Makasigurado Ka nga Ginpatawad Ka Eon ni Jehova

1-2. Ano ro atong mabatyagan kon sayod naton nga napatawad eon ni Jehova ro atong mga saea? (Tan-awa man ro piktyur.)

SAYOD ni Haring David kon mauno ro pamatyag nga nakokonsensya gihapon sa mga saea nga haobra dati. (Sal. 40:12; 51:3; superscription) Nakaobra imaw it seryosong mga saea. Pero, sinsero imaw nga naghinuesoe ag ginpatawad imaw ni Jehova. (2 Sam. 12:13) Bilang resulta, nabatyagan ni David ro kasadya kat nasayran na nga ginpatawad eon imaw ni Jehova.​—Sal. 32:1.

² Mabatyagan man naton ro kasadya kon masayran naton nga ginkaeuy-an kita ni Jehova ag ginpatawad sa atong mga saea. Makaumpaw gid masayran nga handa si Jehova sa pagpatawad sa atong mga saea maskin pa seryoso ra kon sinsero kita nga nagahinuesoe, nagasugid it atong mga saea, ag nagatinguha gid nga indi ra pag-obrahon it uman! (Hulu. 28:13; Binu. 26:20; 1 Juan 1:9) Ag makapalig-on pa gid masayran nga ginapatawad ni Jehova ro atong mga saea nga matsa owa gid ra natabo!—Eze. 33:16.

3-4. Ano ro nabatyagan it sangka sister pagkatapos na nga mabautismuhan, ag ano ro atong pagatalakayon sa rayang artikulo?

³ Kon amat, nalisdan ro iba nga magpati nga ginpatawad eon sanda ni Jehova. Raya man ro nabatyagan ni Jennifer. Gintur-an imaw it anang mga ginikanan parti kay Jehova. Pero kat tin-edyer eon imaw, nag-umpisa imaw sa pag-obra it maeain nga mga bagay ag nangin doble kara ro anang pagkabuhi. Pero pagtaliwan it pilang dag-on, nag-obra imaw it mga pagbag-o, nagdedikar kay Jehova, ag nagpabautismo. Naghambae imaw: “Nangin imoral ako, paeahilong, maakigon, ag ro pag-usoy it kwarta ro nangin pinakaimportante sa ang kabuhi. Sayod ko nga ginahambae it Biblia nga dahil sa sakripisyo ni Cristo, mapatawad ni Jehova ro atong mga saea. Pero maskin naghinuesoe eon ako ag nangayo it kapatawaran kay Jehova, nalisdan gihapon ako magpati nga napatawad na eon ako.”

⁴ Kon amat, nalisdan ka man baea magpati nga ginpatawad ka eon ni Jehova sa ing mga haobrang saea dati? Gusto ni Jehova nga mangin kumbinsido ka sa anang kaeuoy ag pagpatawad pareho sa ginbatyag ni David. Sa rayang artikulo, pagatalakayon naton kon ham-an dapat magpati kita nga ginpatawad eon kita ni Jehova ag kon ano ro makabulig katon nga mangin kumbinsido kara.

HAM-AN DAPAT MAGPATI KITA NGA GINPATAWAD EON KITA JEHOVA?

5. Ano ro gustong ipapati katon ni Satanas? Magtao it halimbawa.

⁵ Kon nagapati kita nga ginpatawad eon kita ni Jehova, malikawan naton nga madaya ni Satanas. Dumdoma nga ginaobra ni Satanas ro tanan para mapapundo kita sa pag-alagad kay Jehova. Para maobra ron, ginatinguhaan ni Satanas nga papatihon kita nga ro atong mga saea hay indi eon gid mapatawad. Isipa ro natabo sa sangka eaki sa Corinto nga nakaobra it sekswal nga imoralidad ag ginpahalin sa kongregasyon. (1 Cor. 5:1, 5, 13) Naghinuesoe imaw ku ulihi. Pero gusto ni Satanas nga indi imaw pagpatawaron it mga igmanghod ag indi pag-abiabihon sa kongregasyon. Ag kon indi imaw mapatawad it mga igmanghod, posibleng isipon na nga indi eon gid imaw mapatawad ni Jehova. Posibleng magkasubo man imaw it sobra hasta nga magpundo imaw sa pag-alagad. Raya gihapon ro mga pamaagi nga ginagamit ni Satanas makaron. Pero “nakasayod kita kon ano ro anang mga plano,” ngani masuk-ean naton imaw.​—2 Cor. 2:5-11.

6. Ano ro makabulig katon kon nakokonsensya gihapon kita sa saea nga haobra naton dati?

⁶ Kon nagapati kita nga ginpatawad eon kita ni Jehova, malikawan naton nga magbatyag it sobrang pagkakonsensya. Kon makaobra kita it saea, normal eang nga masubuan kita. (Sal. 51:17) Mayad man nga makabatyag kita karon dahil kon narealisar naton nga nakaobra kita it maeain, makabulig ra katon nga mag-obra it mga pagbag-o ag obrahon ro tama. (2 Cor. 7:10, 11) Pero, kon padayon naton nga isipon nga owa gihapon kita ginpatawad ni Jehova, posible nga maeuyahan kita ag magpundo sa pag-alagad kana. Ngani kon nagapati kita nga ginpatawad eon kita ni Jehova, indi eon kita masubuan ag makonsensya it sobra. Ag maalagad naton si Jehova sa paagi nga gusto na, nga may malimpyo nga konsensya ag kasadya. (Col. 1:10, 11; 2 Tim. 1:3) Pero, paalin kita mangin kumbinsido nga ginpatawad eon kita ni Jehova?

ANO RO MAKABULIG KATON NGA MAGPATI NGA GINPATAWAD EON KITA NI JEHOVA?

7-8. Ano ro ginsugid ni Jehova katon parti kana, ag sa ano kita makasigurado? (Exodo 34:6, 7)

⁷ Pamaeandungi ro ginsugid ni Jehova parti kana. Halimbawa, tan-awa kon ano ro ginsugid ni Jehova kay Moises sa Bukid it Sinai.a (Basaha ro Exodo 34:6, 7.) Maskin abu ro manami nga mga ugali ni Jehova, ginpili na nga isugid kay Moises nga imaw hay “sangka Dyos nga maeueoy-on ag may kabaeaka.” Ngani, kon makasaea ro alagad ni Jehova ag maghinuesoe, indi na baea ra pagpatawaron? Kon indi na pagpatawaron ruyong nakasaea, magakahueogan ra nga mapintas si Jehova ag owa it kaeuoy. Bukon gid it makaruyon si Jehova!

⁸ Makasigurado kita nga kat ginsugid ni Jehova nga maeueoy-on imaw, nagahambae imaw it kamatuoran. Bukon imaw it purilon. (Sal. 31:5) Ngani, mapatihan gid ro tanan nanang ginahambae. Kon nalisdan ka nga magpati nga ginpatawad ka eon ni Jehova, pangutan-a ing sarili: ‘Nagapati baea ako nga maeueoy-on gid ag may kabaeaka si Jehova ag patawaron na ro maskin sin-o nga naghinuesoe sa anang mga saea? Kon kumbinsido ka nga matuod ron, makasigurado ka nga ginpatawad ka eon man nana.

9. Ano ro ginaturo katon it Salmo 32:5 parti sa pagpatawad ni Jehova sa atong mga saea?

⁹ Pamaeandungi ro mga ginhambae it mga manogsueat it Biblia parti sa pagpatawad ni Jehova. Halimbawa, tan-awa kon ano ro ginsugid it manogsueat it Biblia nga si David parti kara. (Basaha ro Salmo 32:5.) Naghambae si David, “Ginpatawad mo ro akong mga saea.” Ro Hebreong termino nga “pagpatawad” hay nagakahueogan it “pagbuoe,” “pagpaeayo,” o “pagpas-an.” Ngani kat ginpatawad ni Jehova si David, nabatyagan na nga matsa ginbuoe kana ni Jehova ro anang mabug-at nga ginapas-an ag ginpapaeayo ra kana. Nabatyagan rayon ni David ro kasadya dahil sayod na nga ginpatawad eon imaw ni Jehova. (Sal. 32:2-4) Pareho man karon ro atong mabatyagan. Kon sinsero kita nga naghinuesoe sa atong mga saea, indi eon kinahang-ean nga padayon kitang makonsensya sa mga saea nga haobra naton dati nga ginbuoe ag ginpaeayo eon katon ni Jehova.

10-11. Si Jehova hay “handa sa pagpatawad,” ano ro ginaturo kara katon parti kana? (Salmo 86:5)

¹⁰ Basaha ro Salmo 86:5. Naghambae si David nga si Jehova hay “handa sa pagpatawad.” Nagakahueogan ra nga buko’t madaling maakig si Jehova kon makaobra kita it saea ag gusto na gid nga patawaron ro mga nagahinuesoe. Ham-an makaruyon si Jehova? Ro kasugpon it rayang bersikulo hay nagahambae: “Bugana ka sa mainunongon nga gugma sa tanan nga nagatawag kimo.” Natun-an naton sa nagtaliwan nga artikulo nga nagpromisa si Jehova nga ipakita na ro anang mainunongon nga pagpalangga sa mga nagapalangga kana ag indi na gid sanda pag-aywanan. Dahil sa anang mainunongon nga pagpalangga, “handa imaw sa pagpatawad” sa tanan nga mahinuesueon nga nakasaea. (Isa. 55:7, ftn.) Kon nalisdan ka nga magpati nga ginpatawad ka eon ni Jehova, pwede mong pangutan-on ing sarili: ‘Nagapati baea ako nga handa gid sa pagpatawad si Jehova sa tanan nga mahinuesueon ag nagapangayo kana it kaeuoy?’ Kon kumbinsido ka nga matuod ron, makasigurado ka nga ginpatawad ka eon ni Jehova kat nagpangayo ka kana it kaeuoy ag kapatawaran.

¹¹ Makapaumpaw gid masayran nga naintindihan gid ni Jehova nga kita hay buko’t perpekto ag makasasaea. (Sal. 139:1, 2) Tan-awon ta ro sambilog pa sa ginhambae ni David sa anang salmo nga makabulig katon nga magpati nga ginpatawad eon kita ni Jehova.

KON ANO RO GINADUMDOM NI JEHOVA PARTI KATON

12-13. Base sa Salmo 103:14, ano ro ginadumdom ni Jehova parti katon, ag nagapahueag ra kana nga obrahon ro ano?

¹² Basaha ro Salmo 103:14. Ginhambae ni David ro sambilog pa nga rason kon ham-an handa si Jehova nga magpatawad sa mga naghinuesoe sa andang mga saea. Naghambae imaw nga ginadumdom ni Jehova nga “kita hay tapu-tapo.” Buot hambaeon, sayod na nga makasasaea kita. Para mas maintindihan naton ra, sayuron ta kon ano ro ginhambae ni David.

¹³ Naghambae si David nga “sayod gid [ni Jehova] kon paalin kita gin-obra.” Gintuga ni Jehova si Adan “halin sa tapu-tapo it eugta.” Ngani sayod na kon siin naghalin ro tawo ag kon ano ro andang mga kinahang-eanon. Halimbawa, kinahang-ean natong magkaon, magkatueog, ag magginhawa. Kinahang-ean man ra it maskin ku perpektong mga tawo. (Gen. 2:7) Pero kat nagkasaea sanday Adan ag Eba, nangin mas klaro ro kahueogan nga ro mga tawo hay tapu-tapo. Dahil mga inunga kita nanda, namana naton ro saea ag ro pagkabuko’t perpekto ag kinahang-ean natong padayon nga suk-ean ro pag-obra it saea. Ngani sayod ni Jehova nga kon amat, nakakaobra kita it saea. Ag kon nakaobra kita it saea ag naghinuesoe, ginapakitaan na kita it kaeuoy ag ginapatawad.​—Sal. 78:38, 39.

14. (a) Ano pa ro ginhambae ni David parti sa pagpatawad ni Jehova katon? (Salmo 103:12) (b) Ano ro matun-an naton sa pagpatawad ni Jehova kay David? (Tan-awa ro kahon nga “Kon Paalin Ginapatawad ag Ginakalipatan ni Jehova ro Atong mga Saea.”)

¹⁴ Ano pa ro atong matun-an sa Salmo 103 parti sa pagpatawad ni Jehova katon? (Basaha ro Salmo 103:12.) Naghambae si David nga kon nagapatawad si Jehova, ginapaeayo na katon ro atong mga saea “kon mauno kaeayo ro ginabutlakan it adlaw [east] sa ginatunuran it adlaw [west].” Ro east o sidlangan ro pinakamaeayo nga lugar halin sa west o nakatundan. Indi gid rayang daywa magtabo. Ano ro ginaturo kara katon kon ginapatawad ni Jehova ro atong mga saea? Ginhambae it sangka reperensya ro parti sa rayang bersikulo nga kon ginabuoe it Dyos ro atong mga saea ag ginapaeayo ra katon, matsa pareho ra it hugom it sangka bagay nga naduea eon gid. Ngani makasigurado kita nga ro atong mga saea hay indi na eon pag-isipon o ipadumdom katon it uman. Kon amat, ro hugom it pagkaon o it iba pang bagay hay pwedeng magpadumdom katon ku mga natabo dati. Pero kon napatawad eon ni Jehova ro atong saea, owa eon it may makapadumdom kara kana ag owa imaw nagadumot o nagausoy it paagi para pinahan kita.​—Eze. 18:21, 22; Binu. 3:19.

15. Ano ro atong obrahon kon nakokonsensya gihapon kita sa atong mga haobrang saea dati?

¹⁵ Paalin makabulig katon ro ginhambae ni David sa Salmo 103 nga magpati nga ginpatawad eon kita ni Jehova? Isipa kon ano ro ginabatyag ni Jehova. Ginadumdom na nga bukon kita it perpekto. Ag ginapatawad ni Jehova ro tanan nga nagahinuesoe sa andang saea. Ag ginhinuesuean eon man naton ro atong mga saea. Tandai man nga kon ginpatawad eon kita ni Jehova, owa na eon ginaisip ro atong mga saea o ipadumdom pa ra katon. Ngani owa imaw nagadumot katon o nagausoy it paagi para pinahan kita. Owa nagapukos si Jehova sa atong haobrang mga saea dati. Ngani dapat ruyon man ro atong obrahon. (Sal. 130:3) Kon magpati kita nga ginpatawad eon kita ni Jehova, indi eon kita magbatyag it sobrang pagkakonsensya ag padayon kita nga makaalagad kay Jehova nga may kasadya.

16. Magtao it halimbawa kon ham-an delikado nga pag-inisipon ro saea nga ginpatawad eon ni Jehova. (Tan-awa man ro piktyur.)

¹⁶ Isipa rayang halimbawa. Kon ro sangka tawo hay naga-drive it saeakyan, pwede nang tan-awon ro rearview mirror para makita kon may saeakyan sa anang likod. Pwede imaw kara magtan-aw kon amat, pero delikado kon iya lang gid imaw magtinan-aw. Para indi madisgrasya, dapat padayon imaw nga magtan-aw sa daean nga anang ginaagyan. Pareho karon, mayad man kon amat nga isipon naton ro mga saea nga atong haobra dahil makabulig ra katon nga indi maobra it uman ruyong saea. Pero kon padayon naton nga pag-inisipon ro saea nga ginpatawad eon ni Jehova, posibleng maduea ro atong kasadya ag indi eon naton matao ro atong pinakamayad sa pag-alagad kay Jehova. Imbes pag-inisipon ron, magpukos kita sa pag-alagad kay Jehova ag padayon nga isipon ro manami nga paeaabuton nga ginpromisa na katon, nga ro maeain nga mga natabo “hay indi eon madumdoman.”​—Isa. 65:17; Hulu. 4:25.

PADAYON NGA MANGIN KUMBINSIDO NGA GINPATAWAD KA EON NI JEHOVA

17. Ham-an dapat padayon kita nga mangin kumbinsido nga palangga kita ni Jehova ag handa imaw sa pagpatawad katon?

¹⁷ Dapat padayon kita nga mangin kumbinsido nga palangga kita ni Jehova ag handa imaw sa pagpatawad katon. (1 Juan 3:19) Ham-an? Dahil ginatinguhaan gid ni Satanas nga papatihon kita nga bukon kita it palangga ni Jehova ag indi na gid kita mapatawad. Raya ro mga ginagamit ni Satanas para papunduhon kita sa pag-alagad kay Jehova. Ag habang nagapaeapit ro katapusan, ginaobra na gid ro tanan dahil sayod na nga sangkiri lang ro anang oras nga nabilin. (Pah. 12:12) Pero dapat natong suk-ean si Satanas ag padayon nga mag-alagad it matutom kay Jehova.

18. Ano ing obrahon para mangin kumbinsido nga palangga ka ni Jehova ag handa imaw sa pagpatawad kimo?

¹⁸ Natun-an naton ku nagtaliwan nga artikulo kon ano ing obrahon para mangin mas kumbinsido nga palangga ka ni Jehova. Natun-an man naton makaron kon paalin mangin kumbinsido nga ginpatawad ka eon ni Jehova. Halimbawa, dumdoma kon ano ro ginhambae ni Jehova parti kana. Pamaeandungi kon ano ro ginhambae it mga manogsueat it Biblia parti sa pagpatawad ni Jehova. Indi man pagkalipati nga sayod na nga bukon ka it perpekto ag pakitaan ka nana it kaeuoy. Tandai pa gid nga kon nagapatawad imaw, owa na eon ginadumdom ra. Mabatyagan mo rayon ro kasadya dahil kumbinsido ka nga ginapakitaan ka ni Jehova it kaeuoy. Ag mahambae mo man ro ginhambae ni David nga: “Saeamat Jehova dahil ginpatawad mo ‘ro akong mga saea’!”—Sal. 32:5.