Cristianong Griegong Kasueatan sanday Bernabe ag apostol Pablo. Nangin manogtatap man sanda it mga kongregasyon kato. Ham-an? Tungod nagakabaeaka gid sanda sa kahimtangan it andang igmanghod sa espiritwal. Naghambae si Pablo nga gusto gid nana “balikan ag bisitahan ro anang mga kaigmanghuran” agud masayran ro andang kahimtangan. Bisan ginatos ka kilometro ro kaeayo it anang agtonan handa gid imaw agud mapalig-on sanda. (Binuhatan 15:36, NW) Sa makaron, ruyon man ro ginaobra it mga manogtatap it sirkito.

Ginapalig-on nanda kami. Kada manogtatap it sirkito hay nagabisita sa 20 o sobra pa nga mga kongregasyon ag nagatenir sanda it sang Domingo nga may tig-daywang beses kada dag-on. Napalig-on gid kami sa mga eksperiensya it rayang mga igmanghod ag ku andang asawa, kung may una. Ro manogtatap it sirkito kaibahan ku anang asawa hay naila gid makilaea ag makaibahan ro mga unga ag may mga edad sa pagwali nga hilikuton ag sa amon ginatur-an sa Biblia. Raya nga mga manogtatap hay kaibahan it mga elder sa pag-shepherding, agud pabakuron kami paagi sa pamulongpulong sa mga miting ag asembliya.—Binuhatan 15:35.

Interisado sanda sa tanan. Interisado gid ro manogtatap it sirkito sa espiritwal nga kahimtangan it kongregasyon. Ginamiting nana ro mga elder ag ministeryal nga alagad agud tan-awon ro pag-uswag it kongregasyon, ag ginataw-an sanda it praktikal nga mga eaygay nga makabulig sa andang mga obligasyon. Ginabuligan man nanda ro mga payunir agud nga magmadinaeag-on sa pagministeryo, ag naila man sanda makilaea ag mabatian ro parti sa pag-uswag it mga bag-uhan. Handa sanda sa pagsakripisyo it andang kaugalingon bilang “masigkamanugpangabudlay para sa [aton] ikamayad.” (2 Corinto 8:23, NW) Kinahang-ean nga tuearon naton ro andang sinsero nga pagtuo sa Dyos.—Hebreo 13:7.

• Ham-an ginabisitahan it manogtatap it sirkito ro mga kongregasyon?

• Ano ro imong mabenepisyohan sa andang pagbisita?