Kon Paalin Magtao it Mayad nga Eaygay

1. Sin-o ro kinahang-ean nga magtao it eaygay, ag ham-an?

ANO ing nabatyagan kon nagatao ka it eaygay? Para sa iba, maeumo ra obrahon. Pero ro iba hay nahadlok o buko’t komportable nga magtao it pahanumdom, o eaygay sa iba. Maskin alin man kara ing nabatyagan, tanan kita hay kinahang-ean nga magtao it eaygay kon amat. Ham-an? Dahil ginhambae ni Jesus nga ro anang matuod nga mga disipulo hay makilaea paagi sa andang pagpalangga nga ginapakita sa kada isaea. (Juan 13:35) Ag ro sangka paagi nga mapakita naton ra sa atong mga igmanghod hay ro pagtao kanda it eaygay kon kinahang-ean. Ginahambae it Biblia nga ro “maeapit nga pag-amiguhan” hay nagabakud dahil sa “sinsero nga eaygay.”​—Hulu. 27:9.

2. Ano dapat ro obrahon it mga elder, ag ham-an? (Tan-awa man ro kahon nga “Pagtao it Eaygay sa Midweek Meeting.”)

² Ro mga elder ro dapat mas nakasayod kon paalin magtao it mayad nga eaygay sa iba. Ginpili ni Jehova ag ni Jesus rayang mga eaki para diparahon ro kongregasyon. (1 Ped. 5:​2, 3) Ginaobra nanda ra paagi sa pagtao it base sa Biblia nga mga eaygay sa andang mga diskurso sa kongregasyon. Nagatao man sanda it eaygay sa kada isaea katon, pati man sa ratong mga nag-aywan kay Jehova agud makabalik sanda sa kongregasyon. Paalin ro mga elder ag pati man kita makatao it mayad nga eaygay?

3. (a) Ano ro atong obrahon para makatao it mayad nga eaygay sa iba? (Isaias 9:6; tan-awa man ro kahon nga “Tueara si Jesus Kon Nagatao it Eaygay.”) (b) Ano ro atong pagatalakayon sa rayang artikulo?

³ Para makatao it mayad nga eaygay, tun-an naton ro mayad nga mga halimbawa it mga karakter sa Biblia, eabi eon gid si Jesus. Ro sambilog sa mga titulo nga gintao kana hay ro “Maaeam nga Manog-eaygay.” (Basaha ro Isaias 9:6.) Sa rayang artikulo, pagatalakayon naton kon ano ro atong obrahon kon may nagpangayo katon it eaygay ag kon ano ro pwede natong obrahon kon kinahang-ean natong magtao it eaygay maskin owa ra ginpangayo. Pagatalakayon man naton kon ham-an importante ro pagtao it eaygay sa tama nga panahon ag sa tama nga paagi.

KON MAY NAGPANGAYO KATON IT EAYGAY

4-5. Kon may nagpangayo katon it eaygay, ano dapat ro pangutan-on anay naton sa atong sarili? Magtao it halimbawa.

⁴ Kon may nagpangayo katon it eaygay, ano ro posible nga unang reaksyon naton? Posibleng masadyahan gid kita ag magtao eagi kana it eaygay. Pero dapat pangutan-on anay naton ro atong sarili, ‘Kwalipikado baea ako nga magtao it eaygay sa rayang bagay?’ Kon amat, ro pinakamayad nga mabulig naton hay bukon ro pagtao it eaygay kundi ro pagsugid kana kon sin-o ro mas kwalipikado nga makatao kana it eaygay sa rayang bagay.

⁵ Halimbawa, may maeapit ka nga amigo nga may malala nga masakit. Ginsugid na kimo nga naga-research imaw it mga paagi it pagbueong nga pwede kana, ag ginpangutana ka rayon nana kon alin para kimo ro mas mayad nga pagbueong para kana. May napili ka man kunta nga pagbueong nga bagay kana, pero sayod mo nga bukon ka it doktor ag owa ka it eksperyinsya sa pagbueong it anang masakit. Sa ruyong sitwasyon, ro pinakamayad nga maobra mo hay ro pagbulig sa ing amigo nga makausoy it doktor nga makabulig kana.

6. Ano ro mayad natong obrahon bago magtao it eaygay?

⁶ Maskin pa pamatyag naton nga kwalipikado kita sa pagtao it eaygay sa sangka sitwasyon, mas mayad nga indi anay kita magtao it eaygay sa nagpangayo katon. Ham-an? Ro Hulubaton 15:28 hay nagahambae nga ro “matarung hay nagaisip anay bago magsabat.” Paalin kon pamatyag naton hay sayod naton ro sabat? Pwede gihapon kitang mag-research, magpangamuyo, ag magpamaeandong. Kon obrahon naton ra, mas may kompyansa kita nga ro atong eaygay hay pareho sa pagtan-aw ni Jehova sa ruyong sitwasyon. Tan-awon ta ro halimbawa ni propeta Natan.

7. Ano ing matun-an sa halimbawa ni propeta Natan?

⁷ Ginhambae ni Haring David kay propeta Natan nga gusto nang magpatindog it templo para kay Jehova. Nagsugot eagi si Natan kara. Pero ham-an dapat nagpangutana anay si Natan kay Jehova? Dahil buko’t si David ro gusto ni Jehova nga magpatindog it templo. (1 Cron. 17:​1-4) Ginapakita it rayang natabo nga kon may nagpangayo katon it eaygay, mayad gid nga ‘indi kita magpadasudaso sa paghambae.’—Sant. 1:19.

8. Ano pa ro rason kon ham-an dapat maghaeong kita kon nagatao it eaygay?

⁸ Raya ro sambilog pa nga rason kon ham-an dapat maghaeong kita kon nagatao it eaygay sa iba: Pwede kitang madaeahig o mabasoe kon buko’t mayad ro resulta it atong gin-eaygay kanda. Ngani, importante gid nga mag-isip anay kita it mayad bago magtao it eaygay.

KON NAGATAO IT EAYGAY MASKIN OWA RA GINPANGAYO

9. Sa ano dapat sigurado ro mga elder bago sanda magtao it eaygay? (Galacia 6:​1, NWT)

⁹ Kon amat, kinahang-ean pahanumduman it mga elder ro sangka igmanghod kon nakaobra ra it “saea nga tikang.” (Basaha ro Galacia 6:​1, NWT.) Ruyong igmanghod hay posibleng nagaobra it saea nga mga desisyon, nga sa ulihi hay pwedeng magresulta sa pag-obra it seryosong saea. Ro goal it mga elder hay para buligan ruyong igmanghod nga makapabilin sa daean paagto sa kabuhi nga owa it katapusan. (Sant. 5:​19, 20) Pero para mangin epektibo ro andang eaygay, kinahang-ean anay nandang siguraduhon kon nakaobra gid man it saea nga tikang ruyong igmanghod. Dahil sayod nanda nga ginapasugtan kita ni Jehova nga mag-obra it mga desisyon base sa atong sariling konsensya. (Roma 14:​1-4) Ngani, paalin kon ro sangka igmanghod hay nakaobra gid man it saea nga tikang ag nagdesisyon ro mga elder nga taw-an imaw it eaygay?

10-12. Ano dapat ro obrahon it mga elder kon nagatao it eaygay maskin owa ra ginpangayo? Magtao it ilustrasyon. (Tan-awa man ro piktyur.)

¹⁰ Buko’t maeumo para sa mga elder nga magtao it eaygay sa sangka igmanghod kon owa na man ra ginpangayo. Ham-an? Naghambae si apostol Pablo nga ro sangka tawo hay posibleng makaobra it saea nga tikang bago na ra mapan-uhan. Ngani bago imaw taw-an it eaygay, may mga bagay nga dapat obrahon ro mga elder para mangin mas handa rayang igmanghod nga magpamati sa eaygay.

¹¹ Ro pagtao it eaygay maskin owa ra ginpangayo hay pareho sa pagpatubo it tanum sa matig-a nga eugta. Bago magtanum ro sangka mangunguma, ginabasuk-ay na anay ro eugta agud maghumok ag mahanda ra para tamnan. Rayon, itanum na eon ro binhi ag bunyagan ra para magtubo. Pareho karon, may mga bagay nga pwedeng obrahon ro elder para mangin handa ro sangka igmanghod nga magpamati sa eaygay. Halimbawa, nagausoy ro elder it tama nga panahon agud istoryahon ro igmanghod para ihambae nga nabaeaka imaw kana ag may gusto imaw nga isugid. Kon ro manog-eaygay hay kilaea nga mapinalanggaon ag mabuot, mas maeumo para sa iba nga batunon ro anang eaygay.

¹² Sa andang pag-istorya, padayon nga mabuligan it elder ro igmanghod nga mangin mas madali kana ro pagbaton it eaygay paagi sa pagpadumdom nga tanan kita hay nagakasaea ag nagakinahang-ean it eaygay kon amat. (Roma 3:23) Sa matinahuron ag kalmado nga paagi, ipakita kana it elder ro mga teksto sa Biblia nga nakaobra imaw it saea nga tikang. Kon naintindihan eon it igmanghod nga nakaobra imaw it saea nga desisyon, “nagatanum it binhi” ro elder paagi sa klaro nga pag-eksplikar kana kon ano ro mga kinahang-ean nang obrahon para ayuson ra. Sa katapusan it andang pag-istorya, “ginabunyagan” it elder ro binhi paagi sa pagtao kana it sinsero nga komendasyon ag sa pagpangamuyo kaibahan nana.​—Sant. 5:15.

13. Paalin masigurado it mga elder nga naintindihan it sangka igmanghod ro gintao kana nga eaygay?

¹³ Kon amat, iba ro buot hambaeon it manog-eaygay sa pagkaintindi it sangka tawo nga nagabaton it eaygay. Ano ro pwedeng obrahon it mga elder para masigurado nga naintindihan it sangka igmanghod ro andang gin-eaygay? Sa matinahuron nga paagi, pwedeng magpangutana ro mga elder kon naintindihan na ro andang gin-eaygay kana ag kon sayod na kon paalin ra maaplikar.​—Man. 12:11.

PAGTAO IT EAYGAY SA TAMA NGA PANAHON AG SA TAMA NGA PAAGI

14. Ham-an indi dapat kita magtao it eaygay kon akig kita?

¹⁴ Tanan kita hay buko’t perpekto, ngani makahambae kita o makaobra it mga bagay nga makapaakig sa iba. (Col. 3:13) Ginasugid it Biblia nga kon amat, posibleng may mahambae man o may maobra ro iba nga makapaakig katon. (Efe. 4:26) Pero indi gid dapat kita magtao it eaygay kon akig kita. Ham-an? Dahil “ro kaakig it tawo owa nagabulig para manginmatarung sa atubangan it Dyos.” (Sant. 1:20) Kon magtao kita it eaygay habang akig kita, posibleng mapalala pa naton ro sitwasyon. Owa ra nagakahueogan nga indi eon naton pag-ihambae ro atong ginaisip ag ginabatyag sa nagpaakig katon. Pero, dapat natong hueaton nga kalmado eon kita bago makipag-istorya kana. Makatuon kita kay Elihu, nga nagtao it mayad nga eaygay kay Job.

15. Ano ro atong matun-an sa halimbawa ni Elihu? (Tan-awa man ro piktyur.)

¹⁵ Sa sueod it pilang adlaw, gintinguhaan ni Job nga pamatud-an nga saea ro mga akusasyon kana it anang buko’t matuod nga mga amigo. Ginpamatian ni Elihu ro anang mga ginhambae ag naeuoy gid imaw kay Job. Pero kat gintinguhaan ni Job nga pamatud-an nga inosente imaw, ag naghambae it mga bagay nga buko’t matuod parti kay Jehova, naakig gid kara si Elihu. Maskin raya ro anang ginabatyag, naghueat anay imaw nga mangin kalmado bago eaygayan si Job sa matinahuron nga paagi. (Job 32:2; 33:​1-7) Ro halimbawa ni Elihu hay makatao katon it importanteng leksyon: Mangin mas epektibo ro eaygay kon itao ra sa tama nga panahon ag sa tama nga paagi, nga may respeto ag pagpalangga.​—Man. 3:​1, 7.

PADAYON NGA MAGTAO AG MAGBATON IT EAYGAY

16. Ano ing matun-an sa Salmo 32:8?

¹⁶ Ro tema nga teksto sa rayang artikulo hay nagahambae nga ‘nagaeaygay si Jehova katon habang nagatan-aw imaw katon.’ (Basaha ro Salmo 32:8.) Ginapakita kara nga padayon na kita nga buligan. Owa na eang kita ginataw-an it eaygay kundi ginabuligan na man kita nga maaplikar ra. Kanami gid nga halimbawa para katon! Kon may pribilehiyo kita nga makatao it eaygay sa iba, kabay nga tuearon naton si Jehova paagi sa padayon nga pagpalig-on kanda ag pagbulig agud makaobra sanda it mayad nga mga desisyon.

17. Kon nagatao ro mga elder it espisipiko ag base sa Biblia nga mga eaygay, ano ro mapakita nanda? Ieksplikar. (Isaias 32:​1, 2)

¹⁷ Mas kinahang-ean naton makaron nga magtao ag magbaton it eaygay. (2 Tim. 3:1) Kon nagatao ro mga elder it espisipiko ag base sa Biblia nga mga eaygay, mapakita nanda nga “pareho [sanda] sa sapa nga nagailig sa eugta nga owa it tubi.” (Basaha ro Isaias 32:​1, 2.) Nagapasaeamat man kita sa atong mga amigo nga owa nagadaywang-isip nga magtao katon it eaygay nga kinahang-ean naton. Ro andang mga eaygay hay pareho sa “mga mansanas nga bueawan sa pilak nga bueotangan.” (Hulu. 25:11) Kabay nga padayon natong tun-an kon paalin magtao ag magbaton it mayad nga eaygay.