‘Mayad nga Magpaeapit Kita sa Dyos!’

1-2. (a) Ano ro dapat natong obrahon agud mangin maeapit naton nga amigo ro sangka tawo? (b) Ano ro atong pagatalakayon sa rayang artikulo?

MAY una ka baeang maeapit nga amigo? Ano ing gin-obra agud mangin maeapit kana? Posibleng nagtao ka it oras para makilaea imaw, ag para masayran ro anang mga naagyan sa kabuhi, pati man ro anang mga nailaan ag owa nailaan. Nakita mo ro manami na nga mga ugali nga gusto mong tuearon. Dahil karon, palangga mo gid ing amigo.

² Para mangin maeapit mo nga amigo ro sangka tawo, kinahang-ean mo nga magtinguha ag magtao it oras kana. Ruyon man ro dapat natong obrahon para mangin maeapit naton nga amigo si Jehova nga Dyos. Pagatalakayon sa rayang artikulo kon paalin kita mangin mas maeapit sa atong Dyos ag kon ano ro mga benepisyo nga atong mabaton kon obrahon naton ra. Una, tun-an naton kon ham-an mayad nga magpaeapit kita sa atong pinakamayad nga Amigo, nga si Jehova.

3. Ham-an dapat natong pamaeandungan ro mga benepisyo nga atong mabaton kon magpaeapit kita kay Jehova? Magtao it ilustrasyon.

³ Siguradong nagapati ka nga mayad nga magpaeapit kay Jehova. Pero kon pamaeandungan naton ro mga benepisyo nga atong mabaton, magapahueag ra katon nga padayon nga magpaeapit kana. (Sal. 63:​6-8) Halimbawa, sayod naton nga ro pagkaon it masustansya, pag-exercise, pagpahuway it mayad, ag pag-inom it bastante nga tubi hay para gid sa atong ikamayad. Pero abu gihapon ro nagabalewala sa rayang mga bagay, ag ginapabay-an ro andang pang-eawas. Pero, ratong mga nag-isip nga importante rayang mga bagay hay nagatinguha pirme nga obrahon ra. Pareho karon, sayod naton nga mayad nga magpaeapit kita kay Jehova. Pero kon pamaeandungan naton ro mga benepisyo nga atong mabaton, magapahueag ra katon nga padayon nga mas magpaeapit sa atong Amigo.​—Sal. 119:​27-30.

4. Ano ro ginhambae it salmista sa Salmo 73:28?

⁴ Basaha ro Salmo 73:28. Ro nagsueat it Salmo 73 hay sangka Levinhon nga may pribilehiyo nga mag-alagad bilang manogkanta sa templo ni Jehova. Posibleng dinag-on eon imaw nga nagaalagad it matutom kay Jehova. Pero, nagbatyag gihapon imaw nga kinahang-ean nang padumdomon ro anang sarili ag ro iba nga “mayad nga magpaeapit [sanda] sa Dyos.” Ano ro pila nga mga benepisyo kon obrahon naton ra?

RO ‘PAGPAEAPIT SA DYOS’ HAY NAGATAO IT KASADYA

5. (a) Ham-an mangin mas masadya kita kon mas magpaeapit kita kay Jehova? (b) Paalin ro kaaeam ni Jehova makabulig ag makaprotekta kimo? (Hulubaton 2:​6-16)

⁵ Kon mas magpaeapit kita kay Jehova, mangin mas masadya pa gid kita. (Sal. 65:4) Abung mga rason kon ham-an matuod ra. Halimbawa, makabenepisyo kita kon ginaaplikar naton ro praktikal nga kaaeam halin sa anang Bisaea, ro Biblia. Makaprotekta katon ruyong kaaeam halin sa maeain nga mga impluwensya ag sa pag-obra it seryoso nga mga saea. (Basaha ro Hulubaton 2:​6-16.) Ngani, ginahambae it Biblia: “Masadya ro tawo nga nakakita it kaaeam ag ro tawo nga nakabaton it pag-eubot.”​—Hulu. 3:13.

6. Ham-an naduea ro kasadya it salmista?

⁶ Maskin ro mga amigo ni Jehova hay nasubuan man kon amat. Naduea ro kasadya ku manogsueat it Salmo 73 kat nagpadaea imaw sa negatibo nga kaisipan. Naugot imaw ag naibog dahil nakita na nga mas manami ro kabuhi it maeain nga mga tawo maskin owa sanda nagasunod sa Dyos ag sa anang pagsueondan. Gin-isip na nga ro mga bayolente ag bugaeon nga mga tawo hay mas abu ro kwarta, mas mayad ro pang-eawas, ag owa man nagakalisud. (Sal. 73:​3-7, 12) Dahil sa anang nakita nga inhustisya, gin-isip na nga matsa owa it pueos ro anang pag-alagad kay Jehova. Grabi gid ro anang kasubo ag naghambae imaw: “Owa gid it pueos nga ginpabilin ko nga malimpyo ang tagipusuon ag ginhugasan ko ang mga alima agud ipakita nga owa ako it saea.”​—Sal. 73:13.

7. Ano ro atong obrahon kon nasubuan kita? (Tan-awa man ro piktyur.)

⁷ Owa ginpasugtan it salmista nga daugon imaw it kasubo. Maskin grabi ro kasubo it salmista, may gin-obra imaw agud mabag-o ro anang kaisipan. “Nagsueod [imaw] sa baeaan nga santuaryo it Dyos,” kon siin gintadlong ni Jehova ro anang kaisipan. (Sal. 73:​17-19) Kon nasubuan kita, sayod gid ra it atong pinakamayad nga Amigo nga si Jehova. Kon mangayo kita kana it giya paagi sa pangamuyo ag batunon ro anang bulig halin sa anang Bisaea ag sa kongregasyon, taw-an na kita it kusog para madaog ro kasubo. Kon abu ro atong problema ag indi eon naton masayran kon ano ro obrahon, buligan kita ni Jehova nga mangin kalmado.​—Sal. 94:19.a

RO ‘PAGPAEAPIT SA DYOS’ HAY NAGATAO KATON IT MANAMI NGA KABUHI AG PAG-EAUM

8. Ano pa ro importanteng mga rason kon ham-an mayad nga magpaeapit sa Dyos?

⁸ May daywa pa nga importanteng rason kon ham-an mayad nga magpaeapit sa Dyos. Una, mangin masadya ro atong kabuhi makaron. Pangaywa, nagatao ra katon it mabakud nga pag-eaum sa paeaabuton. (Jer. 29:11) Talakayon naton it mayad rayang mga benepisyo.

9. Paalin ro pagpaeapit kay Jehova makatao katon it kasadya?

⁹ Ro pagpaeapit kay Jehova hay makatao katon it kasadya. Abu makaron ro owa nagapati nga matuod ro Dyos. Nagaisip sanda nga owa it katuyuan ro kabuhi ag sa ulihi hay maduea eon ro tanan nga kabuhi iya sa eugta. Pero, sa atong pagtuon sa Bisaea it Dyos, nangin kumbinsido kita “nga may Dyos, ag nagatao imaw it baeos sa mga nagausoy kana.” (Heb. 11:6) Gintuga man kita ni Jehova nga may handum nga simbahon imaw. Ngani kon ginaalagad naton imaw, nagabatyag gid kita it matuod nga kasadya.​—Deut. 10:​12, 13.

10. Ano ro ginpromisa ni Jehova sa mga nagasalig kana? (Salmo 37:29)

¹⁰ Kaeabanan sa mga tawo hay owa it matuod nga pag-eaum para sa paeaabuton. Ro andang pukos eang hay magtrinabaho, magkapamilya, ag magtipon it abung kwarta. Owa nanda nasayran ro promisa it Dyos sa paeaabuton. Sa kabaliskaran, ginasalig it mga alagad ni Jehova ro andang pag-eaum kana. (Sal. 25:​3-5; 1 Tim. 6:17) Nagasalig kita sa atong Dyos ag Amigo, ag sayod naton nga tumanon na ro anang ginpromisa. Naeakip sa atong paeaabuton ro pribilehiyo nga masimba imaw sa owa it katapusan sa Paraiso.​—Basaha ro Salmo 37:29.

11. Ano ro epekto katon it pagpaeapit sa Dyos, ag ano man ro epekto kara kay Jehova?

¹¹ Ro pagpaeapit sa Dyos hay may mayad nga epekto katon sa abu pang paagi. Halimbawa, nagpromisa si Jehova nga patawaron na ro atong mga saea kon maghinuesoe kita. (Isa. 1:18) Bilang resulta, indi eon kita padayon nga makonsensya sa mga saea nga haobra naton dati. (Sal. 32:​1-5) Ag masadya kita kon mapasadya naton si Jehova. (Hulu. 23:15) Sigurado nga abu eon ing nabaton nga mga benepisyo halin kat nangin amigo mo si Jehova. Pero, paalin ka padayon nga mangin maeapit sa Dyos?

KON PAALIN KA PADAYON NGA MANGIN ‘MAEAPIT SA DYOS’

12. Ano eon ing haobra para mangin mas maeapit sa Dyos?

¹² Kon bautismado ka nga Cristyano, sigurado nga abu eon ing haobrang mga bagay para mangin amigo si Jehova. Natun-an mo ro abu nga mga kamatuoran parti kay Jehova nga Dyos ag kay Jesu-Cristo, naghinuesoe sa ing mga saea dati, nagpakita it mabakud nga pagtuo sa Dyos, ag nagtinguha gid para magkabuhi base sa anang kagustuhan. Para mangin mas maeapit sa Dyos, dapat padayon natong obrahon rayang mga bagay.​—Col. 2:6.

13. Ano ro tatlong bagay nga makabulig katon para padayon nga mangin maeapit kay Jehova?

¹³ Ano ro makabulig katon para padayon kita nga mangin maeapit kay Jehova? (1) Dapat padayon natong basahon ag tun-an ro Biblia. Kon nagabasa kita it Biblia, ro goal naton hay bukon eang it basta matun-an ro panguna nga mga kamatuoran parti sa Dyos. Kundi, dapat tinguhaan naton nga maintindihan kon ano ro kabubut-on it Dyos para katon ag magpagiya sa mga prinsipyo nga anang gintao paagi sa anang Bisaea. (Efe. 5:​15-17) (2) Dapat pabakuron naton ro atong pagtuo paagi sa pagpamaeandong sa abu nga mga pamatuod nga nagapakita it anang pagpalangga katon. (3) Dapat padayon natong kaugtan ro mga bagay nga nagapaakig kay Jehova ag likawan nga makipag-amigo sa mga tawo nga nagaobra kara.​—Sal. 1:1; 101:3.

14. Base sa 1 Corinto 10:​31, ano ro pwede natong obrahon kada adlaw para mapasadya si Jehova? (Tan-awa man ro piktyur.)

¹⁴ Basaha ro 1 Corinto 10:31. Importante gid nga obrahon naton ro mga bagay nga makapasadya kay Jehova. Bukon eang kon naga-preaching kita o naga-attend it mga miting sa kongregasyon, kundi sa tanan natong ginaobra kada adlaw. Halimbawa, mapasadya naton si Jehova kon honest kita sa tanan nga bagay ag kon maalwan kita nga nagatao sa iba. (2 Cor. 8:21; 9:7) Gusto na man nga mangin mapinasaeamaton kita sa regalo nga kabuhi. Mangin maeapit kita sa nagtao katon it kabuhi kon nagahaeong kita sa atong ginakaon ag ginainom ag kon ginadipara naton ro atong pang-eawas. Kon nakita ni Jehova nga nagatinguha kita para mapasadya imaw maskin sa maisot nga mga bagay, mas palanggaon na gid kita.​—Luc. 16:10.

15. Ano ro gusto ni Jehova nga pagtratar naton sa iba?

¹⁵ Mabuot si Jehova sa matarung ag sa buko’t matarung nga mga tawo. (Mat. 5:45) Ngani gusto na man nga mangin mabuot kita sa iba. Halimbawa, owa kita ‘nagahambae it maeain bisan kanyo, kundi nga mahidaiton kita ag mainamiguhon, ag matinahuron sa tanan nga mga tawo.’ (Tito 3:2) Ngani maskin owa nagapati ro mga tawo kay Jehova, owa kita nagaisip nga mas mayad o mas mataas kita kaysa kanda. (2 Tim. 2:​23-25) Kon mabuot ag mayad ro atong pagtratar sa iba, mangin mas maeapit kita kay Jehova.

PWEDE KITANG ‘MAGPAEAPIT SA DYOS’ MASKIN NAKASAEA KITA

16. Ano ro ginbatyag ku nagsueat it Salmo 73 pagkatapos it pilang panahon nga pag-alagad kay Jehova?

¹⁶ Paalin kon pagkatapos it pilang panahon, nakabatyag ka nga owa ka nagakadapat sa pagpalangga ni Jehova? Nabatyagan man ra ku nagsueat it Salmo 73. Ginhambae na: “Sangkiri eang magtaeang ro ang mga siki; sangkiri eang ako madanlog sa ang pagtikang.” (Sal. 73:2) Gin-aku na nga “nagmasinueob-on” imaw ag nangin “bukon . . . it makatarungan” nga “matsa pareho . . . it sapat” sa atubang ni Jehova. (Sal. 73:​21, 22) Nahambae na baea ron dahil eang sa anang kaeuyahon, ngani pamatyag na hay owa imaw nagakadapat sa pagpalangga ni Jehova?

17. (a) Maskin naeuyahan gid it buot ro salmista, ano ro anang gin-obra? (b) Ano ro atong matun-an sa anang eksperyinsya? (Tan-awa man ro piktyur.)

¹⁷ Kat nagbatyag ro salmista nga ginpabay-an imaw ni Jehova, posibleng temporaryo eang ratong baeatyagon. Maskin naeuyahan gid imaw it buot, sayod na nga kinahang-ean nang magpaeapit kay Jehova. Ginsueat na: “Pero makaron, padayon ako nga nagaiba kimo [Jehova]; ginabuytan mo ang tuo nga alima. Ginagiyahan mo ako sa ing pahanumdom, ag pagkatapos, daehon mo ako sa ing himaya.” (Sal. 73:​23, 24) Dapat man kitang mangabay kay Jehova nga palig-unon kita kon nagaeuya ro atong pagtuo o kon nagaeuya kita dahil sa atong naobrang saea. (Sal. 73:26; 94:18) Maskin makaobra kita it seryoso nga mga saea, pwede kita makabalik Kana ag makasigurado kita nga “handa [si Jehova] sa pagpatawad” katon. (Sal. 86:5) Ag kon naeuyahan gid kita it buot, dapat mas magpaeapit kita sa atong Dyos.​—Sal. 103:​13, 14.

‘MAGPAEAPIT SA DYOS’ SA OWA IT KATAPUSAN

18. Ham-an owa it limitasyon ro atong pagpaeapit kay Jehova?

¹⁸ Owa it limitasyon ro atong pagpaeapit kay Jehova ag owa it katapusan ro atong pagtuon parti kana. Ginahambae it Biblia nga ro mga paagi ni Jehova, ro anang kaaeam, ag ro anang nasayran hay “indi matungkad.”​—Roma 11:33.

19. Ano ro ginapasalig katon it Salmo?

¹⁹ Ro Salmo 79:13 hay nagahambae: “Kami nga imong katawhan ag panong it imong pahang-eaban, hay magapasaeamat kimo sa owa it katapusan; ag dayawon ka namon sa tanan nga henerasyon.” Kon padayon ka nga magpaeapit sa Dyos, makasalig ka nga mabaton mo ro owa it katapusan nga mga pagpakamayad ag mahambae mo man: “Ro Dyos ro bato it ang tagipusuon ag ro akong parte sa owa it katapusan.”​—Sal. 73:26.