TUEON-AN NGA ARTIKULO 43
KANTA 90 Palig-una ang Isa kag Isa
Kon Paano Madaog ro mga Pagduda
“Siguraduha ro tanan nga bagay.”—1 TES. 5:21, NWT.
RO ATONG MATUN-AN
Tun-an naton kon paano madaog ag maduea ro mga pagduda nga pwedeng makaapekto sa atong pag-alagad kay Jehova.
1-2. (a) Ano ro pila nga mga pagduda nga naeksperyinsyahan it mga alagad ni Jehova? (b) Ano ro atong pagatalakayon sa rayang artikulo?
TANAN kita, bata man o magueang hay may mga pagdudaa kon amat. Halimbawa, imadyina ro sangka bataon nga Saksi nga nagaisip kon interesado gid man kana si Jehova. Tungod karon, bukon imaw it sigurado kon mapabautismo imaw. O isipa ro sangka brother nga kat bata pa imaw hay ginpili na nga unahon ro pag-alagad kay Jehova kaysa sa pagpaabu it kwarta. Makaron nga ginakueang ro badyet it anang pamilya, ginaisip na kon tama gid man baea ro anang haobrang desisyon kato. Isipa man ro sangka magueang nga sister nga limitado lang ro anang kusog. Basi naeuyahan imaw it buot tungod indi na eon maobra ro kaya nang obrahon dati. Hapangutana mo eon baea ing sarili pareho it: ‘Nakikita gid man baea ako ni Jehova? Sulit gid man baea ang mga sakripisyo nga gin-obra para kay Jehova? Magamit pa baea ako ni Jehova?’
2 Kon pabay-an naton nga indi masabat rayang mga pangutana, pwede rang makaapekto sa atong pag-alagad. Sa rayang artikulo, pagatalakayon naton ro mga prinsipyo sa Biblia nga makabulig katon kon nagaduda kita nga (1) interesado katon si Jehova, (2) ro atong mga desisyon dati hay tama, o (3) pwede pa kitang gamiton ni Jehova.
KON PAANO MADUEA ING MGA PAGDUDA
3. Ano ro sangka paagi nga maduea ing mga pagduda?
3 Ro sangka paagi nga maduea ro atong mga pagduda hay ro pag-usoy it mga sabat sa atong mga pangutana sa Bisaea it Dyos. Kon obrahon naton ra, mangin mabakud kita, mangin hamtong sa espiritwal, ag mas mangin handa nga “magmalig-on sa [atong] pagtuo.”—1 Cor. 16:13.
4. Paano naton ‘masigurado ro tanan nga bagay’? (1 Tesalonica 5:21, NWT)
4 Basaha ro 1 Tesalonica 5:21, NWT. Ginapalig-on kita it Biblia nga ‘siguraduhon ro tanan nga bagay.’ Paano naton ra maobra? Masigurado naton nga tama ro atong ginapatihan paagi sa pagkumpara kara sa kon ano ro ginahambae it Biblia. Halimbawa, isipa ro sangka bataon nga nagaduda kon importante baea imaw kay Jehova. Patihan na baea eagi ra? Indi. Kinahang-ean na nga ‘siguraduhon ro tanan nga bagay’ paagi sa pagtuon it Biblia agud masayran na ro kaisipan ni Jehova parti kana.
5. Paano naton makita ro sabat ni Jehova sa atong mga pangutana?
5 Kon nagabasa kita it Biblia, matsa ginaistorya kita ni Jehova. Pero para masayran ro anang kaisipan sa sangka espisipiko nga pangutana, kinahang-ean natong magtinguha. Sa atong pagbasa it Biblia, dapat kitang magpukos sa topiko nga gusto natong masayran. Pwede kitang mag-research sa ruyong topiko gamit ro atong mga publikasyon nga gintao it organisasyon ni Jehova. (Hulu. 2:3-6) Pwede kitang mangamuyo kay Jehova ag mangabay kana nga buligan kita nga makita ro sabat sa atong pangutana. Mag-usoy rayon it mga prinsipyo sa Biblia ag praktikal nga mga impormasyon nga makabulig sa atong sitwasyon. Makabenepisyo man kita kon tun-an naton ro mga karakter sa Biblia nga nakaagi man it pareho sa atong sitwasyon.
6. Paano makabulig katon ro mga miting para madaog ro atong mga pagduda?
6 Ginaistorya man kita ni Jehova paagi sa atong mga miting. Kon regular kita nga naga-attend sa mga miting, pwede kita makabati it sangka punto sa diskurso o sa komento nga kinahang-ean gid naton agud madaog ro atong mga pagduda. (Hulu. 27:17) Talakayon man naton makaron kon paano maduea ro atong mga pagduda sa pila nga mga espisipikong bagay.
KON NAGADUDA KA NGA INTERESADO KIMO SI JEHOVA
7. Ano ro ginapangutana it iba?
7 Hapangutana mo eon baea ing sarili, ‘Nakikita gid man baea ako ni Jehova?’ Kon pamatyag mo hay bukon ka’t importante, basi maisip mo nga imposibleng mangin amigo ro Manogtuga it uniberso. Makaruyon man ro ginbatyag ni Haring David. Nagdayaw gid imaw tungod nakikita ni Jehova ro mga tawo ag naghambae imaw: “O Jehova, ano baea ro tawo agud pansinon mo, ro unga it tawo para taw-an mo it atensyon?” (Sal. 144:3) Siin mo makita ro sabat sa rayang pangutana?
8. Base sa 1 Samuel 16:6, 7, 10-12, ano ro nakikita ni Jehova sa mga tawo?
8 Ginaturo katon it Biblia nga nakikita ni Jehova ratong mga tawo nga buko’t importante sa iba. Halimbawa, ginpaagto ni Jehova si Samuel sa baeay ni Jesse agud magpili it sambato sa anang mga unga nga eaki para mangin masunod nga hari it Israel. Sa waeo nga unga ni Jesse, gintawag na eang ro pito para makilaea ni Samuel, pero owa na gintawag ro kamanghuran nga si David.b Pero si David ro ginpili ni Jehova. (Basaha ro 1 Samuel 16:6, 7, 10-12.) Kilaea ni Jehova kon ano gid nga klasi it tawo si David. Sayod na nga palangga gid imaw it rayang bataon nga eaki.
9. Ham-an makasigurado ka nga interesado kimo si Jehova? (Tan-awa man ro piktyur.)
9 Isipa kon paano ginpakita ni Jehova nga nakikita ka nana. Nagatao imaw it pahanumdom nga insakto gid sa imong mga kinahang-ean. (Sal. 32:8) Pamatuod ra nga kilaea ka gid nana. (Sal. 139:1) Kon sundon mo ro pahanumdom ni Jehova ag makita ro bulig kara, mangin kumbinsido ka nga interesado gid kimo si Jehova. (1 Cron. 28:9; Binu. 17:26, 27) Nakikita ni Jehova ro imong mga pagtinguha ag ing manami nga mga ugali. Gusto na nga mangin amigo ka nana. (Jer. 17:10) Ag mangin masadya si Jehova kon gusto mo nga mangin Amigo man imaw.—1 Juan 4:19.
“Kon usuyon mo [si Jehova], pasugtan na nga makita mo imaw.”—1 Cron. 28:9 (Tan-awa ro parapo 9)c
KON NAGADUDA KA NGA TAMA ING MGA NANGIN DESISYON DATI
10. Kon naiisip naton ro mga nangin desisyon naton dati, ano ro posible natong ipangutana?
10 Kon amat, naiisip it iba kon tama gid man baea ro andang haobra nga mga desisyon dati. Basi nagdesisyon ro iba nga aywan ro andang trabaho nga may mataas nga sweldo o negosyo para makaalagad it mayad kay Jehova. Pero pagtaliwan it mga dinag-on, basi nakikita nanda ro andang mga kakilaea nga nagpadayon sa andang trabaho o negosyo, ag makaron hay abung kwarta ag naga-enjoy it komportable nga kabuhi. Ngani basi mapangutana nanda: ‘Sulit gid man baea ang mga sakripisyo nga gin-obra para kay Jehova? O basi napaeagpas ko ro ibang mga oportunidad?’
11. Ham-an naeuyahan it buot ro nagsueat it Salmo 73?
11 Kon makaruyon man ing mga pangutana, tan-awa kon ano ro ginbatyag ku nagsueat it Salmo 73. Nakita na ro mga tawo nga owa nagaalagad kay Jehova pero may mayad sanda nga pang-eawas, manggaranon, ag matsa owa nagaproblema. (Sal. 73:3-5, 12) Kat nakita na nga manami ro andang kabuhi, nabatyagan na nga ro anang mga pagtinguha sa pag-alagad kay Jehova hay owa’t pueos. Tungod sa rayang negatibong kaisipan, “nagakalisud [imaw] sa bilog nga adlaw.” (Sal. 73:13, 14) Ano ro nakabulig kana agud masuk-ean rayang baeatyagon?
12. Base sa Salmo 73:16-18, ano ro nakabulig sa salmista nga masuk-ean ro anang negatibong baeatyagon?
12 Basaha ro Salmo 73:16-18. Nag-agto ro salmista sa santuaryo ni Jehova ag nakaisip imaw igto it mayad. Naintindihan na nga maskin manami ro andang kabuhi, owa man sanda it pag-eaum sa paeaabuton. Tungod kara, owa eon imaw naeuyahan it buot ag sigurado imaw nga ro pag-alagad kay Jehova ro pinakamayad nga desisyon. Ag nangin determinado imaw nga mag-alagad kay Jehova it padayon.—Sal. 73:23-28.
13. Ano ing obrahon kon naganuoe ka sa ing mga nangin desisyon dati? (Tan-awa man ro piktyur.)
13 Pareho sa salmista, masuk-ean mo man ro mga negatibong baeatyagon. Paano? Isipa ro mayad nga mga bagay nga may una ka—kaibahan kara ro pagpakamayad ni Jehova—ag ikumpara ra sa mga nabaton it ratong mga owa nagaalagad kay Jehova. May manami man sanda nga kabuhi, pero owa sanda it pag-eaum sa paeaabuton. Pero may promisa si Jehova para kimo nga mga pagpakamayad nga sobra pa sa ing maisip. (Sal. 145:16) Isipa man ra: Mangin manami gid man baea ing kabuhi kon iba ing mga nangin desisyon dati? Pero raya ro sigurado: Kon nagaobra ka it mga desisyon tungod sa ing pagpalangga sa Dyos ag sa iba, makabaton ka pirme it mayad nga mga bagay nga makapasadya kimo.
Pamaeandungi pirme ro mga pagpakamayad nga ginpromisa ni Jehova (Tan-awa ro parapo 13)d
KON NAGADUDA KA NGA MAGAMIT KA PA NI JEHOVA
14. Ham-an naeuyahan it buot ro iba, ag ano ro posible nandang ipangutana?
14 Ro iba sa mga alagad ni Jehova hay magueang eon, nagamasakit, o may diperensya sa eawas. Ngani, nagabatyag sanda nga bukon eon sanda it importante kay Jehova. Posible nga ipangutana nanda nga, ‘Magamit pa baea gihapon ako ni Jehova?’
15. Sa ano kumbinsido ro manogsueat it Salmo 71?
15 Ro manogsueat it Salmo 71 hay nakabatyag man it pareho kara. Nagpangamuyo imaw: “Indi ako pag-aywani kon mag-euya eon ako.” (Sal. 71:9, 18) Kon mag-euya eon imaw, kumbinsido gid ro salmista nga kon mag-alagad imaw it matutom sa anang Dyos, giyahan ag suportahan imaw ni Jehova. Natun-an it salmista nga nasadyahan gid si Jehova sa ratong nagaobra it andang pinakamayad para alagaron Imaw, maskin pa may mga limitasyon sanda.—Sal. 37:23-25.
16. Sa anong mga paagi magamit ni Jehova ro mga magueang? (Salmo 92:12-15)
16 Mga may edad o magueang eon, isipa kon ano ro pagtan-aw kimo ni Jehova. Mabuligan ka nana nga makaalagad kana it matutom, maskin pa sa ing pisikal nga mga limitasyon. (Basaha ro Salmo 92:12-15.) Imbes magpukos sa indi mo eon kayang maobra, magpukos sa ing kayang obrahon. Halimbawa, mapalig-on mo ro iba sa ing manami nga mga halimbawa ag sa pagpakita it ing personal nga interes kanda. Pwede mong isugid sa iba kon paano ka ginsuportahan ni Jehova sa sueod it mga dinag-on ag kon ano nga mga promisa sa Biblia ro imong ginaeauman. Ag indi man it kalipati nga ing mga pangamuyo hay mabahoe gid nga bulig sa iba. (1 Ped. 3:12) Ano man ro atong sitwasyon, tanan kita hay may matao kay Jehova ag sa iba.
17. Ham-an indi dapat naton ikumpara ro atong sarili sa iba?
17 Kon naeuyahan ka it buot tungod sangkiri lang ing maobra sa pag-alagad kay Jehova, makasalig ka nga ginaapresyar na kon alin eang ing makaya. Basi ikumpara mo ing maobra sa kayang obrahon it iba. Indi pag-obraha ron! Ham-an? Tungod owa man si Jehova nagakumpara. (Gal. 6:4) Halimbawa, gintaw-an ni Maria si Jesus it maeahaeon nga pahumot bilang regalo. (Juan 12:3-5) Sa kabaliskaran, naghueog it daywang maisot nga sensilyo nga may pinakamanaba nga kantidad ro baeo sa templo. (Luc. 21:1-4) Pero, parehong gin-apresyar ni Jesus ro pagpakita it pagtuo it rayang daywang ka bayi. Ngani, makasigurado man kita nga ginaapresyar ni Jehova ro tanan natong ginaobra para ipakita ro atong pagtuo ag pagpalangga kana, maskin para katon maisot eang ra nga bagay.
18. Ano ro makabulig katon nga madaog ro mga pagduda? (Tan-awa man ro kahon nga “Makabulig Kimo ro Bisaea ni Jehova nga Madaog ro mga Pagduda.”)
18 Kon amat, may mga pagduda man kita. Pero, natun-an naton nga makabulig katon ro Biblia nga madaog ra. Ngani obraha ro tanan para makita ro mga sabat sa ing mga pangutana, ag madaog ing pag-euya it buot. Nakikita ka gid ni Jehova bilang indibidwal. Naapresyar na ing mga sakripisyo ag premyuhan ka gid nana. Makasalig ka nga ro pagtan-aw ni Jehova sa tanan na nga matutom nga mga alagad hay nagakabagay sa anang pagpalangga ag atensyon.
KANTA 111 Mga Rason sa Pagkalipay
a DUGANG NGA EKSPLINASYON: Sa rayang artikulo, pagatalakayon naton ro mga pagduda nga makapabatyag katon nga bukon kita it importante kay Jehova o parti sa mga nangin desisyon nga haobra naton dati. Owa ra nagatukoy sa klasi it mga pagduda nga ginsambit sa Biblia nga nagapakita nga kueang ro pagtuo it sangka tawo kay Jehova ag sa anang mga promisa.
b Maskin owa ginahambae it Biblia ro insaktong edad ni David kat ginpili imaw ni Jehova, posible nga tin-edyer paeang imaw kara.—Tan-awa ro Septyembre 1, 2011 nga isyu it Ang Lalantawan, p. 29, par. 2.
c PIKTYUR: Ginausoy it sangka bataon nga Saksi sa Biblia ro pahanumdom ni Jehova nga makabulig sa anang sitwasyon.
d PIKTYUR: Habang nagatrabaho ro sangka brother para suportahan ro anang pamilya, naimadyin na ro anang sarili nga igto sa paraiso.