May Matun-an Ka Baea Gihapon sa Panguna nga mga Ginaturo it Biblia?

1. Ano ro epekto kimo kat una mong natun-an ro mga kamatuoran nga ginaturo it Biblia?

RO PANGUNA nga mga ginaturo it Biblia hay nagpabag-o sa atong kabuhi. Halimbawa, kat natun-an naton nga ro pangaean it Dyos hay Jehova, nag-obra kita it paagi para mangin amigo nana. (Isa. 42:8) Kat natun-an man naton ro matuod nga sitwasyon it mga patay, owa eon kita nagaisip nga nagaantus ro atong mga pinalangga nga namatay o nahadlok sa mga patay. (Man. 9:10) Ag kat natun-an naton ro promisa it Dyos nga mangin Paraiso ro eugta, owa eon kita nabaeaka sa atong paeaabuton. May pag-eaum kita nga mabuhi bukon eang sa sueod it mga 70 o 80 nga dag-on, kundi sa owa it katapusan.​—Sal. 37:29; 90:10.

2. Paalin ginapakita it 2 Pedro 1:​12, 13 nga ro hamtong nga mga Cristyano hay makabenepisyo gihapon sa panguna nga mga ginaturo it Biblia?

² Indi dapat naton pagkalipatan kon mauno kaimportante ro panguna nga mga ginaturo it Biblia. Sa pangaywang sueat ni apostol Pedro, ginsueatan na ro mga Cristyano nga ‘malig-on eon sa kamatuoran.’ (Basaha ro 2 Pedro 1:​12, 13.) Sa ruyong panahon, may bukon it matuod nga mga manogturo sa kongregasyon nga gustong ipaeayo ro mga igmanghod sa kamatuoran. (2 Ped. 2:​1-3) Ginpalig-on ni Pedro ro mga igmanghod para maprotektahan nanda ro andang sarili sa ruyong mga kapurilan. Ngani, ginpadumdom na sanda it pila nga mga kamatuoran sa Biblia nga sayod eon nanda. Rayang mga kamatuoran hay nagbulig kanda nga padayon nga mangin matutom kay Jehova.

3. Ham-an dapat padayon nga pamaeandungan it tanan nga Cristyano ro panguna nga mga ginaturo it Biblia? Magtao it ilustrasyon.

³ Maskin mabuhay eon kita nga nagaalagad kay Jehova, may bag-o gihapon kita nga matun-an sa panguna nga mga ginaturo it Biblia. Sa pag-ilustrar: Ro mayad nga manog-eaha ag ro nagatuon paeang sa pag-eaha hay posibleng maggamit it parehong mga panakot kon nagaeaha. Pero habang nagabuhay, natun-an it eksperyinsyadong manog-eaha kon paalin gamiton ro parehong mga panakot sa iba-ibang paagi para makaeaha it bag-o ag manami nga mga putahi. Pareho karon, ro mabuhay eon nga nagaalagad kay Jehova hay posibleng may ibang natun-an nga leksyon kaysa sa mga bag-uhan paeang nga nagatuon, maskin pareho nga kamatuoran sa Biblia ro andang natun-an. Umpisa kat nabautismuhan kita, basi nagbag-o eon ro atong sitwasyon ag ro atong ginaobra nga pag-alagad kay Jehova. Kon iaplikar naton ro mga kamatuoran nga atong natun-an dati sa atong sitwasyon makaron, posibleng may matun-an kita nga bag-o ag praktikal nga mga leksyon. Tan-awon ta kon ano ro matun-an it hamtong nga mga Cristyano sa tatlong panguna nga mga ginaturo it Biblia.

SI JEHOVA RO MANOGTUGA

4. Ano ro epekto katon kat nasayran naton nga si Jehova ro Manogtuga?

⁴ Sayod naton nga ro eugta ag ro tanan nga una kara hay gintuga it maaeam ag gamhanan nga Manogtuga. Nagahambae ro Biblia: “Ro Dyos imaw ro naghimo it tanan nga mga butang.” (Heb. 3:4) Pero abu pa kitang matun-an sa rayang kamatuoran. Dahil si Jehova ro nag-obra katon, kilaea na gid kita. Nagakabaeaka man imaw katon ag sayod na kon ano ro pinakamayad para katon. Ngani, kat nasayran naton nga si Jehova ro Manogtuga, nagtao ra it matuod nga kahueogan ag katuyuan sa atong kabuhi.

5. Ano ro kamatuoran nga makabulig katon nga mangin mapainubuson? (Isaias 45:​9-12)

⁵ Ro kamatuoran nga si Jehova ro Manogtuga hay nagaturo katon nga mangin mapainubuson. Halimbawa, kat naghambae si Job it saea nga mga bagay parti kay Jehova, nalipatan na kon ano gid ro importante ag mas nagpukos imaw sa anang sarili ag sa pagtinguha nga pamatud-an nga tama imaw. Pero, ginpadumdom ni Jehova si Job nga Imaw ro Eabing Gamhanan nga Manogtuga. (Job 38:​1-4) Nakabulig ra kana nga marealisar nga ro tanan nga ginaobra ni Jehova hay pirmeng tama. Ku ulihi, nagsueat si propeta Isaias parti kara: “Dapat baea hambaeon it eapok nga daga sa Manog-obra it Kueon: ‘Ano ing ginaobra?’”—Basaha ro Isaias 45:​9-12.

6. Hin-uno naton mas eabi nga isipon kon mauno kaaeam ag kagamhanan ro atong Manogtuga? (Tan-awa man ro piktyur.)

⁶ Habang nagaabu ro eksperyinsya it sangka Cristyano, pwedeng mas magsalig imaw sa anang sariling kaisipan kaysa sa magpangayo it giya kay Jehova ag sa Anang Bisaea. (Job 37:​23, 24) Ngani paalin makabulig kana ro pag-isip kon mauno kaaeam ag kagamhanan ro anang Manogtuga nga si Jehova? (Isa. 40:22; 55:​8, 9) Rayang panguna nga kamatuoran hay makabulig kana nga padayon nga mangin mapainubuson ag marealisar nga ro kaisipan ni Jehova hay mas tama kaysa kana.

7. Ano ro gin-obra ni Rahela para maka-adjust sa bag-ong instruksyon nga halin sa atong organisasyon?

⁷ Ro pag-isip nga si Jehova ro Manogtuga hay nakabulig kay Rahela, nga taga-Slovenia, para maka-adjust sa bag-ong instruksyon nga halin sa atong organisasyon. Gin-aku na: “Kon amat, nalisdan gid ako mag-adjust sa bag-ong mga instruksyon nga halin sa mga nagapanguna katon. Halimbawa, maskin hapamantaw ko eon ro 2023 Update it Nagadumaea nga Grupo #8, nakibot gihapon ako kat una kong nakita nga may bungot ro brother nga nagadiskurso. Ngani nagpangamuyo ako kay Jehova nga buligan ako nga maka-adjust sa rayang pagbag-o.” Narealisar ni Rahela nga dahil si Jehova ro Manogtuga, sayod na pirme ro pinakamayad nga paagi para giyahan ro anang organisasyon. Kon nalisdan ka nga maka-adjust sa bag-ong pag-eubot o sa pagbaton it bag-ong instruksyon, magtao it oras para pamaeandungan kon mauno kaaeam ag kagamhanan ro atong Manogtuga.​—Roma 11:​33-36.

KON HAM-AN GINAPASUGTAN IT DYOS RO PAG-ANTUS

8. Paalin kita nakabenepisyo dahil sayod naton kon ham-an ginapasugtan it Dyos ro pag-antus?

⁸ Ham-an ginapasugtan it Dyos ro pag-antus? Ro pila nga owa nakasayod sa sabat sa rayang pangutana hay naakig sa Dyos o nagapati pa ngani nga owa it Dyos! (Hulu. 19:3) Pero, natun-an naton nga nagaantus ag nagakamatay ro mga tawo buko’t dahil kay Jehova, kundi dahil sa namana nga saea ag sa pagkabuko’t perpekto it mga tawo. Natun-an man naton nga mapinasensyahon si Jehova, ag dahil kara, nagkatsansa ro minilyon nga mga tawo nga makilaea imaw ag nasayran nanda kon paalin na dueaon it permanente ro pag-antus. (2 Ped. 3:​9, 15) Rayang mga kamatuoran hay nagpaumpaw katon ag mas nagpaeapit kay Jehova.

9. Sa anong mga sitwasyon mas eabi natong isipon ro mga rason kon ham-an ginapasugtan ni Jehova ro pag-antus?

⁹ Dapat kitang mangin mapinasensyahon habang ginahueat naton nga dueaon ni Jehova ro pag-antus. Pero, kon makaeksperyinsya kita o ro atong mga pinalangga it kalisdanan, inhustisya, o kamatayon, posibleng mag-isip kita kon ham-an owa eagi ginatapos ni Jehova ro pag-antus. (Hab. 1:​2, 3) Kon ruyon ro atong mabatyagan, mayad gid nga isipon naton ro mga rason kon ham-an ginapasugtan ni Jehova nga mag-antus ro mga matarung.a (Sal. 34:19) Pwede man natong pamaeandungan ro anang katuyuan nga dueaon ro tanan nga pag-antus it mga tawo.

10. Ano ro nakabulig kay Anne nga makaya ro pagkamatay it anang nanay?

¹⁰ Ro kamatuoran parti sa pag-antus hay makabulig katon nga makatiis. Si Anne, nga nagaestar sa isla it Mayotte, sa Indian Ocean hay naghambae: “Grabi gid ang kasubo kat namatay si nanay mga pilang dag-on eon ro nagtaliwan. Pero, pirme kong ginapadumdom ang sarili nga buko’t si Jehova ro rason kon ham-an nagaantus kita. Gusto na gid nga dueaon ro tanan nga pag-antus ag banhawon ro atong namatay nga mga pinalangga. Ro pagpamaeandong sa rayang mga kamatuoran hay nagpalig-on kakon ag nagtao it katawhay sa ang isip.”

11. Dahil sayod naton ro mga rason kon ham-an nagaantus kita, paalin ra makabulig katon nga padayon nga mag-preaching?

¹¹ Dahil sayod naton ro kamatuoran kon ham-an ginapasugtan it Dyos ro pag-antus, makabulig ra katon nga padayon nga mag-preaching. Pagkatapos maeksplikar ni Pedro nga ro pagkamapinasensyahon ni Jehova hay nagatao it kaeuwasan sa mga naghinuesoe, nagsueat imaw: “Isipa ninyo kon ano dapat kamo nga klasi it tawo may eabot sa baeaan nga paggawi ag sa mga ueobrahon it dyosnon nga debosyon.” (2 Ped. 3:​11, NWT) Ro sambilog “sa mga ueobrahon it dyosnon nga debosyon” hay ro atong pagministeryo. Pareho it atong Ama, palangga naton ro mga tawo. Gusto naton nga mabuhi man sanda sa matarung nga bag-ong kalibutan it Dyos. Mapinasensyahon nga ginataw-an ni Jehova ro mga tawo sa inyong lugar it tsansa nga makilaea imaw ag masimba. Sangka pribilehiyo gid nga mangin isigka-manogpangabudlay it Dyos ag mabuligan ro mas abu nga tawo nga makilaea imaw bago mag-abot ro katapusan!—1 Cor. 3:9.

NAGAKABUHI KITA SA “KATAPUSAN NGA MGA INADLAW”

12. Paalin kita nakabenepisyo dahil sayod naton nga nagakabuhi kita makaron sa “katapusan nga mga inadlaw”?

¹² Ginasugid it Biblia kon ano ro mangin mga ugali it mga tawo sa “katapusan nga mga inadlaw.” (2 Tim. 3:​1-5, NWT) Ro mga ugali it mga tawo makaron hay nagapamatuod nga nagakatuman eon ro hula it Biblia. Habang nakikita naton nga nagalala ro mga ugali it mga tawo, mas nangin kumbinsido kita nga masaligan ro Biblia.​—2 Tim. 3:​13-15.

13. Base sa ilustrasyon ni Jesus sa Lucas 12:​15-21, ano ro pwede natong ipangutana sa atong sarili?

¹³ Dahil sayod naton nga nagakabuhi kita sa katapusan nga mga inadlaw, makabulig man ra katon nga magpukos sa kon ano gid ro pinakaimportante. Tan-awon ta kon ano ro atong matun-an sa ilustrasyon ni Jesus sa Lucas 12:​15-21. (Basaha.) Ham-an gintawag ro manggaranon nga eaki nga “langu-lango” o buko’t makatarungan? Bukon it dahil sa manggaranon imaw, kundi dahil buko’t tama ro anang mga prioridad. Nagtipon imaw it “manggad para sa anang kaugalingon, pero bukon it manggaranon sa atubangan it Dyos.” Ham-an importante gid ra? Ginhambae it Dyos sa eaki: “Makaron gid nga gabii mamatay ka.” Makaron, habang nagapaeapit ro katapusan it rayang sistema, pwede natong pangutan-on ro atong sarili: ‘Ginapakita baea it ang mga goal nga nagapukos ako sa pinakaimportante? Ano ro mga goal nga gusto kong abuton it ang mga unga? Ginagamit ko baea ang kusog, oras, ag kwarta agud magtipon it manggad para sa ang sarili o para magtipon it manggad sa eangit?’

14. Paalin ro eksperyinsya ni Miki makabulig katon nga makita kon ham-an importante nga dumdomon naton nga nagakabuhi eon kita sa katapusan nga mga inadlaw?

¹⁴ Kon dumdomon naton nga nagakabuhi eon kita sa katapusan nga mga inadlaw, makabulig ra katon kon ano ro dapat natong unahon sa atong kabuhi. Raya ro naeksperyinsyahan it sister nga si Miki. Ginhambae na: “Kat nag-graduate ako sa high school, gusto ko it trabaho nga ginatun-an ro parti sa mga sapat. Pero gusto ko man magpayunir ag magsaylo sa lugar nga kon siin may mas mabahoe nga pagkinahang-ean. Ginhambaean ako it akong hamtong nga mga amiga ag amigo nga isipon it mayad kon maabot ko baea gihapon ang espiritwal nga mga goal maskin rato ang mangin trabaho. Ginpadumdom nanda kakon nga rayang sistema hay maeapit eon matapos. Ag sa bag-ong kalibutan, matun-an ko eon ro tanan nga sapat sa owa it katapusan. Ngani nagdesisyon ako nga magbuoe it kurso nga indi makaubos it akong panahon. Nakabulig ra kakon nga makausoy it trabaho nga makasuporta sa ang pagpayunir, ag ku ulihi, nagsaylo ako sa Ecuador, kon siin may mas mabahoe nga pagkinahang-ean.” Makaron, si Miki ag ro anang asawa hay nagaalagad sa pangsirkito nga ueobrahon sa ruyong nasyon.

15. Paalin makabulig katon ro halimbawa ni Santiago nga indi magpundo sa pagbulig sa mga tawo nga owa pa nagpakita it interes sa mayad nga balita? (Tan-awa man ro piktyur.)

¹⁵ Indi dapat kita maeuyahan kon owa pa nagpakita it interes ro mga tawo sa mayad nga balita. Pwedeng magbag-o ro andang reaksyon. Tan-awa ro halimbawa ni Santiago, nga igmanghod sa nanay ni Jesus. Nakita na kon paalin nagbahoe si Jesus, nangin Mesias, ag nangin pinakamayad nga manogturo. Pero sa sueod it mga dinag-on, owa nangin disipulo ni Jesus si Santiago. Nangin disipulo eang imaw pagkatapos nga nabanhaw si Jesus, ag nangin mahugod gid imaw nga disipulo.b (Juan 7:5; Gal. 2:9) Importante gid nga indi kita magpundo sa pagbulig sa atong mga igbata nga owa pa nagpakita it interes o sa pag-preaching it uman sa mga owa nagpamati katon dati. Tandai nga nagakabuhi eon kita sa katapusan nga mga inadlaw, ngani importante gid ro atong pagwali nga ueobrahon. Ro atong ginasugid kanda makaron hay posibleng maisip nanda sa ulihi ag magbag-o, maskin pa nag-umpisa eon ro mabahoe nga kasakitan.c

PADAYON NGA MANGIN MAPINASAEAMATON SA MGA PAHANUMDOM NI JEHOVA

16. Paalin ka nakabenepisyo sa mga pahanumdom ni Jehova? (Tan-awa man ro kahon nga “Gamita ro mga Kamatuoran sa Biblia Para Buligan ro Iba.”)

¹⁶ Ro pila sa mga base sa Biblia nga impormasyon nga halin sa atong organisasyon hay gindisenyo para sa mga tawo nga sangkiri eang ro nasayran sa Biblia. Halimbawa, ro atong pangpubliko nga diskurso kada domingo, ro pila nga mga artikulo ag video sa jw.org, ag ro atong pangpubliko nga mga magasin hay gindisenyo para sa mga buko’t Saksi. Pero, makabenepisyo man gihapon kita sa rayang mga pahanumdom. Makabulig ra katon nga mapadaeum ro atong pagpalangga kay Jehova, mapabakud ro atong pagtuo sa anang Bisaea, ag mangin mas epektibo sa pagturo sa iba it panguna nga mga kamatuoran sa Biblia.​—Sal. 19:7.

17. Sa anong mga sitwasyon pwede mong pamaeandungan ro panguna nga mga ginaturo it Biblia?

¹⁷ Sa mga mabuhay eon nga nagaalagad kay Jehova, masadya gid kita kon may bag-o nga pagklaro sa atong pagkaintindi sa kamatuoran sa Biblia. Pero, nagapasaeamat man kita sa panguna nga mga ginaturo it Biblia nga nagbulig katon nga mangin maeapit kay Jehova. Kon ginaisip naton nga mas mayad ro atong opinyon kaysa sa pagsunod it giya halin sa atong organisasyon, mapainubuson naton nga ginadumdom nga si Jehova ro atong maaeam ag makagagahum nga Manogtuga, ro nagagiya sa atong organisasyon. Kon nagatiis kita o ro atong pinalangga it kalisdanan, mapinasensyahon kita ag ginadumdom naton kon ham-an ginapasugtan ni Jehova ro mga pag-antus. Ag kon ginaisip naton kon paalin gamiton ro atong oras ag mga pagkabutang, ginadumdom naton nga nagakabuhi eon kita sa katapusan nga mga inadlaw. Kabay ro mga pahanumdom ni Jehova hay padayon nga magbulig katon nga mangin maaeam ag mangin mainunongon sa pag-alagad kana.