Buko’t Matag-od ro Alima ni Jehova

1. Paalin ginpakita ni Moises nga nagasalig imaw kay Jehova kat ginpangunahan na ro mga Israelinhon paguwa sa Ehipto?

NAGASUGID ro libro it Hebreo parti sa mga alagad ni Jehova nga may pagtuo kana, sambilog kara hay si Moises nga may daeayawon gid nga pagtuo. (Heb. 3:​2-5; 11:​23-25) Ginpakita na ro pagtuo kat ginpangunahan na ro mga Israelinhon paguwa sa Ehipto. Owa na ginpasugtan ro anang kahadlok kay Paraon ag sa anang mga soldado nga magpugong kana. Nagsalig gid imaw kay Jehova, ag ginpangunahan na ro mga Israelinhon paagto sa Puea nga Dagat ag rayon sa disyerto. (Heb. 11:​27-29) Kaeabanan sa mga Israelinhon hay nagduda nga kayang itao ni Jehova ro andang mga kinahang-eanon, pero padayon nga nagsalig si Moises sa anang Dyos. Ag owa gid imaw nadismaya dahil milagruso nga gintao ni Jehova ro pagkaon ag tubi sa mga Israelinhon para mabuhi sanda sa disyerto.a—Ex. 15:​22-25; Sal. 78:​23-25.

2. Ham-an ginpangutana ni Jehova si Moises it “Matag-od baea ro alima ni Jehova”? (Numeros 11:​21-23)

² May mabakud gid nga pagtuo si Moises. Pero, mga sang dag-on pagkatapos nga gin-euwas ni Jehova ro mga Israelinhon, nabaeaka si Moises kon kaya gid man baea itao ni Jehova ro karne nga ginhambae na kanda. Indi maimadyin ni Moises kon paalin ra itao ni Jehova sa minilyon nga tawo nga nagakampo sa disyerto. Ngani, ginpangutana ni Jehova si Moises it “Matag-od baea ro alima ni Jehova?” (Basaha ro Numeros 11:​21-23.) Ro ekspresyon nga “alima ni Jehova” hay nagatukoy sa baeaan nga espiritu it Dyos, o sa anang aktibo nga pwersa. Matsa ginapangutana ni Jehova si Moises, ‘Ginaisip mo gid baea nga indi ko kayang obrahon kon ano ro akong ginhambae?’

3. Ham-an dapat mangin interesado kita sa eksperyinsya ni Moises ag ku mga Israelinhon?

³ Nagakabaeaka ka man baea kon itao gid man ni Jehova ing materyal nga mga kinahang-eanon ag ku ing pamilya? Posibleng nabatyagan mo eon ra. Ngani, tun-an ta ro eksperyinsya ni Moises ag ku mga Israelinhon nga owa nagsalig kay Jehova nga kaya nang itao ro andang mga kinahang-eanon. Sayuron ta man ro mga prinsipyo sa Biblia nga makapabakud it atong pagsalig nga buko’t matag-od ro alima ni Jehova.

MAGTUON SA HALIMBAWA NI MOISES AG KU MGA ISRAELINHON

4. Ham-an nag-umpisang magduda ro mga Israelinhon nga kayang itao ni Jehova ro andang mga kinahang-eanon?

⁴ Ham-an nag-umpisang magduda ro mga Israelinhon nga kayang itao ni Jehova ro andang mga kinahang-eanon? Ro mga Israelinhon ag ro mga buko’t Israelinhon nga halin sa Ehipto hay magkaibahan nga nagtikang sa disyerto paagto sa Ginpromisa nga Eugta. (Ex. 12:38; Deut. 8:15) Nagsawa ro mga buko’t Israelinhon sa pagkaon it manna, ag pati man rayon ro mga Israelinhon, ngani nag-umpisa sanda sa pagreklamo. (Num. 11:​4-6) Nahidlaw sanda sa mga pagkaon nga igto sa Ehipto. Dahil sa andang pagreklamo, nagkabaeaka si Moises kon siin imaw mabuoe it itao kanda.​—Num. 11:​13, 14.

5-6. Ano ro atong matun-an kon paalin naimpluwensyahan it mga buko’t Israelinhon ro abung Israelinhon?

⁵ Nangin buko’t mapinasaeamaton ro mga buko’t Israelinhon sa mga gintao ni Jehova kanda ag naimpluwensyahan man ro mga Israelinhon. Pwede man kitang maimpluwensyahan it mga tawo nga bukon it mapinasaeamaton ag mangin bukon it kontento sa mga ginatao katon ni Jehova. Pwede rang matabo kon isipon naton ro mga bagay nga may una kita dati o maibog sa mga bagay nga may una ro iba. Pero, mangin mas masadya kita kon tun-an naton nga mangin kontento sa kon ano ro una katon.

⁶ Dapat gindumdom it mga Israelinhon kon ano ro ginpromisa kanda ni Jehova. Ginhambae na nga itao na it bugana ro andang mga kinahang-eanon kon igto eon sanda sa Ginpromisa nga Eugta, ag bukon it habang una pa sanda sa disyerto. Pareho karon, imbes magpukos sa mga bagay nga owa katon makaron, dapat magpukos kita sa mga promisa ni Jehova nga itao na katon sa paeaabuton. Pamaeandungan man naton ro mga teksto nga makabulig katon nga mas magsalig pa gid kay Jehova.

7. Ham-an makasigurado kita nga buko’t matag-od ro alima ni Jehova?

⁷ Basi naisip mo gihapon kon ham-an ginpangutana it Dyos si Moises it “Matag-od baea ro alima ni Jehova?” Posibleng ginabuligan ni Jehova si Moises nga mag-isip bukon eang it parti sa kusog it anang gamhanan nga alima kundi pati man kon paalin ra makaabot maskin siin. Ngani kayang itao ni Jehova ro ginpangayo nga karne it mga Israelinhon maskin una sanda sa disyerto. Paagi sa “gamhanan nga alima ag nakaunat nga butkon,” ginpakita it Dyos ro anang gahum. (Sal. 136:​11, 12) Ngani kon una kita sa malisud nga sitwasyon, makasigurado kita nga kaya kitang buligan ni Jehova maskin siin man kita.​—Sal. 138:​6, 7.

8. Paalin naton malikawan ro gin-obrang saea it ratong mga sa disyerto? (Tan-awa man ro piktyur.)

⁸ Gintuman ni Jehova ro anang promisa. Milagruso na nga gintaw-an it kaabu-abu nga pugo ro mga Israelinhon. Pero owa gid sanda nagpasaeamat kay Jehova, kundi abu ro nangin sueok. Sang adlaw ag tunga sanda nga nagtipon it mga pugo. Naakig gid si Jehova sa ratong “mga sueok,” ag ginpatay na sanda. (Num. 11:​31-34) May matun-an kita sa rayang halimbawa. Dapat maghaeong kita nga indi mangin sueok. Manggaranon man kita o pobre, dapat natong unahon ro pagtipon it “manggad sa eangit” paagi sa pagpabakud it atong pagpakig-amigo kay Jehova ag kay Jesus. (Mat. 6:​19, 20; Luc. 16:9) Kon obrahon naton ron, makasigurado kita nga itao ni Jehova ro atong mga kinahang-eanon.

9. Sa ano kita makasalig kon magbulig si Jehova?

⁹ Handa gid magbulig si Jehova sa anang mga alagad makaron. Pero, owa ra nagakahueogan nga indi eon gid kita magkaproblema sa kwarta o pagkaon.b Kon matabo ra, indi gid kita pagpabay-an ni Jehova. Taw-an na kita it kusog para maatubang ro mga kalisdanan. Paalin naton mapakita nga nagasalig kita nga itao ni Jehova ro atong mga kinahang-eanon? Tan-awon ta ro daywang ka sitwasyon: (1) kon nagaproblema kita sa pinansyal ag (2) kon nagaplano para sa atong materyal nga mga kinahang-eanon sa paeaabuton.

KON NAGAPROBLEMA KITA SA PINANSYAL

10. Ano nga mga problema sa pinansyal ro posible natong maeksperyinsyahan?

¹⁰ Habang mas nga nagaeapit ro katapusan it rayang sistema, mapaabot naton nga mas magalisud ro atong sitwasyon. Dahil sa problema sa politika, mga gera, mga kalamidad, o bag-ong pandemya nga pwede mangin rason nga madueaan kita it trabaho, mga pagkabutang, o it atong baeay. Posibleng mag-usoy kita it bag-ong trabaho o mag-isip nga magsaylo it ibang lugar kaibahan ku atong pamilya para maitao ro andang kinahang-eanon. Ano ro makabulig katon nga makaobra it mga desisyon nga nagapakita nga nagasalig kita kay Jehova?

11. Ano ro makabulig kimo kon nagaproblema ka sa pinansyal? (Lucas 12:​29-31)

¹¹ Ro una mong obrahon hay ro pagsugid kay Jehova it ing mga ginakabaeak-an. (Hulu. 16:3) Mangabay kana it kaaeam nga kinahang-ean mo agud makaobra ka it mayad nga mga desisyon ag mangin kalmado para “indi [ka] magkahawag” sa ing sitwasyon. (Basaha ro Lucas 12:​29-31.) Padayon nga mangabay kay Jehova nga buligan ka nga mangin kontento sa kon ano eang ro may una ka. (1 Tim. 6:​7, 8) Mag-research sa atong mga publikasyon kon alin ing obrahon kon nagaproblema sa pinansyal. Abu eon ro nabuligan it mga video ag mga artikulo sa atong website nga jw.org para maatubang ro problema sa pinansyal.

12. Ano ro mga pangutana nga makabulig sa sangka Cristyano para makaobra it pinakamayad nga desisyon para sa anang pamilya?

¹² May pila nga nagbaton it trabaho nga kinahang-ean nandang aywan ro andang pamilya. Pero napamatud-an eon nga ro rayang desisyon hay bukon gid it mayad. Bago magbaton it trabaho, isipa bukon eang it ro pinansyal nga benepisyo kundi pati man ro epekto kara sa ing espiritwalidad ag ku ing pamilya. (Luc. 14:28) Pangutan-a ing sarili: ‘Paalin kara maapektuhan ro ang relasyon sa ang asawa? Maapektuhan baea kara ro akong pag-attend sa miting, pagministeryo, ag ro ang pagpakig-iba sa mga igmanghod?’ Kon may mga unga ka, kinahang-ean mo man pangutan-on ing sarili it rayang importanteng pangutana: ‘Paalin ko mapabahoe ang mga unga “sa disiplina ag paggiya ni Jehova” kon maeayo ako kanda?’ (Efe. 6:​4, NWT) Kon nagaobra ka it desisyon, sunda ro paggiya ni Jehova, bukon it ro mga ginhambae kimo it ing mga igbata o mga amigo nga owa nagasunod sa mga prinsipyo it Biblia.c Si Tony, nga nagaestar sa western Asia hay nakabaton it abung offer nga magtrabaho sa abroad. Pero, pagkatapos nang ipangamuyo ra kay Jehova ag iistorya sa anang asawa, nagdesisyon imaw nga indi pagbatunon ratong mga trabaho ag gin-isip na kon ano ro mga dapat nandang bag-uhon para mas makatipid pa gid sanda. Makaron, naghambae si Tony: “Nagkapribilehiyo ako nga mabuligan ro abung tawo nga makilaea si Jehova, ag palangga gid it among mga unga si Jehova. Natun-an it among pamilya nga habang ginasunod namon ro ginhambae ni Jesus sa Mateo 6:​33, indi gid kami pagpabay-an ni Jehova.”

KON NAGAPLANO PARA SA ATONG MATERYAL NGA MGA KINAHANG-EANON SA PAEAABUTON

13. Ano ro pwede natong obrahon makaron para may una kita nga kwarta nga magamit kon maggueang eon kita?

¹³ Matestingan man ro atong pagsalig sa ikasarang ni Jehova sa pagbulig kon ginahandaan naton ro atong mangin sitwasyon kon maggueang eon kita. Ginapalig-on kita it Biblia nga maghugod para sa ulihi may kwarta kitang magamit para sa atong mga kinahang-eanon. (Hulu. 6:​6-11) Ngani kon kaya malang naton, mayad gid nga magtipon kita it kwarta para sa paeaabuton. Matuod nga makatao it proteksyon ro kwarta. (Man. 7:12) Pero, dapat natong likawan nga mangin pinakaimportante ra sa atong kabuhi.

14. Paalin makabulig katon ro Hebreo 13:5 nga indi masyadong mabaeaka sa atong pinansyal nga kinahang-eanon sa paeaabuton?

¹⁴ May ginsugid nga istorya si Jesus nga nagapakita nga kabuangan ro pagtipon it kwarta ku sangka tawo kon bukon imaw it “manggaranon sa atubangan it Dyos.” (Luc. 12:​16-21) Owa it nakasayod kon ano ro matabo sa paeaabuton. (Hulu. 23:​4, 5; Sant. 4:​13-15) Ginhambae man ni Jesus nga ro gustong mangin sumoeunod nana hay dapat handa ‘mag-aywan’ it tanan nandang pagkabutang. (Luc. 14:​33, Ro Bag-o nga Kasugtanan, TAP) Ag raya ro gin-obra it mga Cristyano kato sa Judea. Masadya sanda maskin maduea rayang mga bagay. (Heb. 10:34) Makaron, abung mga igmanghod ro nadueaan it trabaho dahil ginpakita nanda nga neutral sanda sa politika. (Pah. 13:​16, 17) Ano ro nakabulig kanda nga maobra ron? Nagasalig gid sanda sa promisa ni Jehova nga, “Indi ko gid kamo pag-aywanan ukon pagpabay-an.” (Basaha ro Hebreo 13:5.) Ngani nagaplano kita it mayad para mangin handa sa paeaabuton ag kon may matabo nga owa naton ginapaabot, nagasalig kita sa bulig ni Jehova.

15. Ano dapat ro balanse nga pagtan-aw it Cristyanong mga ginikanan sa andang mga unga? (Tan-awa man ro piktyur.)

¹⁵ Sa pilang mga kultura, gustong magkaunga it mga mag-asawa para may magabulig kanda sa pinansyal kon maggueang eon sanda. Pero ginahambae it Biblia nga ro mga ginikanan ro dapat magtao it kinahang-eanon ku andang mga unga. (2 Cor. 12:14) Syempre, habang nagagueang ro mga ginikanan, kinahang-ean man nanda it praktikal nga bulig ag nasadyahan man nga magdipara kanda ro andang mga unga. (1 Tim. 5:4) Pero naintindihan it mga ginikanan nga nagasalig kay Jehova, nga mangin mas masadya sanda kon buligan nanda ro andang mga unga nga mangin mga alagad ni Jehova, kaysa sa tur-an ro andang mga unga magtipon it abung kwarta para masuportahan sanda sa ulihi.​—3 Juan 4.

16. Paalin tur-an it mga ginikanan ro andang mga unga nga masuportahan ro andang sarili sa pinansyal? (Efeso 4:28)

¹⁶ Tur-i ing mga unga paagi sa ing halimbawa nga nagasalig ka kay Jehova para mangin handa sanda nga suportahan ro andang sarili. Habang bata pa sanda, ipakita ro importansya it pagiging mahugod. (Hulu. 29:21; basaha ro Efeso 4:28.) Habang nagabahoe sanda, buligi sanda nga magtuon it mayad sa eskuylahan. Mayad gid kon naga-research ro Cristyanong mga ginikanan ag kon ginaaplikar nanda ro mga prinsipyo sa Biblia para buligan ro andang mga unga nga makadesisyon kon paalin gamiton ro andang natun-an sa eskuylahan. Makabulig ra sa andang mga unga para masuportahan ro andang sarili ag padayon nga makapartisipar sa pagministeryo.

17. Sa ano kita makasigurado?

¹⁷ Makasigurado gid ro matutom nga mga alagad ni Jehova nga gusto na ag may ikasarang imaw sa pagtao it andang materyal nga mga kinahang-eanon. Habang mas nagaeapit ro katapusan it rayang sistema it mga bagay, mas dapat kitang magsalig kay Jehova. Maskin alin man ro matabo, kabay nga mangin determinado kita nga magsalig nga gamiton ni Jehova ro anang gahum para itao ro atong materyal nga mga kinahang-eanon. Makasigurado kita nga ro gamhanan nga alima ni Jehova ag ro anang nakaunat nga butkon hay bukon it matag-od sa pagbulig katon maskin siin man kita.