Natun-an Mo Eon Baea ro Sekreto Kon Paalin Mangin Kontento?

1. Ano ro kahueogan it pagkakontento, ag owa ra nagakahueogan it ano?

KONTENTO ka baea kon ano ro may una kimo? Ro kontento nga tawo hay masadya ag may katawhay dahil nagapukos imaw sa mga pagpakamayad nga ginatao kana ni Jehova. Kon may mga bagay nga owa kana, owa imaw naakig o nagaeain ro anang buot. Pero, ro pagkakontento hay owa nagakahueogan it pagiging kampante o pagpabaya-baya. Ngani, mayad gid kon nagatinguha ro sangka Cristyano nga dugangan ro anang maobra sa pag-alagad kay Jehova. (Roma 12:1; 1 Tim. 3:1) Pero kon owa pa nag-abot ro pribilehiyo nga gusto na, masadya gihapon imaw.

2. Ano ro pwedeng matabo kon bukon kita it kontento?

² Kon bukon kita it kontento, pwede kitang makaobra it maeain nga mga bagay. Halimbawa, ro buko’t kontento nga tawo hay pirmeng naga-overtime sa trabaho para eang mabakae ro mga bagay nga bukon na man gid it kinahang-ean. Makasueobo nga ro pilang mga Cristyano hay nagpanakaw it kwarta ag it ibang mga bagay nga gusto nanda. Posibleng gin-isip nanda, ‘Para kakon gid ra,’ ‘Mabuhay ko eon ra nga ginahueat,’ o ‘Ibalik ko man galing ra.’ Pero, ro tanan nga klasi it pagpanakaw hay nagapakahuya ag owa nagapasadya kay Jehova. (Hulu. 30:9) Ro iba hay nadismaya ag nagpundo lang sa pag-alagad kay Jehova dahil owa nanda nabaton ro pribilehiyo nga gusto gid nanda. (Gal. 6:9) Ham-an pwedeng maobra ron it sangka alagad ni Jehova? Dahil posibleng amat-amat imaw nga nangin bukon it kontento.

3. Ano ro makapalig-on nga leksyon nga atong matun-an sa Filipos 4:​11, 12?

³ Tanan kita hay makatuon kon paalin mangin kontento. Nagsueat si apostol Pablo nga “natun-an [na] ro manginkuntento sa bisan ano nga kahimtangan.” (Basaha ro Filipos 4:​11, 12.) Ginsueat na ra habang nakapriso imaw. Maskin raya ro anang nangin sitwasyon, owa naduea ro anang kasadya. Natun-an na ro sekreto kon paalin mangin kontento. Kon nalisdan kita nga mangin kontento, ro mga ginhambae ag eksperyinsya ni Pablo hay makapalig-on katon nga pwede kitang mangin kontento. Indi dapat naton pag-isipon nga basta eang naton mabatyagan ro pagkakontento, kundi dapat naton rang tun-an. Paalin? Pagatalakayon ta sa rayang artikulo kon ano ro makabulig katon para mangin kontento.

MANGIN MAPINASAEAMATON

4. Paalin ro pagiging mapinasaeamaton makabulig katon nga mangin kontento? (1 Tesalonica 5:18)

⁴ Ro mapinasaeamaton nga tawo hay nagapakita it pagkakontento. (Basaha ro 1 Tesalonica 5:18.) Halimbawa, kon mapinasaeamaton kita sa mga bagay nga may una kita, owa kita nagakabaeaka it sobra sa mga bagay nga owa katon. Kon ginaapresyar naton ro mga pribilehiyo nga una katon makaron, makabulig ra katon nga obrahon ro atong bilog nga masarangan sa ruyong pribilehiyo imbes nga pag-inisipon kon paalin mabaton ro pribilehiyo nga gustong-gusto naton. Ngani ginapalig-on kita it Biblia nga ieakip sa atong mga pangamuyo ro mga pagpasaeamat kay Jehova. Makabulig katon ro pagiging mapinasaeamaton nga mabatyagan “ro paghidait it Dyos nga indi matungkad ku paghangop it tawo.”​—Fil. 4:​6, 7.

5. Ham-an dapat nangin mapinasaeamaton kunta ro mga Israelinhon? (Tan-awa man ro piktyur.)

⁵ Sayuron ta kon ano ro natabo sa mga Israelinhon. Abung beses sanda nga nagreklamo kay Jehova dahil nahidlaw sanda sa pagkaon nga ginakaon nanda dati sa Ehipto. (Num. 11:​4-6) Ro matuod, buko’t maeumo ro kabuhi sa disyerto. Ano kunta ro nakabulig kanda nga mangin kontento? Gin-isip kunta nanda ro mga bagay nga haobra eon ni Jehova para kanda ag nangin mapinasaeamaton kara. Kat igto sanda sa Ehipto, mapintas sanda nga gintratar bilang mga sueoguon, pero nagpadaea si Jehova it napueo nga kaeaeat-an para euwason sanda. Kat ginpasugtan eon sanda nga maghalin sa Ehipto, “ginpamuoe nanda ro mga pagkabutang it mga Ehiptohanon” pareho it pilak, bueawan, ag mga eambong. (Ex. 12:​35, 36) Kat gin-eagas sanda it mga soldado ni Paraon ag owa eon sanda it maagtunan, milagruso nga gintunga ni Jehova ro tubi sa Puea nga Dagat. Ag habang una sanda sa disyerto, adlaw-adlaw sanda nga ginpakaon ni Jehova it manna. Pero ham-an nagreklamo gihapon sanda? Nangin bukon it kontento ro mga Israelinhon, buko’t dahil kueang ro andang pagkaon, kundi dahil nangin bukon sanda it mapinasaeamaton sa mga gintao kanda ni Jehova.

6. Ano ro makabulig katon nga mangin mapinasaeamaton?

⁶ Ano ro makabulig kimo nga mangin mapinasaeamaton? Una, magtao it oras kada adlaw para isipon ro mayad nga mga bagay nga nagpasadya kimo. Pwede mong isueat ro daywa o tatlong mga bagay nga ginapasaeamatan mo gid. (Pan. 3:​22, 23) Pangaywa, pasaeamati ro iba sa andang gin-obra para kimo, ag eabaw sa tanan, pasaeamati kada adlaw si Jehova. (Sal. 75:1) Pangatlo, magpili it mga amigo nga mapinasaeamaton. Kon ro atong mga amigo hay bukon it mapinasaeamaton o paeareklamo, mangin makaruyon man kita. Pero kon ro atong mga amigo hay mapinasaeamaton, mangin mapinasaeamaton man kita. (Deut. 1:​26-28; 2 Tim. 3:​1, 2, 5) Kon mapinasaeamaton kita, makabulig ra nga mangin kontento kita sa mga bagay nga una katon.

7. Ano ro nakabulig kay Aci nga mangin mapinasaeamaton, ag ano ro resulta kara?

⁷ Tan-awon ta ro eksperyinsya ni Aci, nga nagaestar sa Indonesia. Ginhambae na: “Ku panahon it COVID-19 nga pandemic, ginkumpara ko ang sitwasyon sa mga igmanghod. Ngani, nangin bukon ako it kontento.” (Gal. 6:4) Ano ro nakabulig kana nga bag-uhon ro anang kaisipan? Naghambae pa imaw: “Gin-isip ko ro mayad nga mga bagay nga ginatao kakon ni Jehova kada adlaw ag gindumdom ko man ro abung mga pagpakamayad nga akong nabaton dahil parte ako it organisasyon ni Jehova. Rayon, ginapasaeamatan ko si Jehova sa rayang mga bagay. Bilang resulta, nakabulig ra kakon nga mangin kontento.” Kon nabatyagan mo nga bukon ka eon it masadya dahil sa ing sitwasyon, pwede mong tuearon ro gin-obra ni Aci para mangin mapinasaeamaton ka it uman.

MANGIN MAPAINUBUSON

8. Ano ro natabo kay Baruc?

⁸ Si Baruc hay sekretaryo ni propeta Jeremias. Ag may panahon nga nangin bukon imaw it kontento sa anang kabuhi. May malisud imaw nga asayment. Kinahang-ean na nga buligan si Jeremias sa pagsugid sa mga buko’t mapinasaeamaton nga Israelinhon kon ano ro matabo kanda dahil owa nanda gintuman si Jehova. Pero imbes nga magpukos sa ginapaobra kana ni Jehova, nag-umpisa imaw nga mag-isip sa kon ano ro gusto nang obrahon. Paagi kay Jeremias, ginhambaean ni Jehova si Baruc: “Nagausoy ka it mabahoe nga mga bagay para sa ing sarili. Punduha eon ro pag-usoy sa ruyong mga bagay.” (Jer. 45:​3-5) Matsa ginahambae ni Jehova kay Baruc nga: “Mangin kontento ka sa ing sitwasyon makaron.” Ginbaton na ro pagtadlong ag padayon na nga nangin amigo si Jehova.

9. Ano ro matun-an naton sa 1 Corinto 4:​6, 7? (Tan-awa man ro piktyur.)

⁹ Kon amat, posibleng mag-isip ro sangka Cristyano nga nagakadapat imaw sa sangka pribilehiyo. Posibleng dahil sa anang abilidad, kahugod, o eksperyinsya—o basi una ra kana tanan. Pero, iba ro nakabaton it pribilehiyo nga gusto gid nana. Ano ro makabulig kana nga indi maakig? Pwede nang dumdomon ro ginsueat ni apostol Pablo sa 1 Corinto 4:​6, 7. (Basaha.) Tanan nga pribilehiyo ag talento nga atong nabaton hay halin kay Jehova. Gintao na ra katon buko’t dahil mas espesyal kita kaysa sa iba, kundi gintao na ra dahil sa anang owa it tupong nga kabuot.​—Roma 12:​3, 6; Efe. 2:​8, 9.

10. Paalin kita nga mangin mapainubuson?

¹⁰ Mangin mapainubuson kita kon isipon naton it mayad ro halimbawa nga ginpakita ni Jesus para katon. Tan-awon ta kon ano ro natabo ku gabii nga ginhugasan ni Jesus ro mga siki it anang mga apostoles. Nagsueat si apostol Juan nga: “Si Jesus [1] nakasayod nga gintao kana ku Ama ro bug-os nga gahum; [2] nakasayod man imaw nga naghalin imaw sa Dyos ag [3] magabalik imaw sa Dyos,” pero nagpadayon imaw ag “nag-umpisa sa paghugas ku mga siki it anang mga disipulo.” (Juan 13:​3-5) Pwede kuntang isipon ni Jesus nga dapat hugasan it anang mga apostoles ro anang mga siki. Pero sa bilog na nga kabuhi iya sa eugta, owa na gid gin-isip nga nagakadapat imaw sa mas abu nga pagpakamayad ag komportable nga kabuhi. (Luc. 9:58) Mapainubuson gid si Jesus ag kontento. Nagtao imaw it perpekto nga halimbawa para katon.​—Juan 13:15.

11. Paalin ro pagkamapainubuson nakabulig kay Dennis nga mangin kontento?

¹¹ Si Dennis, nga taga-Netherlands hay nagtinguha nga tuearon ro halimbawa ni Jesus sa pagkamapainubuson, pero nangin bukon ra it maeumo. Naghambae imaw: “Kon may ibang nakabaton it pribilehiyo nga gusto ko, nagabatyag ako kon amat it kaugot dahil sa ang isip, dapat ako ro nakabaton kato. Kon mabatyagan ko ra, ginatun-an ko rayon ro parti sa pagkamapainubuson. Sa JW Library^® app, may tag ako sa espisipiko nga mga teksto parti sa pagkamapainubuson agud madali ko ra makita ag mabasa it uman. Naga-download man ako sa ang cellphone it pila nga mga diskurso parti sa pagkamapainubuson, ag pirme ko rang ginapamatian.a Natun-an ko nga ro tanan natong ginaobra hay para sa kadayawan ni Jehova, bukon it para sa atong sarili. Ro kada isaea katon hay gintaw-an ni Jehova it papel para matuman na ro anang kabubut-on.” Kon nabatyagan mo nga bukon ka eon it masadya dahil owa mo nabaton ro pribilehiyo nga gusto mo, tinguhai nga mangin mapainubuson. Mapabakud kara ing relasyon kay Jehova ag makabulig ra kimo nga mangin kontento.​—Sant. 4:​6, 8.

PAMAEANDUNGI RO MGA PROMISA NI JEHOVA

12. Ano ro pag-eaum sa paeaabuton nga makabulig katon nga mangin kontento? (Isaias 65:​21-25)

¹² Mangin mas kontento kita kon pamaeandungan naton ro manami nga paeaabuton nga ginpromisa katon ni Jehova. Sa libro it Isaias, ginasugid katon ni Jehova nga naintindihan na nga maabu ro atong mga kalisdanan. Pero nagapromisa man imaw katon nga dueaon na ro tanan nga problema. (Basaha ro Isaias 65:​21-25.) Magakabuhi kita nga may seguridad ag magaestar sa manami nga baeay. May makaaeayaw eon kita nga trabaho, ag magakaon kita it masustansya ag manami nga mga pagkaon. Indi eon man kita mabaeaka nga may maeain nga matabo katon o sa atong mga unga. (Isa. 32:​17, 18; Eze. 34:25) Makasigurado kita nga raya tanan nga mga promisa ni Jehova hay matuman gid.

13. Ano ro atong mga kalisdanan makaron, ag paalin ro pagpamaeandong sa atong pag-eaum sa paeaabuton makabulig katon?

¹³ Ham-an importante gid nga pamaeandungan naton ro atong pag-eaum sa paeaabuton? Dahil nagakabuhi kita “sa katapusan nga mga inadlaw” ag tanan kita hay may mga problema nga “malisud atubangon.” (2 Tim. 3:​1, NWT) Pero, ginabuligan kita ni Jehova nga makatiis adlaw-adlaw paagi sa pagtao katon it giya, kusog, ag bulig nga kinahang-ean naton. (Sal. 145:14) Dugang pa, ro atong pag-eaum hay makabulig katon nga maatubang ro atong mga kalisdanan. Basi nalisdan ka nga itao ro materyal nga kinahang-eanon it imong pamilya. Nagakahueogan baea ra nga pirme ka lang magakalisud? Bukon man gid. Nagpromisa si Jehova nga itao na ro imong mga kinahang-eanon ag mas abu pa karon ro anang itao kimo sa Paraiso. (Sal. 9:18; 72:​12-14) Basi may malala ka nga masakit, depresyon, o nagaantus dahil sa epekto it paggueang. Pero makaraya lang gid baea ing kabuhi nga owa eon it pag-eaum nga magmayad? Bukon gid! Owa eon it masakit o kamatayon sa bag-ong kalibutan it Dyos. (Pah. 21:​3, 4) Rayang pag-eaum hay makabulig katon nga indi maakig o maugot sa atong sitwasyon makaron. Mangin masadya ag may katawhay gihapon kita maskin pa buko’t mayad ro pagtratar katon it iba, namatayan kita it pinalangga, o makaagi kita it iba pang mga kalisdanan. Ham-an? Dahil ano man nga kalisdanan ro atong ginaatubang makaron, sayod naton nga raya hay “umaeagi nga kabudlayan” eang ag sa indi magbuhay, indi eon gid kita mag-antus sa bag-ong kalibutan.​—2 Cor. 4:​17, 18.

14. Paalin naton mapabakud ro atong pag-eaum?

¹⁴ Importante gid ro atong pag-eaum para mangin kontento kita, ngani paalin naton ra mapabakud? Pareho it sangka tawo nga kinahang-ean magsuksok it antipara para makita it mayad ro mga bagay sa maeayo, kinahang-ean man natong mag-obra it mga paagi agud mapabakud ro atong pag-eaum para makita naton it mayad ro atong manami nga paeaabuton sa Paraiso. Kon nagakabaeaka kita sa pinansyal, pwede natong imadyinon ro atong mangin kabuhi nga owa eon it problema sa kwarta, utang, ag kapobrehon. Kon nadismaya kita dahil owa naton nabaton ro pribilehiyo nga gustong-gusto naton, pwede natong isipon nga bukon man it importante rayang mga bagay kon ikumpara sa manami nga kabuhi nga perpekto eon kita ag nagaalagad kay Jehova sa owa’t katapusan. (1 Tim. 6:19) Abung mga bagay makaron ro atong ginakabaeak-an, ngani basi nalisdan kita nga pamaeandungan ro mga promisa sa paeaabuton. Pero habang mas ginapamaeandungan naton ro manami nga paeaabuton nga ginpromisa ni Jehova katon, mangin mas maeumo katon nga magpukos kara kaysa sa atong mga problema.

15. Ano ing matun-an sa eksperyinsya ni Christa?

¹⁵ Tan-awa kon paalin ro pag-eaum nakabulig kay Christa, nga asawa ni Dennis nga ginsambit kaina. Naghambae imaw: “May masakit ako nga nagpaeuya sa ang eawas. Indi ako makatikang ngani kinahang-ean kong maggamit it wheelchair, ag haeos pirme lang gid ako nga nakaeubog. Masakit pirme ang eawas. Ginhambae kang it ang doktor nga indi eon gid ako magmayad. Pero naisip ko eagi, ‘Buko’t pareho ro among pagtan-aw sa paeaabuton.’ Nagpukos ako sa ang pag-eaum, ngani nagtao ra kakon it katawhay sa isip. Makaron, kinahang-ean ko nga magtiis habang nagakabuhi sa rayang kalibutan, pero mangin masadya gid ang kabuhi sa bag-ong kalibutan!”

“RO MGA NAGAKAHADLOK KANA HAY INDI PAGKUEANGON”

16. Ham-an nahambae ni Haring David nga ro mga nagakahadlok kay Jehova hay “indi pagkueangon”?

¹⁶ Maskin pa kontento eon kita, makaatubang gihapon kita it mga problema. Isipa ro natabo kay Haring David. Mga tatlo sa anang mga unga ro namatay. Ginpabangdan imaw, gintraidor, ag nagpinanago sa mga gustong magpatay kana sa sueod it mga dinag-on. Pero habang ginatiis na rayang mga kalisdanan, nakahambae imaw parti kay Jehova: “Ro mga nagakahadlok kana hay indi pagkueangon.” (Sal. 34:​9, 10) Ham-an nahambae ra ni David? Dahil sayod na nga maskin ginpasugtan ni Jehova nga matabo rayang mga bagay, sigurado imaw nga itao pirme ni Jehova kon ano ro anang mga kinahang-eanon. (Sal. 145:16) Ag pareho kay David, makasigurado man kita nga buligan kita ni Jehova nga matiis ro atong mga problema. May katawhay kita ag kasadya maskin alin man ro atong sitwasyon.

17. Ham-an gusto mo nga mangin kontento?

¹⁷ Gusto ni Jehova nga mangin kontento ka. (Sal. 131:​1, 2) Ngani obraha ro tanan para mangin kontento. Kon tinguhaan mo nga mangin mapinasaeamaton, mangin mapainubuson, ag kon pabakuron mo ing pag-eaum, mahambae mo nga: “Huo, kontento gid ako.”​—Sal. 16:​5, 6.