TUEON-AN NGA ARTIKULO 45
KANTA 138 Ang Katahom sang Ubanon nga Ulo
Magtuon sa Ulihing Ginhambae it Matutom nga mga Eaki
“Indi baea una sa mga magueang ro kaaeam, ag may pag-eubot ro may maeawig it kabuhi?”—JOB 12:12.
RO ATONG MATUN-AN
Tun-an naton kon paalin ro pagtuman kay Jehova nga Dyos hay makatao it mga pagpakamayad makaron ag kabuhi nga owa it katapusan sa paeaabuton.
1. Ham-an makatuon kita sa mga magueang?
TANAN kita hay nagakinahang-ean it giya kon nagaobra it importanteng mga desisyon sa kabuhi. Mabaton naton rayang mga giya halin sa mga elder ag sa iba pang hamtong nga mga Cristyano. Kon mas magueang sanda katon, indi eagi naton pag-isipon nga buko’t praktikal ro andang ihambae katon. Gusto ni Jehova nga makatuon kita sa mga magueang. Mas abu ro andang eksperyinsya, natun-an, ag nasayran kaysa katon.—Job 12:12.
2. Ano ro pagatalakayon naton sa rayang artikulo?
2 Sa panahon it Biblia, gingamit ni Jehova ro matutom nga mga magueang agud palig-unon ag giyahan ro anang katawhan. Talakayon naton ro halimbawa nanday Moises, David, ag apostol Juan. Nagkabuhi sanda sa iba-ibang panahon, ag buko’t pareho ro andang mga sitwasyon. Habang nagaeapit ro andang kamatayon, nagtao sanda it maaeamon nga pahanumdom sa mga bataon. Ro kada isaea kanda hay nagpabahoe ku importansya it pagtuman sa Dyos. Ginpasueat ni Jehova ro andang maaeamon nga mga pahanumdom sa Biblia agud makatuon kita kanda. Bata man kita o magueang, makabenepisyo kita kon tun-an naton ro andang mga pahanumdom. (Roma 15:4; 2 Tim. 3:16) Sa rayang artikulo, pagatalakayon naton ro ulihing ginhambae it rayang tatlo nga magueang ag ro mga leksyon nga mabuoe naton sa andang ginhambae.
“MAGAEAWIG RO INYONG KABUHI”
3. Ano ro mga gin-obrang pag-alagad ni Moises kay Jehova?
3 Gingamit ni Moises ro anang bilog nga kabuhi sa pag-alagad kay Jehova. Nag-alagad imaw bilang propeta, huwis, lider, ag istoryador. Abu gid ro naeksperyinsyahan ni Moises sa anang kabuhi! Ginpangunahan na ro pagguwa it mga Israelita sa Ehipto ag nakita na mismo ro gin-obra nga mga milagro ni Jehova. Gingamit imaw ni Jehova agud ipasueat ro una sa lima nga libro it Biblia, ro Salmo 90, ag posible ro Salmo 91. Ag ginapatihan nga imaw man ro nagsueat ku libro it Job.
4. Sin-o ro ginpalig-on ni Moises, ag ham-an?
4 Bago imaw mamatay sa edad nga 120, gintipon ni Moises ro tanan nga mga Israelita ag ginpadumdom sanda sa mga bagay nga andang nakita ag naeksperyinsyahan. Kat bataon pa sanda, ro pila sa anang mga manogpaeamati hay nakasaksi it abung pamatuod ag milagro nga gin-obra ni Jehova pati man ro Anang paghukom sa Ehipto. (Ex. 7:3, 4) Nagtabok sanda sa gintunga nga tubi sa Puea nga Dagat ag nakita nanda ro pagkapirdi ni Paraon ag anang mga soldado. (Ex. 14:29-31) Kat sa disyerto sanda, naeksperyinsyahan nanda ro proteksyon ag pagdipara ni Jehova. (Deut. 8:3, 4) Tag maeapit lang magsueod ro mga Israelita sa Ginpromisa nga Eugta, gingamit ni Moises rayang ulihing tsansa agud palig-unon ro katawhan.a
5. Ano ro maeauman it mga Israelita sa ulihing ginhambae ni Moises nga makita sa Deuteronomio 30:19, 20?
5 Ano ro ginhambae ni Moises? (Basaha ro Deuteronomio 30:19, 20.) May manami nga paeaabuton nga ginaeauman ro nasyon it Israel. Paagi sa pagpakamayad ni Jehova, pwede sandang mabuhi it maeawig sa eugta nga ginpromisa kanda. Ro eugta hay manami ag mabungahon gid! Ginsugid kanda ni Moises kon ano ro andang agtunan: “Mabahoe ag manami nga mga syudad nga buko’t kamo ro nagpatindog, mga baeay nga puno it mayad nga mga bagay nga buko’t inyong hinuguran, mga bubon nga buko’t kamo ro nagkutkot, ag mga ueobasan ag mga puno it olibo nga buko’t kamo ro nagtanum.”—Deut. 6:10, 11.
6. Ham-an ginpasugtan it Dyos nga mapirdi it ibang nasyon ro Israel?
6 Nagtao man it paandam si Moises sa mga Israelita. Para padayon sanda nga makaestar sa mabungahon nga eugta, dapat tumanon nanda ro mga sugo ni Jehova. Ginpalig-on sanda ni Moises nga “pilion ro kabuhi” paagi sa pagpamati kay Jehova ag paagi sa “pag-unong kana.” Pero, ginsikway it mga Israelita si Jehova. Ngani ginpasugtan it Dyos nga mapirdi sanda it mga taga-Asiria, ag ku ulihi it mga taga-Babilonia nga nagdaea kanda bilang bihag maeayo sa andang ginaestaran.—2 Hari 17:6-8, 13, 14; 2 Cron. 36:15-17, 20.
7. Ano ro atong matun-an sa mga ginhambae ni Moises? (Tan-awa man ro piktyur.)
7 Ano ro atong matun-an? Ro pagtuman hay makaeuwas it kabuhi. Pareho sa mga Israelita kato nga maeapit lang makasueod sa Ginpromisa nga Eugta, kita man hay maeapit eon magsueod sa bag-ong kalibutan nga ginpromisa it Dyos. Sa indi magbuhay, makita naton nga mangin paraiso ro eugta. (Isa. 35:1; Luc. 23:43) Maduea eon ro Yawa ag ro anang mga demonyo. (Pah. 20:2, 3) Indi eon mapataeang it buko’t matuod nga relihiyon ro mga tawo paeayo kay Jehova. (Pah. 17:16) Dueaon man ro gubyerno it tawo nga nagapaantus sa andang mga sakop. (Pah. 19:19, 20) Owa it lugar ro mga rebelde sa Paraiso. (Sal. 37:10, 11) Tanan nga tawo hay magatuman sa matarung nga kasugoan ni Jehova, ngani may paghiusa eon ag katawhay. Dahil kara, may pagpalangga ag pagsalig ro kada isaea. (Isa. 11:9) Eksayted gid kita nga matabo ron! Dugang pa, kon tumanon naton si Jehova, pwede kitang mabuhi it padayon sa paraiso nga eugta bukon eang it sa ginatos nga dag-on kundi sa owa’t katapusan.—Sal. 37:29; Juan 3:16.
Kon tumanon naton si Jehova, mabuhi kita sa paraiso nga eugta bukon eang it sa ginatos nga dag-on kundi sa owa it katapusan (Tan-awa ro parapo 7)
8. Paalin nakabulig ro promisa nga kabuhi nga owa’t katapusan sa mabuhay eon nga misyonero? (Judas 20, 21)
8 Kon padayon naton nga pamaeandungan ro promisa it Dyos nga kabuhi nga owa’t katapusan, makabulig ra katon nga tumanon imaw maskin alin man nga problema ro atong maatubang. (Basaha ro Judas 20, 21.) Makabulig man ra nga masuk-ean naton ro atong mga kaeuyahon. Ro mabuhay eon nga misyonero sa Africa nga padayon nga ginasuk-ean ro anang kaeuyahon sa unod hay naghambae: “Narealisar ko rayon nga makapugong rayang kaeuyahon nga mabaton ko ro kabuhi nga owa’t katapusan. Ngani, mas nangin determinado gid ako nga suk-ean ag ipangamuyo ra it sinsero kay Jehova. Paagi kara, makaalagad ako kay Jehova nga may malimpyo nga konsensya.”
“MAGAMADINAEAG-ON KA”
9. Ano ro mga kalisdanan nga naeksperyinsyahan ni David sa anang kabuhi?
9 Nangin mayad gid nga hari si David. Mayad man imaw nga musikero, manogsueat it tula, soldado, ag propeta. Nakaeksperyinsya man imaw it mga kalisdanan. May mga dinag-on nga nagpinanago imaw dahil kay Haring Saul nga gusto imaw patyon. Kat hari eon imaw, kinahang-ean na man gihapon nga magpanago sa anang unga nga si Absalom nga gustong agawon ro anang trono. Maskin sa rayang mga kalisdanan ag sa seryosong mga saea nga haobra ni David, ginpamatud-an na nga mainunongon imaw sa Dyos hasta sa anang kamatayon. Naghambae si Jehova nga imaw “ro tawo nga [Anang] nahamut-an.” Dapat gid nga pamatian naton ro maaeamon nga pahanumdom ni David!—Binu. 13:22; 1 Hari 15:5.
10. Ham-an nagtao it pahanumdom si David sa anang unga nga si Solomon nga magabueos kana sa paghari?
10 Halimbawa, sayuron ta ro pahanumdom nga gintao ni David sa anang unga nga si Solomon nga magabueos kana sa paghari. Ginpili ni Jehova rayang bataon para magpatindog it templo kon siin masimba ag mapadunggan it mga tawo si Jehova. (1 Cron. 22:5) Makaatubang kara si Solomon it abung kalisdanan. Ano ro itao nga pahanumdom ni David kana? Tan-awon ta.
11. Base sa 1 Hari 2:2, 3, ano ro pasalig nga gintao ni David kay Solomon, ag paalin ra nangin matuod? (Tan-awa man ro piktyur.)
11 Ano ro ginhambae ni David? (Basaha ro 1 Hari 2:2, 3.) Ginhambae ni David sa anang unga nga kon tumanon na si Jehova, magamadinaeag-on ro anang kabuhi. Sa sueod it mga dinag-on, naeksperyinsyahan ni Solomon ro kadaeag-an sa bulig ni Jehova. (1 Cron. 29:23-25) Ginpatindog na ro manami nga templo ag ginsueat ro pila nga mga libro sa Biblia. Nangin kilaea man imaw sa anang kaaeam ag manggad. (1 Hari 4:34) Pero base sa ginhambae ni David, mangin madinaeag-on eang si Solomon kon padayon na nga tumanon si Jehova nga Dyos. Makasueobo, nagsimba ku ulihi si Solomon sa ibang mga dyos. Naakig kana si Jehova ag naduea na ro kaaeam sa paggahum nga may katarungan ag hustisya.—1 Hari 11:9, 10; 12:4.
Ro ulihing ginhambae ni David sa anang unga nga si Solomon hay makabulig katon nga tumanon si Jehova agud taw-an na kita it kaaeam nga makaobra it mayad nga mga desisyon (Tan-awa ro parapo 11-12)b
12. Ano ro atong matun-an sa mga ginhambae ni David?
12 Ano ro atong matun-an? Ro pagtuman hay nagatao it kadaeag-an. (Sal. 1:1-3) Syempre, owa man nagpromisa si Jehova nga itao na katon ro manggad ag ro dungog pareho kay Solomon. Pero kon tumanon naton ro atong Dyos, taw-an na kita it kaaeam nga makabulig katon nga makaobra it mayad nga mga desisyon. (Hulu. 2:6, 7; Sant. 1:5) Ro anang mga prinsipyo hay makagiya katon agud makaobra it mayad nga mga desisyon parti sa trabaho, edukasyon, kalingawan, ag kwarta. Kon sundon naton ro kaaeam halin sa Dyos, maprotektahan kita kara sa mga maeain nga resulta. (Hulu. 2:10, 11) Makakita kita it mayad nga mga amigo. Ag giyahan kita kara para mangin masadya ro atong pamilya.
13. Ano ro nakabulig kay Carmen agud mangin madinaeag-on sa anang kabuhi?
13 Nag-isip si Carmen nga taga-Mozambique nga kon magbuoe imaw it mataas nga edukasyon hay mangin manami ro anang kabuhi. Ngani, nagtuon imaw it architecture sa sangka unibersidad. Nagsueat imaw, “Gusto ko ang mga natun-an. Pero nagaubos ra it akong oras ag kusog. Sa eskuylahan eon ako it 7:30 a.m. hasta’t 6:00 p.m. Nalisdan ako mag-attend sa mga miting, ag nag-euya ang espiritwalidad. Ag narealisar ko nga nagaalagad ako sa daywa nga amo.” (Mat. 6:24) Ginpangamuyo na ro anang sitwasyon ag nag-research imaw sa atong mga publikasyon. Naghambae pa imaw: “Kat nabaton ko ro maaeamon nga pahanumdom halin sa mga elder ag sa ang nanay, nagdesisyon ako nga magpundo sa pag-eskuyla ag mag-alagad it bilog panahon kay Jehova. Nakabulig ra kakon nga makaobra it mayad nga mga desisyon sa ang kabuhi, ag owa gid ako nagnuoe.”
14. Ano ro pinakamensahe nanday Moises ag David?
14 Palangga gid ni Moises ag ni David si Jehova ag sayod nanda kon mauno ka importante ro pagtuman kana. Sa andang ulihing mga ginhambae, ginpalig-on nanda ro mga nagapamati kanda nga sundon ro andang halimbawa paagi sa pagpabilin nga matutom kay Jehova nga andang Dyos. Pareho man nandang ginpaandaman nga ratong magaaywan kay Jehova hay maduea ro anang pabor ag pati man ro mga pagpakamayad nga ginpromisa na kanda. Ro andang pahanumdom hay importante man katon makaron. Pagtaliwan it ginatos nga dag-on, ro sambato pa nga alagad ni Jehova hay nagpakita man ku importansya it pagpabilin nga matutom sa Dyos.
OWA EON IT MAS MAKAPASADYA PA
15. Ano ro naeksperyinsyahan ni apostol Juan sa anang kabuhi?
15 Si Juan hay pinalangga nga apostol ni Jesu-Cristo. (Mat. 10:2; Juan 19:26) Kaibahan si Juan sa bilog nga ministeryo ni Jesus, nasaksihan na nga nagaobra imaw it mga milagro, ag una imaw sa panahon it kalisdanan ni Jesus. Nagatan-aw si Juan habang ginapatay si Jesus ag nakita na man si Jesus pagkatapos ra nga mabanhaw. Nasaksihan na pa gid ro pag-uswag it Cristyanismo ku unang siglo halin sa maisot nga grupo it matutom nga mga pinili hasta nga ro mayad nga balita hay ‘ginpahayag sa tanan nga mga tawo.’—Col. 1:23.
16. Sin-o ro mga nakabenepisyo sa mga sueat ni Juan?
16 Kat maeapit eon mamatay si Juan, nagkapribilehiyo imaw nga mangin sambato sa manogsueat ku Bisaea it Dyos. Ginsueat na ro daeayawon nga “ginpahayag ni Jesu-Cristo.” (Pah. 1:1) Ginsueat na man ro Ebanghelyo nga nakapangaean kana, pati ro 1, 2 ag 3 Juan. Ro anang pangatlong sueat hay para sa matutom nga Cristyano nga si Gayo, nga palangga na gid bilang anang unga sa espiritwal. (3 Juan 1) Posible nga abu pa ro gintratar ni Juan kato bilang anang mga unga. Ro ginsueat it rayang matutom nga magueang nga eaki hay nagpalig-on sa tanan nga sumoeunod ni Jesus hasta makaron.
17. Base sa 3 Juan 4, ano ro nagatao it kasadya?
17 Ano ro ginsueat ni Juan? (Basaha ro 3 Juan 4.) Ginsueat ni Juan ro kasadya nga matao it pagsunod sa Dyos. Kat ginsueat na ro anang pangatlo nga sueat, ro pila hay nagapaeapta it saea nga mga pagturo ag nangin rason it pagbueoeag. Pero, ro iba hay padayon nga “nagakabuhi sa kamatuoran.” Gintuman nanda si Jehova ag ‘nagkabuhi sanda suno sa mga sugo [nana].’ (2 Juan 4, 6) Rayang matutom nga mga Cristyano hay nagtao it kasadya bukon eang kay Juan kundi pati man kay Jehova.—Hulu. 27:11.
18. Ano ro atong matun-an sa ginhambae ni Juan?
18 Ano ro atong matun-an? Ro katutom hay makatao it kasadya. (1 Juan 5:3) Halimbawa, masadya kita nga masayran nga napasadya naton si Jehova. Nagakasadya imaw kon makita na kita nga ginasikway ro tentasyon it kalibutan ag ginabaton ro kamatuoran. (Hulu. 23:15) Nagakasadya man ro mga anghel sa eangit. (Luc. 15:10) Masadya man kita nga makita ro kada isaea nga nagapabilin nga matutom, eabi eon gid kon nagaatubang it mga kalisdanan ag tentasyon. (2 Tes. 1:4) Ag kon dueaon eon rayang sistema ni Satanas, mangin masadya kita kon makapabilin kita nga matutom kay Jehova.
19. Ano ro nahambae it sister nga si Rachel parti sa pagturo it kamatuoran sa iba? (Tan-awa man ro piktyur.)
19 Nasadyahan gid kita kon ginasugid naton ro kamatuoran sa iba. Si Rachel nga taga-Dominican Republic hay nakabatyag nga sangka mabahoe gid nga pribilehiyo ro pagturo sa iba parti sa atong Dyos nga si Jehova. Kon ginadumdom na ro anang espiritwal nga mga unga, nagahambae imaw: “Indi ko gid maeksplikar ro kasadya nga akong nabatyagan kon nakikita ko ro ang mga gintur-an nga padayon nga nagapalangga kay Jehova, nagasalig kana, ag nagabag-o it andang kabuhi agud mapasadya imaw. Rayang kasadya hay mas eabaw gid kaysa sa mga pagtinguha ag sakripisyo nga akong gin-obra para matur-an sanda.”
Masadya kita kon nagaturo sa iba nga palanggaon ag tumanon si Jehova (Tan-awa ro parapo 19)
PANGINPUSLI RO ULIHING GINHAMBAE IT MATUTOM NGA MGA EAKI
20. Ano ro atong pagkapareho kanday Moises, David, ag Juan?
20 Sanday Moises, David, ag Juan hay mabuhay eon nga nagkabuhi ag iba ro andang sitwasyon katon. Pero abu ro atong pagkapareho kanda. Nagaalagad sanda sa matuod nga Dyos, ag kita man. Pareho kanda, nagapangamuyo kita kay Jehova, nagasalig ag nagapangayo it giya. Ag pareho ku rayang mga eaki, nagasalig kita nga pakamayron ni Jehova ro mga nagatuman kana.
21. Ano ro mga pagpakamayad nga mabaton it mga nagapamati sa pahanumdom nanday Moises, David, ag Juan?
21 Kabay nga pamatian naton ro ulihing ginhambae it rayang magueang nga mga eaki paagi sa pagtuman sa mga sugo ni Jehova. Rayon mabaton naton ro matuod nga kadaeag-an sa tanan natong ginaobra. “Magaeawig ro [atong] kabuhi,” huo, mabuhi kita sa owa’t katapusan! (Deut. 30:20) Ag magakasadya kita nga padayon natong mapahamut-an ro atong mapinalanggaon nga Ama, nga nagatuman it tanan nanang promisa nga mas sobra pa sa atong mapaabot o maisip.—Efe. 3:20.
KANTA 129 Padayon Kita nga Magbatas
a Ro kaabuan sa mga Israelita nga nakakita it mga milagro ni Jehova sa Puea nga Dagat hay owa gid nakakita it Ginpromisa nga Eugta. (Num. 14:22, 23) Ginhambae ni Jehova nga ro mga 20 anyos pataas hay mamatay sa disyerto. (Num. 14:29) Pero, ratong owa pa kaabot it 20 anyos hay nakaeuwas. Kaibahan nanda sanday Josue, Caleb, ag ro tribu ni Levi nga nakatabok sa Suba it Jordan ag nakasueod sa Canaan.—Deut. 1:24-40.
b PIKTYUR: Waea: Ginahambae ni David ro anang ulihing pahanumdom sa anang unga nga si Solomon. Tuo: Ro mga estudyante sa Pioneer Service School hay nakabenepisyo sa teokratiko nga edukasyon.