Paano Namon Ginabuligan ro Among mga Igmanghod nga una sa Kalisdanan?

Kon may kalamidad, ro mga Saksi ni Jehova nagabulig eagi sa andang mga igmanghod nga naapektuhan. Ruyon nga pagpangabudlay hay pagpakita it matuod nga pagpalangga sa kada isaea. (Juan 13:34, 35; 1 Juan 3:17, 18) Paano kami nagabulig?

Nagatao kami it kwarta. Ro mga Cristiano kato sa Antioquia hay nagtao it bulig sa andang mga igmanghod sa pagtuo sa Judea kat may una nga tig-gueotom idto. (Binuhatan 11:27-30) Kapareho makaron, kung ro among mga igmanghod hay nakaagi it mga kalisod sa iba nga lugar, nagapadaea kami kanda it bulig paagi sa amon lokal nga kongregasyon nga nagatao kanda it andang mga kinahang-eanon.—2 Corinto 8:13-15.

Nagatao kami it praktikal nga bulig. Ginaagtunan gid it mga elder ro lugar it mga igmanghod sa kada kongregasyon nga naagyan it kalamidad. Ro relief committee hay nagatao it bulig kapareho it pagkaon, malimpyo nga tubi, eambong, baeay, ag mga bueong. Abu nga mga Saksi ro kaantigohan magpamanday ag nagabulig sa pag-obra it baeay ag mga Kingdom Hall. Tungod gahilisugot kami ag magkaibahan sa pag-obra makabulig eagi kami sa nakaagi it kalamidad. Bukon eang it amon “kaigmanghuran sa pagtuo” ro among ginabuligan, gabulig man kami sa iba, bisan eain ro andang relihiyon.—Galacia 6:10.

Nagatao kami it eugpay nga halin sa kasueatan. Ro mga nakaagi it kalamidad hay nagakinahang-ean gid it eugpay. Sa raya nga panahon nagabuoe kami it kabakod kay Jehova, ro “Dyos nga ginhalinan it tanan nga bulig.” (2 Corinto 1:3, 4) Naila gid kami nga isugid sa mga naagyan it kalamidad ro promisa it Biblia, nga dueaon ku Ginharian it Dyos ro tanan nga kalisdanan ag kasakit.—Pahayag 21:4.

• Ham-an it madasig ro mga Saksi sa pagbulig sa mga naagyan it kalamidad?

• Ano nga eugpay halin sa kasueatan ro masugid namon kanda?