Indi Eon Pagpabuhaya Ing Pagpabautismo

1. Ano ro pila nga rason para magpabautismo?

PALANGGA mo baea si Jehova nga Dyos, ro nagtao kimo it tanan nga mayad nga regalo, pati sa ing kabuhi? Gusto mo baea ipakita ing pagpalangga kana? Ro pinakamayad nga paagi hay ro pagdedikar it ing sarili kay Jehova ag magpabautismo. Kon obrahon mo ron, mangin parte ka it pamilya ni Jehova. Bilang resulta, ro imong Ama ag Amigo hay magagiya ag magadipara kimo dahil imaw eon ro nagatag-ana kimo. (Sal. 73:24; Isa. 43:​1, 2) Ro imong pagdedikar ag pagpabautismo hay nagatao man kimo it pag-eaum nga mabuhi sa owa it katapusan.​—1 Ped. 3:21.

2. Ano ro atong pagatalakayon sa rayang artikulo?

² Basi nagadaywang isip ka nga magpabautismo dahil sa pila nga mga rason. Bukon eang it ikaw ro nakabatyag karon. Ruyon man ro ginbatyag it minilyon nga tawo, pero nag-obra sanda it mga pagbag-o sa andang paggawi ag kaisipan para mangin kwalipikado sa bautismo. Ag makaron, masadya ag mahugod sanda nga nagaalagad kay Jehova. Ano ing matun-an sa mga nabautismuhan ku unang siglo? Sayuron ta kon ano ro mga kalisdanan nga andang naagyan ag kon ano ro atong matun-an sa andang halimbawa.

NAGPABAUTISMO RO MGA SAMARITANO

3. Ano nga mga pagbag-o ro kinahang-ean obrahon it mga Samaritano para mabautismuhan?

³ Ku panahon ni Jesus, ro mga Samaritano hay parte it sangka relihiyusong grupo. Kaeabanan kanda hay nagaestar sa palibot ku syudad it Siquem ag sa Samaria, sa may north it Judea. Para mabautismuhan ro mga Samaritano, kinahang-ean nandang batunon ro tanan nga nasueat sa Bisaea it Dyos ag tun-an pa gid ra. Nagapati ro mga Samaritano nga ro unang limang libro it Biblia eang—ro Genesis hasta’t Deuteronomio—ag posible pati ro libro it Josue, ro naghalin sa Dyos. Nagaeaum man sanda nga magaabot ro Mesias, base sa promisa it Dyos sa Deuteronomio 18:​18, 19. (Juan 4:25) Para mabautismuhan, kinahang-ean nandang batunon nga si Jesus ro ginpromisa nga Mesias. Ag ruyon mismo ro gin-obra it “abu nga mga Samariahanon.” (Juan 4:39) Ag kinahang-ean man nga bag-uhon it ibang Samaritano ro andang buko’t mayad nga pagtan-aw sa mga Judio.​—Luc. 9:​52-54.

4. Base sa Binuhatan 8:​5, 6, 14, ano ro reaksyon it pila nga mga Samaritano sa ginwali ni Felipe?

⁴ Ano ro nakabulig sa mga Samaritano nga magpabautismo? Kat nagwali si Felipe nga ebanghelisador “nahanungod kay Cristo,” ro pila nga mga Samaritano hay “nagbaton sa bisaea it Dyos.” (Basaha ro Binuhatan 8:​5, 6, 14.) Maskin si Felipe hay sangka Judio, nagpamati gid sanda kana. Posibleng nadumdoman nanda ro mga teksto sa Pentateuch nga nagahambae nga ro Dyos hay owa it pinaeabi. (Deut. 10:​17-19) Sa kada magwali imaw, “ginpamatian it mayad ku mga tawo ro ginhambae ni Felipe” parti kay Cristo, ag ginbaton nanda ro klaro nga pamatuod nga si Felipe hay ginpadaea it Dyos. Nag-obra man imaw it abung mga milagro, pareho it pagpamayad sa mga may sakit ag pagpaguwa it mga demonyo sa mga ginsapian.​—Binu. 8:7.

5. Ano ing matun-an sa mga Samaritano?

⁵ Pwede kuntang indi pagpamatian it ratong mga Samaritano si Felipe dahil Judio imaw o dahil bag-o kanda rayang mga pagturo. Pero owa nanda ron gin-obra. Kat nakumbinsi sanda nga ro ginturo ni Felipe hay kamatuoran, nagpabautismo eagi sanda. Ginasugid it Biblia: “Kat magtuo sanda sa mensahi ni Felipe nahanungod sa Mayad nga Balita ku Ginharian it Dyos ag nahanungod sa ngaean ni Jesu-Cristo, nagpabautiso [o, nagpabautismo] sanda, mga eaeaki ag mga babayi.” (Binu. 8:12) Kumbinsido ka baea nga ro Bisaea it Dyos hay kamatuoran ag ro mga Saksi ni Jehova hay owa it ginapaeabi ag nagatinguha nga ipakita ro matuod nga pagpalangga sa kada isaea—ro tanda it matuod nga mga Cristyano? (Juan 13:35) Indi mahadlok nga magpabautismo, makasigurado ka nga pakamayron ka ni Jehova.

6. Ano ing matun-an sa halimbawa ni Ruben?

⁶ Si Ruben, nga taga-Germany hay nagbahoe sa Saksi nga pamilya. Pero kat bataon pa imaw, nagduda imaw kon matuod baea si Jehova. Ano ro nakabulig kana? Kat narealisar na nga kueang pa ro anang nasayran, nagdesisyon imaw nga dugangan ro anang natun-an. Naghambae si Ruben: “Sa akong personal study, kinahang-ean kong sayuron kon ano ro matuod ag bukon. Kinahang-ean kong tun-an it pauman-uman ro parti sa ebulosyon.” Ginbasa na ro libro nga Is There a Creator Who Cares About You? Mabahoe gid ro nabulig it ruyong libro kay Ruben. Nahambae na sa anang sarili, ‘Matuod gid si Jehova!’ Ag kat nagbisita imaw sa world headquarters, mas naapresyar na pa gid ro atong internasyonal nga pag-ieigmanghuran. Pag-uli ni Ruben sa Germany, nabautismuhan imaw sa edad nga 17. Kon may mga pagduda ka parti sa Dyos, sa Biblia, o sa iba pang topiko, mag-research sa atong mga publikasyon. Madaog mo ro mga pagduda kon insakto ro imong nasayran. (Efe. 4:​13, 14) Ag kon mabatian mo ro mga eksperyinsya parti sa pagpalangga ag paghiusa it mga alagad ni Jehova sa iba-ibang parte it kalibutan ag makita ra sa inyong kongregasyon, mas maapresyar mo pa gid ro atong bilog kalibutan nga pag-ieigmanghuran.

NAGPABAUTISMO SI SAULO NGA TAGA-TARSO

7. Ano nga kaisipan ro dapat bag-uhon ni Saulo?

⁷ Tan-awa ro halimbawa ni Saulo nga taga-Tarso. Maaeam imaw sa kasugoan it mga Judio ag ginarespeto gid nanda imaw. (Gal. 1:​13, 14; Fil. 3:5) Sa ruyong panahon, abung mga Judio ro nagapati nga ro mga Cristyano hay mga apostata. Ngani mapintas nga ginhingabot ni Saulo ro mga Cristyano. Para kana, ginaobra na ro kabubut-on it Dyos. (Binu. 8:3; 9:​1, 2; 26:​9-11) Kon magtuo si Saulo kay Jesus ag mangin bautismado nga Cristyano, kinahang-ean handa man imaw nga hingabuton.

8. (a) Ano ro nakabulig kay Saulo nga magpabautismo? (b) Base sa Binuhatan 22:​12-16, paalin ginbuligan ni Ananias si Saulo? (Tan-awa man ro piktyur.)

⁸ Ano ro nakabulig kay Saulo nga magpabautismo? Kat nagpakita kana ro ginhimaya nga si Ginuong Jesus, nabulag si Saulo. (Binu. 9:​3-9) Sa sueod it tatlong adlaw, owa imaw nagkaon o nag-inom ag sigurado nga ginpamaeandungan na ro natabo kana. Nangin kumbinsido gid si Saulo nga si Jesus ro Mesias ag ginapakita ku anang mga sumoeunod ro tanda it matuod nga relihiyon. Nabatyagan ni Saulo ro grabi gid nga pagnuoe dahil sambilog imaw sa nagpapatay kay Esteban! (Binu. 22:20) Pagkatapos it tatlong adlaw, ginpaeapitan si Saulo it disipulo nga si Ananias, ginpamayad na imaw sa anang pagkabulag, ag ginpalig-on nga magpabautismo eagi. (Basaha ro Binuhatan 22:​12-16.) Mapainubuson nga ginbaton ni Saulo ro bulig ni Ananias ag nagpabautismo.​—Binu. 9:​17, 18.

9. Ano ing matun-an kay Saulo?

⁹ Abu kitang leksyon nga matun-an kay Saulo. Pwede na kuntang pasugtan ro anang bugae ag kahadlok sa tawo nga magpugong kana nga magpabautismo. Pero owa na ron ginpasugtan. Mapainubuson si Saulo ag handa imaw mag-obra it mga pagbag-o sa anang kabuhi para mangin sumoeunod ni Cristo. (Binu. 26:​14, 19) Handa si Saulo nga mangin Cristyano maskin sayod na nga pagahingabuton imaw. (Binu. 9:​15, 16; 20:​22, 23) Pagkatapos it anang bautismo, padayon imaw nga nagsalig sa bulig ni Jehova para matiis ro mga kalisdanan. (2 Cor. 4:​7-10) Kon mabautismuhan ka bilang isaea sa mga Saksi ni Jehova, pwedeng matestingan ing pagtuo o makaeksperyinsya it mga pagkontra. Pero makasalig ka nga pirme kang buligan ni Jehova ag ni Jesus agud makatiis ag makapabilin nga matutom.​—Fil. 4:13.

10. Ano ing matun-an sa halimbawa ni Anna?

¹⁰ Si Anna hay nagbahoe sa Eastern Europe. Pagkatapos mabautismuhan ro anang nanay, nagpasugot ro anang tatay nga magpa-Bible study man si Anna maskin 9 nga dag-on pa eang imaw. Pero, owa kara naila ro iba nandang igbata nga nagaestar sa andang baeay. Para kanda, ro pagbaylo it relihiyon nga andang ginmana sa andang kalolo-lolohan hay mabahoe gid nga kahuy-anan. Kat 12 nga dag-on eon si Anna, nag-eaong imaw kay tatay na nga gusto nang magpabautismo. Gustong masayran it anang tatay kon personal na baea ron nga desisyon o basi may nagpilit kana. Nagsabat imaw, “Palangga ko si Jehova.” Ngani ginsugtan imaw ni tatay na nga magpabautismo. Ku ulihi, naeksperyinsyahan ni Anna ro mga pag-intrimis ag buko’t manami nga pagtratar. Ginhambaean imaw it sambilog sa anang igbata, “Mas mayad pa nga nangin imoral ka lang o paeasigarilyo kaysa mangin Saksi ni Jehova.” Paalin ra nakaya ni Anna? Naghambae imaw, “Ginbuligan ako ni Jehova nga mangin mabakud ag ginsuportahan gid ako it ang mga ginikanan.” Ginasueat man ni Anna ro mga panahon nga nabatyagan na ro bulig ni Jehova. Ginabasa na ra kon amat para indi na malipatan kon paalin imaw ginbuligan ni Jehova. Kon nahadlok ka sa paghingabot, tandai nga buligan ka man ni Jehova.​—Heb. 13:6.

NAGPABAUTISMO SI CORNELIO

11. Ham-an posibleng nagdaywang isip si Cornelio nga magpabautismo?

¹¹ Makatuon man kita it importante nga leksyon sa halimbawa ni Cornelio. Imaw hay “isaeang ka kapitan” o senturion, ag ginadumaeahan na ro mga 100 nga soldado it Roma. (Binu. 10:1) Dahil karon, ginatahod gid imaw sa andang lugar ag sa anang posisyon bilang soldado. “Mabahoe gid ro anang nahimo sa pagbulig sa mga imoe [o, pobre].” (Binu. 10:2) Ginpadaea ni Jehova si apostol Pedro para isugid kana ro mayad nga balita. Nagdaywang isip baea si Cornelio nga magpabautismo dahil kilaea imaw?

12. Ano ro nakabulig kay Cornelio nga magpabautismo?

¹² Ano ro nakabulig kay Cornelio nga magpabautismo? Mabasa naton nga imaw hay “may kahadlok sa Dyos, . . . ag ro anang bug-os nga panimaeay.” Ag pirme imaw nga nagapangamuyo sa Dyos. (Binu. 10:2) Kat ginsugid ni Pedro ro mayad nga balita kay Cornelio, ginbaton na ag ku anang pamilya si Cristo ag nagpabautismo eagi. (Binu. 10:​47, 48) Handa gid mag-obra si Cornelio it maskin alin nga mga pagbag-o para masimba si Jehova kaibahan ku anang pamilya.​—Jos. 24:15; Binu. 10:​24, 33.

13. Ano ing matun-an kay Cornelio?

¹³ Pareho kay Saulo, pwede kuntang pasugtan ni Cornelio ro anang posisyon nga magpugong kana para mangin Cristyano. Pero owa na ron ginpasugtan. Kinahang-ean mo man baea mag-obra it mabahoe nga mga pagbag-o para makapabautismo? Kon huo, si Jehova ro imong mangin Manogbulig. Pakamayron na gid ro imong determinasyon nga iaplikar ro mga prinsipyo sa Biblia para maalagad imaw.

14. Ano ing matun-an sa halimbawa ni Tsuyoshi?

¹⁴ Si Tsuyoshi, nga taga-Japan hay kinahang-ean mag-obra it pagbag-o sa anang trabaho para mangin kwalipikado sa bautismo. Assistant imaw ku headmaster o prinsipal it Ikenobo nga eskuylahan nga nagaturo sa mga tawo kon paalin mag-ayos it mga bueak. Kon indi maka-attend sa eubong ro prinsipal, si Tsuyoshi pirme ro ginapaagto para magpartisipar sa mga ritwal it mga Budhista. Pero, kat natun-an ni Tsuyoshi ro kamatuoran parti sa kamatayon, sayod na nga indi imaw mabautismuhan kon padayon imaw nga nagapartisipar sa rayang mga ritwal. Ngani nagdesisyon imaw nga indi eon magpartisipar. (2 Cor. 6:​15, 16) Gin-istorya ni Tsuyoshi ro prinsipal parti kara. Ano ro resulta? Owa imaw ginpahalin sa trabaho maskin owa eon imaw nagapartisipar sa mga ritwal. Pagkatapos it sang dag-on nga pag-Bible study, nabautismuhan si Tsuyoshi.a Kon kinahang-ean mo mag-obra it pagbag-o sa ing trabaho para mapasadya ro Dyos, makasalig ka nga itao na ing mga kinahang-eanon ag ku ing pamilya.​—Sal. 127:2; Mat. 6:33.

NAGPABAUTISMO RO MGA TAGA-CORINTO

15. Ano ro posibleng nagpugong sa mga taga-Corinto kato nga magpabautismo?

¹⁵ Ro mga taga-Corinto kato hay kilaea nga materyalistiko ag imoral. Abung mga tawo igto ro nagaobra it mga bagay nga owa nailaan it Dyos. Ngani malisud para kanda nga alagaron si Jehova. Pero, kat nag-abot sa syudad si apostol Pablo ag nagwali it mayad nga balita parti kay Cristo, “nagtuo . . . ag nagpabautiso [o, nagpabautismo] ro kaabuan sa mga taga-Corinto nga nakabati.” (Binu. 18:​7-11) Nagpakita rayon si Ginuong Jesu-Cristo kay Pablo sa paeanan-awon ag naghambae: “Abu ro akong mga tawo sa raya nga syudad.” Ngani, padayon nga nagwali igto si Pablo sa sueod it sang dag-on ag tunga.

16. Ano ro nakabulig sa mga taga-Corinto kato nga magpabautismo? (2 Corinto 10:​4, 5)

¹⁶ Ano ro nakabulig sa mga taga-Corinto kato nga magpabautismo? (Basaha ro 2 Corinto 10:​4, 5.) Nakabulig kanda ro Bisaea it Dyos ag ro anang baeaan nga espiritu nga mag-obra it mabahoe nga mga pagbag-o sa andang kabuhi. (Heb. 4:12) Ratong mga taga-Corinto nga nagbaton it mayad nga balita parti kay Cristo hay ginpundo ro andang mga ueobrahon pareho it pagpahilong, pagpanakaw, ag homosekswalidad.​—1 Cor. 6:​9-11.b

17. Ano ing matun-an sa mga taga-Corinto kato?

¹⁷ Maskin mabahoe nga pagbag-o ro dapat obrahon it pila nga mga taga-Corinto kato, owa nanda gin-isip nga malisud para kanda nga mangin Cristyano. Gintinguhaan gid nanda nga makaagi sa makitid ag malisud nga daean paagto sa kabuhi nga owa it katapusan. (Mat. 7:​13, 14) Nalisdan ka baea nga punduhon ing maeain nga ugali o ueobrahon para mabautismuhan? Indi maeuyahan! Pangabaya si Jehova nga buligan ka it anang baeaan nga espiritu nga mapundo ing maeain nga mga ueobrahon.

18. Ano ing matun-an sa halimbawa ni Monika?

¹⁸ Si Monika, nga taga-Georgia hay nagtinguha gid nga punduhon ro anang maeain nga mga ginahambae ag buko’t mayad nga mga kalingawan para mabautismuhan. Ginhambae na: “Kat bataon ako, ro pangamuyo ro nagtao kakon it kusog para magbag-o. Sayod ni Jehova nga gusto ko gid obrahon ro tama, ag pirme na akong ginabuligan ag ginagiyahan.” Nabautismuhan si Monika sa edad nga 16. May mga ueobrahon ka baea nga kinahang-ean punduhon para maalagad si Jehova? Padayon nga pangabaya si Jehova nga taw-an ka it kusog para makaobra it mga pagbag-o. Bugana na nga ginatao ro anang baeaan nga espiritu.​—Juan 3:34.

ING PAGTUO HAY MAKAHALIN IT BUKID

19. Ano ro makabulig kimo para makaya ro mat bukid it bahoe nga mga problema? (Tan-awa man ro piktyur.)

¹⁹ Makasalig ka nga palangga ka ni Jehova ag gusto na nga mangin parte ka it anang pamilya. Matuod ron, maskin alin man ro mga kalisdanan nga nagapugong kimo para magpabautismo. Ginhambae ni Jesus sa anang mga disipulo ku unang siglo: “Kon may pagtuo kamo nga parehas kabahoe sa busoe it mostasa, sarang kamo makahambae sa raya nga bukid, ‘Sumaylo ka idto!’ ag raya magasaylo. Owa it butang nga indi ninyo mahimo!” (Mat. 17:20) Ratong mga nakabati hay mga pilang dag-on paeang nga nakaibahan si Jesus, ngani kinahang-ean pa nandang pabakuron ro andang pagtuo. Pero ginpasalig sanda ni Jesus nga kon dugangan pa nanda ro andang pagtuo, buligan sanda ni Jehova nga makaya ro mat bukid it bahoe nga mga kalisdanan. Ag buligan ka man ni Jehova nga maobra ron!

20. Paalin ka mabuligan it mga halimbawa ku mga Cristyano kato ag makaron nga ginsambit sa rayang artikulo?

²⁰ Kon may mga kalisdanan o mga nagapugong kimo sa pagpabautismo, mag-usoy eagi it paagi para makaya ra. Mapaumpawan ka ag mapalig-on sa mga halimbawa ku mga Cristyano kato ag makaron. Kabay mapalig-on ka it andang halimbawa ag mapahueag nga idedikar ing sarili kay Jehova ag magpabautismo. Raya ro pinakamayad nga desisyon nga pwedeng mong obrahon!