TUEON-AN NGA ARTIKULO 42
KANTA 44 Pangamuyo sang Napung-awan
Kon Paalin Mapauswag ro Atong Pangamuyo
“Nagatawag ako kimo sa ang bilog nga tagipusuon. Sabta ako, O Jehova.”—SAL. 119:145.
RO ATONG MATUN-AN
Makatuon kita sa mga pangamuyo it mga alagad ni Jehova nga nasueat sa Biblia para mapauswag ro atong mga pangamuyo.
1-2. (a) Ano ro posibleng magpugong katon nga isugid kay Jehova kon ano gid ro atong ginabatyag? (b) Paalin naton nasayran nga nagapamati gid si Jehova sa atong mga pangamuyo?
NAGABATYAG ka man baea kon amat nga ing pangamuyo hay pauman-uman, padali, o rutina eang? Kon huo, owa ka nagaisaeahanon. Dahil sa atong kasakuon, posibleng dalion eang naton ro atong mga pangamuyo. O posibleng nalisdan kita nga isugid kay Jehova kon ano gid ro atong ginabatyag dahil pamatyag naton hay owa kita nagakabagay nga magpaeapit kana.
2 Ginapasalig kita it Biblia nga mas importante kay Jehova ro atong tinagipusuon nga pangamuyo kaysa sa kon paano kita nagapangamuyo. Ginapamatian na “ro pangabay it mapainubuson.” (Sal. 10:17) Nagapamati imaw sa tanan naton nga ginahambae dahil interesado gid imaw katon.—Sal. 139:1-3.
3. Ano nga mga pangutana ro atong pagatalakayon sa rayang artikulo?
3 Posibleng ipangutana naton: Ham-an indi dapat kita mahadlok nga magpaeapit kay Jehova sa pangamuyo? Paalin mangin mas sinsero ro atong mga pangamuyo? Ano ro atong matun-an sa mga pangamuyo it mga alagad ni Jehova nga nasueat sa Biblia nga makabulig katon para mapauswag ro atong mga pangamuyo? Ag ano ro pwede natong obrahon kon nalisdan kita nga isugid kay Jehova kon ano gid ro atong ginabatyag? Talakayon naton ro sabat sa rayang mga pangutana.
INDI MAHADLOK NGA MAGPAEAPIT KAY JEHOVA SA PANGAMUYO
4. Ano ro makabulig katon nga indi mahadlok nga magpaeapit kay Jehova sa pangamuyo? (Salmo 119:145)
4 Kon isipon naton nga si Jehova hay mainunongon nga amigo nga gusto ro pinakamayad para katon, mangin mas komportable kita nga magpaeapit kana sa pangamuyo. Raya ro gintinguhaan nga isipon ku manogsueat it Salmo 119 kay Jehova kat nangamuyo imaw Kana. May mga problema man imaw. May mga tawo man nga nagsugid it buko’t matuod parti kana. (Sal. 119:23, 69, 78) Ag kon amat, naeuyahan pa gid imaw it buot dahil sa anang mga haobrang saea. (Sal. 119:5) Bisan pa karon, owa imaw nahadlok nga magpaeapit kay Jehova sa pangamuyo.—Basaha ro Salmo 119:145.
5. Ham-an indi dapat naton pagpasugtan ro negatibong mga baeatyagon nga magpugong katon sa pagpangamuyo? Magtao it ilustrasyon.
5 Gusto ni Jehova nga magpaeapit kita kana sa pangamuyo maskin pa nakaobra kita it seryosong mga saea. (Isa. 55:6, 7) Ngani indi dapat naton pagpasugtan ro negatibong mga baeatyagon nga magpugong katon sa pagpangamuyo. Sa pag-ilustrar, sayod it sangka piloto nga pwede imaw makakomunikar sa mga air traffic controller kon kinahang-ean na it bulig. Dapat baea nga magdaywang-isip imaw nga magpabulig kanda dahil nahuya imaw magsugid nga nagtaeang imaw o dahil nagsaea imaw? Syempre indi! Pareho karon, maskin pa nagabatyag kita kon amat nga owa kita kasayod kon ano ro atong obrahon o nagkasaea kita, indi dapat kita mahadlok nga magpaeapit kay Jehova sa pangamuyo.—Sal. 119:25, 176.
KON PAALIN MANGIN MAS SINSERO RO ATONG MGA PANGAMUYO
6-7. Paalin ro pagpamaeandong sa manami nga mga ugali ni Jehova makabulig katon nga mangin mas sinsero ro atong mga pangamuyo? Magtao it halimbawa. (Tan-awa man ro footnote.)
6 Kon isugid naton kay Jehova ro tanan natong ginaisip ag ginabatyag, mangin mas sinsero ro atong mga pangamuyo. Ngani, ano ro pwede natong obrahon para mapauswag ro atong mga pangamuyo?
7 Pamaeandungi ro manami nga mga ugali ni Jehova.a Kon pirme natong ginapamaeandungan ro anang mga ugali, mangin mas maeumo katon nga isugid kana ro atong mga ginaisip ag ginabatyag. (Sal. 145:8, 9, 18) Tan-awa ro halimbawa it sister nga si Kristine, nga ro anang tatay hay bayolente. Naghambae imaw: “Nalisdan akong mag-istorya kay Jehova ag patihan nga Imaw hay sangka mapinalanggaon nga Ama. Pamatyag ko, indi eon ako pagpalanggaon ni Jehova dahil sa ang mga saea.” Ano nga ugali ni Jehova ro nakabulig kana? Ginhambae na: “Ro mainunongon nga pagpalangga ni Jehova hay nagpasalig kakon nga palangga na gid ako. Sayod ko nga indi na ako pag-aywanan. Bisan pa magkasaea ako, palanggaon na gihapon ako ag buligan. Kat ginpamaeandungan ko kon mauno kamapinalanggaon si Jehova, nangin mas maeumo eon kang nga isugid kana ro mga bagay nga nagapasadya ag nagapasubo kakon.”
8-9. Ano ro mga benepisyo kon isipon anay naton ro mga gusto natong ipangamuyo? Magtao it ilustrasyon.
8 Isipa anay kon ano ing ihambae. Bago mangamuyo, pwedeng mong ipangutana sa ing sarili ro pila nga mga pangutana. Halimbawa: ‘Ano nga mga problema ang ginaatubang makaron? May kinahang-ean baea akong patawaron? May mga pagbag-o baea sa ang sitwasyon nga kinahang-ean ko ro bulig ni Jehova?’ (2 Hari 19:15-19) Pwede man natong tuearon ro halimbawa ni Jesus kon isipon naton ro pwede natong ipangamuyo kay Jehova parti sa Anang pangaean, sa Anang Ginharian, ag sa Anang kabubut-on.—Mat. 6:9, 10.
9 Kat nasayran it sister nga si Aliska nga may kanser sa utok ro anang asawa, nalisdan imaw kon ano ro anang ihambae sa anang pangamuyo. Naghambae imaw: “Grabi gid ang kasubo, ngani indi ako kaisip it mayad kon ano ang ihambae sa pangamuyo.” Ano ro nakabulig kana? Ginhambae na: “Bago ako mangamuyo, ginaisip ko anay kon ano ang ihambae kay Jehova agud indi eang ra mapukos sa ang sarili ag sa masakit it ang asawa. Kat gin-obra ko ra, nangin mas kalmado ako ag nakapangamuyo kay Jehova parti sa iba pang bagay.”
10. Ham-an indi dapat kita magdali kon nagapangamuyo? (Tan-awa man ro piktyur.)
10 Indi magdali kon nagapangamuyo. Pwedeng mangin sinsero ro atong mga pangamuyo maskin matag-od eang ra, pero mas masugid naton ro atong mga ginaisip ag ginabatyag kon indi kita magdali sa atong mga pangamuyo.b Ro asawa ni Aliska nga si Elijah hay naghambae: “Gintinguhaan ko nga magpangamuyo it pilang beses sa bilog nga adlaw, ag dahil nagtao ako it oras sa pagpangamuyo, nangin mas maeapit ako kay Jehova. Owa ginadalian ni Jehova nga matapos eagi ang pangamuyo, ngani makapangamuyo ako kana it maeawig.” Testingi ra: Mag-usoy it oras ag lugar nga makapangamuyo ka, posible it mabaskog, owa’t istorbo, ag maeawig. Tinguhai rayon nga maobra mo ra it regular.
Mag-usoy it oras ag lugar nga makapangamuyo ka nga owa’t makaistorbo (Tan-awa ro parapo 10)
TUN-I RO MGA PANGAMUYO IT MGA ALAGAD NI JEHOVA NGA NASUEAT SA BIBLIA
11. Paalin makabulig katon ro pagtuon sa mga pangamuyo it mga alagad ni Jehova nga nasueat sa Biblia? (Tan-awa man ro kahon nga “Pareho Man Baea Kanda Ing Ginabatyag?”)
11 Makabulig katon ro pagtuon sa mga pangamuyo ag mga kanta it pagdayaw ku mga alagad ni Jehova nga nasueat sa Biblia. Habang ginatun-an naton kon paalin nanda ginsugid kay Jehova ro andang mga ginaisip ag ginabatyag, makabulig ra katon nga isugid man kay Jehova ro sueod it atong tagipusuon. Makatuon man kita it bag-ong mga ekspresyon nga pwede natong ieakip sa atong mga pangamuyo. Ag makausoy kita it mga pangamuyo nga pareho sa atong ginabatyag.
12. Ano ro pwede natong ipangutana habang ginatun-an naton ro sangka pangamuyo nga nasueat sa Biblia?
12 Habang ginatun-an naton ro sangka pangamuyo nga nasueat sa Biblia, pwede natong pangutan-on ro atong sarili: ‘Sin-o kara ro nagahambae ag ano ro anang sitwasyon? Raya man baea ang gustong ihambae sa ang pangamuyo? Ano ang matun-an kara?’ Basi kinahang-ean mo pang mag-research pa gid para masabat rayang mga pangutana, pero sulit gid ra. Tan-awon ta ro pilang halimbawa.
13. Ano ro atong matun-an sa pangamuyo ni Hana? (1 Samuel 1:10, 11) (Tan-awa man ro piktyur.)
13 Basaha ro 1 Samuel 1:10, 11. Kat ginhambae ni Hana rayang pangamuyo, may daywang ka mabahoe imaw nga problema. Baog imaw, ag ro anang asawa hay may pangaywang asawa nga nagapaantus kana. (1 Sam. 1:4-7) Kon may problema ka man nga padayon nga nagapalisud kimo, ano ing matun-an sa pangamuyo ni Hana? Naumpawan gid si Hana kat nangamuyo imaw it maeawig ag kat ginsugid na kay Jehova ro tanan nang ginabatyag. (1 Sam. 1:12, 18) Maumpawan man kita kon ‘ihaboy naton ro atong paeas-anon kay Jehova’ paagi sa pagsugid it tanan natong ginakabaeak-an ag kon ano ro atong ginabatyag kara.—Sal. 55:22.
Ginsugid ni Hana kay Jehova kon mauno imaw kasubo dahil baog imaw ag ro anang asawa hay may pangaywang asawa nga pirmeng nagaintrimis kana (Tan-awa ro parapo 13)
14. (a) Ano pa ro atong matun-an sa pangamuyo ni Hana? (b) Ham-an makabulig katon ro pagpamaeandong sa Biblia para mapauswag ro atong pangamuyo? (Tan-awa ro footnote.)
14 Mga pilang dag-on pagkatapos nga matawo ro unga ni Hana nga si Samuel, gindaea na imaw sa Mataas nga Saserdote nga si Eli. (1 Sam. 1:24-28) Sa anang tinagipusuon nga pangamuyo, ginsugid na nga kumbinsido imaw nga ginaprotektahan ag ginadipara ni Jehova ro anang matutom nga mga alagad.c (1 Sam. 2:1, 8, 9) Owa man naduea ro mga problema ni Hana, pero mas nagpukos imaw sa mga pagpakamayad nga gintao kana ni Jehova. Ano ro atong matun-an kara? Mas masarangan naton ro atong mga problema nga ginaatubang kon magpukos man kita sa mga bulig nga ginatao katon ni Jehova hasta makaron.
15. Ano ro atong matun-an sa pangamuyo ni propeta Jeremias kon nagaatubang kita it inhustisya? (Jeremias 12:1)
15 Basaha ro Jeremias 12:1. Kat nakita ni Jeremias nga matsa mas manami ro kabuhi it mga tawo nga nagaobra it maeain, nag-euya ro anang buot. Naeuyahan man imaw dahil gin-intrimis imaw it ibang mga Israelinhon. (Jer. 20:7, 8) Ruyon man ro atong ginabatyag kon makita naton nga nagauswag ro kabuhi it mga tawo nga nagaobra it maeain ag kon ginaintrimis kita. Bisan pa ginhambae ni Jeremias kay Jehova ro anang pagkadismaya, owa na gid ginkwestyon ro hustisya it Dyos. Kat nakita na kon paalin gintadlong ni Jehova ro anang katawhan, nagdugang ro anang pagsalig sa hustisya ni Jehova. (Jer. 32:19) Pwede man natong isugid sa atong mga pangamuyo ro atong kaugot ag pagkadismaya, nga nagasalig nga tadlungon ni Jehova sa tama nga panahon ro mga ginaatubang naton nga inhustisya.
16. Ano ro atong matun-an sa pangamuyo it ginbihag nga Levinhon? (Salmo 42:1-4) (Tan-awa man ro piktyur.)
16 Basaha ro Salmo 42:1-4. Rayang kanta hay ginsueat it ginbihag nga Levinhon nga indi makasimba sa templo kaibahan ro ibang mga Israelinhon. Ro anang salmo hay nagapakita kon ano ro anang ginabatyag. Posibleng mabatyagan man naton ro anang ginabatyag kon indi kita makaguwa it baeay dahil sa masakit o kon napriso kita dahil sa atong pagtuo. Posibleng nagabag-o bag-o ro atong emosyon, pero maskin ano man ro atong ginabatyag mas mayad nga isugid naton ra kay Jehova sa pangamuyo. Makabulig ra katon nga usisaon ro atong mga ginaisip ag dumdomon kon ano gid ro pinakaimportante. Halimbawa, narealisar it Levinhon nga may bag-o imaw nga oportunidad para dayawon si Jehova. (Sal. 42:5) Gindumdom na man kon paalin imaw gindipara ni Jehova. (Sal. 42:8) Ro sinsero nga pagpangamuyo sa Dyos hay makabulig katon nga maintindihan kon ano ro atong ginabatyag, mangin kalmado it uman, ag matiis ro mga kalisdanan.
Ro Levinhon nga nagsueat it Salmo 42 hay nagsugid it tanan nanang ginabatyag sa Dyos. Kon isugid man naton ro tanan natong ginabatyag sa pangamuyo, makabulig ra katon nga tan-awon it positibo ro atong sitwasyon (Tan-awa ro parapo 16)
17. (a) Ano ro atong matun-an sa pangamuyo ni Jonas? (Jonas 2:1, 2) (b) Paalin makabulig katon ro pila nga mga ekspresyon sa mga Salmo kon nagaatubang kita it mga kalisdanan? (Tan-awa ro footnote.)
17 Basaha ro Jonas 2:1, 2. Raya ro pangamuyo ni propeta Jonas kat sa tiyan imaw it mabahoe nga isda. Maskin owa na gintuman si Jehova, nagsalig imaw nga pamatian it Dyos ro anang pangamuyo. Sa anang pangamuyo, naggamit imaw it abu nga mga ekspresyon nga makita sa mga Salmo.d Posibleng pamilyar imaw sa rayang mga teksto. Kat gindumdom na ra, nangin sigurado imaw nga buligan imaw ni Jehova. Pareho kara, kon tinguhaan naton nga mag-memorize it pila nga mga teksto sa Biblia, posibleng madumdoman naton ra ag makatao it paumpaw kon magpangamuyo kita kay Jehova sa malisud nga mga sitwasyon.
PADAYON NGA MAGPAEAPIT KAY JEHOVA SA PANGAMUYO
18-19. Ano ro pasalig katon it Roma 8:26, 27 kon indi naton masayran kon ano ro atong ihambae sa pangamuyo? Magtao it halimbawa.
18 Basaha ro Roma 8:26, 27. Kon amat, basi indi naton masayran kon ano ro atong ihambae sa pangamuyo. Pero may makabulig katon. Sa ruyong mga panahon, ro baeaan nga espiritu it Dyos hay “nagapakitueoy” para katon. Paalin? Paagi sa baeaan nga espiritu ni Jehova, gingiyahan na ro mga manogsueat it Biblia nga isueat ro andang mga pangamuyo. Kon indi naton insaktong mahambae kon ano gid ro gusto natong hambaeon, pamatian gihapon ra ni Jehova maskin pila eang nga mga ekspresyon ro atong mahambae sa pangamuyo, ag sabton na gid ra.
19 Nakabulig ra sa sister nga si Yelena, nga taga-Russia. Gin-aresto imaw dahil sa anang pagpangamuyo ag pagbasa it Biblia. Grabi gid ro kabaeaka ni Yelena, ngani nalisdan imaw nga magpangamuyo. Naghambae imaw: “Kat nalisdan ako ag indi ko masayran kon ano ang ipangamuyo, nadumdoman ko rayon nga ginapamatian ni Jehova ro mga pangamuyo it anang mga alagad kato . . . nga matsa akon ra nga pangamuyo. . . . Nakapaumpaw gid ra kakon sa ruyong malisud nga sitwasyon.”
20. Ano ro makabulig katon nga mahanda ro atong isip sa pagpangamuyo kon nagakabaeaka kita?
20 Kon nagakabaeaka kita, posibleng malisdan kita nga magpukos kon nagapangamuyo. Ano ro makabulig katon? Pwede natong basahon it mabaskog o pamatian ro mga audio recording it mga Salmo bago mangamuyo. Pwede man natong isueat ro atong mga gustong ihambae pareho sa gin-obra ni Haring David. (Sal. 18, 34, 142; superskripsyon.) Owa man it mga pagsueondan kon paalin naton mahanda ro atong sarili sa pagpangamuyo. (Sal. 141:2) Ngani, pwede mong obrahon kon ano ro pinakamayad sa ing sitwasyon.
21. Ham-an makapangamuyo kita sa atong bilog nga tagipusuon?
21 Makapaumpaw nga masayran nga naintindihan ni Jehova kon ano ro atong gustong hambaeon bago pa naton ra ihambae kana. (Sal. 139:4) Pero, gusto na gihapon nga isugid naton kon ano ro atong ginabatyag ag ipakita ro atong pagsalig kana. Ngani indi magdaywang-isip nga magpangamuyo sa imong Ama sa eangit. Magtuon sa mga pangamuyo nga nasueat sa Biblia. Mangamuyo sa ing bilog nga tagipusuon. Ag isugid kana kon ano ro nakapasadya ag nakapasubo kimo. Si Jehova ro imong matuod nga Amigo, indi ka gid nana pag-aywanan!
KANTA 45 Ang Ginapamalandungan sang Akon Tagipusuon
a Tan-awa ro “Ang pila sa dalayawon nga kinaiya ni Jehova” nga makita sa Mga Teksto Para sa Aton Cristianong Pagkabuhi sa idaeum it topiko nga “Jehova.”
b Kon nagapangamuyo para sa kongregasyon, ginatinguhaan ra nga mangin matag-od eang.
c Sa pangamuyo ni Hana, naggamit imaw it pareho nga mga ekspresyon nga mabasa sa mga sinueatan ni Moises. Nagapakita ra nga ginpamaeandungan na gid ro Kasueatan. (Deut. 4:35; 8:18; 32:4, 39; 1 Sam. 2:2, 6, 7) Pagtaliwan it ginatos nga dag-on, si Maria nga nanay ni Jesus hay naggamit it mga pagdayaw nga pareho gid sa ginhambae ni Hana.—Luc. 1:46-55.
d Halimbawa, ikumpara ro Jonas 2:3-9 sa Salmo 69:1; 16:10; 30:3; 142:2, 3; 143:4, 5; 18:6; ag 3:8. Raya ro pagpasunod it mga teksto sa Biblia nga gingamit ni Jonas sa anang pangamuyo.