Bataon nga mga Brother—Tueara Sanday Marcos ag Timoteo

1-2. Ano nga mga kalisdanan ro pwedeng magpugong kunta kanday Marcos ag Timoteo para mas makaalagad sa iba?

BATAON nga mga brother, gusto nyo baea nga dugangan ro inyong maobra sa pag-alagad kay Jehova ag mas makabulig sa mga igmanghod sa kongregasyon? Sigurado nga gusto nyo gid. Kanami gid makita ro bataon nga mga brother nga handa mag-alagad sa iba! (Sal. 110:3) Pero, basi nalisdan ka nga obrahon ra. Nagadaywang isip ka baea nga magpaeapad it ing ministeryo dahil nahadlok ka sa mga bagay nga pwedeng matabo? May beses baea nga owa mo ginbaton ro sangka asayment dahil basi indi mo ra maobra it mayad? Kon huo, bukon eang it ikaw ro nakabatyag karon.

² Makaruyon man ro mga kalisdanan nga naagyan nanday Marcos ag Timoteo. Pero owa nanda ginpasugtan ro kahadlok sa mga bagay nga pwedeng matabo o ro kakueang nanda sa eksperyinsya, nga magpugong kanda para mas makaalagad sa iba. Posibleng nagaestar si Marcos sa manami nga baeay kaibahan ro anang nanay kat ginsampit imaw nanday apostol Pablo ag Bernabe sa una nandang asayment bilang misyonero. (Binu. 12:​12, 13, 25) Gin-aywanan ni Marcos ro nakasanayan na nga lugar para magpaeapad it anang ministeryo. Una, nag-agto imaw sa Antioquia. Rayon, gin-ibhan na sanday Pablo ag Bernabe sa andang pagpanaw sa maeayo nga mga lugar. (Binu. 13:​1-5) Pareho kay Marcos, posibleng nagaestar man si Timoteo kaibahan sa anang mga ginikanan kat ginsampit imaw ni Pablo nga magsunod kana sa pagwali nga ueobrahon. Dahil bata pa ag kueang sa eksperyinsya si Timoteo, posibleng naisip na nga bukon pa imaw it kwalipikado nga magsunod kay Pablo. (Ikumpara ro 1 Corinto 16:​10, 11 ag 1 Timoteo 4:12.) Pero, nagdesisyon imaw nga magsunod ag nabaton na ro abung pagpakamayad habang nagaalagad kay Jehova.​—Binu. 16:​3-5.

3. (a) Mauno kapalangga ni Pablo sanday Marcos ag Timoteo? (2 Timoteo 4:​6, 9, 11) (Tan-awa man ro piktyur.) (b) Ano nga mga pangutana ro atong pagatalakayon sa rayang artikulo?

³ Natun-an nanday Marcos ag Timoteo kon paalin diparahon ro iba-ibang responsibilidad sa kongregasyon habang bata pa sanda. Palangga gid ni Pablo rayang bataon nga mga eaki. Ngani kat nasayran na nga maeapit lang imaw mamatay, ginpangabay na sanda nga agtunan imaw. (Basaha ro 2 Timoteo 4:​6, 9, 11.) Ano nga mga ugali ro nailaan ni Pablo kanday Marcos ag Timoteo? Paalin sanda matuead it bataon nga mga brother? Ag paalin makabulig sa bataon nga mga brother makaron ro mapinalanggaon nga mga pahanumdom ni Pablo?

TUEARA SI MARCOS—HANDA MAG-ALAGAD

4-5. Paalin ginpakita ni Marcos nga handa imaw mag-alagad sa iba?

⁴ Ro pag-alagad sa iba hay nagakahueogan it pagtinguha nga makabulig kanda ag sa padayon nga pagbulig maskin malisud ra. Manami nga halimbawa kara si Marcos. Kat owa imaw ginpasunod ni Pablo sa anang pangaywang asayment bilang misyonero, posibleng nasakitan si Marcos ag nadismaya. (Binu. 15:​37, 38) Pero owa ron nagpaeuya kana nga mag-alagad sa anang mga igmanghod.

⁵ Nagsunod si Marcos sa anang igkampod nga si Bernabe para mag-alagad sa ibang lugar. Pagtaliwan it mga 11 nga dag-on, sambilog si Marcos sa mga nagbulig kay Pablo sa anang una nga pagkapriso sa Roma. (Filem. 23, 24) Ro matuod, naapresyar gid ni Pablo ro anang bulig, ngani naghambae imaw nga “mabahoe gid ro . . . nabulig” ni Marcos.​—Col. 4:​10, 11.

6. Paalin nakabenepisyo si Marcos sa anang pagpakig-iba sa hamtong nga mga Cristyano? (Tan-awa ro footnote.)

⁶ Nakabenepisyo si Marcos sa anang pagpakig-iba sa hamtong nga mga Cristyano. Pagkatapos nang makaibahan si Pablo sa Roma, nagsunod imaw kay apostol Pedro sa Babilonia. Nangin maeapit gid sanda nga mag-amigo, ngani gintawag imaw ni Pedro nga “Marcos, ro hinigugma ko nga unga.” (1 Ped. 5:13) Habang magkaibahan sanda, posibleng ginsugid ni Pedro sa anang bataon nga amigo ro mga detalye parti sa kabuhi ag pagministeryo ni Jesus nga ku ulihi, ginsueat ni Marcos sa anang Ebanghelyo.a

7. Paalin natuead it sangka bataon nga brother nga si Seung-Woo ro halimbawa ni Marcos? (Tan-awa man ro piktyur.)

⁷ Padayon nga nangin masako si Marcos sa pag-alagad kay Jehova ag nagpabilin nga maeapit sa hamtong nga mga eaki. Paalin mo matuead si Marcos? Kon owa ka pa nakabaton it pribilehiyo sa pag-alagad, mangin mapinasensyahon ag mag-usoy it iba pang mga paagi nga makaalagad kay Jehova ag sa kongregasyon. Tan-awa ro halimbawa ni Seung-Woo, nga nagaalagad makaron bilang elder. Kat bataon pa imaw, ginakumpara na ro anang sarili sa ibang bataon nga mga brother. Ro pila kanda hay mas nauna nga nakabaton it mga pribilehiyo kaysa kana. Nasakitan ag nadismaya kara si Seung-Woo. Ag ku ulihi, ginsugid na ra sa mga elder. Ginhambae it sangka elder kana nga obrahon na eang ro anang bilog nga masarangan sa pag-alagad sa iba, maskin pa kon amat, indi ra makita it iba. Ginsunod gid ra ni Seung-Woo. Ginbuligan na ro mga magueang ag ratong mga nagakinahang-ean it masakyan paagto sa miting. Naghambae imaw parti sa anang eksperyinsya: “Naintindihan ko eon kon ano gid ro kahueogan it pag-alagad sa iba. Nabatyagan ko ro kasadya sa pagbulig sa iba.”

TUEARA SI TIMOTEO—MAGPAKITA IT PAGPALANGGA SA IBA

8. Ham-an ginpili ni Pablo si Timoteo nga mangin kaibahan sa anang asayment? (Filipos 2:​19-22)

⁸ Kinahang-ean ni Pablo it maisog nga mga kaibahan sa anang pagbalik sa mga syudad kon siin ginhingabot imaw dati. Una nang ginpili nga makaibahan ro sangka eksperyinsyadong Cristyano nga si Silas. (Binu. 15:​22, 40) Ginpili na man rayon si Timoteo. Ham-an ginpili ni Pablo si Timoteo? Ro sambilog nga rason hay dahil may mayad imaw nga reputasyon. (Binu. 16:​1, 2) May matuod man imaw nga pagpalangga sa mga tawo.​—Basaha ro Filipos 2:​19-22.

9. Paalin ginpakita ni Timoteo nga palangga na gid ro mga igmanghod?

⁹ Halin pa ku umpisa it anang ministeryo kaibahan ni Pablo, ginpakita ni Timoteo nga mas palangga na ro mga igmanghod kaysa sa anang sarili. Dahil karon, may kompyansa si Pablo nga aywanan imaw sa Berea para palig-unon ro bag-ong mga disipulo igto. (Binu. 17:​13, 14) Sa ruyong panahon, siguradong nakabenepisyo si Timoteo sa halimbawa ni Silas, nga nagpabilin man sa Berea. Pero ku ulihi, si Timoteo lang isaea ro ginpadaea ni Pablo sa Tesalonica para palig-unon ro mga Cristyano igto. (1 Tes. 3:2) Pagtaliwan it sobra 15 nga dag-on, mas nagdaeum ro pagpalangga ni Timoteo sa mga igmanghod. Ginpakita na ro empatiya sa mga nagaantus paagi sa ‘pagtangis kaibahan sa mga nagatangis.’ (Roma 12:15; 2 Tim. 1:4) Paalin matuead it bataon nga mga brother si Timoteo?

10. Paalin natun-an it brother nga si Woo Jae nga mas magpakita it personal nga interes sa iba?

¹⁰ Natun-an it brother nga si Woo Jae, nga mas magpakita it personal nga interes sa iba. Kat mga bayntehon paeang imaw, nalisdan si Woo Jae nga makipag-istorya sa mga igmanghod nga mas magueang kana. Ngani kon igto sanda sa Kingdom Hall, ginamueo na eang sanda ag mapanaw rayon. Ginpalig-on imaw it sangka elder nga pwede nang umpisahan nga istoryahon ro mga igmanghod paagi sa pagsugid it mga bagay nga naapresyar na parti kanda. Ag ginpalig-on na man imaw nga isipon kon alin ro andang mga nailaan o hilig obrahon. Ginsunod gid ra ni Woo Jae. Makaron, elder eon si Woo Jae. Naghambae imaw: “Mas maeumo eon kakon makaron nga makipag-istorya sa mga tawo ano man ro andang edad. Kanami gid sa pamatyag nga mas naintindihan ko eon ro sitwasyon it iba. Nakabulig gid ra kakon kon paalin mabuligan ro mga igmanghod.”

11. Paalin mapakita it bataon nga mga brother ro personal nga interes sa mga igmanghod sa kongregasyon? (Tan-awa man ro piktyur.)

¹¹ Bataon nga mga brother, pwede nyo mang mapakita ro personal nga interes sa iba. Sa mga miting, makipag-istorya sa iba ano man ro andang edad o lahi. Kamustaha ag pamatii rayon sanda. Makabulig ra kimo nga masayran kon paalin mo sanda mabuligan. Basi masayran mo nga may magueang nga mag-asawa nga nagakinahang-ean it bulig kon paalin gamiton ro JW Library^® app, o basi owa sanda it makaibahan sa pag-preaching. Pwede mo baea sandang tur-an kon paalin gamiton ro andang gadyet o ibhan sanda sa pag-preaching? Kon buligan mo ing mga igmanghod sa rayang mga paagi, mangin mayad ka nga halimbawa sa kongregasyon.

MAKABULIG KIMO RO MAPINALANGGAON NGA PAHANUMDOM NI PABLO

12. Paalin makabulig sa bataon nga mga brother ro pahanumdom ni Pablo kay Timoteo?

¹² Gintaw-an ni Pablo si Timoteo it praktikal nga pahanumdom para buligan imaw nga mangin masadya ag makaalagad it mayad sa Dyos. (1 Tim. 1:18; 2 Tim. 4:5) Bataon nga mga brother, makabulig man kinyo ro mapinalanggaon nga pahanumdom ni Pablo. Paalin? Basaha ro daywang ka sueat ni Pablo kay Timoteo ag isipa nga matsa ginsueat na ra para kimo, ag pamaeandungi kon paalin mo ra maaplikar. Tan-awa ro pila nga mga halimbawa.

13. Ano ro makabulig kimo nga mangin mas mainunongon kay Jehova?

¹³ “Hanasa ro imong kaugalingon sa kabuhi nga dyosnon.” (1 Tim. 4:7b) Ano ro kabuhi nga dyosnon o dyosnon nga debosyon? Raya ro pagkamainunongon it sangka tawo kay Jehova ag ginaobra na kon ano ro makapasadya Kana. Dahil owa man kita natawo nga may makarayang ugali, kinahang-ean naton rang paeambuon. Paalin? Ro Griego nga termino nga “hanasa ro imong kaugalingon” hay pirmeng nagatukoy sa mga atleta nga nagasanay gid it mayad para mangin handa sa kompetisyon. Kinahang-ean nanda ro disiplina sa sarili para magdaog. Pareho sa mga atleta, kinahang-ean man naton ro disiplina sa sarili para mapaeambo ro mga ugali nga mas makapaeapit katon kay Jehova.

14. Ano dapat ro atong mangin goal kon nagabasa it Biblia? Magtao it ilustrasyon.

¹⁴ Importante nga may rutina kita sa pagbasa it Biblia adlaw-adlaw. Ag dapat natong dumdomon nga ro atong goal hay mangin maeapit kay Jehova. Halimbawa, ano ing matun-an kay Jesus kat nakaistorya na ro bataon nga manggaranon? (Mar. 10:​17-22, Ro Bag-o nga Kasugtanan, TAP) Nagapati ro bataon nga eaki nga si Jesus ro Mesias pero kueang ro anang pagtuo para mangin sumoeunod ni Jesus. Maskin pa kara, “nakabatyag it pagpalangga” kana si Jesus. Mabuot gid ro pagpakig-istorya ni Jesus kana. Klaro gid nga gusto ni Jesus nga mag-obra imaw it mayad nga desisyon. Hapakita ni Jesus ro pagpalangga ni Jehova sa rayang bataon nga eaki. (Juan 14:9) Habang ginapamaeandungan mo ro rayang istorya ag ro imong sitwasyon, pangutan-a ing sarili, ‘Ano ang dapat obrahon para mangin mas maeapit kay Jehova ag mas maalagad ro iba?’

15. Ham-an importante nga mangin mayad nga halimbawa sa iba ro sangka bataon nga brother? Magtao it ilustrasyon. (1 Timoteo 4:​12, 13)

¹⁵ “Magmangin ehemplo ka sa mga tumoeuo.” (Basaha ro 1 Timoteo 4:​12, 13.) Ginpalig-on ni Pablo si Timoteo nga paeambuon bukon eang ro anang ikasarang sa pagbasa ag pagturo, kundi pati man ro mga ugali pareho it pagpalangga, pagtuo, ag kalimpyo sa moral. Ham-an? Dahil mas importante ro ginaobra it sangka tawo kaysa sa anang ginahambae. Ibutang ta nga gintaw-an ka it asayment nga magdiskurso parti sa kon paalin mangin mas mahugod sa pagministeryo. Mas may kompyansa ka sa pagdiskurso parti sa rayang topiko kon ginaobra mo ro imong pinakamayad sa ministeryo. Ag kon nakikita ra it mga igmanghod kimo, mas mapahueag sanda nga mangin mahugod man.​—1 Tim. 3:13.

16. (a) Ano ro limang paagi para mangin mayad nga halimbawa ro bataon nga mga brother? (b) Paalin mangin mayad nga halimbawa ro sangka bataon nga brother sa ‘paghambae’?

¹⁶ Sa 1 Timoteo 4:​12, ginsambit ni Pablo ro limang paagi para mangin mayad nga halimbawa ro sangka bataon nga brother. Sa ing personal nga pagtuon, pwede mong tun-an ro kada isaea kara. Halimbawa, gusto mong mangin mayad nga halimbawa sa ‘paghambae.’ Isipa kon ano ing pwedeng hambaeon para mapalig-on ro iba. Kon nagaestar ka pa kaibahan sa ing mga ginikanan, pwede mo sandang pasaeamatan sa andang mga ginaobra para kimo. Sa mga miting, pwede ka magkomento base sa kon ano ing naintindihan. Ag pagkatapos it miting, pwede mo mang pasaeamatan ro mga igmanghod nga may parte sa programa ag isugid kanda kon ano kato ing nailaan. Ro imong mga pagtinguha para mangin mayad nga halimbawa sa paghambae hay nagapakita nga nagauswag ka sa espiritwal.​—1 Tim. 4:15.

17. Ano ro makabulig sa sangka bataon nga brother para maabot ro anang espiritwal nga mga goal? (2 Timoteo 2:22)

¹⁷ “Paeagiwi ro mga maeain nga handom it mga pamatan-on, ag tinguhaa nga magkabuhi it matarong.” (Basaha ro 2 Timoteo 2:​22, Ro Bag-o nga Kasugtanan, TAP.) Ginpalig-on ni Pablo si Timoteo nga likawan ro mga bagay nga pwedeng makaapekto sa pag-abot it anang espiritwal nga mga goal ag makasamad sa anang relasyon kay Jehova. Basi marealisar mo man nga mas abu nga oras ing nagagamit sa kalingawan, ngani sangkiri lang ing oras sa espiritwal nga mga bagay. Halimbawa, isipa kon mauno it abu nga oras ing nagagamit sa paghampang it mga sport, sa pag-browse sa Internet, o paghampang it mga video game. Pwede mo baeang gamiton ing ibang oras para sa teokratiko nga mga ueobrahon? Pwede kang mag-volunteer sa pagmentinar it inyong Kingdom Hall o mag-cart witnessing. Kon obrahon mo rayang mga bagay, makakita ka it bag-ong mga amigo nga makabulig kimo nga maabot ing espiritwal nga mga goal.

ABUNG PAGPAKAMAYAD KON NAGAALAGAD SA IBA

18. Paalin naton nasayran nga may masadya nga kabuhi sanday Marcos ag Timoteo?

¹⁸ Nag-obra it mga sakripisyo sanday Marcos ag Timoteo para mas maalagad ro iba ag nangin masadya gid ro andang kabuhi. (Binu. 20:35) Nag-agto sa iba-ibang lugar si Marcos para buligan ro mga igmanghod. Ginsueat na man ro parti sa exciting nga kabuhi ag pagministeryo ni Jesus. Ginbuligan mat-a ni Timoteo si Pablo nga magporma it bag-ong mga kongregasyon ag palig-unon ro mga igmanghod. Masadya gid si Jehova sa tanan nga sakripisyo nga gin-obra nanday Marcos ag Timoteo para kana.

19. Ham-an dapat sundon it bataon nga mga brother ro pahanumdom ni Pablo kay Timoteo, ag ano ro mangin resulta kon obrahon nanda ra?

¹⁹ Makita naton sa mga sueat ni Pablo kay Timoteo nga palangga na gid rayang bataon nanang amigo. Ag nagapakita man ra nga palangga gid ni Jehova, kamo nga bataon nga mga brother. Gusto na nga mangin masadya ro inyong pag-alagad. Ngani, obraha ing bilog nga masarangan nga sundon ro mapinalanggaon nga pahanumdom ni Pablo, ag paeambua ing kagustuhan nga mas makaalagad sa iba. Kon obrahon mo ra, mangin masadya ing kabuhi makaron ag mabaton mo ro “matuod-tuod nga kabuhi” sa paeaabuton.​—1 Tim. 6:​18, 19.