Tueara ro Kaisipan ni Jehova ag ni Jesus

1-2. Ano ro naeakip sa atong pagpalangga kay Jehova, ag paalin ginpakita ni Jesus nga palangga na si Jehova sa anang bilog nga painu-ino?

GINSUGID ni Jesus kon ano ro pinakaimportanteng sugo it Dyos kat ginhambae na: “Higugmaa ro Ginuo [o, si Jehova] nga imong Dyos it bug-os mo nga tagipusoon, it bug-os mo nga kaeag, it bug-os mo nga kusog, ag it bug-os mo nga painu-ino.” (Luc. 10:27) Ngani palangga naton si Jehova sa atong bilog nga kabuhi. Eakip kara ro atong mga handum, baeatyagon, ag kusog. Pati man kon paalin kita mag-isip. Syempre, indi man naton maintindihan it mayad ro tanan nga kaisipan ni Jehova. Pero mas maintindihan naton ra kon tun-an naton ro “paino-ino it . . . Kristo” dahil perpekto na nga napakita ro kaisipan it anang Ama.​—1 Cor. 2:​16, Ro Bag-o nga Kasugtanan, TAP.

² Palangga gid ni Jesus si Jehova sa anang bilog nga painu-ino. Sayod na kon ano ro gusto it Dyos para kana ag determinado imaw nga obrahon ra, maskin pa kinahang-ean nang mag-antus. Dahil nakapukos si Jesus sa pag-obra it gusto ku anang Ama, owa na ginpasugtan ro maskin alin nga bagay nga mangin mas importante sa anang kabuhi.

3. Ano ro natun-an ni apostol Pedro kay Jesus, ag ano ro anang ginpalig-on nga obrahon it mga Cristyano? (1 Pedro 4:1)

³ Si Pedro ag ro ibang mga apostoles hay nagkapribilehiyo nga makaibahan si Jesus ag makatuon kana mismo kon paalin imaw mag-isip. Kat gin-obra ni Pedro ro anang unang sueat, ginpalig-on na ro mga Cristyano nga dapat may una man sandang kaisipan pareho ni Cristo. (Basaha ro 1 Pedro 4:1.) Sa orihinal nga linggwahe, ro termino nga gingamit ni Pedro para sa: “Magpakalig-on sa inyong kaugalingon” hay nagatukoy sa mga soldado nga may kompletong gamit para mangin handa sa inaway. Ngani kon tuearon it mga Cristyano ro kaisipan ni Jesus, makaya man nandang suk-ean ro mga saea nga handum ag ro kalibutan nga ginagamhan ni Satanas.​—2 Cor. 10:​3-5; Efe. 6:12.

4. Paalin makabulig katon rayang artikulo nga sundon ro ginhambae ni Pedro?

⁴ Tun-an naton ro kaisipan ni Jesus ag kon paalin naton ra matuead. Sayuron ta man kon paalin naton (1) matuead ro kaisipan ni Jehova, nga makabulig katon para maghiusa ro aton tanan nga kaisipan, (2) mapakita ro pagkamapainubuson, ag (3) mapakita ro mayad ro painu-ino paagi sa pagsalig kay Jehova sa pangamuyo.

TUEARA RO KAISIPAN NI JEHOVA

5. Sa ano nga sitwasyon owa hatuead ni Pedro ro kaisipan ni Jehova?

⁵ Sayuron ta ro sangka sitwasyon nga owa hatuead ni Pedro ro kaisipan ni Jehova. Ginhambae ni Jesus sa anang mga apostoles nga dapat imaw mag-agto sa Jerusalem, kon siin igto imaw pagadakpon it relihiyusong mga lider, paantuson, ag pagapatyon. (Mat. 16:21) Sayod ni Pedro nga si Jesus ro ginpromisa nga Mesias nga magaeuwas sa katawhan it Dyos. Ngani, posibleng malisud gid para kana nga patihan nga pasugtan ni Jehova si Jesus nga mamatay. (Mat. 16:16) Ngani gindaea imaw ni Pedro sa kilid ag ginsaway: “Ginuo, kabay nga indi raya tugotan it Dyos! Indi raya dapat manabo kimo!” (Mat. 16:22) Buko’t pareho ro anang kaisipan kay Jesus dahil owa hatuead ni Pedro ro kaisipan ni Jehova.

6. Paalin ginpakita ni Jesus nga pareho ro anang kaisipan kay Jehova?

⁶ Pareho gid ro kaisipan ni Jesus sa anang Ama sa eangit. Ginhambae ni Jesus kay Pedro: “Halin iya, Satanas! Imo ‘t-a nga ginabaeabagan ro akong pagtuman sa gusto it Dyos. Ro imong paino-ino hay ana it tawo bukon it ana ku Dyos.” (Mat. 16:​23, Ro Bag-o nga Kasugtanan, TAP) Para maobra ro kabubut-on it Dyos, sayod ni Jesus nga kinahang-ean nang mag-antus ag mamatay. Ngani, owa na ginpamatian ro ginhambae ni Pedro maskin pa may mayad imaw nga motibo. Dahil kara, natun-an ni Pedro nga kinahang-ean nang mag-isip pareho sa kaisipan it Dyos. Importante raya nga leksyon nga kinahang-ean man natong matun-an.

7. Paalin napakita ni Pedro ku ulihi nga gintuead na ro kaisipan ni Jehova? (Tan-awa ro piktyur.)

⁷ Ku ulihi, ginpakita ni Pedro nga gusto nang ro anang kaisipan hay mangin pareho kay Jehova. Nag-abot eon ro panahon nga ro mga owa natuli nga mga Hentil hay mangin parte ku katawhan it Dyos. Si Pedro ro ginpili it Dyos nga magwali kay Cornelio, nga sambilog sa unang mga Hentil nga nangin Cristyano. Ginalikawan it mga Judio ro mga Hentil, ngani kinahang-ean ni Pedro nga bag-uhon ro anang kaisipan para mawalihan na sanda. Kat naintindihan ni Pedro kon ano ro kaisipan it Dyos parti sa mga Hentil, ginbag-o na ro anang pagtan-aw. Ngani, kat ginpaagto imaw ni Cornelio sa andang baeay, “owa [imaw] magbalibad.” (Binu. 10:​28, 29) Ginwalihan na si Cornelio ag ro tanan nga una sa anang baeay, ag nagpabautismo sanda.​—Binu. 10:​21-23, 34, 35, 44-48.

8. Paalin naton mapakita nga ro atong kaisipan hay pareho sa kaisipan ni Jehova? (1 Pedro 3:8)

⁸ Pagtaliwan it pilang dag-on, ginpalig-on ni Pedro ro anang isigka-Cristyano: “Magkaeasugot kamo.” (Basaha ro 1 Pedro 3:​8, Ro Bag-o nga Kasugtanan, TAP.) Bilang katawhan ni Jehova, magahiusa ro atong kaisipan sa atong mga igmanghod kon tuearon naton ro kaisipan ni Jehova nga natun-an ta sa Biblia. Halimbawa, ginpalig-on ni Jesus ro anang mga sumoeunod nga unahon ro Ginharian sa andang kabuhi. (Mat. 6:33) Ngani kon may sangka igmanghod sa inyong kongregasyon nga gustong magpayunir o mag-alagad it full-time sa ibang paagi, imbes nga hambaean naton imaw nga kaeuy-an ro anang sarili ag magpatawhay eang, dapat naton imaw palig-unon ag suportahan sa anang goal.

MANGIN MAPAINUBUSON

9-10. Paalin ginpakita ni Jesus nga mapainubuson gid imaw?

⁹ Ku gabii bago ginpatay si Jesus, gintur-an na si Pedro ag ro iba pang apostoles it importante nga leksyon parti sa pagkamapainubuson. Bago karon, ginsugo ni Jesus si Pedro ag si Juan nga ipreparar ro ulihing paihapon nga andang pagasaeuhan bago imaw mamatay. Kinahang-ean nandang siguraduhon nga may planggana ag tualya para mahugasan it mga bisita ro andang mga siki bago magkaon. Pero sin-o ro mapainubuson nga magaobra kara?

¹⁰ Ginpakita ni Jesus nga mapainubuson gid imaw dahil owa imaw nagdaywang isip nga obrahon ra. Posibleng nakibot gid ro anang mga apostoles kat gin-obra na ro ueobrahon it sangka sueoguon. Gin-uba ni Jesus ro anang balabal, ginbugkos ro tualya sa anang hawak, ginbubuan it tubi ro planggana, ag ginhugasan ro siki it anang mga apostoles. (Juan 13:​4, 5) Posibleng nabuhayan si Jesus sa paghugas it siki ku anang 12 nga apostoles—eakip kay Judas, nga magatraidor kana. Pero, mapainubuson nga gin-obra ra tanan ni Jesus. Rayon, mapinasensyahon nga naghambae si Jesus: “Naeubtan baea ninyo ro akong ginhimo kinyo? Ginatawag ninyo ako nga Manogturo ag Ginuo, ag husto ruyon, ay ruyon gid man ako. Ngani, kon ako nga Ginuo ninyo ag Manogturo naghugas it inyong mga siki, ngani kamo man dapat maghueogasan it inyong mga siki.”​—Juan 13:​12-14.

11. Paalin ginpakita ni Pedro nga natun-an na eon nga mangin mapainubuson? (1 Pedro 5:5) (Tan-awa man ro piktyur.)

¹¹ Nakatuon si Pedro sa pagkamapainubuson ni Jesus. Kat nagbalik si Jesus sa eangit, milagruso nga ginpamayad ni Pedro ro eaki nga paki halin kat natawo ra. (Binu. 1:​8, 9; 3:​2, 6-8) Nangawa kara ro abung tawo ag nagpaeapit sanda kanday Pedro. (Binu. 3:11) Ginbaton baea ni Pedro ro pagdayaw kana it mga tawo, maskin halin imaw sa lugar nga importante gid ro posisyon ag ro pagiging kilaea? Owa, kundi mapainubuson na nga gintao ro pagdayaw kay Jehova ag kay Jesus, ag ginhambae na sa mga tawo: “Rayang inyong nakita ag nasayran nahimo tungod sa pagtuo sa anang ngaean, ag raya nga pagtuo kay Jesus ruyon ro nagpamayad kana it bug-os nga inyo makaron nakita.” (Binu. 3:​12-16) Ku ulihi, ginsueatan ni Pedro ro mga Cristyano nga dapat mangin mapainubuson. Sa orihinal nga linggwahe, naggamit imaw it termino nga nagatao it ideya nga ro pagkamapainubuson hay matsa eambong nga kinahang-ean isuksok. Nagapadumdom ra katon kat ginbugkos ni Jesus ro tualya sa anang hawak ag ginhugasan ro siki it anang mga apostoles.​—Basaha ro 1 Pedro 5:5.

12. Paalin naton padayon nga mapakita ro pagkamapainubuson pareho kay Pedro?

¹² Matuead naton ro halimbawa ni Pedro sa pagkamapainubuson. Tandai nga ro matuod nga pagkamapainubuson hay indi eang makita sa atong ginahambae. Ro termino nga gingamit ni Pedro para sa pagkamapainubuson hay nagaeakip sa kon paalin naton ginatan-aw ro atong sarili ag ro iba. Nagabulig kita sa iba dahil palangga naton si Jehova ag ro mga tawo, buko’t dahil gusto natong dayawon kita. Ginapakita naton nga mapainubuson kita kon masadya kita nga nagaalagad kay Jehova ag sa atong mga igmanghod, maskin pa indi ra makita it iba.​—Mat. 6:​1-4.

MANGIN ‘MAYAD RO PAINU-INO’

13. Ano ro buot hambaeon nga mangin ‘mayad ro painu-ino?’

¹³ Ano ro buot hambaeon nga mangin ‘mayad ro painu-ino?’ (1 Ped. 4:​7, NWT; 2 Cor. 5:​13, Ro Bag-o nga Kasugtanan, TAP) Ro Cristyano nga may mayad nga painu-ino hay nagatinguha gid agud makaobra it mga desisyon nga nagapakita it kaisipan ni Jehova. Sayod na nga owa eon it mas importante pa kaysa sa anang relasyon kay Jehova. May balanse imaw nga pagtan-aw sa anang sarili, ag naintindihan na nga bukon na it sayod ro tanan. Ag ginapakita na nga nagasalig imaw sa Dyos paagi sa mapainubuson nga pagpangamuyo pirme kay Jehova.a

14. Sa anong sitwasyon owa hapakita ni Pedro ro pagsalig kay Jehova?

¹⁴ Ku ulihing gabii bago mamatay si Jesus, ginpaandaman na ro anang mga disipulo: “Sa gabii ngara, tanan kamo magapaeagiw ag magasikway kakon.” May kompyansa nga nagsabat si Pedro: “Bisan aywan ka it tanan, indi ko gid ikaw pag-aywan.” Sa ruyong gabii, ginsugo ni Jesus ro pila sa anang mga disipulo: “Magpueaw kamo ag magpangamuyo.” (Mat. 26:​31, 33, 41) Kon ginsunod eang kunta ni Pedro ruyong pahanumdom, may kaisog kunta imaw nga akuon nga disipulo imaw ni Jesus. Pero, ginhambae ni Pedro nga bukon na it kilaea si Jesus, ag ginhinuesuean na gid ra.​—Mat. 26:​69-75.

15. Paalin nakapabilin si Jesus nga may mayad nga painu-ino sa anang ulihing kabuhi bilang tawo?

¹⁵ Nagsalig gid si Jesus kay Jehova. Maskin perpekto si Jesus, nagpangamuyo imaw it pauman-uman sa ruyong gabii bago imaw mamatay. Nagtao ron kana it kaisog nga sundon kon ano ro gusto ni Jehova nga obrahon na. (Mat. 26:​39, 42, 44; Juan 18:​4, 5) Siguradong owa nalipatan ni Pedro nga nangamuyo si Jesus it abung beses sa anang ulihing gabii.

16. Paalin napakita ni Pedro nga napaeambo na eon ro mayad nga painu-ino? (1 Pedro 4:​7, NWT)

¹⁶ Ku ulihi, natun-an ni Pedro nga magsalig pa gid kay Jehova paagi sa pangamuyo. Ginpasalig it ginbanhaw nga si Jesus si Pedro ag ro ibang mga apostoles nga mabaton nanda ro baeaan nga espiritu para mawali nanda ro mayad nga balita. Pero, ginhambaean sanda ni Jesus nga maghueat sa Jerusalem hasta matabo ra. (Luc. 24:49; Binu. 1:​4, 5) Ano ro gin-obra ni Pedro habang nagahueat? Si Pedro ag ro anang isigka-Cristyano hay “nagatipon permi sa pagpangamuyo.” (Binu. 1:​13, 14) Ku ulihi, ginpalig-on ni Pedro sa anang una nga sueat ro anang isigka-Cristyano nga mangin mayad ro andang painu-ino ag magsalig kay Jehova paagi sa pangamuyo. Ginhambae na: “Pero ro katapusan it tanan nga bagay hay maeapit eon. Ngani, mangin mayad ro inyong painu-ino, ag mangin alisto pirme sa pagpangamuyo.” (1 Ped. 4:​7, NWT) Natun-an ni Pedro nga magsalig kay Jehova ag nangin haligi imaw it kongregasyon.​—Gal. 2:9.

17. Maskin pa abu kita it abilidad, ano dapat ro padayon natong obrahon? (Tan-awa man ro piktyur.)

¹⁷ Para mangin mayad ro atong painu-ino, dapat kitang mangamuyo pirme kay Jehova. Maskin pa abu kita it abilidad, dapat padayon kitang mangamuyo kay Jehova para sa anang bulig. Ngani, kon nagaobra kita it importanteng mga desisyon, nagapangamuyo kita kay Jehova para sa anang giya ag nagasalig nga sayod na kon ano ro pinakamayad para katon.

18. Paalin naton mabag-o ro atong kaisipan para matuead ro kaisipan ni Jehova?

¹⁸ Nagapasaeamat gid kita kay Jehova dahil gin-obra na kita nga may ikasarang sa pagtuead it anang mga ugali. (Gen. 1:26) Syempre, indi man naton matuead it perpekto si Jehova. (Isa. 55:9) Pero pareho kay Pedro, mabag-o naton ro atong kaisipan paagi sa padayon nga pagtuead sa kaisipan it Dyos, pagtinguha nga mangin mapainubuson, ag pagpakita it mayad nga painu-ino.